Saray Kasal a Mapagalang ed Imaton na Dios tan Too

“Wala so sakey a bansal ed Cana . . . Si Jesus abagaan met tan saray babangatan to ed bansal.”—JUAN 2:1, 2.

1. Anto so ipapaimano na salaysay nipaakar ed inyakar nen Jesus diad Cana?

AMTA nen Jesus, say ina to, tan arum ed saray babangatan to so liket a nagamoran ed sakey a mapagalang a kasal diad limog na totoo na Dios. Pinagmaliw ni ingen nen Kristo ya alay abig so sakey a bansal diad impanggawa to ed primeron nikurit a milagro to ditan, ya angarum na liket ed satan ya okasyon. (Juan 2:1-11) Nayarin akaatendi kayo la tan nanliketan yo iray kasal na saray Kristiano a malabay a manlingkor ed si Jehova bilang maliket a sanasawa. Odino nayarin asingger lay pankasal yon mismo odino nayarin ontutulong kayo ed kaaro yo pian magmaliw a maaligwas so kasal to. Anto so nagawaan pian maaligwas so sakey a kasal?

2. Anto so impormasyon a walad Biblia nipaakar ed saray kasal?

² Amoria na saray Kristiano a makatulong a maong so bilin ed impuyan a Salita na Dios sano manplaplanon mankasal so sakey a laki tan bii. (2 Timoteo 3:16, 17) Tua, ag-idadatak na Biblia so detalyado iran totontonen parad sakey a Makristianon kasal. Tua itan lapud nanduruma so kustombre tan anggan saray legal a kakaukolanen unong ed lugar tan panaon. Alimbawa, diad Israel nensaman et anggapo so pormal a seremonya na kasal. Diad agew na kasal, awiten na nobyo so nobya to diad abung ton dili odino diad abung nen ama to. (Genesis 24:67; Isaias 61:10; Mateo 1:24) Sayan mapublikon kundang et ipapasen a sakey lan kasal, ya anggapo so pormal a seremonya a singa diad kaslakan a nagagawa iran kasal natan.

3. Anton okasyon ed Cana so pinagmaliw nen Jesus a maliket?

³ Sayan kundang et bibidbiren na saray Israelita bilang uksoyan ed panangasawa odino kasal. Kayari na satan, nayarin onla ira ed sakey a ponsia, a singa samay asalambit ed Juan 2:1. Oniay impangipatalos na dakel a bersion na Biblia ed satan a bersikulo: “Wala so sakey a kasal diad Cana . . .” Balet say salita ed orihinal a lenguahe so matukoy a nipatalos a “bansal” odino “ponsia na kasal.”a (Mateo 22:2-10; 25:10; Lucas 14:8) Ipapabitar na salaysay ya inmatendi si Jesus tan nanggawa na makapaliket a bengatla parad sakey a ponsia na kasal na Judio. Balet, say manunan punto et mandumaan so nagagawa ed ontan a kasal nensaman tan saray kaslakan a kasal natan.

4. Anton klase na kasal so pipilien na arum a Kristiano, tan akin?

⁴ Diad dakel a bansa natan, walaray legal a kakaukolanen a nepeg a kapeten na saray Kristianon malabay a mankasal. No akapet da la itan, nayarin mankasal ira ed antokaman a paraan ya aabobonan na ley. Satan so nayarin melag tan simplin seremonya a gawaen na sakey a huis, mayor, odino ministro ya autorisado na gobierno. Denesidi na arum so mankasal ed ontan a paraan, a nayarin alaen dan legal iran testigo so pigaran kakanayon odino Kristianon kakaaro ra odino basta imbitaan da ira pian miliket ed satan ya importantin okasyon. (Jeremias 33:11; Juan 3:29) Mipadpara, nayarin desidien na arum a Kristiano ya agmangiparaan na baleg a bansal odino ponsia a mankaukolan na malaknab a panagplano tan baleg a gastos. Imbes, nayarin iyuksoy da so simplin panangan a kaiba so maapit iran kakaaro ra. Antokaman so personal a panlabayan tayo ed sayan pamaakaran, nepeg tayon bidbiren a saray arum a matakken a Kristiano et nayarin walaan na saray panmoria a midumaan ed sikatayo.—Roma 14:3, 4.

5. Akin a labay na dakel a Kristiano a walay paliwawa ed kasal da, tan anto so ipabitar na satan?

⁵ Pipilien na maslak a Kristianon sankapareha a walay paliwawan nibase’d-Biblia diad kasal da.b Bibidbiren da a si Jehova so angiletneg ed panangasawa tan intarya to ed Salita to so makabat a bilin no panon ya ontalona tan magmaliw a maliket so panamaley. (Genesis 2:22-24; Marcos 10:6-9; Efeso 5:22-33) Tan labay na maslak a sankapareha a nakaiba iray Kristianon kakaaro tan kakanayon da ed sayan maliket ya okasyon. Ingen, panon tayon moriaen so malaknab a pandurumaan na legal iran kakaukolanen, totontonen, tan anggan say maslak a lokal iran kustombre? Konsideraen ed sayan artikulo iray situasyon ed nanduruman lugar. Arum so nayarin midumaan a tuloy ed amta yo la odino no anto so nagagawa ed lugar yo. Anggaman kuan, nipaimano so pigaran kaslakan iran prinsipyo odino aspekto ya importante ed saray lingkor na Dios.

Say Mapagalang a Kasal et Akakapet ed Legal Iran Kakaukolanen

6, 7. Akin a nepeg itayon interesado diad legal iran aspekto na panangasawa, tan panon tayon nagawaan iya?

⁶ Anggaman manepeg la so impangiletneg nen Jehova ed panangasawa bilang sagrado, saray gobierno na too so walaan na kontrol ed saray gawaen na saramay mankasal. Saya so matukoy. Oniay imbaga nen Jesus: “Bayaran yo ed Cesar so bengabengatlan kien nen Cesar, tan ed Dios so saray kien na Dios.” (Marcos 12:17) Mipadpara, oniay ingganggan nen apostol Pablo: “Ontulok komon so balang kamarerwa ed saray atagtagey a pakauley: ta anggapo so pakauley ya agkien na Dios; et saray pakauley a wala ingganggan ira na Dios.”—Roma 13:1; Tito 3:1.

⁷ Diad maslak iran bansa et say Cesar, odino saray sibil a pakauley, so mandetermina no siopa so kualipikadon mankasal. Kanian, sano nandesidin mankasal so duaran Kristiano a bulos a mangasawa unong ed Kasulatan, sikara so maalwar ya ontulok ed saray ley ed lugar da. Lalanoren na saya so pangala na lisensia, pangusar ed managkasal ya inautorisaan na gobierno, tan nayarin irehistro so nagawan kasal. Sanen kinaukolan nen Cesar Augustos so sakey ya “inkapadron” odino pamparehistro, tinmulok si Maria tan Jose kanian nambiahe ira ed Betlehem pian ‘paipadron’ odino manparehistro.—Lucas 2:1-5.

