Panon so Ikiwas Tayon Andi-siblet ed Panangaro na Dios?
“No onya no panon ya inadaro tayo na Dios, sirin sikatayo ed inkasikatayo so walad silong na obligasyon a manaroan ed sinansakey.”—1 JUAN 4:11.
1, 2. Anto so nakaukolan parad sikatayo ya onkiwas ya andi-siblet ed saray demostrasyon na panangaro na Dios?
SI Jehova so mogmong alimbawa na aro. Peteg, ed abenegan ya artikulo, anengneng tayo no panon a peteg a daakan iray paneknek na aro to. Naimano tayo met no panon a si Moises, David, tan si Jesu-Kristo so kinmiwas ya andi-siblet ed saramay demostrasyon na aro. Agta balang sakey ed saray Tasi nen Jehova so manlabay a manggawa ed pareho? Maseguron tuloy!
2 Anto so kakaukolanen no sikatayoy onkiwas ya andi-siblet ed saray balikas na panangaro na Dios? Sakey a bengatla ed pigara, nepeg tayon mangiyuna ed sikato ed bilay tayo, a sikatoy aroen ed amin a puso, kamarerwa, nonot, tan biskeg tayo. (Marcos 12:29, 30) Kabaliksan na saratan a diad nailuam-ed-Dios, a walaan na ampetang a personal a relasyon ed si Jehova. Kasin pilalek tayo so mitongtong ed mangatatawen ya Ama tayo ed pikakasi? Kasin manpipikasi tayon andi-tunda tan maseet ed pikakasi? Odino kasin manapuratsa tayo ed saray pikakasi tayo, no maminsan anggan okupadon-tuloy a manpikasi? (Roma 12:12; 1 Tesalonica 5:17) Kasin iderekta tayo so imano ed si Jehova, a mangiiter na galang ed sikato tan organisasyon to ed walan nagagawaaan tayo? (1 Corinto 3:7; 4:7) Kasin peteg a liknaen tayo so singa ginawa na salmista? Nipaakar ed Dios, inkuanto: “Maminpiton danay ed agew a walan nandayew ak ed sika.”—Salmo 119:164.
3. Sano sikatayoy mankakasakey ed panligliwaan ed sosyal, panon a nipanengneng a sikatayoy onkikiwas ya andi-siblet ed panangaro na Dios?
3 Balanglan sikatayoy onkikiwas ya andi-siblet ed panangaro na Dios odino andi et niparungtal a maong sano sikatayoy mankakasakey ed panligliwaan ed panaon a sosyal. Kasin say totongtongen tayo so onliber ed sekular iran pamaakaran odino ed espiritual a bengabengatla? Agto kabaliksan a sikatayoy walan seryoson manaral ed Biblia ed kada panaon a mitipon tayo ed kaparan mananisia. Balet maseguron makaromog tayo na makapainteres a bengabengatla ed espiritual a nengneng ya ilaktip ed tongtongan tayo. Akin ya ag-ibinsabinsa iray eksperiensia ed lawak, ya idalatdat so paboriton teksto tayo ed Biblia, ya ibabaga no panon a naaralan tayo so katuaan, odino mangisitas na saray ebidensya ed maaron panasikaso tan bendisyon na Dios?
4. Panon so pangikuenta tayo ed saray pamaakaran no sikatayo so adismaya nipaakar ed pigaran pribilehyo ed lingkor?
4 Sananey a sirkumstansya a nayarin niparungtal so laknab na apresasyon tayo ed panangaro na Dios et sano sikatayoy alabsanan nipaakar ed pigaran pribilehyon serbisyo ed organisasyon nen Jehova. Panon so ikiwas tayo? No say manunan paga tayo et pamagalang ed si Jehova, sikatayo so mikasakey a nagkalalon say Dios so parehon napagalang a maong ed siopaman a walaan na nikadkaduman pribilehyo ed serbisyo. (Ipareng so Lucas 9:48.) Balet no sikatayoy walaan na masyadon paga ed dilin bentaha odino ngaran tayo, sikatayoy manaburido a sikatayoy alabsanan, a singa isisipen tayo. Nepeg a sinonot tayo ya inaro tayo nen Jehova tan nakabatan ni ingen a diad kaplesan et agtayo makalegpet na pamaakaran ed teokratikon responsabilidad. Nayarin sikatayoy mayamyaman a bebendisyonan to ed arum iran dalan, tan say ontan iran paneknek na panangaro to so nepeg a makatulong ed sikatayon manpatuloy ed espiritual ya inkabalanse.—Uliran 10:22.
