Naabrasa Ka ed Teokratikon Eskuelaan Parad Ministeryo

DIAD interon dalin, ed masulok a 200 a bansa, minilyon ya estudyante so nagugunggonaan kada simba manlapud edukasyon ed Teokratikon Eskuelaan Parad Ministeryo. Arum so balo ni labat. Tan arum so dakel lan taon ya onaatendi ed eskuelaan. Nikokondukta so eskuelaan ed pigamplon libo a paspasen. Inerman so panaayam mo, nitarya ed sika so parehon programa na edukasyon. Saray totoo ed amin ya edad, etniko iran grupo, tan agamoran ya edukasyon so makakaawat a libre ed sayan teokratikon panagbangat.

Sanen inggapo so eskuelaan ed saray kongregasyon na Tastasi nen Jehova nen 1943, say gagala na satan so nidatak ed sarayan salita: “Pian iparaan so amin a ‘lalakin matoor,’ saraman so akadngel ed Salita na Dios tan amaneknek ed pananisia ra, pian ‘makayarin mangibangat ed arum’ . . . ed gagalan gawaen so balang sakey . . . a magmaong a nakinlongan pian mapublikon niparungtal so ilalon wala ed sikato.” (Course in Theocratic Ministry, p. 4) Ontan nin siansia so gagala na eskuelaan anggad natan.

Peteg, anto so sankaabigan a bengatlan nagawaan na siopaman ed sikatayo ed inter na Dios a langkap a panagsalita? Onebat so Biblia: “Amin a bengatlan manlinlinawa—idayew to komon si Jah.” (Sal. 150:6, NW) Sano gawaen tayo itan, napagayaga tayo so puso na mangatatawen ya Ama tayo. Papaneknekan tayo ed sikato a saray dilin kapusoan tayo so onkikiwas ed pisasalamat diad kaabigan tan panangaro to. Agpankelawan a saray Kristiano so napapaseseg a lawas “mangisaklang ed Dios na sakey a bagat na panangidayew, salanti, say bunga na saray bibil a mangiyabawag ed lapag ed ngaran to”! (Heb. 13:15, NW) Diad gagalan natulongan kan onaligwas ed abilidad mon mangusar ed saray inter na Dios a langkap pian idayew si Jehova, abrasaen mi ka bilang estudyante ed Teokratikon Eskuelaan Parad Ministeryo.

Anggaman say panagbasa ed publiko tan saray arte ed panagsalita tan panagbangat so naikdan na malaem ya imano ed eskuelaan, aglabat angangga ed satan iray gunggona ed edukasyon ed Teokratikon Eskuelaan Parad Ministeryo. Legan kan mibibiang, sika so natulongan a mamayubo ed saratan a makanakanan dunong a singa say personal a panagbasa, panagdengel tan pakatanda, panagaral, panagsukimat, panag-usisa tan panag-organisa, pitotongtong, panangebat ed saray tepet, tan pangisulat ed saray walad kanonotan. Say mismon Biblia tan saray nibase ed Biblian publikasyon so mangiter na basiyan para ed panagaral tan para ed panagkomento tan presentasyon a niiter ed eskuelaan. Legan mon papanoen so kanonotan mo ed saray ankablin katuaan a naromog ed Salita na Dios, naaralan mon isipen iray kanonotan na Dios. Agaylan makagunggona itan ed amin ya aspekto na bilay! Nipaakar ed kablian na Salita na Dios, insulat na koma-20 siglon edukador na unibersidad a si William Lyon Phelps: “Balang sakey a walaan na nagnap a pikakabat ed Biblia so nayarin peteg a natawag ya edukado. . . . Manisia ak a say pikakabat ed Biblia ya andian na kurso ed kolehyo so mas makana nen say kurso ed kolehyo ya andian na Biblia.”