8. Panon kabiskeg so obligasyon na sanasawa ed balang sakey, tan anto so gagawaen na saray Tasi nen Jehova pian nipatnag da so pakatalos da ed satan?

⁸ Sano mankasal so duaran Kristiano diad paraan a legal tan bibidbiren na publiko, sikara so walaan la na obligasyon ed balang sakey diad imaton na Dios. Kanian, ag-uuliten na saray Tasi nen Jehova so sakey a seremonya na kasal diad pakawalaan na maminpigan legal a seremonya, nisay uliten da iray impansipanan da ed kasal, a singa diad koma-25 odino koma-50 ya anibersaryo na kasal na sanasawa. (Mateo 5:37) (Ibabaliwala na arum a relihyon so inabobonan na ley a seremonya na kasal ed sibil, lapud ibabaga ran aliwan lehitimo so sakey a panangasawa no anggapo so ritual a ginawa na pari odino klerigo a mangiyabawag ed sankapareha bilang asawan laki tan asawan bii.) Diad dakel a bansa, aautorisaan na gobierno so sakey a ministro na saray Tasi nen Jehova pian mangasal. No posible itan, nayarin labay ton gawaen itan a seremonya panamegley na sakey a paliwawa na kasal diad Kingdom Hall. Satan so pasen na tuan panagdayew tan matukoy a pasen parad sakey a paliwawan nipaakar ed uksoyan ya inletneg nen Jehova.

9. (a) Diad sibil a kasal, anto so nayarin desidien a gawaen na Kristianon sankapareha? (b) Panon a nayarin pibiangen iray mamatatken ed saray plano ed kasal?

⁹ Diad arum iran bansa, kakaukolanen na ley a say pankasalan na sakey a sankapareha et diad opisina na gobierno, a singa diad munisipyo, odino diad arap na aturon opisyal na gobierno. Kayari na sayan legal a kundang, mabetbet a dedesidien na saray Kristiano so pakawalaan na paliwawa na kasal diad Kingdom Hall ed satan met ya agew odino no ontumbok ya agew. (Agda labay ya onlabas so dakel ya agew ed baetan na sibil a seremonya tan say paliwawa ed Biblia, lapud kasal la ra ed arap na Dios tan ed too, pati diad imaton na Kristianon kongregasyon.) No say sankapareha a mankasal ed sibil et malabay a nawalaan na paliwawa diad Kingdom Hall, nepeg a masakbay da lan kerewen so permiso na mamatatken a kabiangan ed Komite na Kongregasyon Parad Serbisyo. Niarum ni ed pamekder da a maabig so reputasyon na sankapareha, seguroen na sarayan manangasikaso ya ag-ombana so oras na kasal ed regular iran pantitipon tan niyeskedyul iran programa diad Kingdom Hall. (1 Corinto 14:33, 40) Repasoen da met so antokaman iran preparasyon a kaliktan na mankasal nipaakar ed pangusar ed Kingdom Hall tan desidien da no kasin iyanunsio ra so kausar na satan.

10. No kinaukolan so pankasal ed sibil, panon iyan mangapekta ed paliwawa ed kasal?

¹⁰ Say matatken a manpaliwawa ed kasal so nepeg a mangiparungtal na mabilabilay, makapaseseg ed espiritual, tan mapagalang a paliwawa. No say sakey a sankapareha et nankasal lan inmuna diad sibil, ipabitar to a sikara so akasal la unong ed ley nen Cesar. No agginawa iray impansipanan ed kasal diad seremonya ed sibil, nayarin labayen na sankapareha so mangibalikas ed pansipanan da legan na paliwawa.c No sayan kasal ed sibil et angilaktip ed saray impansipanan balet ta labay na balon kasal a mansipanan ira ed arap nen Jehova tan ed kongregasyon, nayarin ibaga ra so sipanan da ed balang sakey diad past tense, a mangipapatnag a sikara so “impantipon” odino impankasakey la.—Mateo 19:6; 22:21.

11. Diad arum iran pasen, panon a kakasalen so sankapareha, tan antoy epekto na satan ed paliwawa ed kasal?

¹¹ Diad arum iran pasen, nayarin agkakaukolanen ed sakey a sankapareha so mankasal panamegley na antokaman a seremonya, anggan diad arap na sakey ya opisyal na gobierno. Nagawa so kasal sano iparungtal da so apirmaan a rehistro na kasal da diad sakey ya opisyal. Diad ontan, nirehistro so sertipiko na kasal. Diad onian paraan et ikonsidera la so sankapareha bilang asawan laki tan bii, a satan so petsa na kasal da. Unong ya asalambit la ed tagey, nayarin labay na akasal lan sankapareha ya isublay a tampol ed satan ya impangirehistro so sakey a nibase’d-Biblia a paliwawa diad Kingdom Hall. Say matatken ya agin laki ya apilin manpaliwawa so mangipakabat ed amin ya inmatendi a say sankapareha et akasal la lapud kasumsumpal ya impangirehistro. Antokaman iran pansipanan et nayarin gawaen unong ed nidatak ed parapo 10 tan diad paimano’d-leksab na satan. Saramay onatendi ed Kingdom Hall so miliket ed sankapareha tan nagunggonaan ira ed simbawa na Salitay Dios.—Kanta nen Solomon 3:11.

Akaugalian tan Sibil Iran Kasal

12. Anto so akaugalian a kasal, tan anto so matukoy a gawaen kayari na ontan a kasal?

¹² Diad arum a bansa, saray sankapareha so onloloob ed tatawagen ya akaugalian a kasal (odino kasal ya unong ed kustombre na tribu). Agtutukoyen na saya so duaran indibidual a manaamong labat, nisay tutukoyen na satan so paniiba a nayarin aawaten la diad arum iran lugar balet ta aliwan sigpot ya akasal ed legal a paraan.d Say tutukoyen tayo et say panangasawa unong ed bibidbiren na publiko a kustombre na tribu odino lugar. Nayarin lalanoren na saya so sigpot a pambayar tan pangawat na dasel, a gawaen ton legal tan Makasulatan so impanasawa na sakey a sankapareha. Momoriaen na gobierno so ontan ya akaugalian a kasal bilang lehitimo, legal, tan atekepan na obligasyon. Kayari na satan, kaslakan a posible so pangirekord odino pangirehistro ed agawan akaugalian a kasal, tan diad panggawa ra ed satan et makaawat so sankapareha na opisyal a sertipiko. Say pangirehistro et manalimbeng ed sankapareha odino parad asawan bii no sikato so nabalo tan parad siopaman a magmaliw ya ananak da. No wala so siopaman ya onloob ed akaugalian a kasal, sikaray pasesegen na kongregasyon ya irehistro da itan a tampol anggad posible. Makapainteres, ompatnag a diad silong na Mosaikon Ganggan et opisyal a nirekord iray kasal tan inkianak.—Mateo 1:1-16.