Mangaaro ed Inkatunong, Mamubusul ed Kaugsan
5. Saray paneknek na panangaro na Dios so nepeg a nawalaan na anton epekto ed kondukta tayo?
5 Saray paneknek na panangaro na Dios ed sikatayo so nepeg a mamayubo ed sikatayon onalig ed Kristo ed pangaro ed inkatunong tan pamubusol ed kaugsan. (Hebreos 1:9) Tua, agtayo nagawaan iyan ayadyarin tuloy, a singa ginawa nen Jesus. Ingen, nagawaan itan a kalat tayo a magmaliw a masanto, matua, mananumpal-ganggan a posible ed ag-ayadyarin kipapasen tayo. Pian nagawa iya, agtayo mamayubo lambengat na panangaro parad matunong tan maabig iran bengatla noagta ontan met a mamayubo na panamusol, agpanlabay, pandimla, ed no antoy mauges. Unong ya imbalikas nen apostol Pablo itan: “Busulen so mauges, onkiling ed maabig.” (Roma 12:9) “Busulen” so mabiskeg a maong salita, kabaliksan toy “ikuentan alablabas a pankabusol.”—Webster’s New Collegiate Dictionary.
6. Anto so makatulong ed sikatayon manbantay a sumpad saray tukso ed dalan tayo ed mundo, say makasalanan a laman tayo, tan say Diablo?
6 Anto so ontulong ed sikatayon manbantay a sumpad manangitulak iran tukso ed dalan tayo ed panamegley na mundo, say dilin makasalanan a laman tayo, tan say Diablo? Say katooran ed si Jehova a Dios. Sikatoy akikasi ed sikatayo: “Onkabat ka, anako, tan paliketen mo so pusok, pian naebatan ko so mamabalaw ed siak.” (Uliran 27:11) On, say katooran ed si Jehova so mamayubo ed sikatayon mangala na makabat a kurang ed panamusol ed no antoy bubusolen to. Niarum ni, anggan panon lan singa ompatnag a makapalikliket odino makapasagyat so pamuyak ed sakey ed saray ganggan na Dios, manpatuloy tayon ibaga ed inkasikatayo a say panggawa na ontan so andian na kablian. (Galacia 6:7, 8) Say atooan a puso so makapalikdo, manamalingo, masilib, unong ya apanonotan tayo ed Jeremias 17:9. Say Kristianon puso so manlabay ed maong, marakep, puro iran bengatla. Balet no maminsan say makasalanan iran kilingan so mamalagyat a manpilalek met ed mauges. Singa saray puso na Israelitas a nandayew ed si Jehova tan ingen nansiansia ed panagtalintao da ed “atagey iran pasen,” kanian say dilin puso tayo so nayarin magmaliw a masiblet tan mamalikdo. (1 Arari 22:43; Deuteronomio 12:2) Say ag-ayadyarin puso so nayarin mananap na pangirasonan pian onlad dalan na katuksoan. Nayarin mamawas ed inkaseryoso na mauges a bengatlan agawaan ya akatuksoan tayo. Odino nayarin say puso tayo so manalin mangombense ed sikatayo ya antokaman a dusa so temporaryo lambengat.
7. Akin a manbantay tayo ed panpilalek na mauges?
7 Diad apresasyon ed panangaro na Dios, nepeg tayon manbantay a sumpad panpilalek ed mauges, a singa ikiling a mamaarap ed seksual ya imoralidad, balangalan sikatayoy walad kasuloan o walad panamaley. Maparanay, no antoy ginmapon singano agmakapasakit a pankarinyo so nanresulta ed duaran Kristiano a magmaliw ya ontanlan emosyonal ya alanor ed sinansakey a walan angagamil na kasalanan tan walan adispelosip. Angan saray mamatatken, a nepeg a manpatuloy ya alimbawa ed pulok, et walan naermenan ed sarayan pamaakaran!—Ipareng so 1 Arari 15:4, 5.
