Anton klase na Ngaran so Walad Sika?

DIAD Biblia, say salitan “ngaran” so manasaglawi no maminsan ed reputasyon na sakey. Alimbawa, insulat nen makabat ya Arin Solomon: “Say sakey a maong a ngaran sikato so magmaong nen say mabli a larak, tan say agew na ipatey, nen say agew na kianak.” (Eclesiastes 7:1; ikompara so Uliran 22:1.) Unong ed saray salita nen Solomon, say too so agnisipor a walaan lay maong a ngaran. Imbes, satan so diad legay kurang na bilay to a sikatoy makagamor na reputasyon a walaan na tuan kabaliksan. Say ngaran to so mangipabidbir ed sikato nipaakar ed saray personal a kualidad to, no kasin sikatoy mabunlok odino masiblet, maabagey odino agmililikna, mapaabeba odino mapaatagey, matunong odino marelmeng ni ingen.

Nonoten pay David. Leleg na impanari to, pinaneknekan toy inkasikaton mapekder tan agmanguman-uman. Ontan met, sipapaabeban binidbir nen David iray lingo to tan nagbabawi ed saray graben kasalanan to. Tekep na makatunongan a rason, inkuan na propeta nen Jehova a si David so “laki ya unong ed dili a puso [na Dios].” (1 Samuel 13:14) Awalaan lay maong a ngaran ed Dios so malangwer nin David.

Misunian, si Joram ya Ari na Judea so nanggawa na mauges a ngaran parad inkasikato. Pinabeneg toray uuleyan to ed panagdayew ed si Jehova tan impapatey to ni ingen iray anemiran agagi ton lalaki tan pigaran priprinsipe na Juda. Diad kaunoran, dinusa nen Jehova si Joram na makapaot-ot a sakit a sengeg na impatey to. Ibabaga na Biblia a si Joram “et sinmipot ya andi nankaliket,” odino singa impangikuan na Today’s English Version, “anggapoy nanermen sanen sikatoy inatey.”​—2 Awaran 21:20.

Say kurang na bilay di David tan Joram so mangiyiilustra ed inkamatua na proverbioy Biblia: “Say pakanodnonotan ed matunong sikato so bendito, balet say ngaran na marelmeng nabulok.” (Uliran 10:7) Balang sakey ed sikatayo sirin so kaukolan a seryoson mangonsidera ed tepet ya, ‘Anton klasen ngaran so gagawaen ko ed Dios tan ed kaparak a too?’