13. Kayari na akaugalian a kasal, anto so matukoy a gawaen nipaakar ed paliwawa ed kasal?

¹³ Say sankapareha a legal a pinankasakey ed ontan a proseso na akaugalian a panangasawa so magmaliw ya asawan laki tan bii sano nagawa so ontan a kasal. Unong a nipaimano la, saray Kristiano ya onloob ed ontan a legal a kasal so nayarin manpilalek a walay paliwawa ed kasal da, tekep na pansipanan da, diad Kingdom Hall. No ontan so nagawa, ipaamta na espiker a say sankapareha et akasal la unong ed saray ley nen Cesar. Maminsan labat iyan paliwawa. Wala so sakey a kasal, a diad sayan kipapasen et samay legal ya akaugalian a kasal (kasal ya unong ed kustombre na sakey a tribu), tan sakey a Makasulatan a paliwawa. No posiblin mantumbokan la iyan duaran uksoyan, a matukoy no diad saman met lan agew, magmaliw a mapagalang so Makristianon kasal diad lugar yo.

14. Anto so nayarin gawaen na sakey a Kristiano no posible so akaugalian a kasal tan say kasal ed sibil?

¹⁴ Diad arum a bansa a bibidbiren a legal so akaugalian a kasal, wala met iray uksoyan parad kasal ed sibil (odino, kasal unong ed nidatak a ley). Say kasal ed sibil so gendat a gagawaen diad arap na opisyal na gobierno, tan nayarin mangilaktip itan ed pansipanan na mankasal tan pampirma ed rehistro. Mas pipilien na arum a Kristianon sankapareha so mankasal ed sibil nen say akaugalian a kasal. Anggapo so legal a kakaukolanen ed saraya; kada sakey ed saratan a paraan et legal la. Onaplika met dia so nibaga ed parapo 9 tan 10 nipaakar ed paliwawa ed kasal tan saray pansipanan. Say manunan bengatla et say sankapareha so akasal la ed paraan a mapagalang ed imaton na Dios tan too.—Lucas 20:25; 1 Pedro 2:13, 14.

Pansiansiaen a Mapagalang so Kasal

15, 16. Panon a nalalanor so panamagalang diad panamaley?

¹⁵ Sanen linmesa so problema ed panamaley na ari na Persia, walay makagunggonan imbilin na sakey a manunan mananimbawa a manngaray Memucan, salanti, ‘amin ya asawan bibii et iter da ed kaasawaan da so dayew.’ (Ester 1:20) Diad saray panamaley na Kristiano, satan a bilin et agla nakaukolan ya iganggan ni na siopaman a toon ari; saray kaasawaan a bibii so malabay a mangigalang ed kaasawaan da. Ontan met, saray Kristianon kaasawaan a lalaki so mangigalang ed asawa ra. (Uliran 31:11, 30; 1 Pedro 3:7) Say pangipatnag na galang ed panamaley tayo so agnepeg a gawaen kayari na dakel nin taon. Nepeg ya ipatnag la itan diad gapo, on, manlapud kasal a manpatuloy.

¹⁶ Aliwa lambengat a say laki tan bii—say asawan laki tan bii—so nepeg a mangipatnag na panamagalang diad agew na kasal da. No sakey a Kristianon matatken so manpaliwawa diad kasal, sikato met so nepeg a mangipatnag na galang. Say paliwawa to so nepeg ya ipaarap ed sankapareha. Bilang panamagalang ed sankapareha, agnepeg ya ipabitar na espiker iray makapalpalek odino gawa-gawan istorya. Nepeg ya agto ilaktip iray personal a tuloy ya obserbasyon to a nayarin mamabaing ed sankapareha tan saray dumerengel. Imbes, panggunaetan toy magmaliw a maligsa tan makapabiskeg, ya ipapabitar to so Angigapo na panangasawa tan say alay abig a bilin To. On, say mapagalang a paliwawa na matatken nipaakar ed kasal so makatulong pian say kasal et mamagalang ed si Jehova a Dios.

17. Akin a wala so legal ya aspekto na saray kasal na Kristiano?

¹⁷ Nayarin naimano yo ed sayan artikulo so dakel iran punto nipaakar ed legal iran detalye na kasal. Nayarin walaray pigaran aspekto ya agdirektan onaplika ed lugar yo. Ingen, amin tayo so nepeg a makaamta ya importantin tuloy a saray uksoyan na kasal ed limog na saray Tasi nen Jehova et mangipatnag na respeto ed saray ley, ed saray kakaukolanen nen Cesar. (Lucas 20:25) Oniay impaseseg ed sikatayo nen Pablo: “Bayaran yo so nabebetangan da ya amin: say buis dia ed akanbetang na buis; say impuesto dia ed akan-impuesto; . . . say galang dia ed akan-galang.” (Roma 13:7) On, matukoy parad saray Kristiano, a manlapu la’d agew na kasal da et ipatnag da so panamagalang ed uksoyan ya inletneg na Dios parad panaon tayo.

18. Anto nin uksoyan nipaakar ed kasal so manepeg ya imanoen, tan iner so pakaromogan tayo na impormasyon nipaakar ed saya?

¹⁸ Diad dakel a kasal na Kristiano et walay onsusublay a sosyal a panduroypo—sakey a ponsia, panangan, odino reception. Nodnonoten ya inmatendi si Jesus ed ontan a ponsia. No wala so ontan a panduroypo, panon a makatulong ed sikatayo so simbawa na Biblia pian naseguro a mamagalang met itan ed Dios tan mangipatnag na maabig parad saray balon kasal tan ed Kristianon kongregasyon? Sayan bengatla so singbaten ed ontumbok ya artikulo.e

Paneknekan Yoy Pananisia Yo Diad Panamegley na Kabibilay Yo

‘Say pananisia, no anggapo so saray gawa to et inatey.’—SANTIAGO 2:17.

1. Akin a saray akadkaunan Kristiano et angimano ed parehon pananisia tan saray gawa?

PINANEKNEKAN na saray akadkaunan Kristiano so pananisia ra diad amin ya aspekto na mismon kabibilay da. Pinaseseg nen babangatan a Santiago so amin a Kristiano: “Mananumpal kayo komon na salita, ya aliwan dumerengel labat.” Oniay inyarum to: “Unong a say laman ya asian ed espiritu et inatey, ontan met say pananisia ya andi gawa inatey.” (Santiago 1:22; 2:26) Manga 35 a taon kayari ton insulat iratan, nantultuloy a pinaneknekan na dakel a Kristiano so pananisia ra diad panamegley na matukoy iran gawa. Balet makapaermen ta aliwan ontan so ginawa na arum. Kinomendaan nen Jesus so kongregasyon na Smirna; ingen ta oniay inkuan to ed dakel a kabiangan na kongregasyon ed Sardis: ‘Siak amtak so saray gawa yo, a wala so ngaran yo a mabilay kayo, et anta inatey kayo.’—Apocalipsis 2:8-11; 3:1.