8. Anton pasakbay ya alimbawa so inter nen apostol Pablo ed sikatayo, tan panon a niilustray ontan a problema?
8 Imanoen si apostol Pablo, ya apapalaran ed makapakelkelaw iran pasingawey tan pakayari tan dingan na langkap na madibinon inkapuyan. Pian ontalona ed pipoligesgesan to a sumpad makasalanan iran kilingan, sikatoy walan mibakal—on, nagkalalon pekpeken–so laman to. Kasin mankontento tayo ed panggaway daiset? (Roma 7:15-25; 1 Corinto 9:27) Singano sikatayo so walad sakey a melag a baloto ed maples a manaagos ya ilog tan nagogoyor a mamaarap ed kapelagan to. Pian niarawi ed desyang, nepeg tayoy andi-tundan mansakay a manpaatagey a sumpad mabiskeg ya agos. Nayarin ompatnag ya agtayo manggagawa na nagkalalon aligwas, balet basta sikatayoy mantutuloy ya ibunek so inkasikatayon pilit, agtayo ompawil ed saray kapelagan ed kadederal tayo. Petepeteg, saray paneknek na panangaro nen Jehova a Dios ed sikatayo so nepeg a sengegan ed sikatayon mangibunek ed inkasikatayo a pilit a magmaliw a matoor ed sikato diad panamusol ed kaugsan tan pangaro ed inkatunong.
Ipanengneng so Sanaagin Panangaro
9. Anton simbawa so inter nen apostol Juan no nipaakar ed panangaro ed agagi tayo?
9 Saray paneknek na panangaro na Dios so nepeg a mamayubo ed sikatayon mangaro ed saray agagi tayo unong ya inaro nen Jesu-Kristo iray babangatan to. (Juan 13:1) Sankamatukoyan, inkuan na apostol Juan: “Onya so panangaro, ya aliwan lapud angaro tayo ed Dios, noag ingen sikato so angaro ed sikatayo tan inbaki to so Anak to a bilang manamaandi ed kasalanan tayo. Inararok ira, no onya so impangaro na Dios ed sikatayo, nepeg met a manaaroan so sakey tan sakey ed sikatayo.” (1 Juan 4:10, 11) Diad tua, inkuan nen Jesus a say dalan na pakabidbiran ed tua iran patumbok to et say aro ed limog da.—Juan 13:34, 35.
10, 11. Anto iray arum a dalan a nidemostra tayo so inaagin panangaro?
10 Kabat tayo a saray Kristianos so nepeg a mangipanengneng na sanaagin panangaro. Balet aliwan makapuy so panginonot ed inkasikatayo ed nanduruman dalan ya ipanengneng tayo iyan singa-Kristo a panangaro ed sinansakey. Say ontan ya aro so ontulong ed sikatayo a paulyanan iray panduruma no nipaakar ed rasa, inkabaley, edukasyon, kultura, tan pang-ekonomya. Nagkalalo ni, say sanaagin panangaro so mamayubo ed sikatayon onatendin nankakasakey ed saray pantitipon. No peteg ya inaro tayoray agagi tayo, agtayo abuloyan so mauges a panaon odino samsamet a sakit ed pisikal a mamaandi ed gayaga tayo a miulop dingan da tan mibiang ed panpapasesegan. (Roma 1:11, 12) Nagkalalo nen satan, say sanaagin panangaro so manpaprepara ed sikatayon maong ed saray pantitipon tayo tan mangala na aktibon biang ed saratan pian sikatayoy makasagyat ed aro ed sinansakey tan maabig iran kimey.—Hebreos 10:23-25.
11 Anto met ed itulong ed saray agagi tayo ed lawak a ministeryo? Walan naimano a saray mamatatken tan ministeryal ya ariripen so naynay a mibiang ed pankabkaabungan a ministeryo ed sinansakey odino ed inkasikara no sarag da, tekep na daiset a panagplano, itagar yoray manangipalapag na Panarian a mankaukolan na tulong ed ministeryo a miulop ed sikara. Say pangipanengneng na aro ed sayan dalan so manggawa ed lawak a serbisyo na saray mamatatken tan ministeryal ya ariripen a doblen tumang. Tan anto met ed pangitagar ed balo nin manangipalag ed sakey a panagaral na Biblia ed abung?—Roma 15:1, 2.
