Manbangat Tekep na Aralem a Pakatalos tan Pananangguyor
“Say puso na makabat ibangat to so sangi to, tan mangyarum na pakaaral ed saray bibil to.”—ULIRAN 16:23.
1. Akin a mas ni lalanoren na pangibangat na Salitay Dios nen say basta pangipasabi na impormasyon?
SAY kalat tayo bilang managbangat na Salitay Dios et say pangiter na espiritual a pakatalos aliwa lambengat ed kanonotan da noagta ed kapusoan da met. (Efeso 1:18) Sasaglawien sirin na panbangat so mas ni nen say pangipasabi na impormasyon. Oniay kuan na Uliran 16:23: “Say puso na makabat ibangat to so sangi to, tan mangyarum na pakaaral ed saray bibil to.”
2. (a) Antoy kabaliksan na tangguyoren? (b) Panon a posiblin magmaliw so amin a Kristianon makatangguyor a managbangat?
2 Maseguron inyaplika nen apostol Pablo iyan prinsipyo ed panagbangat to. Sanen walad Corinto, sikatoy “nankatunongan ed sinagoga ed amin a Sabaton et sineetan to a sinimbawa [“tinangguyor,” NW] so saray Judios tan Griegos.” (Gawa 18:4) Unong ed sakey ya autoridad, say Griegon nipatalos dia a ‘tangguyoren’ et kabaliksan toy “panguman na kanonotan lapud impluensiay panagkatunongan odino panangonsidera ed moral.” Diad panamegley na makakombinsi iran argumento, ayarian nen Pablo ya apasimbalo iray mismon kaisipan na totoo. Say abilidad ton manangguyor so nankelawan a tuloy a tinakotan na saray mamubusol ed sikato. (Gawa 19:24-27) Anggaman kuan, say abilidad nen Pablo ed panagbangat so agpakapatnagay abilidad na too. Inkuanto ed saray taga-Corinto: “Say salitak tan panangipulong ko aliwa a salita a makaayat na kakabatan, noag dia ed panangipatnag na espiritu tan pakayari. Ta pian say pananisia yo aliwan dia ed kakabatan na saray totoo, noag dia ed pakayari Dios.” (1 Corinto 2:4, 5) Lapud amin a Kristiano so natulongay espiritu nen Jehova a Dios, amin da so nayarin magmaliw a makatangguyor a managbangat. Balet panon? Nengnengen tayo pa so pigaran epektibon paraan ed panagbangat.
Magmaliw a Maong a Dumerengel
3. Akin a nakakaukolan so aralem a pakatalos sano ibabangat so arum, tan panon tayon nasabi so kapusoan na say iyaaralan tayo ed Biblia?
3 Say sankaunaan a paraan ed panbangat et sasaglawien toy italineng, aliwan pansalita. Singa naimano ed Uliran 16:23, nepeg a walaan itayo na aralem a pakatalos ta pian magmaliw a makatangguyor. Maseguron walaan na aralem a pakatalos si Jesus no nipaakar ed totoon binangatan to. Inkuan na Juan 2:25: “Sikato lanlamang amta to la no anto so wala ed loob na too.” Balet panon tayon naamtaan so walad kapusoan na saramay ibabangat tayo? Sakey a dalan et say pagmaliw a maong a dumerengel. Kuan na Santiago 1:19: “Amin a too masiglat komon ya ondengel, mapalna ed pansalita.” Tua, aliwan amin a totoo so mainomay a makapangibalikas ed iisipen da. Legan a saray iyaaralan tayo ed Biblia et nakokombinsin talagan interesado itayo ed sikara, mas onkiling iran mangibalikas na tudtuan nalilikna ra. Say mapangasi balet ta makatebek iran tepet so mabetbet a makatulong ed sikatayo pian nasabi kapusoan tan ‘naagwat’ so ontan iran balikas.—Uliran 20:5.
4. Akin a nepeg a magmaliw a maong a dumerengel iray Kristianon mamatatken?
4 Nagkalautlan importanti a saray Kristianon mamatatken et magmaliw a maong a dumerengel. Dia labat ed pagmaliw dan ontan et ‘nakabatan da no panon so nepeg dan iyebat ed balang sakey.’ (Colosas 4:6) Ipapasakbay na Uliran 18:13: “Say mangiter na ebat ed arapen na indengel to, sikato so inkaatiw tan makapabaing ed sikato.” Walay duaran agagi a maong so getma ra, a sinimbawa ra so sakey ya agin bii nipaakar ed inkamakamundo lapud agto impakaatendi ed pigaran miting. Asakitan a tuloy so agi ya agda tinepetan no akin ya ag-akapiaral. Sikatoy manpapaabig lapud impakaopera. Agaylan importanti sirin so italineng tayo sakbay a manimbawa!