2. Antoray nepeg ya itepet na saray Kristiano ed inkasikaran dili nipaakar ed pananisia ra?

² Unong ed satan, pinaseseg nen Jesus iramay walad Sardis—tan nagkalalon onaplika itan ed amin a manbasa ed saray salita to ed saginonor—pian paneknekan da so inmunan aro ra parad Kristianon katuaan tan mansiansia iran aliing ed espiritual. (Apocalipsis 3:2, 3) Nayarin tepetan tayo so inkasikatayo: ‘Komusta iray gagawaen ko? Kasin napatnagan a tuloy ed saray kiwas ko a gagawaen koy anggaay nayarian ko pian paneknekan so pananisiak diad amin a gagawaen ko, anggan diad saray aspekto ya agdirektan mitunosan ed panagpulong odino ed saray miting ed kongregasyon?’ (Lucas 16:10) Dakel iran aspekto ed bilay so nikonsidera, balet konsideraen tayo so sakey labat ya aspekto: saray sosyal a panduroypo, pati saramay panduroypo a mabetbet a nagawa kayari na saray Kristianon kasal.

Saray Angkelag a Panduroypo

3. Anto so punto de bista na Biblia nipaakar ed iyatendi ed saray panduroypo?

³ Apresyaen na maslak ed sikatayo no naimbitaan itayo ed sakey a panduroypo na maliket iran Kristiano. Si Jehova et “maliket a Dios,” kanian labay to met a manliket iray lingkor to. (1 Timoteo 1:11, NW) Impaisulat to ed si Solomon diad Biblia iyan katuaan: “Diad saman binilin ko so liket, lapu ed say too andian na magmaong a bengatla ed leksab na banwa, nen say pangan, tan say yinum, tan say panliket; ta satan mansiansia ed sikato ed kimey to ed saray amin ya agew na pambilay to.” (Eclesiastes 3:1, 4, 13; 8:15) Say ontan a panliket so nayarin nagawa diad sakey a panangan na pamilya odino diad sakey a melag a panduroypo na saray tuan managdayew.—Job 1:4, 5, 18; Lucas 10:38-42; 14:12-14.

4. Anto so nepeg ya imanoen na sakey a mangiyuuksoy na sakey a panduroypo?

⁴ No sikayo so mangiyuuksoy tan responsable ed ontan a panduroypo, nepeg a maalwar yon nonoten so plano yo, anggaman say imbitaan yo et daiset labat a mananisia diad sakey a panangan tan makaaron pantotongtong. (Roma 12:13) Seguroen yon “nagawa komon so sarayan amin ed kasimpitan,” ya iwawanwan na ‘kakabatan a manlapu ed tagey.’ (1 Corinto 14:40; Santiago 3:17) Oniay insulat nen apostol Pablo: “Anggan mangan kayo sirin, odino oninum, odino antokaman a gawaen yo, gawa yo ya amin ed gloria na Dios. Agkayo mangiiter na sengeg na katiroran.” (1 Corinto 10:31, 32) Anto so pigaran aspekto a mankaukolan na imano? Say masakbay lan pangiplano ed satan so makatulong pian naseguro yon say gawaen yo tan saray bisita yo et pakapatnagan na mabilay a pananisia yo.—Roma 12:2.

Anton Klase na Panduroypo?

5. Akin a nepeg a mannonot a maong so managparawes no kasin sikato so mangiserbi na de-alkohol ya iinumen tan mangipatogtog na musika?

⁵ Dakel a manpaparawes so nipaarap ed isyu no kasin mangiserbi ira na de-alkohol ya iinumen. Ag-iratan nakaukolan pian magmaliw a makapabiskeg so panduroypo. Nodnonoten pa so impangitarya nen Jesus ed sakey a panangan parad sakey a baleg a grupo—pinarakel to so tinapay tan sira. Ag-ibabaga na salaysay a sikatoy mamilagron angitarya na alak, anggaman amta tayo a nayarian ton gawaen itan. (Mateo 14:14-21) No desidien yo so mangiserbi na de-alkohol ya iinumen diad sakey a panduroypo, gawaen a kabkaabigan labat itan, tan seguroen a walaray aliwan de-alkohol ya iinumen a napampilian na saramay mas malabay ed saratan. (1 Timoteo 3:2, 3, 8; 5:23; 1 Pedro 4:3) Agbalot pipiliten so siopaman ya oninum na alak a mangetket a “singa say uleg.” (Uliran 23:29-32) Komusta met so nipaakar ed musika odino kansionan? No walay musika diad panduroypo yo, seguradon maalwar yon pilien iray sonata, pati say togtog tan liriko. (Colosas 3:8; Santiago 1:21) Amoria na dakel a Kristiano a say pangipatogtog na Kingdom Melodies odino anggan say sankakaiban pangansion ed ontan iran kanta so mamawala na maabig ya atmospera. (Efeso 5:19, 20) Tan, siempre, naynay ya imanoen so kakasil ta pian say musika et agmangamper ed maliket a pantotongtong odino agmakadisturbo ed kakaabay.—Mateo 7:12.

6. Panon a nipatnag na managparawes a mabilay so pananisia to no nipaakar ed pantotongtong odino arum niran aktibidades?

⁶ Diad sosyal a panduroypo, nayarin pantongtongan na saray Kristiano so nanduruman tema, mangibasa na sakey a materyal, odino mangisalaysay na makapainteres iran eksperiensya. No aliwa lan marakep so aarapen na tongtongan, mataktikan ipaarap itan na managparawes diad maabig a pantongtongan. Nepeg met a sikatoy alerto ya anggapo so manosolo ed pantotongtong. No nanengneng to ya ontan lay nagagawa, sikato so mataktikan mansalita tan pibiangen to so arum diad tongtongan, a nayarin pansalitaen to met iray kalangweran odino iparungtal to so sakey a tema a mangisagyat na nanduruman komento. Panliketan na parehon kalangweran tan matatatken so onian aspekto na panduroypo. Bilang manangorganisa, igiya iray pamaakaran diad makabat tan mataktikan paraan, tan say ‘inkamakatunongan yo et naamtaan’ na amin ya inmatendi. (Filipos 4:5, NW) Natebek da a sikayo so walaan na mabilay a pananisia, a mangaapekta ed amin ya aspekto na bilay yo.