12. Panon tayon talosan so 1 Juan 3:16-18?
12 Say aro met so sengegan a sikatayoy ontulong ed saray agagi tayo a walad peteg a materyal a pankaukolan. Insulat nen apostol Juan: “Diad saya abidbir tayo so aro, ta saman inter to so bilay to nisesengeg ed sikatayo; tan sikatayoy nepeg met a mangitalaga ed bilay tayo nisesengeg ed saray agagi tayo. Balet siopakaman a walaan na kayamanan to ed sayan mundo a makapansuporta ed bilay tan nanengneng to so mankaukolan ya agi tan ingen kaputan to so puerta na panangasi ed sikato, diad anton dalan a mansiansia so aro na Dios ed sikato? Anakko ran ankekelag, aleg a mangaro tayo, ed salita nisay diad dila noag dia ed saray gawa tan dia ed katuaan.” (1 Juan 3:16-18) Nayarin agtayo nakerew natan ya italaga iray kamarerwa tayo ed biang da, balet no maminsan walaan tayo na saray pankanawnawan ibalikas so panangaro ed sikara ed arum iran dalan, aliwa lambengat ed salita odino ed dila noag ontan met ed saray gawa. Anggapo so mauges ed pangaro ed saray agagi tayo ed salita, balet agtayo labay a limitaan so panangaro tayo ed saya sano sikaray makaukolan na materyal iran bengatla. Say balikas nen Jesus a “wala so nagkalalon liket ed pangiter nen say pangawat” so onaplika met ed pangitarok na materyal a tulong.—Gawa 20:35.
13. (a) Anto iray pigaran manunan katuaan a naaralan tayo dingan na tulong na nanengneng ya organisasyon nen Jehova? (b) Anton makanan punto so ginawa nen Charles Taze Russell?
13 Walaan tayo na pankanawnawan ipanengneng so panangaro ed agagi tayo a mangipapangulo ed kongregasyon odino mitukoyan ed nanengneng a sankamundoan ya organisasyon nen Jehova. Ilaktip na saya so pagmaliw a matuwa ed “matoor tan makabat ya aripen.” (Mateo 24:45-47) Nepeg ya arapen tayo so katuaan ya anggan panon lay gawaen tayon pamabasa tayo ed Bilia, agtayon balot naaralan so katuaan ed dili tayo. Agtayo komon aromog so katuaan nipaakar ed si Jehova, saray gagala tan atributos to, say kabaliksan tan kaimportantian na ngaran to, say panarian, dondon nen Jesus, say pandumaan ed baetan na organisasyon na Dios tan ed si Satanas, nisay no akin ya inabuloyan na Dios so kaugsan. Singa ontan ed insulat na inmunan presidente na Watch Tower Society, si Charles Taze Russell nen 1914: “Agta sikatayo so abendito, maliket a totoo? Agta say Dios tayo et matoor? No wala man so makaamta na dinanman a bengatlan magmaong, abuloyan a mangala ed satan. No siopakaman ed sikatayo so makaromog na bengatlan magmaong, kaliktan min ibagayo itan ed sikami. Kabat tayon anggapoy magmaong nisay kapalduan maong nen say walan aromog ed Salita na Dios . . . Anggapoy sinalita odino sulsulat a makapangibaga ed deen, say gayaga tan say bendisyon ya intarok na malinew a pikakabat ed tuan Dios diad kapusoan tan bilay tayo. Say Salaysay na Kakabatan, Hustisya, Pakayari tan Aro na Dios so nanagnap a mamenek ed saray kilingan na parehon nonot tayo tan puso tayo. Anggapo lay anapen tayo. Anggapo lay mas nagkalalon pilalek nen say pangisepsep ed kanonotan tayo ed sayan makapakelaw a Salaysay.” (The Watch Tower, Disyembre 15, 1914, pahina 377-8) Agaylan tua iraman a maong-inkasulat iran salita!
