totoo et ukomen sirin base ed gawaen da legan na Agew na Panangukom.

Legay Agew na Panangukom, pankanawnawa na binilyon a totoo ya aralen so panlabayan na Dios tan gawaen itan. Labay ton ibaga et dakel so kaukolan ya ibangat. On, “naaralan na saray manaayam ed sayan dalin so inkatunong.” (Isaias 26:9) Balet, wala ray agda labay ya gawaen so panlabayan na Dios. Imbaga na Isaias 26:10: “Anggano nakasian so mauges, agto met lanlamang naaralan so inkatunong. Anggan diad dalin na kaptekan et sikatoy manggaway mauges, tan agto nanengneng so katagyan nen Jehova.” Saratan ya mauges et pateyen legan na Agew na Panangukom tan anggapo lay ilalo ra.​—Isaias 65:20.

Diad sampot na Agew na Panangukom, saray makaliktar et sigpot lan ‘manbilay’ bilang perpekton totoo. (Apocalipsis 20:5) Kanian diad Agew na Panangukom, nipawil la so perpekton bilay ya labay na Dios parad totoo. (1 Corinto 15:24-28) Insan nagawa so sampot ya subok. Ibulos si Satanas ed akaprisoan to tan naabuloyan ya palikdoen so totoo diad sampot lan pankanawnawa. (Apocalipsis 20:3, 7-10) Saramay ag-ondapag ed sikato et makaeksperiensya ed sayan impromisa na Biblia: “Saray matunong et tawiren day dalin, tan manbilay ira ditan diad andi-anggaan.” (Salmo 37:29) On, say Agew na Panangukom et sakey a bendisyon ed amin a matoor ya totoo!

MANGA apataplon taon antis na 1914, impaamta la na saray estudyante na Biblia ya wala ray nikadkaduman nagawa ed satan a taon. Anto iratan, tan anto ray prueba ya say 1914 et importantin taon?

Nabasad Lucas 21:24 iyan imbaga nen Jesus: “Say Jerusalem et igatin-gatin na saray nasyon, anggad nasumpal iray aturon panaon na saray nasyon [“saray agew na saray Gentiles,” Say Biblia].” Say Jerusalem so capital city na bansa na saray Judio​—ditan so nanuleyan na nantutumbokan ya ararin nanlapud pamilya nen Arin David. (Salmo 48:1, 2) Balet, duma irayan arari ed saray lider na arum a bansa ta nanuley ira ed “trono nen Jehova” bilang representanti to. (1 Awaran 29:23) Kanian, say Jerusalem et simbolo na pananguley nen Jehova a Dios.

Balet, panon tan kapigan ‘inggatin-gatin na saray nasyon’ so pananguley na Dios? Agawa itan nen 607 B.C.E. nen sinakop na saray taga-Babilonia so Jerusalem. Kayari na satan et anggapo lay nanuley ed “trono nen Jehova,” tan abayag ya anggapoy nanari ya nanlapud poli nen David. (2 Arari 25:1-26) Kasin agla manampot iyan ‘pangigatin-gatin’? Andi, ta oniay impasakbay nen Ezequiel nipaakar ed samay sampot ya ari na Jerusalem, si Zedekias: “Ekal mod ulom so turbante, tan ekal moy korona. . . . Ag-itan niiter ed siopaman anggad onsabi imay makankanepegan, tan iter ko itan ed sikato.” (Ezequiel 21:26, 27) Samay “makankanepegan” odino walaay legal a kanepegan ed korona nen David et si Kristo Jesus. (Lucas 1:32, 33) Kanian manampot so ‘pangigatin-gatin’ no magmaliw lan Ari si Jesus.

Kapigan itan nagawa? Impaimano nen Jesus ya saray nasyon na saray Gentil et manuley ed espisipikon karukey na panaon. Diad Daniel kapitulo 4 et naamtaan tayo no panon kabayag itan ya panaon. Nabasa ditan so kugkugip nen Arin Nabucodonosor na Babilonia tan walay isisimbolo na satan ya nagawad arapen. Diad kugip to, anengneng toy atagtagey a kiew ya abatang. Say sengeg na satan et ag-onsimit ta abariberan na balatyang tan gansa. Maksil ya imbaga na sakey ya anghel: “Paulyan yon onlabas so pitoran panaon.”​—Daniel 4:10-16.

Diad Biblia, no maminsan et uusaren iray kiew pian irepresenta so pananguley. (Ezequiel 17:22-24; 31:2-5) Kanian say labay ya ibaga na pambatang ed simbolikon kiew et walay panaon ya ontunday pananguley na Dios, ya irerepresenta na saray arari ed Jerusalem. Balet, impaamtad samay kugip ya say ‘pangigatin-gatin ed Jerusalem’ et temporaryo labat, dia labat ed loob na “pitoran panaon.” Panon kabayag itan?

Ipapaamta na Apocalipsis 12:6, 14 a say talora tan kapalduan panaon et “1,260 ya agew.” Say “pitoran panaon” sirin et mamiduay karukey to (1,260 x 2), odino 2,520 ya agew. Balet, say ‘impangigatin-gatin’ na saray nasyon na saray Gentil ed pananguley na Dios et aglabat agawa diad loob na 2,520 ya agew kayarin aderal so Jerusalem. Malinew sirin ya mas andukey ya panaon so natutukoy. Base ed Numeros 14:34 tan Ezequiel 4:6, ‘say sakey agew et parad sakey a taon,’ kanian say “pitoran panaon” et 2,520 ya taon.

Say 2,520 a taon et ginmapo nen Oktubre 607 B.C.E., nen sinakop na saray taga-Babilonia so Jerusalem tan inekal dad trono so ari ya nanlapud pamilya nen David. Anampot itan ya panaon nen Oktubre 1914. Diad satan, say “aturon panaon na saray nasyon” et anampot, tan ginawa na Dios si Jesu-Kristo ya Ari ed tawen.a​—Salmo 2:1-6; Daniel 7:13, 14.

Impasakbay la nen Jesus ya say ‘kiwawala’ to bilang Ari ed tawen et nabidbir ed saray nikadkaduma ya nagawad mundo, singa saray guerra, eras, yegyeg, tan epidemya. (Mateo 24:3-8; Lucas 21:11) Mabiskeg iratan a prueba ya nen 1914 et ginmapon nanuley so Panarian na Dios diad tawen tan ginmapo met lay “kaunoran iran agew” na sayan mauges a mundo nen Satanas.​—2 Timoteo 3:1-5.

PIGARAN beses labat ya abitlad Biblia so nipaakar ed anghel ya say ngaran to et Miguel. Balet, naimano ya kada no nabibitla, walay importantin gagawaen to. Singa bilang, diad libron Daniel, si Miguel et migi-guerra ed saray mauges ya anghel; diad sulat nen Judas et sikatoy akisuppiatan odino akikatunongan ed si Satanas; tan diad Apocalipsis et sikatoy migi-guerra ed Diablo tan saray demonyo to. Lapud indepensa nen Miguel so pananguley nen Jehova tan akilaban ed saray kakabusol na Dios, dugarugad sikato so labay ya ibaga na ngaran to​—“Siopay Mipara ed Dios?”

Siopa si Miguel? No maminsan, wala ray pigapigara so ngaran da. Singa bilang, say ulo na pamilya ya si Jacob et kabkabat met ed ngaran ya Israel, tan si apostol Pedro et tinawag ya Simon. (Genesis 49:1, 2; Mateo 10:2) Mipadpara, ipapanengneng na Biblia ya say Miguel et sananey ya ngaran nen Jesu-Kristo, antis tan kayari na impanbilay to diad dalin. Aralen tayo ray rason ya walad Biblia no akin ya ontan so nibaga tayo.

Arkanghel. Ibabaga na Salitay Dios ya si Miguel et “arkanghel.” (Judas 9) Say labay ya ibaga na satan ya salita et “pangulo na saray anghel.” Diad Biblia, say salitan arkanghel et singular, aliwan plural. Diad satan et nanengneng tayo ya saksakey labat so ontan ya anghel. Sakey ni, nanengneng tayod Biblia ya say posisyon nen Jesus et arkanghel. Nen pinaoli so Katawan a Jesu-Kristo, imbaga na 1 Tesalonica 4:16: “Say Katawan a mismo et onleksab manlapud tawen tan mangiganggan, a walaay