Sikayo ran Kabataan—Manpatatken Kayo ed Espiritual

1. Akin et nakomendaan so dakel ya kabataan?

KADA taon, nilibon kabataan so manpapabautismo. Kasin sakey ka ed sikara? No on, seguradon malikeliket iray agagi ed satan ya desisyon mo, tan lalo lay Aman Jehova! (Pro. 27:11) Isip mo pay amin ya ginawam pian magmaliw kan kualipikado parad bautismo. Segurado ya makulikulim ya inaral so Biblia; ompan pigay taon da kan inyaralan. Akombinse ka ya say Biblia et Salita na Dios. Ontan met, akabkabat tan naar-arom si Aman Jehova, say Autor na satan ya sagradon libro. Ontan lay panangarom ed sikato kanian natan et sakey ka lan dedikado tan bautismadon lingkor to. Atan so sankaabigan ya desisyon mo!

2. Antoy pantongtongan tayo ed sayan artikulo?

² Seguradon asubok so pananisiam antis kan abautismoan. Pero legan kan ontatatken, agka nin siansia tundaan nen Satanas ta labay ton ombetel so panangarom ed si Jehova tan magmaliw kan inaktibo. (Efe. 4:14) Agkan balot ompapayag ya nagawa itan ed sika! Antoy makatulong pian mansiansia kan matoor ed si Jehova tan nagawaan moy im-promise mod sikato? Dapat “itultuloy” moy manpatatken ed espiritual. (Heb. 6:1) Panon mon nagawaan itan?

ANTOY GAWAEN MO PIAN ONTATKEN KA ED ESPIRITUAL?

3. Antoy nepeg tayon gawaen anggano bautismado tayo la?

³ Importantin unoren na amin a bautismadon Kristiano imay bilin nen apostol Pablo ed saray agagi diad Efeso. Imbaga tod sikara ya nepeg iran ‘ombaleg’ o manpatatken bilang Kristiano. (Efe. 4:13) Singa to ibabaga ya, ‘Itultuloy yoy onaligwas.’ Inkompara nen Pablo so iyaligwas ed espiritual diad ibaleg na sakey ya ugaw. Di ba saray atateng panliketan day baby da? Pero ag-ira naliketan no kalabas na dakel ya taon et ugaw-ugaw nin siansia so kagagawa tan panagnonot na anak da. Diad ibabaleg to, dapat kalkalna to lan ekalen iray “ugali na sakey ya ugaw.” (1 Cor. 13:11) Ontan met ed sikatayo ran Kristiano. Anggano bautismado tayo la, dapat tuloytuloy tayon ontatken tan onaligwas ed espiritual. Pantongtongan tayo ray pigaran suggestion ya makatulong pian nagawaan tayo itan.

4. Antoy makatulong pian onaligwas kad espiritual? Ipaliwawa. (Filipos 1:9)

⁴ Pabiskeg moy panangarom ed si Jehova. Seguradon inar-arom lay Aman Jehova. Pero wala ni nagawaan mo pian sikatoy mas naar-arom. Walay sakey ya paraan ya imbaga nen apostol Pablo ya nabasad Filipos 1:9. (Basaen.) Impikasi to iray agagi ed Filipos ya “lalo ni komon ya ombaleg” so panangaro da. “Ombaleg” met so panangaro tayo no tuloytuloy tayon nawalaan na “suston kakabatan” tungkol ed si Jehova. No diman tayo mas nakakabat si Jehova, diman tayo nanengneng iray balibalin ugali tan gagawaen to kanian mas naar-aro tayo. No inar-aro tayoy Aman Jehova, agtayo labay ya nasakitan. Kanian diad amin ya desisyon tayo, sankanonot tayo no antoy panlabayan to tan gawaen tayo no antoy makapaliket ed sikato.

5-6. Antoy gawaen tayo pian ombiskeg so panangaro tayod si Jehova? Ipaliwawa.

⁵ Ombiskeg so panangaro tayod si Jehova no kabkabaten tayoy Anak to. Akin ey? On ta no antoy ugali nen Jehova, sikatoy ugali met nen Jesus. (Heb. 1:3) Nakabkabat moy Jesus no aralen moy libro na Mateo, Marcos, Lucas, tan Juan. No agka ni apasal ya manbasa na Biblia kada agew, anto kasi no igapom natan ed anggan dinan ed sarayan libro? Legan mon babasaen irayan salaysay tungkol ed si Jesus, manpokus ka ed saray balibalin ugali to. Singa bilang, sikatoy mainomay ya asinggeran. Anggan saray angkekelag ya ugugaw et agnababaingan ya onasingger ed sikato. Nilalakap tan ineeba to ni ra ingen. (Mar. 10:13-16) Sikatoy maomaong tan makaaro, kanian agmanaalangan iray disipulo to ya ibagad sikato no antoy walad isip da. (Mat. 16:22) Diad tua, aaligen met labat nen Jesus so ugali nen Ama to. Matmainomay met ya asinggeran si Aman Jehova. Anggan anton oras et sarag tayoy manpikasi ed sikato, tan naibaga tayon amin so nalilikna tayo. Agto tayo balawen o husgaan. Imamalasakit tan inar-aro to tayo.—1 Ped. 5:7.