No Panon a Sigpot a Nagunggonaan

Siempre, ta pian sigpot a nagunggonaan manlapud edukasyon a nitarya ed Teokratikon Eskuelaan Parad Ministeryo, sika, ya estudyante, so nepeg a personal a mansagpot. Pinaseseg nen apostol Pablo so Kristianon kaiba to a si Timoteo: “Panseetan mo so sarayan bengatla, sikara labat so arapen mo; pian say ibubunam [“ibubulaslas,” NW] nipatnag komon ed saray ganagana.” (1 Tim. 4:15) Diad antoran praktikal a dalan a nayarin makapanseet ka?

No posibli, atendian mo so Teokratikon Eskuelaan Parad Ministeryo kada simba. Usaren a makabat iyan libron-panaralan a, Minabang ed Edukasyon na Teokratikon Eskuelaan Parad Ministeryo. Isulat moy ngaran mo ed niganan espasyo ed paulon pahina. Awit mon naynay so libro kapag no onatendi ka ed eskuelaan. Sayan libron-panaralan so sakey met a libron pangisulatan na saray nota. Sano akabasa ka ditan na importante iran punto ya isipen mon ontulong ed sika, gulisan mo iratan. Usaren iray maawang ya espasyo a pangisulatan ed saray praktikal a punton naaralan mo kaleganan na saray diskusyon ed eskuelaan.

Sakey ya inimprintan kopya na programa a tumboken ed Teokratikon Eskuelaan Parad Ministeryo so nitarya a biig. Say eskedyul so mangilaktip met ed saray detalye ed no panon a nikondukta so eskuelaan. Nayarin naimanom a praktikal ya itekep so eskedyul ed sayan libro ta pian kakaawit itan.

Diad pangiparaan ed sinimba iran sesyon ed eskuelaan, lawas nonoten a say Biblia so manunan libron-panaralan. Unaen a basaen so dinanman a porsyon na Biblia a nayarin niyeskedyul ed satan a simba. No nayarian mo met a basaen a masakbay so materyal ed nanduruman parte na programa, saya met so makagunggonan tuloy.

Kaleganan na panagaral, nayarin walaray pankanawnawan mibiang iray dumerengel. Sigpot ya anamoten iraya. Say pibibiang ed ontan iran diskusyon so makanakana diad agpakalingwan ed narengel mo tan nayarian mon iyaplika ed personal a bilay mo.

Siempre, amin ya estudyante so nawalaan na pankanawnawan mangiter na saray paliwawa odino demostrasyon ed imaton na kongregasyon. Anamoten so balang sakey ed saratan a pankanawnawa. Kaukolan a manseet ka pian onaligwas so antokaman a kalidad na panagpaliwawan nipabtang ed sika. Sika so naikdan na konseho nisesengeg ed mantultuloy ya aligwas mo. Awat mo so ontan a personal a tulong. Diad librom, isulat moray espesipikon suhestion ed no anto so nayarin personal a paaligwasen mo. Lapud mairap para ed sakey a toon natebek so inkasikato ed paraan a pakatebek ed sikato na arum, say maaro, nibase ed Biblia iran suhestion tan konsehon niiter so makatulong na baleg ed iyaaligwas mo. Onaplika met itan anggano mibibiang ka la ed eskuelaan ed dakel lan taon.—Uli. 1:5.

Kaliktan mo ta so lalon maples ya iyaaligwas? No ipanengneng mo so personal ya ikiwas, satan so nagawaan. Aralen a masakbay so materyal a kobrian ed kada paliwawa na estudyante. No nakaukolan so kasandin manpaliwawa, nayarian moy manboluntaryo, tan satan so mamalaknab na eksperiensiam. Sano manpaliwawa iray arum, talinengen a maong no panon dan iparungtal so materyal. Makaaral itayo ed sakey tan sakey.