Saray Seremonya tan Ponsia na Kasal

7. Akin a manepeg ya ikonsidera iray plano ed kasal tan saray nagawan panduroypo?

⁷ Say sakey ya espisyal ya okasyon a panliketan et say Makristianon kasal. Saray lingkor na Dios nensaman, pati si Jesus tan saray babangatan to, so mabulos ya akibiang ed ontan iran maliket ya okasyon, pati samay walaay ponsia. (Genesis 29:21, 22; Juan 2:1, 2) Balet diad agano niran panaon, ipapabitar na eksperiensya a say panangiplano ed saray nagawa diad kasal so mankaukolan na nikaduman sagpot ta pian nipatnag so maong a panagdesisyon tan inkabalanse bilang Kristiano. Ingen, saraya so normal ya aspekto na bilay a mangiiter na pankanawnawa ed sakey a Kristiano a mangipatnag ed pananisia to.

8, 9. Panon a saray gagawaen ed dakel a kasal et mamepekder ed say nabasa tayo ed 1 Juan 2:16, 17?

⁸ Ipapasen na dakel a totoon agmakaamta odino agmannononot ed saray maridios a prinsipyo a say kasal et sakey ya okasyon odino sakey a baraan parad alablabas a panliliket. Diad sakey a magasin ed Europa, oniay imbaga na sakey a biin kapkapankasal to nipaakar ed kasal ton “singa ari tan reyna”: ‘Linmugan kami ed karwahen guguyoren na apatiran kabayo insan ontutumbok ed satan so 12 a karomata a guguyoren na kabayo tan sakey a karwahe ya akaluganan na banda a mantotogtog na musika. Insan walay espisyal iran putahi tan alay abig a musika; talagan ekselente iman. Agawa so unong a kinaliktan ko, singa ak reyna ed saman ya agew.’

⁹ Anggaman nanduruma iray kustombre ed kada bansa, sarayan balikas so malinew a mangipapabitar ed insulat nen apostol Juan: “Amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.” Nilitrato yo kasi ed nonot yo so matakken ed espiritual a Kristianon sankapareha a malabay a nawalaan na kasal a “singa ari tan reyna” ya atekepan na magastos tan singa pantasya a panduroypo? Imbes, nepeg a napatnagan ed panmoria ra a say “mangunor ed linawa na Dios onsiansia lawas.”—1 Juan 2:16, 17.

10. (a) Parad kabkaabigan a kasal, akin ya importante so panagplano? (b) Panon so nepeg a panggawa na saray desisyon nipaakar ed saramay imbitaan?

¹⁰ Labay na saray Kristianon sankapareha so magmaliw a realistiko tan makatunongan, tan say Biblia so makatulong ed sikara. Anggaman importantin okasyon so agew na kasal, amta ra a gapoan labat itan na bilay na duaran Kristiano bilang sanasawa a walaan na ilalon manbilay ya andi-anggaan. Ag-ira obligado a nawalaan na baleg a ponsia ed kasal da. No desidien da so mangiyuksoy na ontan a panduroypo, kuentaen da so gastos tan nonoten da so klase na panduroypo. (Lucas 14:28) Diad bilay dan dua bilang Kristiano, say asawan laki so ulo unong ed Kasulatan. (1 Corinto 11:3; Efeso 5:22, 23) Kanian say nobyo so manunan responsable ed bansal. Siempre, sikato so maaron ontupleg ed asawaen to nipaakar ed no sioparay labay dan imbitaan odino no pigaray imbitaan da ed bansal da. Nayarin aliwan posible odino praktikal so pangimbita ed amin a kakaaro tan kakanayon; kanian nakaukolan a gawaen so pigaran makatunongan a desisyon tekep na kapaabebaan. Nepeg a manmatalek so sankapareha a makatalos tan ag-ombarong so arum a kaparan Kristiano ya agda naimbitaan.—Eclesiastes 7:9.

“Mananguksoy na Bansal”

11. Anto so betang na “mananguksoy na bansal” diad sakey a kasal?

¹¹ No desidien na sankapareha so mangiyuksoy ed sakey a panduroypo pian selebraan so kasal da, panon dan naseguro a mansiansian mapagalang so okasyon? Diad loob na dakel lan dekada, aapresyaen na saray Tasi nen Jehova so kakabatan diad pangiyuksoy ed sakey ya aspekton asalambit ed ponsia ya inatendian nen Jesus diad Cana. Wala nensaman so sakey a “mananguksoy na bansal” odino direktor ed bansal, a maseguron sakey a responsablin kapananisiaan. (Juan 2:9, 10) Ontan met, pilien na makabat a nobyo so sakey a matatken ed espiritual a Kristianon agin laki parad sayan importantin betang. No naamtaan to la iray pilalek tan panlabayan na nobyo, gawaen na direktor ed bansal iray detalye sakbay tan legan na panduroypo.

12. Anto so nepeg a nodnonoten na nobyo nipaakar ed de-alkohol ya iinumen?

¹² Mitunosan ed asingbat la ed parapo 5, dedesidien na arum a sankapareha so agpangiserbi na saray de-alkohol ya iinumen diad bansal da ta pian napaliisan so sobran paniinuman a maneral ed liket tan aligwas na okasyon. (Roma 13:13; 1 Corinto 5:11) Ingen, no walay paiserbi ran de-alkohol ya iinumen, nepeg a seguroen na nobyo a kabkaabigan labat so iserbi odino itarya. Wala so alak ed bansal ya inatendian nen Jesus diad Cana, tan sikato so angitarya na alay abig ya alak. Makapainteres ta oniay inkomento na mananguksoy ed saman a bansal: “Balang too iparungo to ya unona so maong ya alak; et sano saray totoo akainum ira la a maong, insan say makapuy: sika inyatol mo so maong ya alak anggad natan.” (Juan 2:10) Maseguron ag-impaseseg nen Jesus so pambuanges, lapud minoria to itan a makapuy. (Lucas 12:45, 46) Diad impangibalikas na manangasikaso ed pankelkelaw to lapud kalidad na alak, impatnag to a wala lay pigaran bisita ed bansal a naimano ton abuek la. (Gawa 2:15; 1 Tesalonica 5:7) Kanian, nepeg a seguroen na nobyo tan say napanmatalkan a Kristianon tinuro ton direktor ed bansal ya amin ya inmatendi et ontulok ed sayan malinew a bilin: “Agkayo manbuanges na alak, a sikato so kawalaan na pisesepakan.”—Efeso 5:18; Uliran 20:1; Oseas 4:11.

13. Anto so nepeg a nodnonoten na sankapareha no mangiyuksoy ira na musika diad bansal da, tan akin?

¹³ Singa diad arum iran panduroypo, no wala so musika et manepeg ya imanoen so kakasil na satan ta pian makapandedengelan so totoo no mantongtong ira. Oniay naimano na sakey a Kristianon matatken: “Diad iyaaralem lay labi, sano ondadakep lay tongtongan odino ginmapo la so sayawan, onkakasil la no maminsan so musika. Say makalnan musika diad gapo so nayarin magmaliw lan maksil tan mangamper lay pantotongtong. Say bansal et sakey a pankanawnawa parad maabig a panlilimog. Agaylan makapaermen no sayan okasyon et deralen na maknol a musika!” Diad sayan pamaakaran met a nakaukolan a responsablin onkiwas so nobyo tan say direktor ed bansal, ya ag-imamatalek ed saray managtogtog, inarkila man odino andi, so pangontrol ed klase tan kakasil na musika. Oniay insulat nen Pablo: “Amin a gawaen yo, dia ed salita odino gawa, gawaen yo ya amin ed ngaran na Katawan tayo a Jesus.” (Colosas 3:17) Sano onsempet iray bisita kayari na bansal (odino ponsia), kasin nanonotan da so musika a mangipapatnag a gagawaen na sankapareha so amin a bengatla diad ngaran nen Jesus? Ontan so nepeg a kipapasen.