⁶ Makasi met si Jesus. Oniay aminsan ya agawa unong ed salaysay nen apostol Mateo: “Sanen anengneng [nen Jesus] iray totoo, akasian to ra, lapud singa ra kinatatan tan pinaulyanan a karnero ya andiay managpastol.” (Mat. 9:36) Si Aman Jehova ey, makasi met kasi? Makaala tayoy ideya ed sayan imbaga nen Jesus: “Aliwan makapaliket ed Amak a walad tawen no nabalang so anggan sakey ed sarayan angkekelag.” (Mat. 18:14) Talagan maar-aroy Aman Jehova, awa? On, no kabaten tayon maong si Jesus, ombiskeg so panangaro tayod si Jehova.

7. Panon ya makatulong iray maespiritual ya agagi ed iyaligwas mo?

⁷ Say sakey nin paraan pian mas naarom si Jehova tan onaligwas ka et no kabaten mon maong iray maespiritual ya agagi ed kongregasyon. Seguro, napapansin mo ya malikeliket ira. Agdan balot pagbabawian so desisyon da ya manlingkor ed si Jehova. Tepetan mo ra no anto ray agda nalinglingwanan ya eksperiensya ra diad panlilingkor dad sikato. No walay importantin desisyonan mo, kerew kay advice ed sikara. Tandaan mo ya no dakel so mansimbawa ed sika, nasegurom ya duga iray desisyon mo.—Pro. 11:14.

8. Antoy gawaen mo no walay bangat na Biblia ya aliwan malinew ed sika?

⁸ Usisam iray bangat na Biblia ya aliwan malinew ed sika. Singa abitla ed parapo 2, agka tundaan nen Satanas ta labay ton onkapuy so pananisiam tan kuestionen mo iray bangat na Biblia. Say sakey ya uusaren to et say teorya na ebolusyon. Ompan nen ugaw ka et talagan manisia ka ya walay Dios. Pero natan ya ontatatken ka la, ompan manduaruwa ka ta say ibabangat dad eskuelaan et nan-evolve so amin ya bengatla. Ompan wala met so punto na saray teacher mo tan singa makakombinse so eksplinasyon da. Pero ompan agda nin balot sinali ya aralen iray ebidensya no kasin walay Amalsa. Tandaan mo imay prinsipyo ed Proverbio 18:17 ya no maminsan et wala ray ibabaga na arum ya singa duga, pero no usisaen mon maong et aliwa manaya. Kanian imbes ya manisia kan tampol ed amin ya ibabangat dad eskuelaan, usisam ni no antoy ibabaga na Biblia, say Salita na Dios. Man-research ka ed saray publikasyon tayo. Tepetan mo ray agagi ya datin manisia ed ebolusyon no akin ya akombinse ira ya walay maar-aron Amalsa.b Makatulong itan pian naamtaan mo iray ebidensya.

9. Antoy naaralan mo ed ginawa nen Melissa?

⁹ Ontan so ginawa nen Melissa.c In-research to iray ebidensya no talaga kasin walay Amalsa. Kuan to: “Balibali so panag-explain na saray teacher ko tungkol ed ebolusyon kanian singa nakombinse ka met ah. Agko labay so man-research ta natatakot ak ompan napatunayan ko ya talagan tua so ebolusyon. Pero naisip ko ya aglabay nen Jehova ya basta tayo labat manisia ed sikato. Kanian nan-research ak. Binasak so libron Is There a Creator Who Cares About You? tan saray brosyur ya Pinalsa Kasi Bilay? tan The Origin of Life—Five Questions Worth Asking. Nakal so amin ya panduaruwak. Nensaman ko la komon iya ginawa!”