5. Panon a naresolbi na saray mamatatken so balingaan ya onlesa ed limog na agagi?
5 Parad mamatatken, mabetbet a sasaglawien na panagbangat so panimbawa ed arum. Importanti met dia so pagmaliw a maong a dumerengel. Say itatalineng so nagkalalo lan nakaukolan sano onlesay balingaan ed limog na kaparan Kristianos. Diad kayari italineng labat et nibagan naalig na mamatatken so “Ama ed sikato, salanti, mangukom ed saray totoo ya andi intalonggaring.” (1 Pedro 1:17) Mabetbet ya ompetang iray liknaan ed ontan iran situasyon, tan kaukolan a nonoten na matatken so konseho ed Uliran 18:17: “Say mangikatunongan na matunong to ya unona singa matunong; balet say kaabay to onsabi tan sikato so usisaen to.” Say epektibon managbangat et ontalineng ed parehon dapag. Diad panpikasi et napakalmado to so walan kipapasen. (Santiago 3:18) No medyo ompetang iray liknaan, nayarin isuheri ton direkta lan ibaga na balang sakey iray problema ra ed sikato, imbes a mansangsangan ira. Diad panamegley na matukoy iran tepet, napiho na matatken iray probleman nepeg a resolbien. Diad dakel a kaso et nisesengeg ed makapuy a pantatalosan so ompapaway a sengegan na balingaan, aliwan lapud panamasakit. Balet no asumlang iray prinsipyo ed Biblia, sarag la’d satan na maaron managbangat so mamilin tekep na aralem a pakatalos, ta nadngel to lay nantupag.
Say Kablian na Pagmaliw a Simpli
6. Panon ya impanengneng di Pablo tan Jesus so alimbawa ed simplin panagbangat?
6 Say pamasiansia ed saray bengatla a simpli so sakey nin makanakanan dunong ed panagbangat. Tua, labay tayon saray iyaaralan tayo ed Biblia et “ombiskeg . . . komon a manalos a maong a pati saray lapag a sasantos no panon so kaawang tan karukey tan kaatagey tan kaaralem” na katuaan. (Efeso 3:18) Walaray aspekto na doktrina ed Biblia a makapasagyat tan mabetbet a makapaangat. (Roma 11:33) Anggaman kuan, sanen pinulongan nen Pablo iray Griego, insentro to ed simplin mensahe nen ‘nipasak a Kristo.’ (1 Corinto 2:1, 2) Mipadpara, nampulong si Jesus ed malinew tan makapasagyat a paraan. Inusar toy simplin bokabularyo diad Sermon to ed Palandey. Ingen, lugan to so pigara ed ekselentin katuaan a nibalikas ed kapiganman.—Mateo, kapitulo 5-7.
7. Panon tayon napansiansia a simpli iray bengatla diad panangikondukta na saray panangiyaral na Biblia?
7 Napansiansia tayo met a simpli iray bengatla sano ibabangat iray iyaaralan ed Biblia. Panon? Diad pangipaimano ed “bengatla ran sankaabigan.” (Filipos 1:10) Sano ipaliwawa iray mairap a tema, kaukolan tayon ibalikas so inkasikatayo ed malinew a paraan. Iyapasakey tayo ed manuna iran kasulatan imbes a salien a basaen tan singbaten so kada teksto’d Biblian nisita ed palapagan. Kakaukolanen na saya so panparaan tayon maong. Kaukolan ya agtayo bubuntonan so iyaaralan na saray detalyi, ompan nipaarap tayo ed saray agtanton importantin isyu. No walay tepet na iyaaralan ya agnisisiglaot ed leksion, mataktika tayon isuheri a singbaten itan kayari leksion.