14. Anto so nepeg a makapaliket a nanonotan na saray Kristiano diad sakey a kasal?

¹⁴ On, say mauksoy a kasal so alay abig a nanodnonotan. Si Adam tan Edyta, a sanasawa ed loob la na 30 taon, so nankomento nipaakar ed sakey a kasal: “Talagan nalikna yo so Makristianon kaliberliber. Walaray kanta na panangidayew ed si Jehova ingen ta wala met so pigaran maabig a programa. Say pansasayaw tan musika so agtanton importante. Balibali tan makapabiskeg, tan amin a bengatla et mitunosan ed saray prinsipyo na Biblia.” Malinew, baleg so nagawaan na nobyo tan nobya pian napaneknekan da so pananisia ra panamegley na saray gawa ra.

Saray Regalo ed Kasal

15. Anton simbawa na Biblia so niyaplika nipaakar ed saray regalo ed kasal?

¹⁵ Diad dakel a bansa et kaslakan la parad saray kakaaro tan kakanayon so manregalo ed saramay mankasal. No labay yo so manregalo, anto so nayarin nodnonoten yo? Bueno, tandaan so inkuan nen apostol Juan nipaakar ed “maapan gloria na bilay.” Insiglaot to so ontan a panagpangta, aliwan ed saray Kristianon mangipapatnag na pananisia ra diad gawa ra, noagta dia ed saray walad ‘mundon mangangga.’ (1 Juan 2:16, 17) Nipaakar ed apuyanan ya imbaga nen Juan, nepeg kasin iyanunsio na saray balon-kasal so kangaranan na amin a nanregalo? Saray Kristiano ed Macedonia tan Acaya so angiter na kontribusyon parad saray agagi ed Jerusalem, balet anggapo so nabasa a niyanunsio so kangaranan da. (Roma 15:26) Dakel a Kristiano so agmaparungtal a manreregalo imbes ya agmanepeg ya ipaimano ra so inkasikara. Nipaakar ed saya, repasoen so simbawa nen Jesus a walad Mateo 6:1-4.

16. Anto so gawaen na saray balon-kasal pian agnasakitan so liknaan na arum no nipaakar ed saray regalo ed kasal?

¹⁶ Say pangipakabat ed saray nanregalo so “pansengegan na kompetisyon” no siopa so angiter na sankarakpan odino sankamablian a regalo. Sirin, saray makabat a Kristianon balon-kasal so agmangiyanunsio ed kangaranan na saray nanregalo. No iyanunsio so kangaranan na saray nanregalo, nayarin niiyan ed kababaingan so arum a nayarin agmakapanregalo. (Galacia 5:26, NW; 6:10) Tua, aliwan makapuy no amtaen na nobyo tan nobya no siopa so angiter na sakey a regalo. Nayarin naamtaan da ed sakey a matukoy a kard ya akatekep ed regalo balet agda itan ibabasa ed publiko. Sano manaliw, mangiter, tan mangawat na saray regalo ed kasal, walaan itayo na pankanawnawan mamaneknek ya anggan diad sayan pribadon pamaakaran et apektado na pananisia tayo iray kiwas tayo.a

17. Saray Kristiano so nepeg a nawalaan na anton kalat nipaakar ed pananisia tan gawa ra?

¹⁷ Say pamaneknek ed pananisia tayo so maseguron aglambengat mangilalanor ed pambilay a malinis ed moral, iyatendi ed Makristiano iran pantitipon, tan pibiang ed panagpulong a kimey. Komon ta amin tayo so nawalaan na mabilay a pananisia a mangaapekta ed amin a gawaen tayo. On, nipatnag tayo so pananisia tayo diad panamegley na saray gawa ya “ayadyari” odino sigpot ya agawaan, a mangilaktip ed saray aspekto na bilay a siningbat la.—Apocalipsis 3:2.

18. Panon tayon napaneknekan a tua iray salita ed Juan 13:17 nipaakar ed saray Makristianon kasal tan panduroypo?

¹⁸ Kayari na impangipatnag nen Jesus ed maabig ya alimbawa parad saray matoor ya apostol to diad mapaabeban impanguras to ed salisali ra, oniay inkuan to: “No amta yo so sarayan bengatla, mapalar kayo no sikaray gawaen yo.” (Juan 13:4-17) Diad lugar a panaayaman tayo natan, nayarin agla nakaukolan odino aliwan normal so panguras ed sali na arum a too, a singa say bisita ed abung tayo. Balet, unong ed kinonsidera tayo ed sayan artikulo, wala niray arum ya aspekto na bilay a nipatnag tayo so pananisia tayo diad maaro, makonsidera iran gawa, pati saramay bengatlan misiglaotan ed sosyal iran panduroypo tan saray Kristianon kasal. Nipatnag tayo so pananisia tayo balanglan no mankasal itayo odino imbitado itayo ed kasal odino onatendi ed maliket a panduroypo na saray Kristiano a malabay a mangipatnag na pananisia ra diad panamegley na saray kiwas da.

[Paimano ed leksab]

Panon Yon Ebatan?

Panon yon napaneknekan so pananisia yo:

• sano mangoorganisa kayo na sosyal a panduroypo?

• sano mangiyuuksoy kayo na kasal odino ponsia?

• sano mangiiter odino mangaawat kayo na regalo ed kasal?

[Litrato ed pahina 24]

Anggan sano daiset labat so imbitaan tayo, paiwanwan itayo ed ‘kakabatan a manlapud tagey’

Pagmaliwen Yon Makapalikliket tan Mapagalang so Agew na Kasal Yo

“SAY agew na kasal ko et sakey ed saray makabkabaliksan tan makapalikliket ya agew ed bilay ko,” so kuan nen Gordon, a ngalngali lan 60 taon to ed estado. Akin a makabkabaliksan so agew na kasal parad saray tuan Kristiano? Satan so agew a sikaray manggawa na sagradon pisisipanan ed saramay papablien da—diad kapareha ra tan diad si Jehova a Dios. (Mateo 22:37; Efeso 5:22-29) On, labay na saray manplaplanon mankasal a maliket so agew na kasal da, balet labay da met a pagalangan so Angigapo na panangasawa.—Genesis 2:18-24; Mateo 19:5, 6.

Anto so gawaen na nobyo pian magmaliw a mas mapagalang iyan maliket ya okasyon? Anto so nagawaan na nobya pian nipatnag to so panamagalang ed asawa to tan ed si Jehova? Panon a makatulong so arum ya onatendi pian magmaliw a maliket so agew na kasal? Naebatan iratan a tepet diad pangikonsidera ed pigaran prinsipyo na Biblia, tan diad pangiyaplika ed sarayan prinsipyo et naparaisetan iray onlesan problema a makaderal ed sayan espisyal ya okasyon.

Siopa so Akanresponsabilidad?

Diad dakel a bansa et walaray ministro na saray Tasi nen Jehova a legal a mangakasal. Anggan diad saray pasen a kakaukolanen na ley so manpakasal ed huis, nayarin labay na mankasal a walay paliwawa a nibase ed Biblia. Diad ontan a paliwawa, say nobyo so kaslakan a nakekerew a mangipatnag ed inter na Dios a betang to bilang ulo na pamilya. (1 Corinto 11:3) Sirin, say nobyo so walaan na manunan responsabilidad no anto so nagawa ed kasal. Siempre, masakbay lan gagawaen iray mismon uksoyan ed seremonya na kasal tan diad antokaman a panduroypo ya onsublay ed satan. Akin a nayarin mamalesa iya na saray problema?

Sakey lan rason et sasalien a kontrolen na saray kakanayon na sakey a partido odino ed biek a partido iray plano ed kasal. Oniay inkuan nen Rodolfo, a dakel lay kinasal to: “No maminsan, say nobyo so dedesdesen a maong na kakanayon, nagkalalo la no ontutulong iran manbayar parad ponsia na kasal. Nayarin walaray ipipilit dan nagawa ed seremonya na kasal tan diad ponsia. Saya so mangiyaabeba ed Makasulatan a betang na nobyo bilang say akanresponsabilidad ed okasyon.”

Oniay inkuan nen Max, a masulok lan 35 taon ton mangakasal: “Say naiimanok a maslak a nagagawa et say nobya so mandedesisyon no anto so nagawa ed kasal tan ponsia, ya anggapoy tanton nagawaan na nobyo.” Si David, a dakel met lay kinasal to, so angikuan: “Saray nobyo so ag-apasal a mangidaulo tan diad kaslakan et agtanton mibabali ed saray panagparaan ed kasal.” Panon a nagawaan na nobyo so responsabilidad to diad epektibon paraan?

Say Pitatalosan so Mangarum na Liket

Pian maaligwas a nagawaan na nobyo so responsabilidad to diad panagparaan ed kasal, sikato so nepeg a mitalosan diad epektibon paraan. Oniay mabitar ya inkuan na Biblia: “Ed kaandian na simbawa, saray kanonotan nabagbag.” (Uliran 15:22) Balet, napaliisan so dakel a pakadismayaan no saray preparasyon ed kasal et itongtong nin unona na nobyo ed nobya to, diad saray kapamilyaan da, tan ed arum niran makapangiter na maabig a simbawa manlapud Biblia.

On, importantin pantongtongan nin unona na mankasal no antoray plano tan posiblin gawaen da. Akin? Bueno, imanoen iray komento nen Ivan tan say asawa ton si Delwyn, a maliket a sanasawa diad loob na dakel lan taon, anggaman mandumaan so kultura ra. No nodnonoten da iray implano ra ed kasal da, oniay inkuan nen Ivan: “Walaray labalabay kon nagawa ed kasal ko, laktip lay sakey a ponsia a kaiba so amin a kakaarok, sakey a wedding cake, tan say nobyak et akasulong na amputin trahe de boda. Diad biek a dapag, say labay nen Delwyn et melag tan simplin kasal ya anggapo so wedding cake. Ninonot to ni ingen a simpli labat so isulong to imbes a trahe de boda.”

Panon ya akapanpaknaan iyan sankapareha anggaman mandumaan iray panlabayan da? Diad panamegley na maabig tan matuan pitatalosan. (Uliran 12:18) Oniay inkuan ni nen Ivan: “Inaral mi iray nibase’d-Biblia ya artikulo nipaakar ed saray kasal, a singa saramay nipalapag ed The Watchtower na Abril 15, 1984.a Akatulong ed sikami iyan artikulo pian nawalaan na espiritual a panmoria ed sayan okasyon. Lapu ed mandumaan ya abenegan mi, kinaukolan min ikompromiso so pigaran aspekto na personal iran panlabayan mi. Inmadapta kami ed balang sakey.”

Ontan met so ginawa di Aret tan Penny. Nipaakar ed agew na kasal da, oniay inkuan nen Aret: “Nantongtongan mi nen Penny so nanduruman pilalek mi ed kasal, tan awalaan kami na mauksoy a paknaan. Impikasi mi so panamendisyon nen Jehova ed saman ya agew. Kinerew ko met so bilin na atateng mi tan arum niran matatken lan sanasawa diad kongregasyon. Akatulong a maong iray suhestion da. Bilang resulta, balibali so kasal mi.”

Pansiansiaen so Kagalangan Diad Panangawes tan Panag-ayos

Siempre, labay na nobyo tan nobya a marakep so kawes da ed kasal. (Salmo 45:8-15) Nayarin mangigana ira na panaon, sagpot, tan kuarta parad matukoy a kawesen. Dinan iran prinsipyo ed Biblia so makatulong pian makapampili ira na mapagalang tan marakep a kawes?

Konsideraen met so isulong na nobya diad okasyon. Anggaman nanduruma so estilo na saray totoo tan bansa, onaplika so simbawa na Biblia anggan iner a pasen. Saray bibii so ‘manpales na masimpit, a manparakep ira a mabinta tan madangka.’ Saya so onaplika ed saray Kristianon bibii ed amin a panaon, tan anggan diad agew na kasal da. Diad tua, say maliket a kasal et agmankaukolan na “kawes ya ankabli.” (1 Timoteo 2:9; 1 Pedro 3:3, 4) Agaylan makapaliket no niyaplika iyan bilin!

Oniay inkomento nen David, ya asalambit la ed gapo: “Panggugunaetan na maslak iran sankapareha so itulok ed saray prinsipyo na Biblia, tan nakomendaan ira. Balet, walaray kipapasen a saray trahe de boda na saray nobya tan abay-a-bibii et agmasimpit, abebbeba so lewlew na kawes da, odino mankaninag iratan.” Sanen kinatongtong na sakey a Kristianon matatken so nobya tan nobyo sakbay na kasal da, tinulongan to ira pian napansiansia ra so maespiritual a panmoria. Panon? Tinepetan to ra no kasin say plaplanoen dan isulong et masimpit a tuloy ya isulong diad sakey a Makristianon pantitipon. Tua, say estilo na kawes et nayarin midumaan ed say isusulong ed regular a pipiaral, tan say isulong ed kasal et nayarin pakapatnagan na lokal a kustombre, balet say kasimpitan et nepeg a mitukoyan ed mapagalang iran estandarte na Kristiano. Anggaman ipapasen na arum a taga-mundo a mapeget so moral ya estandarte na Biblia, maliket iray tuan Kristiano lapud agda aabuloyan ya impluensyaan ira na mundo.—Roma 12:2; 1 Pedro 4:4.

“Imbes a nonoten mi ya importantin tuloy iray kawesen odino say ponsia,” so kuan nen Penny, “say angiyapasakeyan mi nen Aret et diad seremonya, say maespiritual a kabiangan na okasyon. Satan so sankaimportantian a nagawa ed saman ya agew. Saray espisyal a bengatla a nanonotan ko et aliwan say insulong ko odino kinan ko, noagta saray akalimog ko ed saman ya agew tan say liket ya aliknak diad akiasawaan kon laki ya inar-arok.” Sarayan punto so nepeg a nodnonoten na Kristianon sankapareha sano manplaplano la ran mankasal.

Say Kingdom Hall—Sakey a Mapagalang a Pasen

Pilalek na dakel a Kristianon sankapareha so mankasal diad Kingdom Hall no posible itan. Akin a saya so pipilien da? Onia so rason ya insalaysay na sakey a sankapareha: “Amoria mi a say panangasawa et sagradon uksoyan nen Jehova. Say pankasal diad Kingdom Hall, say pasen a pandadayewan tayo, so angipaslep ed sikami manlapu la’d gapo a nakaukolan a kabiangan si Jehova ed panamaley mi. Say sakey nin gunggona ed impankasal mi diad Kingdom Hall imbes a diad sananey a lugar et nipanengneng ed saray inmatendin agmananisian kakanayon ya importantin tuloy ed sikami so panagdayew ed si Jehova.”

No inabuloyan na saray mamatatken ed kongregasyon a responsable ed Kingdom Hall so pangusar ed satan, sikara so nepeg a masakbay lan pakabatan na sankapareha nipaakar ed saray preparasyon a gawaen da. Sakey a paraan a nipatnag na nobya tan nobyo so manepeg a respeto ed saramay imbitado ed kasal et say mapekder a determinasyon ya onsabi ra ed niyeskedyul ya oras na kasal. Tan labay dan seguroen ya amin a bengatla et nagawa ed mapagalang a paraan.b (1 Corinto 14:40) Kanian paliisan da iray agmapagalang a panagparayag a nagagawa ed dakel a minumundon kasal.—1 Juan 2:15, 16.

Nipatnag met na saramay onatendi ed kasal a say panmoria ra et mipadpara ed panmoria nen Jehova ed panangasawa. Alimbawa, agda ilaloan a say kasal et manaeg ed arum iran Makristianon kasal, a singano walay kompetisyon no siopa so sankarakpan a kasal. Moriaen met na saray matatken ed espiritual a Kristiano a say iyatendi ed Kingdom Hall parad nibase’d-Biblia a paliwawa et mas importante tan makagunggona nen say ponsia odino say panduroypo ya onsublay ed satan. No say iyabuloy na panaon odino kipapasen et sakey labat ed saratan a mantumbokan ya okasyon so naatendian na sakey a Kristiano, mas maabig a pilien so iyakar ed Kingdom Hall. Oniay imbaga na sakey a matatken a manngaray William: “No agtanton importante parad saray bisita so onatendi ed Kingdom Hall balet ta presente ira ed reception, saya so pakapatnagan na kakulangay apresasyon ed inkasagrado na okasyon. Anggano ag-itayo imbitado ed reception, nipatnag tayo so suporta ed nobya tan nobyo tan makapangiter itayo na alay abig a pantasi ed saray agmananisian kakanayon ya inmatendi ed kasal no atendian tayo so seremonya diad Kingdom Hall.”

Say Liket a Mansiansia Anggad Kayari na Agew na Kasal

Pinagmaliw na komersyo ed mundo so selebrasyon na kasal bilang baleg a negosyo. Unong ed sakey ya agano nin report, say simplin kasal diad Estados Unidos et “mankantidad na $22,000 odino kapaldua na kabkaabigan a sueldo [ed sakey taon] na sakey a pamilya na Amerikano.” Lapud naimpluensyaan na propaganda na komersyo, dakel a balon kasal odino saray kapamilyaan da so akautang na baleg lapu labat ed satan ya agew, a babayaran da ni ed loob na dakel a taon. Kasin makabat so ontan a kurang bilang gapo na panamaley na sakey a sankapareha? Saramay agmakaamta odino agmanutumbok ed saray prinsipyo na Biblia so nayarin mandesidi a nawalaan na ontan a magastos a kasal, balet midumaan a tuloy diad limog na saray tuan Kristiano!

Lapud nilimitaan da so kabaleg na kasal da pian magmaliw a kabkaabigan tan agmagastos, tan inyapasakey da ed maespiritual ya aspekto na okasyon, dakel a Kristianon sankapareha so akapangusar na panaon tan kaykayarian da a mitunosan ed dedikasyon da ed Dios. (Mateo 6:33) Konsideraen pa so alimbawa nen Lloyd tan Alexandra, a nantultuloy ed sigpot-panaon a ministeryo diad loob na 17 taon manlapu la’d impankasal da. Oniay inkuan nen Lloyd: “Nayarin moriaen na arum a simpli labat so kasal mi, balet malikeliket kami nen Alexandra. Inisip mi a say agew na kasal mi et nepeg ya, aliwan makapabelat ed pinansyal, noagta panangiselebra ed uksoyan nen Jehova a panliketan a maong na duaran too.”

Oniay inyarum nen Alexandra: “Siak so manpapayunir sakbay kamin mankasal, tan agko labay ya ontunda ed sayan pribilehyo lapu labat ed magastos a kasal. Espisyal a tuloy so agew na kasal mi. Balet, satan so gapoan labat na legay-bilay a paniba mi. Inyaplika mi so bilin ya agmi alablabas ya iyaapasakey ed seremonya na pangasawa tan inanap mi so panangigiya nen Jehova ed bilay mi bilang sanasawa la. Saya so peteg ya angitarok na panamendisyon nen Jehova ed sikami.”c

On, say agew na kasal yo et espisyal ya okasyon. Saray awawey tan kiwas a napatnagan ed satan ya agew so mangiletneg na padron ed arapen yo bilang sanasawa. Kanian, manmatalek kayo ed panangigiya nen Jehova. (Uliran 3:5, 6) Lawas nodnonoten a say sankaimportantian et say espiritual ya aspekto na satan ya agew. Suportaan yo so balang sakey diad betang yo ya inter na Dios. Diad ontan a paraan, niletneg yo so putel a pundasyon na panamaley yo, tan lapud panamendisyon nen Jehova et nawalaan kayo na liket a mansiansia anggad kayari na agew na kasal yo. —Uliran 18:22.