Paimano ed leksab

a Inaon nen Pablo so patalos a Septuagint ed Habacuc 2:4, a lalaktipen toy balikas a “no siopaman so onsener, agmanliket so kamarerwak ed sikato.” Sayan balikas so agpinmatnag ed dinanman a walan Hebreon manuskrito ed kaplesan. Insuheri na arum a say Septuagint et nibase ed akadkaunan Hebreo iran manuskrito ya anggapo lan balot. Antokaman so agawa, satan so inlaktip dia nen Pablo diad tulong na masanton espiritu na Dios. Walaan itan sirin na panangabobon na Dios.