Jeremias

41 Diad komapiton bulan, si Ismael+ ya anak nen Netanias ya anak nen Elisama, a nanlapu ed poli na ari* tan sakey ed saray opisyal na ari, tan kaiba toy samplora nin lalaki, et linma rad si Gedalias ya anak nen Ahikam diad Mizpa.+ Legan iran mandurungo diad Mizpa, 2 inmalagey si Ismael ya anak nen Netanias tan saray samploran lalaki a kaiba to tan pinatey dad espada si Gedalias ya anak nen Ahikam ya anak nen Safan. Pinatey to imay tinuro na ari na Babilonia a manuley ed saman a dalin. 3 Pinatey met nen Ismael so amin a Judion kaiba nen Gedalias diad Mizpa, pati saray sundalon Caldeo a wadman.

4 Diad komaduan agew kayarin inatey si Gedalias, sanen anggapo ni makaamta, 5 wala ray sinmabin 80 lalaki a nanlapud Siquem,+ Silo,+ tan Samaria.+ Akiskisan iray balbas da, apilat iray kawes da, sinugatan day inkasikara,+ tan wala ray awit dan apay a kakanen tan olibano+ ya iyakar dad abung nen Jehova. 6 Kanian pinmaway ed Mizpa si Ismael ya anak nen Netanias pian abeten to ra, tan sikatoy onaakis legan a manaakar. Sanen nabet to la ra, inkuan tod sikara: “Onla tayo ed si Gedalias ya anak nen Ahikam.” 7 Balet sanen akasabi la rad syudad, pinapatey ira nen Ismael ya anak nen Netanias tan saray totoo to, tan imbabantak da rad bobon.

8 Balet walay samploran lalaki a kaiba na saraya ya angibagad si Ismael: “Agmo kami papateyen, ta wala ray inyamot min trigo, sebada, larak, tan dilo diad uma.” Kanian agto ra pinatey a kaiba na saray agagi ra. 9 Diad sakey a baleg a bobon so angibantakan nen Ismael ed amin a bangkay na lalakin pinapatey to, a satan imay ginawa nen Arin Asa lapud si Arin Baasa na Israel.+ Sayan bobon so anginan nen Ismael ya anak nen Netanias ed saray bangkay na pinapatey to.

10 Inerel nen Ismael so arum nin totoo diad Mizpa,+ pati saray bibiin anak na ari tan amin a totoon atilak ed Mizpa, ya inmatalek nen Nebuzaradan a pangulo na saray guardia ed si Gedalias+ ya anak nen Ahikam. Sikaray inerel nen Ismael ya anak nen Netanias, tan sikatoy linmad saray Ammonita.+

11 Sanen naamtaan nen Johanan+ ya anak nen Karea tan say amin a pangulo na armadan kaiba to so amin a mauges a ginawa nen Ismael ya anak nen Netanias, 12 tinipon dan amin so lalaki tan linma ran milaban ed si Ismael ya anak nen Netanias, tan sikatoy nalmo dad abay na baleg a danum* a walad Gibeon.

13 Aliketan so amin a totoon walad si Ismael sanen anengneng day Johanan ya anak nen Karea tan say amin a pangulo na armada a kaiba to. 14 Insan pinmuliktar so amin a totoon inerel nen Ismael ed Mizpa+ tan pinmawil ira a kaibay Johanan ya anak nen Karea. 15 Balet atakasan nen Ismael ya anak nen Netanias tan waloran totoo to si Johanan, tan linma rad saray Ammonita.

16 Inala nen Johanan ya anak nen Karea tan say amin a pangulo na armada a kaiba to so arum nin totoo ed Mizpa, saramay inliktar dad si Ismael ya anak nen Netanias, kayari ton pinatey si Gedalias+ ya anak nen Ahikam. Manlapud Gibeon et impawil da ray lalaki, saray sundalo, bibii, ugugaw, tan saray opisyal ed palasyo. 17 Kanian binmuat ira tan nanayam iran agano diad pundoan a ginawa nen Kimham a walad abay na Betlehem,+ a say gagala ra et onlad Ehipto+ 18 lapud saray Caldeo. Ta natatakot la rad sikara, lapud pinatey nen Ismael ya anak nen Netanias si Gedalias ya anak nen Ahikam, say tinuro na ari na Babilonia a manuley ed sayan dalin.+