Epektibon Pangusar na Tepetepet
8. Panon ya inusar nen Jesus iray tepet ed epektibon paraan?
8 Sakey nin mausar a dunong ed panagbangat et lalanoren toy pangitepet na epektibon tepetepet. Malaknab ya inusar nen Jesu-Kristo iray tepet ed panagbangat to. Alimbawa, tinepetan nen Jesus si Pedro: “Anto so isisip mo, Simon? Saray arari dalin siopa so pansingilan da na impuesto ono buis? Ed saray anak da, ono ed saray sankaili? Et sanen inkuan to, Ed saray sankaili, inkuan nen Jesus ed sikato, Saray anak ag-ira sirin ombuis.” (Mateo 17:24-26) Bilang say bogbogtong ya Anak na samay Sakey a dadayewen ed templo, talagan ag-obligado si Jesus a manbayar na buis parad templo. Balet nipasabi nen Jesus iyan katuaan diad epektibon impangusar to na tepetepet. Diad ontan et atulongan nen Jesus si Pedro a nawalaan na suston konklusion a nibase’d impormasyon ya amta la nen Pedro.
9. Panon tayon nausar iray tepet legan na saray panangiyaral na Biblia?
9 Epektibon nausar tayoray tepet legan na saray panangiyaral na Biblia. No aliway ebat na iyaaralan, onkiling tayon iter so suston ebat, balet talaga ta’n natandaan toy impormasyon? Mabetbet a sankaabigan lay pangitonton ed iyaaralan ed dugan konklusion diad pantepet. Singa bilang, no mairap ton natalosan no akin a kaukolan ton usarey madibinon ngaran, nayarin itepet tayo, ‘Kasin importanti ed sikay ngaran mo? . . . Akin? . . . Antoy liknaan mo no walay agto labay ya usaren so ngaran mo? . . . Agta makatunongan labat ed Dios a kaukolanen to itayon usaren so personal a ngaran to?’
10. Panon a nausar na mamatatken iray tepet sano ontutulong ed saray sinansakey ya asakitan so liknaan da?
10 Epektibon nausar met na mamatatken so tepetepet sano papastolan da so pulok. Dakel ed kongregasyon so nasasakitay liknaan tan naaataki mundo nen Satanas et liknaen dan sikaray agmalinis tan agla naaro. Nayarin mankatunongan so sakey a matatken ed ontan a too diad pangibagan: ‘Anggaman ikuan mon sikay marutak, anto tay liknaan nen Jehova ed sika? No say maaron mangatatawen ya Ama tayo et inabuloyan toy Anak to ya ompatey tan mangitarya na dondon parad sika, agta labay ya ibaga na satan ya inaro ka na Dios?’—Juan 3:16.
11. Anto so gagala a kanaan na saray rhetorical a tepet, tan panon iratan a nausar ed panagsalita ed publiko?
11 Saray rhetorical a tepet so sakey nin mausar a paraan ed panbangat. Ag-iilaloan a maksil ya ebatan iraya na saray dumerengel, balet ta natulongan iran mankatunongan ed sarayan pamaakaran. Mabetbet a mantepet iray propeta nensaman na ontan iran tepet ta pian pannonoten daray dumerengel da. (Jeremias 18:14, 15) Epektibon angusar si Jesus na saray rhetorical a tepet. (Mateo 11:7-11) Saratan a tepet so nagkalautlan epektibo ed panagsalita ed publiko. Imbes a basta ibaga ed dumerengel a nepeg day magmaliw a sigpot-puso ta pian napaliket si Jehova, mas epektibo no tepeten, ‘No agtayo talagan sigpot-puso ed serbisyo tayo, kasin napaliket si Jehova?’
12. Antoy kablian na pangitepet na punto de bistan tepetepet?
12 Makana met iray punto de bistan tepet ta pian naamtaan no sisiaen na iyaaralan ed Biblia so nanaaralan to. (Mateo 16:13-16) Nayarin sustoy pangebat na iyaaralan a mauges so pilalawanan. Balet akin ya agpatumbokan itan na tepet a singa say, Antoy personal a liknaan mo nipaakar ed estandarte na Dios ed moralidad? Liknaen mo ta a masyadon mapeget itan? Nibagam ta a talagan importanti no tumboken odino agtumboken iray estandarte na Dios?
Saray Ilustrasyon a Manabi ed Puso
13, 14. (a) Antoy kabaliksan na pangiyilustra ed sakey a bengatla? (b) Akin ya epektibo iray maong ya ilustrasyon?