10-11. Antoy gawaen mo pian nalabanan moy tukso ya manggaway imoral? (1 Tesalonica 4:3, 4)

¹⁰ Labanan moy tukson manggaway imoral. No say sakey et tinedyer la, maksil so liknaan to ed sex, kanian mas mainomay ya natukson manggaway imoral. Labay nen Satanas ya makagawa kay imoral. Pero antoy gawaen mo pian agto ka natukso? (Basaen so 1 Tesalonica 4:3, 4.) Manpikasi kad si Jehova tan ibagam ed sikato so amin ya naliliknam. Ibagam iray kakapuyan tan pakakasubokan mo, tan kerew mo ya ikdan to kay biskeg pian nalabanan moy tukso. (Mat. 6:13) Agka nababaingan ya ibaga iratan ed si Jehova, ta agto ka husgaan. Diad tua, labalabay to kan tulongan. (Sal. 103:13, 14) Makatulong met no inagew-agew kan manbasa na Biblia. Imbaga nen Melissa, ya abitla nen niman, ya no maminsan et wala ray imoral ya naiisip to. Kuan to: “Akatulong so inagew-agew ya pambabasak na Biblia pian agak nadaeg na tukso. Atan so mangipapanonot ed siak ya si Jehova so akanggawa ed siak. Agko labay ya nabalang si Jehova ed bilay ko.”—Sal. 119:9

¹¹ Agmo sasarilien so problemam. Ibagam ed ateng mo no anto ray subok ya lalabanan mo. Ompan diad gapo et naiilang o nababaingan ka, pero tandaan mo ya makatulong so pitongtong mod sikara. Oniay imbaga nen Melissa: “Impikasik ed si Jehova ya ikdan to ak na pakpel, insan ak akitongtong ed si Daddy’k tungkol ed problemak. Akainawa ak kayari min nantongtong. Amtak ya proud ed siak si Jehova.”

12. Antoy gawaen mo pian duga iray desisyon mo?

¹² Manpaigiya ed saray prinsipyo ed Biblia. Diad itatatken mo, wala ray situasyon ya mandesisyon ka la parad sarilim. Pero siempre, kulang ni eksperiensyam ed bilay. Antoy gawaen mo sirin pian agka makagaway desisyon ya manderal ed relasyon mod si Jehova? (Pro. 22:3) Walay imbaga nen Sister Kari ya akatulong ed sikato diad panagdesisyon to. Kuan to: “Kaukolan kon talosan iray prinsipyo ed Biblia imbes ya akadepende ak labat ed saray ganggan.” Duga si Kari. No say sakey et matatken ed espiritual, aliwan puros ganggan so pangibasian toy desisyon to. Kanian diad pambabasam na Biblia, tepetan moy sarilim: ‘Diad sayan teksto, antoy naaralan ko ya estandarte nen Jehova? Kasin walay nadokdok ko dia ya prinsipyo ya makatulong pian nagawaan koy duga? No wala, antoy pakinabang no iyaplikak itan?’ (Sal. 19:7; Isa. 48:17, 18) No dadalepdepen mo iray prinsipyo ya nababasam ed Biblia, mas mainomay moy manggawa na desisyon ya makapaliket ed si Jehova. Legan kan ontatatken ed espiritual, mas natalosan moy panagnonot to, kanian agmo kaukolan so ganggan ed amin ya situasyon ed bilay mo.

13. Antoy resulta no maong ya kakaaro so pilien mo? (Proverbio 13:20)

¹³ Say pilim ya kakaaro et saramay inar-aro day Jehova. Singa abitla ed parapo 7, mas onaligwas ka no maespiritual iray kakaarom. (Basaen so Proverbio 13:20.) Imanoen tayoy eksperiensya nen Sara. Wala may panaon ya natatabangan la ed panlilingkor to tan agla maliket. Antoy akatulong pian ompawil so seseg to? Oniay imbaga to: “Maong labat ta diad saman et wala ray aka-close kon agagi. Say sakey et kabataan ya sister. Saniba min ipaparaan so aralen ed Panag-bantayan. Walay sakey nin sister ya tinulongan to ak pian agak nababaingan ya mankomento ed aral. Lapud maong ya impluensya na saray kakaarok, na-improve koy personal study’k tan panagpikasik. Kanian binmiskeg so panangarok ed si Jehova, tan pinmawil so liket ko.”

14. Antoy ginawa nen John pian nawalaan na maong ya kakaaro?

¹⁴ Antoy gawaen mo pian nakaarom iray maespiritual ya agagi? Oniay imbaga nen John ya natan et manlilingkor la bilang sakey ya elder tan Bethelite: “Nen kabataan ak ni, dakel so akaarok ya agagi ya nakakaibak diad panagpulong. Masetseseg ira, tan anengneng ko ya talagan malikeliket ira ed ministeryo. Lapud maong ya impluensya ra, in-goal koy manpayunir. Nen payunir ak la, diman ko a-realize ya pigpigara labat so maong ya kakaarok dati ta say labay ko labat ya pikaaroan et saramay kaedad ko. Nen atawag ak ed Bethel, dakel met so akaarok ya matatken ed espiritual. Lapud maong ya alimbawa ra, naaralan ko no panon so manpili na dugan libangan, tan lalo ak ya inmapit ed si Jehova.”