Niarum ni, no iyabuloy na sirkumstansiam, napapeles moy iyaaligwas mo diad personal a panaral a masakbay ed sayan libron-panaralan. Kayarim a naaralan a maong so wala ed ontumbok a 15 ya aaralen, ituloy a kimeyan so “Programa Pian Paaligwasen so Abilidad Bilang Managpaliwawa tan Managbangat,” ya onggapo ed pahina 78. Unona, aralen so kada leksion tan gawaen iray panagpasal a nidatak a misiglaotan ed satan. Ikanam ed ministeryo so nanaaralan mo. Saya so nagkalalon mamaaligwas ed sika bilang managpaliwawa tan managbangat ed Salita na Dios.

Say naaralan mo ed Teokratikon Eskuelaan Parad Ministeryo so ontulong a mangiparaan ed sika ed saray importantin pamaakaran ed bilay. Lapud mabilay itayo nisesengeg ed linawa na Dios, say pangidayew ed sikato so pamidbir ed mismon gagala na kiwawala tayo. Kanepegan nen Jehova a Dios so sankatageyan a kalidad na dayew. (Apoc. 4:11) Say edukasyon a naawat tayo ed eskuelaan so sakey a paraan na pakapanggawa ed saya ta pian makapanisip itayon malinew, onkiwas a sikakabat, tan epektibon nipaliwawa tayo so makapakelaw iran katuaan manlapud impuyan a Salita na Dios.

PUNDASYON A PANGIPAALAGEYAN

Say abilidad a pitongtong diad epektibon paraan so sakey a dunong. Aliwan amin et maong ed satan. Dakel a libron-panaralan so adesinyon ontulong ed totoo pian onaligwas ed sayan pamaakaran. Anggaman ontan, say Manamalsa, say Sakey ya angipalangkap ed totoo na abilidad a mansalita, so mikabat a nagkalalo ed panagsalita tan panagbangat nen say siopaman a toon instruktor nipaakar ed panagpaliwawa. Say bogbogtong ya Anak to so akitulongan ed sikato bilang Pangulon Komikimey diad impamawala ed utek na too tan saray organo ed panagsalita tan ontan met ed arum niran pankelawan ed palsa.

Sanen niwala iray anghel insan saray totoo, satan ya Anak so nanserbi bilang say Salita na Dios, say manunan Sakey a diad panamegley to et impasabi na Dios a mismo so instruksion ed sikara. (Uli. 8:30; Juan 1:1-13) Satan ya Anak so nibaki ed dalin bilang say Katawan a Jesu-Kristo. Nipaakar ed sikato, ibabaga na apuyanan a rekord: “Dakel a katooan so nankelkelaw ed panagbangat to.” Tan tinasian na saraman so akadngel ed sikato: “Anggapo ni too a nansalita na onia.” (Mat. 7:28; Juan 7:46) Masulok ya 40 danay a si Jesus so atukoy ed saray Ebanghelyo bilang Managbangat, tan diad maabig a rason. Dakel so naaralan tayo ed sikato nipaakar ed panagsalita tan panagbangat.

Lugan met na Biblia so sakey a kuritan nipaakar ed no panon ya inusar nen Jehova a Dios iray lalaki tan bibii a nanlapud nanduruman kipapasen ed bilay a manggawa ed linawa to. Arum ed sikara so angipasabi na antikey balet mapuersa iran mensahe. Dakel so agnansalita ed arap na dakel a dumerengel, balet ta matoor iran akibiang diad impantasi nipaakar ed tuan Dios tan say gagala to. Mapatnag, kaslakan so aliwan marunong a managpaliwawa, balet benendisyonan na Dios iray sagpot da. Makaaral itayo ed ibabaga na Biblia nipaakar ed no panon dan ginawa so ministeryo ra.—Sal. 68:11.

Siempre, say Biblia so aliwan sakey a libron-panaralan nipaakar ed panagpaliwawa ed publiko. Balet para ed saraman so manbasa tekep na pakatebek, lugan na satan so makanakanan impormasyon nipaakar ed epektibon panagsalita tan panagbangat. Panggunaetan na Minabang ed Edukasyon na Teokratikon Eskuelaan Parad Ministeryo so mangipaalagey ed satan a pundasyon.