13 Sakey nin dalan pian nasabi so kapusoan na saray dumerengel tan iyaaralan ed Biblia et diad epektibo iran ilustrasyon. Say Griegon balikas a nipatalos bilang “ilustrasyon” et literal a mankabaliksay “pangiyabay odino pangitekep.” Sano mangiyilustra ka, isalaysay moy sakey a bengatla ‘ya iyaabay itan’ ed bengatlan mipadpara. Alimbawa, intepet nen Jesus: “Panon so pangyulibay tayo ed panariay Dios? Ono anto ya alimbawa so pangipaakaran tayo’d sikato?” Bilang ebat, sinalambit nen Jesus so kabisado ran bukel na mostasa.—Marcos 4:30-32.
14 Angusar iray propeta na Dios na dakel a mapuersan ilustrasyon. Sanen saray taga-Asirya a kinmanan instrumento na Dios ed panusa ed saray Israelita et angusar na alablabas a panaglames, inwalwal nen Isaias so inkamapaatagey da tekep na sayan ilustrasyon: “Manpasirayew ta so wasay a sumpa ed mangiwasay ed sikato? Patageyen ta na lagari so inkasikato a sumpa ed mangigarigar ed sikato?” (Isaias 10:15) Sano ibabangat nen Jesus so arum, malaknab to met ya inusar iray ilustrasyon. Unong ed report “agto akisalita ed sikara no anggapoy sakey ya alimbawa.” (Marcos 4:34) Epektibo iray maong ya ilustrasyon lapud lanoren day utek tan puso. Abuloyan daray dumerengel a nasepsep day balon impormasyon diad pangikompara ed bengatlan kabisado ra la.
15, 16. Antoy manggawa’d saray ilustrasyon a lalon epektibo? Mangiter na saray alimbawa.
15 Panon tayon nausar iray ilustrasyon a talagan manabi ed puso? Manuna’d amin, say sakey ya ilustrasyon so nepeg a makatunongan a misimbangan ed bengatlan nipapaliwawa. No say panangikompara et talagan agmatukoy, say ilustrasyon so mangisuwawi imbes a liwawaan toray dumerengel. Aminsan et sinalin impabitar na sakey ya espiker a walaay marakep a getma so inkamapasakop na saray alanaan a nakdaan ed si Jesu-Kristo diad impangiyaliling to ed sikara ed sakey a matoor ya am-amayo ya aso. Balet kasin say ontan a manleglemew ya alimbawa et talagan matukoy? Isasalaysay itan na Biblia ed dalan a mas makapasagyat tan mapagalang. Ikokompara toy 144,000 ya alanaan a patumbok nen Jesus ed “sakey a nobya ya akawesan nipaakar ed asawa to.”—Apocalipsis 21:2.
16 Mas epektibo iray ilustrasyon sano mangaapekta ira ed bilay na totoo. Say ilustrasyon nen Natan nipaakar ed pinatey a kordero so anenyeg ed puso nen Arin David lapud panangaro to ed karnero, ta sikatoy sakey a managpastol diad inkatobonbalo to. (1 Samuel 16:11-13; 2 Samuel 12:1-7) No say ilustrasyon to et nipaakar ed kalakian a baka, ompan aliwan ontan ka-epektibo. Diad mipadparan dalan, saray ilustrasyon a nibase’d makasientipikon agawgawa odino ag-akabkabatan iran insidenti ed awaran so andiay epekto ed saray dumerengel tayo. Imbase nen Jesus iray ilustrasyon to ed inagew-agew a kabibilay. Sinaglawi toray bengatlan kaslakan la a singa say silewan, kamanokan ed tawen, tan saray lirio ed uma. (Mateo 5:15, 16; 6:26, 28) Mainomay a nisiglaot na saray dumerengel nen Jesus so inkasikara ed ontan iran pamaakaran.
17. (a) Diad anto so napangibasiyan tayo na saray ilustrasyon tayo? (b) Panon tayon nitukoy iray ilustrasyon a nausar ed saray palapagan tayo unong ed saray sirkumstansia na saray iyaaralan tayo?
17 Diad ministeryo tayo, dakel so pankanawnawan nausar tayo so simpli balet ta epektibo iran ilustrasyon. Manimano. (Gawa 17:22, 23) Nayarin say ilustrasyon et nipaakar ed ananak, ayaman, trabaho, odino panagligliwaan na dumerengel. Odino nayarin usaren tayoy personal a pakaamta tayo ed say iyaaralan ed Biblia ta pian napalaknab iray ilustrasyon a wala la’d aaralen tayon palapagan. Alaen pan alimbaway epektibon ilustrasyon ya inusar ed parapo 14 na kapitulo 8 na libron Pikakabat a Mangitonton ed Andi-Anggaan a Bilay. Sasaglawien toy nipaakar ed sakey a maaron ateng a pinauges na sakey a kaabay. Isipen tayon maong no panon tayon itukoy itan ya ilustrasyon ed saray sirkumstansia na iyaaralan tayo ed Biblia a sikato met so sakey ya ateng.