15. Antoy imbaga nen Pablo ed si Timoteo pian makaiwas ed mauges ya impluensya? (2 Timoteo 2:20-22)

¹⁵ Panon to no walay kakongregasyon mo ya alikas mon makapuy so impluensya tod sika? Amta nen Pablo ya wala ray agagi nensaman ya mauges so impluensya ra kanian binagaan toy Timoteo ya arawian to ra. (Basaen so 2 Timoteo 2:20-22.) Say pikakaaro tayod si Jehova so sankaimportantian ed bilay tayo. Dakdakel lay ginawa tan insakripisyo tayo pian makapikaaro tayod sikato, kanian agtayon balot ompapayag ya naderal itan lapu labat ed mauges ya impluensya na arum.—Sal. 26:4.

ONALIGWAS KA NO WALAY GOAL MO ED ESPIRITUAL

16. Anto ray dapat ya i-goal mo?

¹⁶ Manisip ka na goal mo ed espiritual. No walay goal mo, magmaliw kan mas makalakal tan ontatken so nonot mo. (Efe. 3:16) Singa bilang, marakep no i-goal mo ya regular kan makapan-personal study tan inagew-agew kan manbasa na Biblia. (Sal. 1:2, 3) Sarag mo met ya i-goal ya mas mabetbet kan manpikasi tan iparaan moy ibagam antis kan manpikasi. Ompan kaukolan mon mas kontrolen so sarilim diad panagpilim na libangan tan bawasan moy panaon mo ed satan. (Efe. 5:15, 16) Seguradon naliketan si Jehova ed sika no nanenengneng to ya gagawaen moy anggaay nayarian mon ontatken ed espiritual.

17. Antoy resulta no dakel so panaon mon ontulong ed arum?

¹⁷ Mas ontatken ka ed espiritual no dakel so panaon mon ontulong ed arum. Imbaga nen Jesus: “Mas makapaliket so mangiter nen say mangawat.” (Gawa 20:35) On, mas maliket ka no usaren moy panaon tan biskeg mo parad arum. Singa bilang, marakep no i-goal mo ya tulongan iray kakongregasyon mon mansasakit o maedad la. Ompan sarag mo ran itindaanan o ibangat mo ra pian nakabisado day pangusar ed gadyet da. No sakey kan brother, i-goal moy magmaliw ya ministeryal a lingkor, ya say motibom et pian natulongan mo ray agagi. (Fil. 2:4) Nipanengneng mo met so panangaro ed saray agni manlilingkor ed si Jehova no ipulong mod sikara so maong ya balita na Panarian. (Mat. 9:36, 37) Tan no posible, i-goal moy onloob ed full-time ya panaglingkor.

18. Akin et makatulong so iloob ed full-time ya panaglingkor pian ontatken kad espiritual?

¹⁸ No onloob ka ed full-time ya panaglingkor, ontulong itan pian lalo kan ontatken ed espiritual. No manpayunir ka, sarag moy manaral ed School for Kingdom Evangelizers, manlingkor ed Bethel, o manboluntaryo ed saray construction project tayo. Oniay imbaga nen Kaitlyn ya kabataan ya payunir: “Nen agano ak nin abautismoan, akatulong so lanang ya impiulop kod saray maespiritual ya agagi ed ministeryo pian onaligwas ak ed espiritual. Akaaral ak ya maong ed alimbawa ra. Kanian in-goal ko met ya i-improve so personal study’k tan say panagbangat ko.”

19. Anto ray awaten mon bendisyon no itultuloy moy manpatatken ed espiritual?

¹⁹ No itultuloy moy manpatatken ed espiritual, dakel ya bendisyon so awaten mo. Lapud akapokus ka ed panaglingkor mod si Jehova, agnasayang so biskeg tan panaon mo ed sayan mundo. (1 Juan 2:17) Agnasakitan so liknaan mo lapud agmo pagbabawian iray desisyon mo. Walay direksion na bilay mo kanian maliket ka. (Pro. 16:3) Lapud maong so alimbawam, napaseseg mo iray agagi, ugaw man o matatken. (1 Tim. 4:12) Tan say sankaimportantian ed amin, mareen so nonot mo tan panatag so loob mo ta antam ya napapaliket moy Jehova tan malet kayon sankaaro.—Pro. 23:15, 16.