Epektibon Panamilin

NEPEG a nayarian na Kristianon mamatatken “so mangikalar na maabig a bangat.” (Tito 1:9) No maminsan et saya so gawaen diad pangarap ed mairap iran kipapasen. Importante so pangiter na konseho a mitunosan ed saray pananontonan na Kasulatan. Sirin, nepeg ya imatleken na mamatatken so simbawa: “Manseet ka . . . ed panagkalar.” (1 Tim. 4:13) Anggaman say sisingbaten tayo dia so nipaarap a manuna ed saray mamatatken odino ed saraman so manadampot ed sayan pribilehyo, walaray panaon sano nepeg a bilinen na atateng so ananak da odino saramay mangiyaaral na Biblia so kaukolan a mamilin ed saray iyaaralan da na Biblia. Diad ontan iran kipapasen, onaplika so miulibay iran pananontonan.

Saray Kipapasen a Mankaukolan na Panamilin. Pian nadetermina no kapigan so nepeg a pamilin, makatulong so pangusisa ed saray kipapasen a nikurit ed Biblia a niiter so panamilin. Binilin nen apostol Pedro iray mamatatken a mangimano ed responsabilidad da bilang pastol ed pulok na Dios. (1 Ped. 5:1, 2) Sinimbawa nen Pablo si Tito a bilinen toray tobonbalon lalaki a “mankalakal.” (Tito 2:6) Pinaseseg nen Pablo iray kapara ton Kristiano a ‘salitaen so saksakey a bengatla’ tan paliisan iramay pansesengegay kaapag-apag ed limog na agagi. (1 Cor. 1:10; Roma 16:17; Fil. 4:2) Anggaman kinomendaan nen Pablo iray membro na kongregasyon ed Tesalonica nisesengeg ed saray maabig a bengatlan gagawaen da, sikara so binilin ton mangiyaplika a nagkalalo ed bangat ya inawat da. (1 Tes. 4:1, 10) Tinangguyor nen Pedro iray kapara ton Kristiano a “mansiansian ompaliis ed pilpilalek na laman.” (1 Ped. 2:11, NW) Binilin nen Judas iray agagi to “a mibangal a nisesengeg ed pananisia” makasengeg ed impluensya na saray agmaridios a mipapagletan ed malukak a kondukta. (Jud. 3, 4) Saray Kristiano ed inkalapagan so papasesegen a manbibilinan ta pian anggapo komon so manpaawet diad panamegley na manamalikdon pakayari na kasalanan. (Heb. 3:13) Binilin nen Pedro iray Judio ya agni angiteen na pananisia ed Kristo: “Ilaban yo so inkasikayo ed sayan pikewet a kapolian.”​—Gawa 2:40.

Antoran kalidad so kakaukolan ta pian makapambilin ed ontan iran kipapasen? Panon a say sakey a manbibilin et napagmaliw ton maganat so apelo to ya aliwan masebeg odino mapasang?

“Lapud Aro.” No agniiter so panamilin tayo “lapud aro,” nayarin ompatnag ya ansakit itan. (Filem. 9) Tua, no kakaukolanen so tampol ya ikiwas, say panagpaliwawa na espiker so nepeg a mangipasabi ed kaganatan na kipapasen. Say mapalnan panagsalita so nayarin ompatnag a mikakasi. Ontan met, nepeg a gawaen so apelo tekep na inkaseryoso tan empatya. Say maaron apelo so nayarin mamakiwas ed saray dumerengel. Sanen nansalita nisesengeg ed inkasikato tan saray kakaiba to, imbaga nen Pablo ed saray taga-Tesalonica: “Kabat yo no panon so panangimano mi ed balang sakey ed sikayo, a singa sakey ya ama ed saray dilin anak to, a kakalaran mi kayo.” (1 Tes. 2:11) Saraman a Kristianon manangasikaso so akideneng ed agagi tekep na aro. Komon ta saray balikas mo so ompaway a manlapud peteg a panagpaga parad saray dumerengel mo.

Magmaliw a mataktika. Agpaiingongoten iramay panggugunaetan mon sagyaten ya onkiwas. Ontan met, agmo ikikibot ya ibaga ed saray dumerengel mo so “amin a kalar na Dios.” (Gawa 20:27) Saramay dumerengel a maapresyan mangawat na simbawa so agnasakitan odino naumas so panangaro ra ed sika lapud mapangasin papasesegen mo ran manggawa na duga.​—Sal. 141:5.

Mabetbet, makagunggona so pamilin tekep na espisipiko tan masimoon a komendasyon. Isipen iray maabig a bengatlan gagawaen na agagim​—bengabengatlan panliketan nen Jehova a maong: say pananisian ipapatnag da ed gawa ra, say aron mamapakiwas ed sikaran mangisekar, tan say panagsungdo ra ed arap na makasubsubok iran kipapasen. (1 Tes. 1:2-8; 2 Tes. 1:3-5) Saya so ontulong ed agagim a manliknan sikara so napapabli tan natatalosan, tan ontulong itan ed sikaran onkiwas ed ontumbok ya iyapelo.

“Tekep na Amin ya Andukey a Panagtepel.” Nepeg ya iter so panamilin a “tekep na amin ya andukey a panagtepel.” (2 Tim. 4:2, NW) Anto so lalanoren na saya? Ilalaktip na andukey a panagtepel so maanos a panagsungdo ed lingo odino inkasanokan. Say sakey ya andukey so panangitepel to so mailalo lawas ya iyaplika na saray dumerengel to so ibabaga to. Say panamilin ed onian espiritu so mangamper ed saray dumerengel mo manlapud panisip ya aatrogaen mo la so sankaugesan nipaakar ed sikara. Say kompiyansam a saray agagim so malabay a manserbi ed si Jehova ed anggaan na nayarian da so onapelo ed pilalek dan manggawa na duga.​—Heb. 6:9.

“Diad Bangat a Mabunigas.” Panon na sakey a matatken a “manbilin diad bangat a mabunigas”? Diad “ibemben a malet ed matoor a salita no nipaakar ed arte na panagbangat to.” (Tito 1:9, NW) Imbes ya ibalikas mo so dilin opinyon mo, usaren so Salita na Dios a biskeg na apelom. Abuloyan so Biblia ya ontulong ed sikan mantebek no antoray nakaukolan ya ibaga. Ilista iray gunggona na panangiyaplika ed ibabaga na Biblia ed pamaakaran a kapapagaan mo. Nodnonoten a maong iray pansumpalan​—namparan peles tan arapen—​no agmitunosan ed Salita na Dios, tan saraya so usaren a pangombinse ed saray dumerengel mo ed pankaukolan na pangalay matukoy a kiwas.

Seguroen a nipaliwawam a malinew ed saray dumerengel mo no anto so nepeg dan gawaen tan no panon so nepeg dan panggawa ed satan. Ipalinew a say panagkatunongan mo so malet a nibase ed Kasulatan. No iyabuloy na Kasulatan so kawayangan ed anggan anton desisyon a gawaen, idatak so kalaknab na satan a kawayangan. Insan, diad konklusyon mo, gawaen so pinal ya apelo a mamabiskeg ed determinasyon na saray dumerengel mo ya onkiwas.

Tekep na “Kawayangan ed Panagsalita.” Pian epektibon makapambilin ed arum, nepeg a say sakey so walaan na “kawayangan ed panagsalita diad pananisia.” (1 Tim. 3:13, NW) Anto so manggawa ed sakey a toon makapansalitan bulo-bulos? Say katuaan a say “pinagkauliran na saray maabig a gawa” to so mitunosan ed samay ibibilin ton gawaen na agagi to. (Tito 2:6, 7; 1 Ped. 5:3) No onia so kipapasen, saramay papasesegen ya onkiwas so makamoria a say sakey a mamibilin so agmanilalon gawaen da so agto gagawaen a mismo. Nanengneng da a sarag dan aligen so pananisia to unong a sikato et pambabanikelan ton aligen si Kristo.​—1 Cor. 11:1; Fil. 3:17.

Say panamilin a nibase ed Salita na Dios tan niiter ed espiritu na aro so epektibon tuloy. Saramay angimatalkan na responsabilidad a manbilin so nepeg a maseseg nipaakar ed panamilin diad maabig a paraan.​—Roma 12:8.