Kasin say Kuarta et Lamot na Amin ya Kaugsan?

Say ebat na Biblia

Andi. Ag-ibabaga na Biblia ya say kuarta et mauges, odino lapuan itan na amin ya mauges a bengatla. Say kabkabat ya panangibagan “say kuarta et lamot na amin ya kaugsan” et makapalingo tan agkompleton balikas ya inala ed Biblia. Diad tua, ibabaga na Biblia ya “say panangarod kuarta et lamot na amin a kaugsan.”a—1 Timoteo 6:10, Maung a Balita, indanet mi so mabakat ya salita.

Antoy ibabaga na Biblia nipaakar ed kuarta?

Bibidbiren na Biblia ya say kuarta, no usaren ed dugan paraan, et mausa-usar, magmaliw ni ingen itan ya “proteksion.” (Eclesiastes 7:12) Ontan met, kokomendaan na Biblia iramay mabunlok o maiter ed arum, ya nayarin kaiba iray regalo ya kuarta.—Proverbio 11:25.

Anggaman ontan, papasakbayan itayo na Biblia ya agtayo manpopokus ed pananap na kuarta. Ibabaga na satan: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo.” (Hebreo 13:5) Kaukolan ya duga so paraan na pangusar ed kuarta tan agnepeg ya manpayaman. Imbes, nepeg ya kontento itayo ed saray talagan kaukolan tayo, singa say naakan, kawes, tan panayaman.—1 Timoteo 6:8.

**Akin et papasakbayan itayo na Biblia nipaakar ed panangaro ed kuarta?**

Saray maagum ya totoo et agda natawir so bilay ya andi-anggaan. (Efeso 5:5) Say sakey a rason et lapud say agum et sakey ya klase na idolatriya, odino palson panagdayew. (Colosas 3:5) Sakey ni, diad pansasagpot dan naala so labay da, saray maagum et ibabaliwala da la iray maabig ya prinsipyo. Saramay “maganat ya onyaman et agmansiansian andiay kasalanan,” so ibabaga na Proverbio 28:20. Ompan natukso ni ra ingen ya manggaway krimen, singa say pan-blackmail, pankatkat, pansaol, pan-kidnap, odino pamatey.

Anggaman say panangaro ed kuarta et agmet naynay ya manresulta ed mauges ya ugali, nayarin wala ray negatibon pansumpalan na satan. Ibabaga na Biblia ya “saramay determinadon onyaman et napepelag ed tukso tan patit tan dakel ya andi-kakanaan tan makapasakit a pilpilalek.”—1 Timoteo 6:9.

Panon ya makatulong ed sikatayo iray bilin na Biblia nipaakar ed kuarta?

No agtayo gawaen iray bengatlan amta tayon mauges tan agmakapaliket ed Dios lapu labat ed kuarta, nawalaan tayoy respeto ed sarili tan niwala ed sikatayoy pabor tan suporta na Dios. Diad saramay labay dan paliketen so Dios, oniay ipropromisa to ed sikara: “Agta kan balot taynanan, tan agta kan balot paulyanan.” (Hebreo 13:5, 6) Ipapaseguro to met ya “say matoor a too et makaawat na dakel a bendisyon.”—Proverbio 28:20.

Saray Bersikulo ed Biblia Nipaakar ed Kuarta

Eclesiastes 7:12: “Say kuarta et sakey a proteksion.”

Say labay ya ibaga: No usaren ed dugan paraan so kuarta, makatulong itan lapud nayarin makapangiter itan na kaaruman ya seguridad.

Lucas 12:15: “Anggano dakdakel so kayarian na sakey a too, ag-iratan makapangiter ed sikato na bilay.”

Say labay ya ibaga: Aliwan say kuarta so sankaimportantian ya bengatla ed bilay tayo, tan ag-itayo niliktar na satan.

1 Timoteo 6:10: “Say panangaro ed kuarta et lamot na amin a makaderal a bengatla, tan diad panggugunaet na arum a peneken iyan panangaro, abalang ira ed pananisia tan sinasaksak day sarili ra na dakel a pakasakitan.”

Say labay ya ibaga: Say mismon kuarta et aliwan mauges. Balet saramay mangaaro ed kuarta—ya gagawaen dan manuna itan ed bilay da—et nawalaan na dakel ya problema, singa bilang, aliwan maliket so pamilya da tan aliwan maabig so kondisyon na laman da lapud sobra so pantratrabaho da pian makalmo na kuarta.

Hebreo 13:5: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo.”

Say labay ya ibaga: Imbes ya gawaen so amin pian onyaman, marunong itayo no kontento tayo lad saray talagan kaukolan tayo.

Mateo 19:24: “Mas mainomay nin onlabot ed abot na dagum so sakey a kamelyo nen say pakaloob na sakey a mayaman a too ed Panarian na Dios.”

Say labay ya ibaga: Kakkapangimbita nen Jesus ed sakey ya kalangweran a lakin mayaman ya ontumbok ed sikato. Balet ag-itan inawat na laki lapud mas inaro to iray kayamanan to. Kanian angiter na pasakbay si Jesus. No unaen na sakey so kayamanan nen say Dios, nabalang to so bilay ya andi-anggaan.

a Sayan bersikulo et impatalos met ya: “Say panangaro ed kuarta et lamot na amin a makaderal a bengatla.”