Manmiministro ed Saramay Walad Paway
14. Panon a saray balikas na panangaro na Dios so mamayubo ed sikatayon onkiwas ed saramay walad paway?
14 Saray balikas na panangaro na Dios a pangagayagaan tayo so nepeg a mamayubo ed sikatayo a mangipanengneng na panangaro ed kaabay ed saramay walad paway na kongregasyon. Panon tayon nayarin gawaen iya? Saray sirkumstansya so mangipanengneng a natulongan tayoray kakaabay tayo ed materyal a dalan. Balet, nagkalalon importanti, ipanengneng tayo so panangaro ed kaabay diad pangitarok ed arum na maong a balita na Panarian na Dios tan aantabayen iray manangaro ed inkatunong a magmaliw a babangatan nen Jesu-Kristo. Kasin maparanay tayo ed lapag a ministeryo, odino napapaulianan itan? Kasin nagmaliw itan a kaugalian lambengat odino basta-basta a nengneng na serbisyo? Odino kasin peteg ya abayuboan itayo na panangaro ed kaabay? Kasin mangipapatnag tayo na pililikna? Kasin maanus tayo, a manalagar ed totoo ya onebat? Kasin pasesegen tayoray unabung a mangibalikas ed inkasikara? On, imbes a gawaen so amin a pantongtong, abuloyan tayo so panangaro ed kaabay a mamakiwas ed sikatayon ontalineng tan nawalaan na makatumang iran singbatan ed Biblia dingan na totoon naabet tayo ed ministeryo.
15. Akin a say “inpormal a panagtasi” so sakey a magmaong a termino imbes ya “agginagalan panagtasi”? (b) Akin a mangala na bentaha ed saray pankanawnawan mantasin inpormal?
15 Kasin ontanlan alerto tayo a sarag tayo a mangala na bentaha ed saray pankanawnawa a mantasin inpormal? Nepeg ya imanoen so aliwa lambengat ya agginagalan panagtasi, a mangisusuheri na kimey ya ag-inplano odino walaan na samet ya importansya. Say inpormal a panagtasi so importantin tuloy, tan say panangaro ed kaparan totoo so mamasagyat ed sikatayon mangala na saray pankanawnawan mibiang ed satan. Agaylan naynay a mabunga so ontan a panagtasi! Alimbawa, kaleganan ya onatendi ed sakey a kumbension na saray Tasi nen Jehova ed mamaabalaten ya Italya, sakey ya agin laki so linma ed sakey a talyer pian pasalatan so headlight na kotse. Legan a manalagar, sikatoy akapantasi ed saramay walad liber to tan angiter ed sikara na handbills a mangiimbita ed sikara ed mapublikon paliwawa na Biblia ed Simba. Diad sakey ya internasyonal a kumbension ed Roma sakey a taon ed saginonor, sakey ya agin laki ya agto nabidbir so angabrasa ed sikaton ampetapetang. Siopa iyan agin laki? Akin, sikatoy sakey ed saramay lalakin walan initdan to na handbill ed talyer nen katantaon! Say laki so inmatendi pian ondengel ed mapublikon paliwawa tan inter to so ngaran to parad sakey a panagaral na Biblia. Natan sikato tan say asawa ton bii so dedikadon Tastasi nen Jehova. Anggapoy panduwaruwa a say inpormal a panagtasi so makatumang a maong!
Mansiansian Onkikiwas ed Panangaro na Dios
16. Anto iran tepet so nayarin itepet tayo ed inkasikatayo?
16 Peteg a si Jehova so mabunlok ed pangipatnag na aro ed saray palsa to. Unong a naimano tayo, say Kasulatan so mangiter na maabig iran alimbawa ed sikatayo ed saramay kinmiwas ya andi-siblet ed saray paneknek na panangaro na Dios. Sankamatukuyan, say apuyanan a salmista so angiyabawag: “O komon no saray totoo et idayew da si Jehova lapud abig na linawa to tan lapu ed makapakelkelaw ira a gawa to ed saray anak na totoo.” (Salmo 107:8, 15, 21, 31) Manpakpel ta itayon awaten so agkanepegan a panangasi na Dios tan onsaew ed saray gagala to? Agbalot nagawa itan! (2 Corinto 6:1) Kanian balang sakey ed sikatayo so ontepet ed inkasikaton sinansakey: ‘Kasin peteg a papablien koray balikas na panangaro na Dios a walan nangayagaan ko la tan mataletalek a manilalo a mangayaga ni ed arapen? Kasin mamayubo ira ed siak a mangaro ed si Jehova ed interon pusok, kamarerwak, kanonotan ko, tan biskeg ko? Kasin siak so peteg a nailuam-ed-Dios? Kasin inarok so inkatunong tan bubusulen so kaugsan? