Jeremias
47 Saya so mensahe nen Jehova ed si propeta Jeremias nipaakar ed saray Filisteo,+ antis a sakopen na Faraon so Gaza. 2 Oniay inkuan nen Jehova:
“Onsasabi so danum manlapud amianen.
Magmaliw itan a delap a mapmaples ya onaagus.
Tan delapen to so dalin tan amin a wadtan,
Say syudad tan saramay manaayam ditan.
Onakis iray lalaki,
Tan onugaog so amin a manaayam ed sayan dalin.
3 Diad tanol na manbagtik iran kalakian a kabayo to,
Diad ungol na saray karwahe ton pan-guerra
Tan ungol na saray dalig to,
Agla pawilen na saray kaamaan so ananak da,
Ta kinmapuy iray lima ra,
4 Lapud say onsabin agew so maneral ed amin a Filisteo;+
5 Nayangyangan* so Gaza.
Aderal lay Askelon.+
6 O espada nen Jehova!+
Panoy kabayag na agmo pandeen?
Pawil ka ed kaluban mo.
Manpainawa ka tan mandeen ka.
7 Panon itan ya ondeen
Anta ingganggan itan nen Jehova?
Sumpad Askelon tan sumpad gilig na dayat,+
Ditan so angibakian tod satan.”