Basaen so Kasulatan Tekep na Dunong
18. Akin a panggunaetan tayoy pagmaliw a marlas a managbasa?
18 Sinimbawa nen Pablo si Timoteo: “Manseet ka ed panagbasa, ed panagkalar, ed panangibangat.” (1 Timoteo 4:13) Lapud say Biblia so pinagkapundasyon na ibabangat tayo, makagungguna no basaen itan ed marlas a paraan. Apribilihyoan iray Levita a mangibasa ed Mosaikon Ganggan ed totoo na Dios. Kasin nan-ataata ira ed impanbasa ra odino binasa ra itan ed apasakey a tonada? Andi, kuan na Biblia ed Nehemias 8:8: “Binasa ra ed libro, dia ed tunong na Dios, a maliwliwawa; et initer da so belas, a dia ed ontan atalosan da so impanbasa.”
19. Panon tayon napaaligwas so panagbasa tayo ed Kasulatan?
19 Arum ed Kristianon lalaki a maong ya espiker so makapuy no nipaakar ed panagbasa. Panon iran onaligwas? Diad panag-insayo. On, diad paulit-ulit a panbasan maksil anggad marmarlas la ra. No wala ed lenguahe yo iray audiocassette a nipaakar ed Biblia, makabat so italineng ed panangibekas na managbasa tan ed panangidumadumay bosis tan imanoen no panon a nibalikas iray ngaran tan nikaduman salita. Saramay walaan na New World Translation ed lenguahe ra so makaanamot met ed saray tulong ed panangibalikas.a Diad panangipasal et anggan saray kangaranan a singa say Maʹher-shalʹal-hash-baz so nabasan main-inomay.—Isaias 8:1.
20. Panon tayon ‘naimatonay panagbangat tayo’?
20 Bilang totoo nen Jehova, agaylan pribilihyo so kakausar tayo bilang managbangat! Komon ta balang sakey ed sikatayo sirin et seryosoen to itan a responsabilidad. Komon ta sikatayo so ‘lawas manimaton ed inkasikatayon dili tan ed ibabangat tayo.’ (1 Timoteo 4:16) Magmaliw itayon maabig a managbangat diad pagmaliw a maong a dumerengel, diad pamasiansian simpli ed saray bengatla, diad pantepet na tepetepet ya atekepay aralem a pakatalos, diad pangusar na epektibo iran ilustrasyon, tan diad panbasa na kasulatan tekep na dunong. Komon ta nagunggunaan itayon amin manlapud panangipasal ya itatarya nen Jehova diad panamegley na organisasyon to, ta saya so makatulong ed sikatayo a nawalaan na “dila na saray abangatan.” (Isaias 50:4) Diad sigpot a panganamot ed amin ya uusaren a nitarya parad ministeryo tayo, pati saray brosyur, audiocassette, tan videocassette, naaralan tayo so manbangat tekep na aralem a pakatalos tan pananangguyor.
[Paimano ed leksab]
a Saray proper name so inapag unong ed silabiko, kada silabiko so nibiig diad panamegley na tulnek odino marka ed panangibalikas. Say panangidanet so niiyan ed silabikon amarkaan. No say silabiko so mansusumpal ed sakey a vowel, say vowel so nibalikas ya andukdukey. No say silabiko so mansasampot ed sakey a consonant, say vowel so nibalikas ed antikey.
Kasin Natandaan Yo?
◻ Panon a makatulong ed panagbangat tayo so pagmaliw a maong a dumerengel?
◻ Panon tayon naalig si Pablo tan si Jesus ed panbangat a simpli?
◻ Antoran klase na tepet so nausar tayo sano ibabangat so arum?
◻ Anton klase na saray ilustrasyon so sankaepektiboan?
◻ Panon tayon napaaligwas so dunong tayo bilang mapublikon managbasa?
[Litrato ed pahina 16]
Say sakey a maong a managbangat et ondengel ta pian makagamor na aralem a pakatalos
[Saray litrato ed pahina 18]
Angagwat si Jesus na saray ilustrasyon manlapud agew-agew a kabibilay