SANO napabtangan a manpaliwawa, dakel so mansasagpot a mangisulat ed amin a bengatla, manlapud introduksion anggad konklusyon. Sakbay a nasumpal so paliwawa, nayarin dakel lay imparaan ya insulat. Nayarin pigaran oras so kaukolanen na saya.

Kasin ontan so panagparaan mo ed saray paliwawam? Labay mo ta ya aralen so mas mainomay a paraan? No naaralan mo no panon so pangiparaan na outline, agmo la kaukolan ya isulat so amin a bengatla. Saya so mangiter ed sika na malaem a panaon ed pampasal mon mangiparungtal ed paliwawa. Saray presentasyon mo so aliwa lambengat a mainomay ya ipresenta noagta nagkalalon makapainteres a dengelen tan nagkalalon makapakiwas ed dumerengel mo.

Siempre, para ed saray publikon paliwawa a nipaparungtal ed kongregasyon, walay outline a nitarya. Balet, aliwan ontan so kipapasen ed kaslakan nin arum a paliwawa. Nayarin sika so napabtangan lambengat na suheto odino tema. Odino nayarin nakerew ed sika a kobrian so espesipikon niimprintan materyal. No maminsan et nayarin basta naikdan ka na pigaran instruksion. Diad amin na ontan iran asainmin, kaukolan mon iparaan so dilin outline mo.

Say pangaligan ed pahina 41 so mangiter ed sika na ideya no panon a nayarin alasiren so antikey ya outline. Imanoen a kada manunan punto so onggapo ed nikawigin dasig tan nisulat ed angkabaleg iran letra. Diad leksab na kada manunan punto, nilista iray punto a manuporta ed satan. Saray kaaruman a punton nausar diad pamalaknab ed saratan ya ideya so nilista ed leksab da tan nidere na daiset manlapud kawigin dasig. Usisaen a maong iyan outline. Imanoen a saray duaran manunan punto so direktan nisiglaot ed tema. Imanoen met a saray segundaryon punto so aliwan basta makapainteres iran punto. Noag ingen, kada sakey so manuporta ed manunan punto a walad tagey na saratan.

Sano mangiparaan ka na outline, nayarin ag-eksakton kapara na samay pangaligan. Balet no natebek moray prinsipyon nasasaglawi, saraya so ontulong ed sikan mangorganisa ed materyal mo tan makapanparaan na maabig a paliwawa ed kabkaabigan a karakel na panaon. Panon so panggawam?

Analisaen, Pilien, tan Organisaen

Nakaukolan mo so sakey a tema. Say temam so aliwan basta inkalapagan a suheto a singa samay nayarin irepresenta na sakey a salita. Satan so manunan ideya a labay mon ipasabi, tan ipatnag na satan so punto a nononoten mon singbaten ed suhetom. No nipabtang so sakey a tema, analisaen a maong so kada manunan salita. No tibukelen mo so nipabtang a tema a nibase ed nipalapag a materyal, aralen itan a materyal a walad kanonotan so tema. No sika so apabtangan lambengat na sakey a suheto, sirin makauley kan manpili na tema. Balet, sakbay a gawaen so ontan, nayarin naromog mon makatulong so pansukimat. Diad pansiansian lukas so kanonotan mo, mabetbet a makala ka na kaaruman iran ideya.

Legan mon gagawaen irayan kundang, itultuloy mon tepetan so inkasika: ‘Akin a sayan materyal so importante ed saray dumerengel ko? Anto so gagalak?’ Nepeg ya aliwan say basta pangobre ed materyal odino makapasagyat a pampaliwawa noagta pian makagawa na bengatlan makagunggona ed saray dumerengel mo. Sano niletneg la so gagalam, isulat mo itan. Itultuloy mon nodnonoten itan no manpaparaan ka.

Kayarim ya adetermina so gagalam tan akapili ka la na sakey a teman matukoy ed satan (odino naanalisa no panon ya ontukoy so nipabtang a temam ed satan), makapansukimat ka na lalon matukoy ed satan. Anapen so materyal a walaan na partikular a kablian ed saray dumerengel mo. Agka mankokontento ed saray inkalapagan a bengatla, noagta sukimaten iray espesipikon punto a makaibangat tan talagan makatulong. Magmaliw a realistiko ed karakel na sukimaten mo. Diad kaslakan a kipapasen et nawalaan ka la na amayamay a materyal nen say nayarian mon usaren, kanian kaukolan a manpili ka.

Ibiig moray manunan punto a kaukolan mon isingbat ta pian natibukel mo so temam tan narapat mo so gagalam. Saraya so magmaliw a basiyan mo, say manunan outline mo. Kaunongan karakel so manunan punto a nepeg a wadtan? Nayarin magenap la so duara a para ed antikey a diskusyon, tan gendat et magenap la so limara para ed anggan sakey oras a paliwawa. Kapiganman a daiset iray manunan punto, mas mainomay iratan a natandaan na saray dumerengel mo.

Bektan wala la’d kanonotan mo so temam tan manuna iran punto, organisam la so asukimat mon materyal. Desidien no anto so direktan misiglaotan ed saray manunan puntom. Pilien iray detalyen manggawan balo ed presentasyon mo. No pilien moray teksto a manuporta ed saray manunan punto, isulat iray ideyan ontulong ed sikan manrason ed saratan a teksto diad makabaliksan a paraan. Ipasen so kada punto ed leksab na manunan punto a kinepegan na satan. No arum ed impormasyon so ag-ontukoy ed dinanman ed saray manunan puntom, ekal mo​—anggaman satan so makapainteres—​odino isinop itan pian nausar ed arum a pankanawnawa. Pansiansiaen lambengat so sankaabigan a materyal. No salien mon kobrian so dakel, nakaukolan mo so mansalitan maples tan agmo nibinsabinsa a maong. Mas maabig so pangipasabi na pigaran punton walaan na peteg a kablian ed saray dumerengel mo tan gawaen itan a maong. Ag-onlalampas ed nigeter ya oras.

No diad sayan punto et agmo ni agawaan nensaman, uksoy mo unong ed lohiko so materyal mo. Onia so ginawa nen Lucas a managsulat na Ebanghelyo. Sanen atipon to so daakan iran katuaan a misiglaotan ed suheto to, indatak to iratan a “mauk-uksoy.” (Luc. 1:3) Nayarian mon iyuksoy so materyal mo unong ed kronolohiya odino ed kada topiko, nayarin unong ed sengegan tan epekto odino problema tan solusyon, depende ed no anto so sankaepektiboan a pakadampot ed gagalam. Nepeg ya anggapo so biglan panguman manlapud sakey ya ideya ed sananey. Kaukolan a mainomay a nitonton iray dumerengel manlapud sakey ya ideya insan diad sananey, ya anggaporay baet a mairap a napankonektaan. Say ebidensyan impresenta so nepeg a mangipaarap ed dumerengel diad lohikon konklusyon. Legan ya uuksoyen moray puntom, isipen no panon ya onepekto so presentasyon mo ed dumerengel mo. Kasin mainomay dan tumboken so panagkatunongan mo? Kasin napakiwas ira ed narerengel da, a mitunosan ed gagalan wala ed kanonotan mo?

Ontumbok, mangiparaan ka na introduksion a managyat na interes ed suhetom tan mangipanengneng ed saray dumerengel mo a say singbaten mo so walaan na peteg a kablian ed sikara. Nayarin makatulong so pangisulat ed saray unonan pigaran estansam. Kaunoran, iplano so makapakiwas a konklusyon a matukoy ed gagalam.

No iparaan moy outline mo a masakbay, nawalaan ka na panaon a mamarakep ed satan sakbay ya ipaliwawam. Nayarin namoriam so pankaukolan na panuporta ed pigaran ideya diad pigaran estatistika, sakey ya ilustrasyon, odino sakey ya eksperiensya. Say pangusar ed kaplesan a nagagawa odino balitan makapainteres ed lokal so makatulong ed dumerengel mon makatebek a tampol ed pitukoyan na materyal. Legan mon rerepasoen so paliwawam, nayarin naimanom iray dakel a pankanawnawa pian nitukoy so impormasyon ed dumerengel mo. Makana so paraan na pan-analisa tan pamarakep diad pangiyuksoy ed maabig a materyal ed sakey ya epektibon paliwawa.

Arum iran managpaliwawa so nayarin mankaukolan na lalon malaknab iran nota nen saray arum. Balet no organisaen moy materyal mo ed leksab labat na pigaran manunan punto, ekalen iraman so agtalagan manuporta ed saraya, tan uksoy moray ideyam unong ed lohiko, naimanom a diad daiset ya eksperiensya, agmo la kaukolan ya isulat so amin a bengatla. Agla mangalay dakel a panaon itan! Tan say kalidad na saray paliwawam so onaligwas. Mapatnag a tuan nagugunggonaan ka manlapud edukasyon na Teokratikon Eskuelaan Parad Ministeryo.

DIAD kada asainmin ed eskuelaan et walay pankanawnawan onaligwas. Manseet ka, pian say ibubulaslas mo so kalkanan ompatnag namparan diad sika tan diad arum. (1 Tim. 4:15) Tulongan ka na eskuelaan pian lalon sigpot mon nabayuboan iray abilidad mo.

Kasin mannerbiyos ka no asingger ka lan manpaliwawa ed imaton na kongregasyon? Saya so normal, anggano medyo abayag ka lan nampalista ed eskuelaan. Anggaman ontan, pigaran bengatla so makatulong a mamakepa na pagam. Diad abung, iyugalim a mabetbet so pambasan maksil. Diad saray miting ed kongregasyon, mankomenton naynay, tan no sakey ka lan manangipalapag, mibiang kan maparanay ed panagpulong. Saya so mangiter ed sika na eksperiensya diad pansalita ed arap na arum. Niarum ni, iparaan mon mas masakbay iray asainmin mo bilang estudyante, tan ipasal mo iratan ya ipaliwawan maksil. Tandaan a sika so manpaliwawa ed imaton na makaaro iran dumerengel. Tan sakbay kan manpaliwawa, manpikasi ed si Jehova. Sikato so maliket a mangiter na masanton espiritu to ed saramay lingkor ton onkerew ed sikato.​—Luc. 11:13; Fil. 4:6, 7.

Magmaliw a makatunongan ed saray iilaloan mo. Kaukolan so panaon ed pagmaliw ya eksperiensyado bilang sakey a managpaliwawa tan diad pagmaliw ya epektibon managbangat. (Miq. 6:8) No agano ka nin nampalista ed eskuelaan, agmo iilaloan a makapangiter kan tampol na marandantal a presentasyon. Noag ingen, kimeyan a sakey-sakey so sakey a punto na konseho ed panagpaliwawa. Aralen so seksion ed sayan libro a mangipapaliwawa ed satan. No nayari, manpasal ed samay nisuheri ditan. Saya so mangiter ed sika na eksperiensya ed saray pamaakaran a mitukoyan ed punton pangonsehoan ed sika sakbay mon iparungtal so asainmin mo ed kongregasyon. Onaligwas kan siansia.

No Panon so Pangiparaan ed Asainmin a Panagbasa

Dakel ni saglawien na say panagparaan ed panagbasa ed publiko nen say basta pakapangibaga ed saray salita ed nipabtang a materyal. Pambanikelan mon dampoten so malinew a pakatalos ed kabaliksan na materyal. Bektaman a naawat mo so asainmin mo, igetmam a basaen ya amin itan. Panggunaetan mon talosan so punto ed kada estansa tan say ideyan atibukel ed kada parapo ta pian nipatalos mo a susto tan atekepan na manepeg a liknaan. No nayari, basaen so diksionaryo para ed dugan panangibalikas ed saray salitan agkabisado. Amtaen a maong so materyal. Nayarin nakaukolan na atateng a tulongan iray ankelag ya anak dan manggawa ed saya.

Kasin apabtangan kan mamasa ed sakey a porsyon na Biblia odino nayarin saray parapo na sakey ya artikulo ed Say Panag-Bantayan? No saray audiocassette na satan a materyal so wala ed lenguahem, makatulong a tuloy so italineng ed panagbasa tan imanoen iray makana a singa say panangibalikas, panangigrupo na saray salita, danet, tan modulasyon. Insan salien ya isiglaot irayan kalidad ed mismon panagbasam.

Sano gawaen mo la so asainmin mo, seguroen ya aralen a maong so leksion a manisingbat ed kalidad na panagpaliwawa a nipabtang ed sika. No nayari, satan so repasoen mo kayari na aminpigan impanpasal mo ya impamasa a maksil ed nipabtang a materyal. Sigpot mon pambanikelan ya iyaplika itan ya insulat a konseho no nayari.

Sayan panagpasal so ontulong ed sikan maong diad ministeryom. Legan a sika so manpupulong, walaan ka na dakel a pankanawnawan mangibasa ed arum. Lapud say Salita na Dios so walaan na pakayarin mamasimbalo ed kabibilay na totoo, importante so pambasam a maong ed satan. (Heb. 4:12) Agmo iilaloan a nakalakalam so amin a kipaakaran na epektibon panagbasa diad loob na sakey odino duaran asainmin. Parad sakey a Kristianon matatken a walaan na dakel lan taon ya eksperiensya, onia so insulat nen apostol Pablo: “Manseet ka ed panagbasa [ed publiko].”​—1 Tim. 4:13.

Pankimey ed Suheto tan Eksena

Sano makaawat ka na asainmin ed eskuelaan a manasaglawi na pankimey ed eksena (setting), panon so nepeg mon pangigapo?

Niraya so taloran manunan bengatla a kaukolan a konsideraen: (1) nipabtang a suhetom, (2) eksenam tan say toon pitongtongan mo, tan (3) say punton pangonsehoan a nipabtang a kimeyan mo.

Nakaukolan mon tiponen so materyal ed suheton nipabtang ed sika. Balet sakbay mon palaknaben itan, isipen a maong so nipaakar ed eksenam tan ontan met ed toon pitongtongan mo, ta saraya so misiglaotan ed nengneng na materyal a kobrian mo tan say paraan na pangipresentam ed satan. Anton eksena so nayarin usaren mo? Kasin idemostram no panon so pangipresenta ed maong a balita ed sakey a kabat mo? Odino kasin ipanengneng mo no anto so nayarin nagawa sano naabet mo so sakey a too ed unonan pankanawnawa? Kasin say too so mas panguloan odino mas ugaw nen sika? Antoy nayarin awawey to nipaakar ed suheton labay mon isingbat? Kaunongan kalaknab so nayarin pakaamta to ed satan? Anton gagala so iilaloan mon narapat bilang resulta na pantongtong yo? Saray ebat ed saratan a tepet so mangiter na importantin totontonen ed kimeyan mo.

Iner so pakaromogan mo na materyal ed suheton nipabtang ed sika? Diad saray pahina 33 ya anggad 38 ed sayan libro, wala so nasingbat ed “No Panon so Pansukimat.” Satan so basaen mo, insan usaren iray walad sikan uusaren ed panagsukimat. Diad kaslakan iran kipapasen, tampol mon naromog so malaem a materyal nen say nausar mo. Basaen a malaknab pian nakabisadom so walad sikan materyal. Balet, no ontan so gawaen mo, lawas a nonoten so eksenan usaren mo ed presentasyon tan ontan met ed toon pitongtongan mo. Tandaan iray punton matukoy ya usaren.

Sakbay mon organisaen so presentasyon mo tan manggawa na pinal a pampili ed saray detalye, mangigana na panaon ed pambasa ed salaysay na punton pangonsehoan ed sika. Say panangiyaplika ed satan a konseho so sakey ed saray manunan rason para ed asainmin mo.

Diad pangobrim ed materyal ed loob na nigeter ya oras, nakontento ka diad pangibagam ed konklusyon mo, lapud niiter so sinyal sano asabi la so nipabtang ya oras. Anggaman ontan, diad lawak na ministeryo tayo, say oras so agnaynay ya imanoen. Kanian leleg a sika so manparaan, nonoten no kaunongan a panaon so niiter, balet lawas ya idanet so epektibon panagbangat.

Panonot Nipaakar ed Saray Eksena. Usisaen iray suhestion ed pahina 82, tan pilien so sakey a praktikal ed ministeryom tan mangiyabuloy ed sikan realistikon mangusar ed nipabtang a materyal. No abaybayag ka lan mibibiang ed eskuelaan, saya so moriaen mon sakey a pankanawnawa pian nadampot tan nabayuboan mo so kaaruman iran dunong ed ministeryom.

No ipabtang na manangasikaso ed Teokratikon Eskuelaan Parad Ministeryo so eksena, awaten itan ya angat. Kaslakan ya eksena et sasaglawien to so panagpulong. No agka nin balot akapantasi ed ontan iran kipapasen ya adeskribe, mangala na saray ideya diad pitongtong ed saray manangipalapag ya akasali la. No posibli, salien mon singbaten so nipabtang a suheto diad eksena a mipara ed samay usaren mo ed eskuelaan. Saya so ontulong ed sikan makagawa na importantin gagala ed kipasal mo.

Sano say Pangidalatdat et Diad Nengneng na Paliwawa

No sakey kan laki, nayarin napabtangan kan mangipresenta na antikey a paliwawa ed kongregasyon. Diad pangiparaan ed sarayan paliwawa, saray manunan punton imanoen so mipara ed saraman so nilista la para ed saray asainmin na estudyante diad nengneng na demostrasyon. Saray manunan pandumaan et say dumerengel tan say metodo na presentasyon.

Alay abig no iparaan mo so materyal ta pian balang sakey ed dumerengel so nagunggonaan. Maslak ed saray presente so mikabat la ed saray manunan katuaan na Biblia. Nayarin kabisado da la so suheton nipabtang ya ipaliwawam. Nonoten no anto la so amta ra nipaakar ed suhetom. Pambanikelan mon nagunggonaan ira diad presentasyon mo. Tepetan mo so inkasika: ‘Panon kon usaren so temak a mamaaralem na apresasyon ko tan ontan met ed saray dumerengel ko nipaakar ed si Jehova bilang sakey a persona? Anto so wala ed materyal ya ontulong ed sikamin manebek ed linawa na Dios? Panon so pakatulong na sayan materyal ed panggawa na maabig iran desisyon ed utel na mundon tinalonaan na saray pilalek na laman?’ (Efe. 2:3) Saray makapnek ya ebat ed saratan a tepet so mankaukolan na panagsukimat. Sano usaren so Biblia, aglabat basta basaen iray teksto. Mankatunongan ed saray teksto ya usaren mo, tan ipanengneng no panon a saraya so mangiter na basiyan parad pankonklusyon. (Gawa 17:2, 3) Agmo sasalien a kobrian so dakerakel. Ipresentam so materyal ed paraan a mainomay a natandaan.

Kaukolan met ya isakup ed panagparaan so pangiter na imano ed panangiparungtal mo. Agmo iya melmelagen. Ipasal mon maksil so panagpaliwawam. Say pansasagpot mo ed panagaral tan panangiyaplika ed konseho ed nanduruman kalidad na panagpaliwawa so ontulong a maong ed iyaaligwas mo. Balanglan sika so balobalo nin manpapaliwawa odino sika so eksperiensyado la, manparaan a maong ta pian sika so makapansalitan walaan na kombiksyon tan liknaan a matukoy ed materyal mo. Legan mon susumpalen so kada asainmin mo ed eskuelaan, lawas nonoten a say gagala na pangusar mo ed inter na Dios ed sika a langkap ed panagsalita et pian idayew mo si Jehova.​—Sal. 150:6.

SAY programa ed Teokratikon Eskuelaan Parad Ministeryo so ipaparaan pian nagunggonaan so interon kongregasyon. Iprepresenta met so mablin impormasyon ed arum iran miting ed kongregasyon ontan met ed saray asamblea tan kombension. No apabtangan ka diad sakey ed sarayan programa, sika so naikdan na ambelat a responsabilidad. Pinaseseg nen apostol Pablo so Kristianon manangasikaso a si Timoteo a lawas manimano ed ibabangat to. (1 Tim. 4:16) Saramay presente ed saray Kristianon pantitipon so angigana na mabmablin panaon, tan arum so nansagpot a maong, pian onatendi parad kibangat ed saray bengatlan manasaglawi na relasyon da ed Dios. Peteg a say pangiter ed ontan a panangibangat so sakey ya engranden pribilehyo! Panon mon matukotukoy a nagawaan itan a pribilehyo?

Saray Manunan Punto Manlapud Panagbasa ed Biblia

Sayan parte ed eskuelaan so nibase diad panagbasa ed Biblia a niyeskedyul para ed simba. Idanet no panon a say materyal so mangapekta ed sikatayo natan. Singa nibaga ed Nehemias 8:8, si Esdras tan saray kakaiba to so nambasa ed lapag manlapud Salita na Dios, impaliwawa ra, ‘inikdan da na kabaliksan,’ tan innabang da so pakatalos. Say pangipaliwawam ed saray manunan punto ed Biblia so mangiter ed sika na pankanawnawan manggawa met ed ontan.

Panon mon iparaan so ontan ya asainmin? No nayari, basaen so nipabtang a porsyon ed Biblia sakey simba odino masulok ni sakbay to. Insan nonoten so kipapasen na kongregasyon yo tan saray pankaukolan ditan. Satan so ipikasi. Anton konseho, antoran ehemplo, antoran prinsipyo ed sayan porsyon na Salita na Dios so ontukoy ed saratan a pankaukolan?

Nakaukolan so pansukimat. Kasin wala ed lenguahe yo so Watchtower Library ed CD-ROM odino say Watch Tower Publications Index? No wala, maabig ya usaren iratan. Diad pansukimat ed wala lan nipalapag nipaakar ed saray bersikulon pinilim a pangiyapasakeyan, nayarin makaromog ka na makapaliwawan impormasyon a materyal, saray paliwawa ed kasumpalan na saray propesiya, saray nausisan teksto a mangiparungtal nipaakar ed si Jehova, odino saray diskusyon nipaakar ed saray prinsipyo. Agmo kokobrian so dakerakel a punto. Iyapasakey so pigara lambengat a pinilin bersikulo. Magmaong so pangobre na pigaran bersikulo tan kobrian a maong.

Nayarin kaukolan met ed asainmin mo so pangimbita ed saray dumerengel a mankomento ed no panon iran agunggonaan manlapud panagbasa ed Biblia ed satan a simba. Anto so aromog dan mangunggona ed sikara diad panagaral dan personal tan bilang pamilya odino diad ministeryo odino diad dalan na bilay da? Antoran kalidad nen Jehova so nipatnag diad saray impideneng to ed totoo tan nasyones? Anto so naaralan na saray dumerengel ya amabiskeg ed pananisia ra tan amaaralem na apresasyon da ed si Jehova? Ag-iyaapasakey ed saray detalyado tan komplikadon punto. Idanet so praktikal a kablian na saray punton pinili.

Instruksion a Paliwawa

Saya so nibase ed nipalapag a materyal, a singa say artikulo ed Say Panag-Bantayan odino Awake! odino nayarin porsyon na sakey a libro. Diad kaslakan a kipapasen et wala so magenagenap a materyal para ed nigeter ya oras. Panon mon iparungtal so asainmin? Bilang sakey a managbangat, aliwan basta kobrian labat so materyal. Say sakey a manangasikaso so nepeg a “maong a manbangat.”​—1 Tim. 3:2.

Igapom so presentasyon mo diad panaral ed nipabtang a materyal. Nengnengen iray teksto. Mandalepdep. Pambanikelan a gawaen la itan a masakbay antis na samay petsa na paliwawam. Lawas nonoten a saray agagi so napapaseseg a manbasan masakbay ed nipalapag a materyal ya angibasian na paliwawa. Say asainmin mo so aliwan basta repasoen itan odino segeken itan noagta pian ipanengneng no panon so pangiyaplika ed satan. Usaren so matukoy iran porsyon ed materyal diad paraan a talagan makagunggona ed kongregasyon.

No panon a say kada ugaw et walaan na dili ton personalidad, kada kongregasyon so walaan na nikabiig iran awawey. Say sakey ya ateng a manbangat ya epektibo so aglabat mangidalatdat ed saray moral a totontonen ed anak to. Sikato so mikatunongan ed anak to. Ikonsidera to so personalidad na anak to tan saray probleman aarapen na ugaw. Mipadpara, panggunaetan na saray managbangat ed kongregasyon a talosan tan imanoen iray pankaukolan na grupo a pitotongtongan da. Anggaman ontan, say makatebek a managbangat so agmangusar na saray ehemplon mamabaing ed sakey ed saray dumerengel. Ipabitar toray gunggonan panggagayagaan bilang resulta na panaakar ed dalan nen Jehova tan mangidanet ed simbawa na Kasulatan ya ontulong ed kongregasyon diad matalonan pangarap ed saray probleman kidudungetan da.

Tenyegen na maong a panagbangat so kapusoan na saramay onderengel. Aliwan say basta pangibaga ed saray katuaan so kaukolan na saya noagta paaralemen met so apresasyon ed walan irerepresenta na saraya. Kaukolan na satan so peteg a panangiyansakit ed saraman so babangatan. Nepeg ya amtaen na saray espiritual a pastol so pulok. No maaron itanem da ed isip iray probleman aarapen na sinansakey, nayarian da so mansalitan makapaseseg, nipatnag da so pakatalos, panangabagey, tan empatya.

Unong a kabat na saray epektibon managbangat, say sakey a paliwawa so nepeg a walaan na malinew a gagala. Nepeg ya iparungtal so materyal diad paraan ya ombitar iray manunan punto tan natandaan. Nepeg a natandaan na saray dumerengel iray praktikal a punton mangapekta ed kabibilay da.

Service Meeting

Sano manpaliwawa ka a nibase ed sakey ya artikulo diad Ministeryo Tayo ed Panarian, say angat so nayarin miduma. Dia et naromog mo a mabetbet a kaukolan mon ipasabi so amin a nitarya diad saray dumerengel, ya agpilien so sankamatukoyan. Tulongan so dumerengel a manrason unong ed saray teksto a manitibukel ed basiyan na dinanman a niiter a konseho. (Tito 1:9) Limitado so oras, diad maslak a kipapasen et agto iyabuloy so kaaruman a materyal.

Diad biek a dapag, nayarin sika so napabtangan a mangipresenta ed materyal ya anggapo so artikulon pinmatnag ed Ministeryo Tayo ed Panarian. Nayarin wala so reperensya ed sakey ya artikulo ed Panag-Bantayan, odino nayarin say asainmin so nankarga na pigaran antirikey a punto. Bilang managbangat et makauley ka lan mangonsidera ed saray pankaukolan na kongregasyon a misiglaotan ed nipabtang a materyal. Nayarin nakaukolan mon usaren so antikey, mabitar ya ilustrasyon odino mangisalaysay na matukoy ya eksperiensya. Tandaan a say asainmin mo so aliwan basta ipaliwawa so tema noagta iparungtal itan ed paraan a say kongregasyon so natulongan a manggawa ed kimey ya indatak na Salitay Dios tan makapanggayaga diad panggawa ed satan.​—Gawa 20:20, 21.

Legan ya ipaparaan mo so asainmin mo, isipen iray sirkumstansya na saraman so manitibukel na kongregasyon. Komendaan ira ed nagagawaan da la. Panon a say pangiyaplika ra ed saray suhestion ed nipabtang a materyal so nayarin mamabulaslas ed inkaepektibo ra tan gayaga ra ed ministeryo?

Kasin say asainmin mo so mankakaukolan na sakey a demostrasyon odino interbio? No ontan, nepeg lan iplanon masaksakbay. Nayarin makapasagyat so basta pangerew ed anggan siopa a mangiyuksoy ed satan, balet ta aliwan naynay a mamawala itan na sankaabigan a resulta. No nayadyari lambengat, ipasal so demostrasyon odino interbio sakbay na agew na aral. Seguroen a sayan kabiangan na partim so niparungtal ed paraan a tuan mamalaknab ed niiter ya instruksion.

Saray Asamblea tan Kombension

Saray agagin lalaki a mamabayubo na maabig iran kalidad ed espiritual tan magmamaliw ya epektibon managpaliwawa ed publiko tan managbangat et nasabi panaon a sikaray nakerew a mibiang ed programa na asamblea odino kombension. Tuan saraya so nikadkaduman okasyon para ed teokratikon edukasyon. Say ontan ya asainmin so nayarin naawat ed porma na sakey a manuskrito, sakey ya outline, saray instruksion para ed sakey a drama ed Biblia a walaan na modernon-agew ya aplikasyon, odino sakey a parapo lambengat na saray instruksion. No sika so apribilihyoan a manserbi ed ontan a programa, aralen a maong so materyal a niiter ed sika. Satan so pankimeyan ya anggad natebek mo so kablian to.

Saramay napabtangan na sakey a paliwawan manuskrito so kaukolan a mamasa ed materyal a salita por salita. Agda uumanen so salita odino inkauksoy na materyal. Aralen da itan pian natebek dan malinew no antoray manunan punto tan no panon so inkatibukel na saraya. Manpasal iran manbasan maksil ya anggad nayarian da lan iparungtal so paliwawa a tekep na manepeg a panangidanet na punto, entusiasmo, ligsa, liknaan, inkasimoon, tan kombiksyon, tan ontan met ed kakasil tan biskeg a matukoy ed dakel a dumerengel.

Saray agagin lalaki a napabtangan na sakey ya outline na paliwawa so kaukolan a manibukel ed materyal da diad paraan a maapit a mitunosan ed outline. Imbes a basta basaen so outline legan na paliwawa odino iparaan ed porman manuskrito, say managpaliwawa so nepeg a mangipresenta ed materyal diad paraan ya ekstemporanyo tan manlalapud puso. Importante so panumbok ed nigeter ya oras ed outline ta pian nipresentan malinlinew so kada manunan punton nipabitar. Say managpaliwawa so kaukolan a mangusar a maong ed saray ideya tan teksto a nilista ed leksab na saratan a manunan punto. Nepeg ya agto mangisasalet na kaaruman iran punto unong ed personal a panlabay to a mansumpal la ingen ed kipuera na nidatak ed outline. Siempre, say basiyan na instruksion et say Salita na Dios. Responsabilidad na saray Kristianon mamatatken so “pangipulong ed salita.” (2 Tim. 4:1, 2, NW) Kanian nagkalalo lan kaukolan ya imanoen na managpaliwawa iray tekston walad outline​—mankatunongan unong ed saratan tan mangiyaplika ed saratan.

Ag-ipalpaleen

Kasin manseserbi ka ed sakey a kongregasyon a wala so dakel a pankanawnawan manpaliwawa? Panon mon niiter so magenap ya imano ed amin na saratan? Paliisan so atrasado lan panagparaan ed saray partim.

Saray paliwawan peteg a makagunggona ed kongregasyon so mankaukolan na magenap a masakbay a panmolimoli. Kanian, iyugali so pambasa ed materyal bektaman a naawat mo so kada asainmin. Nayarian mon morekdeken itan legan a gawaen mo so arum a kimey mo. Legan na saray agew odino simba sakbay na panpaliwawam, nayarin makadngel ka na saray komenton ontulong ed sikan natalosan no panon so sankaabigan a pangiyaplika ed impormasyon. Nayarin onlesa iray kipapasen ya ompatnag a nipanpanaon itan ya impormasyon. Say pambasa tan pannonot ed asainmin mo kayarin tuloy na pakaawat mo so mankaukolan na panaon, balet alay abig so pakausar mo ed satan a panaon. Sano onyurong ka lan manibukel ed outline, nagamoran mo iray gunggona diad masakbay lan impanmolimolim ed satan. Say pangasikaso ed saray asainmin ed onian paraan so pirmin mangekal na banal tan natulongan kan mangipresenta ed materyal diad praktikal a paraan tan nasabi so kapusoan na saramay wala ed kongregasyon.

Anggad punton naapresyam so langkap a nimatalek ed sika a misiglaot ed programa na panangibangat nen Jehova para ed totoo to, sikato so nigalang mo tan mansumpal ed pakabendisyonan na saraman so mangaaro ed sikato.​—Isa. 54:13; Roma 12:6-8.

KADA simba, maslak a kongregasyon na saray Tastasi nen Jehova so mangiyaareglo na paliwawa ed publiko diad sakey a Makasulatan a suheto. No sakey kan matatken odino ministeryal a lingkor, kasin nipapatnag mon sakey ka ya epektibon managpaliwawa ed publiko, sakey a managbangat? No ontan, sika so nayarin naimbitaan a mangiter na paliwawa ed publiko. Say Teokratikon Eskuelaan Parad Ministeryo so akatulong ed pigamplon libon agagin lalaki a nagmaliw a kualipikado ed sayan pribilehyo na serbisyo. Sano napabtangan kan mangiter na paliwawa ed publiko, iner so nepeg mon pangigapoan?

Aralen so Outline

Sakbay kan mansukimat, basaen so outline tan dalepdepen itan ya anggad natalosan mo so kabaliksan to. Iteen ed nonot so tema, a satan so titulo na paliwawa. Anto so nakaukolan mon ibangat ed saray dumerengel mo? Anto so gagalam?

Kabisadoen iray manunan paulo. Analisaen iray manunan punto. Panon so pikonektaan na kada sakey ed tema? Diad leksab na kada manunan punto, nilista iray pigaran segundaryon punto. Saray punton manuporta ed sarayan segundaryon punto so nilista ed silong na saraya. Imanoen no panon a say kada seksion na outline so nibase ed samay akauna, a mangipaarap ed ontumbok, tan ontulong a manumpal ed gagala na paliwawa. Bektaman ya atalosan mo so tema, say gagala na paliwawa, tan no panon a saray manunan punto so manumpal ed satan a gagala, sirin akaparaan ka la a mangigapon manibukel ed materyal.

Diad gapo, nayarin naimanom a makatulong so pannonot ed paliwawam bilang apatira odino limaran antirikey a paliwawa, a kada sakey so walaan na manunan punto. Saraya so iparaan a sakey-sakey.

Say nitaryan outline so sakey ya uusaren ed panagparaan. Ag-itan onkana bilang nota a satan la so usaren mo ed pampaliwawam. Satan so katag-taglang. Kaukolan mon peketan na laman, a singa panangibaga, ikdan na puso, tan pabilayen.

Panangusar ed Saray Kasulatan

Imbase nen Jesu-Kristo tan saray babangatan to so panagbangat da ed Kasulatan. (Luc. 4:16-21; 24:27; Gawa 17:2, 3) Nagawaan mo met so ontan. Saray Kasulatan so nepeg a basiyan na paliwawam. Imbes ya ipaliwawa tan iyaplika iray balikas a walad nitaryan outline, tebeken no panon a saratan a balikas so sinuportaan na Kasulatan, insan manbangat manlapud Kasulatan.

Diad pangiparaan mo ed paliwawam, usisaen so kada bersikulon nisitas ed outline. Imanoen so konteksto. Arum a teksto so nayarin basta mangiter na makatulong ya impormasyon. Aliwan amin na saratan so kaukolan a basaen odino komentoan legan na pampapaliwawam. Pilien iraman so sankaabigan parad saray dumerengel mo. No iyapasakey mo ed saray tekston nisitas ed inimprintan outline, nayarin agmo la nakaukolan ya usaren so kaaruman iran Makasulatan a reperensya.

Mandepende so aligwas na paliwawam, aliwan diad karakel na tekston usaren, noagta diad kalidad na panagbangat. Sano ipaparungtal iray teksto, ipanengneng no akin a saratan so uusaren. Ilugar so panaon a pangiyaplika ed saratan. Kayari pamasam ed sakey a teksto, pansiansiaen mon lukas so Biblia legan a sisingbaten mo so teksto. Nayarin ontan met so gawaen na saray dumerengel mo. Panon mon nasagyat so interes na saray dumerengel mo tan natulongan iran sigpot a nagunggonaan manlapud Salita na Dios? (Neh. 8:8, 12) Nagawaan mo so ontan diad panamegley na eksplinasyon, ilustrasyon, tan aplikasyon.

Eksplinasyon. Sano manpaparaan ya ipaliwawa so sakey a manunan teksto, tepetan mo so inkasika: ‘Anto so kabaliksan na satan? Akin a satan so usaren ko ed paliwawak? Anto so nayarin itetepet na saray dumerengel ed inkasikara nipaakar ed sayan bersikulo?’ Nayarin kaukolan mon analisaen so konteksto, say abenegan, say kipapasen, say puersa na saray salita, say gagala na apuyanan a managsulat. Mankaukolan iya na panagsukimat. Makaromog ka na daakan a mabmablin impormasyon ed saray publikasyon ya intarya na “matoor tan makabat ya aripen.” (Mat. 24:45-47) Agmo sasalien ya ipaliwawa so amin a bengatla nipaakar ed bersikulo, noagta ipaliwawam no akin ya impabasam itan ed saray dumerengel mo a misiglaotan ed punto a sisingbaten.

Ilustrasyon. Say gagala na saray ilustrasyon et pian nipaarap moray dumerengel mo ed aragdalem a pakatalos odino pian tulongan iran makatanda ed sakey a punto odino prinsipyon siningbat mo. Saray ilustrasyon so ontulong ed totoon mantalos ed saman so imbagam ed sikara tan satan so isiglaot ed bengatlan kabat da la. Onia so ginawa nen Jesus sanen inter to imay bantog a Sermon ed Palandey. “Saray manok ed tawen,” “saray lirio ed uma,” “mainget a puerta,” “abung ed tapew na baton-dampay,” tan dakel niran balikas a nanggawa ed panagbangat to a maranet, malinew, tan agnalingwanan.​—Mat., kap. 5-7, NW.

Aplikasyon. Say panangipaliwawa tan panangiyilustra ed sakey a teksto so mangiter na pikakabat, ingen say pangiyaplika ed satan a pikakabat so mamawala na resulta. Tua, responsabilidad na saray dumerengel so ikiwas ed mensahe na Biblia, balet ta natulongan mo ran mantebek ed nakaukolan a gawaen. Bektan matalek kan natatalosan na saray dumerengel mo so bersikulon sisingbaten tan natetebek da so pisiglaotan na satan ed punton nasasalaysay, ikdan na panaon so pangipanengneng ed sikara ed epekto na satan ed sisiaen tan kondukta. Ipabitar iray gunggona na pangipulisay ed saray lingon ideya odino kondukta ya agmitukoyan ed katuaan a sisingbaten.

Legan ya iisipen mo no panon ya iyaplika iray teksto, tandaan a saray totoon dumerengel mo so nanlapud nanduruman binalegan tan nidudunget ira ed nanduruma iran sirkumstansya. Nayarin walaray balobalon interesado, tobonbalo, maedad la, tan saraman so mipupuligesgesan ed nanduruman personal iran problema. Gawam a praktikal tan realistiko so paliwawam. Paliisan moy pangonseho a singa pigpigara labat a totoo so walad kaisipan mo.

Saray Desisyon na Managpaliwawa

Arum a desisyon nipaakar ed paliwawam et adesisyonan la parad sika. Saray manunan punto so mabitabitar a nipanengneng, tan say karakel na panaon a nepeg mon usaren a paningbat ed kada manunan paulo so malinew a nipanengneng. Arum a desisyon et makauley ka la. Nayarin labay mon usaren so malaem a panaon ed arum a segundaryon punto tan magano labat ed arum. Agmo ipapasen a nepeg mon kobrian so kada segundaryon punto ed parehon karukey. Nayarin satan so sengeg lay pangganat mo ed materyal tan nakewkew iray dumerengel mo. Panon mon determinaen no dinan so tibukelen mon malaknab tan no dinan so maganom labat a saglawien? Tepetan mo so inkasika: ‘Dinan iran punto so ontulong ed siak a mangipasabi ed manunan ideya na paliwawa? Dinan iray makagunggonan maong ed saray dumerengel ko? Kasin say pangekal ed sakey a nisitan teksto tan misiglaotan a punto so mamakapuy na inka-alutor na ebidensian nipaparungtal?’

Pampelengan mo so agmangisasalet na palpalbeng odino personal ya opinyon. Anggan say Anak na Dios, si Jesu-Kristo, et pinaliisan to so nansalita na ‘nanlapud inkasikaton dili.’ (Juan 14:10) Bidbiren a say rason no akin a saray totoo so oonla ed saray miting na Tastasi nen Jehova et pian ondengel ed pangipapaliwawa ed Biblia. No sika la so impasen a maabig a managpaliwawa, nayarin ontan lapud inyugalim lan ipaimano so Salita na Dios ya aliwan diad inkasika. Nisengeg ed saya, saray paliwawam so naapresya.​—Fil. 1:10, 11.

No agawaan mo la so simplin outline a nagmaliw a maiyan ya eksplinasyon na Kasulatan, nakaukolan mo la natan ya ipasal so paliwawam. Makagunggona so pampasal a maksil. Say importantin bengatla et say paneguro a walad kanonotan mon maong so amin a punto. Nepeg a sikay mansalitan walaan na sigpot a kombiksyon, pagmaliwen mon mabilabilay so panagpaliwawam, tan entusiastikon ipresenta so katuaan. Sakbay mon iparungtal so paliwawam, tepetan mo so inkasika: ‘Anto so iilaloan kon nagawaan? Kasin saray manunan punto so nipabitar? Kasin peteg a pinagkabasiyan ko so Kasulatan ed paliwawak? Kasin say kada manunan punto so mangipaarap ed ontumbok? Kasin say paliwawa so mamabiskeg na apresasyon ed si Jehova tan diad saray probisyon to? Kasin say konklusyon so direktan misiglaotan ed tema, ipanengneng ed dumerengel no anto so gawaen da, tan pakiwasen ira a manggawa ed satan?’ No on so ebat mo ed sarayan tepet, sirin wala ka la ed kipapasen a ‘manggawa na maabig ed pikakabat,’ para ed pakagunggonaan na kongregasyon tan diad kirayewan nen Jehova!​—Uli. 15:2.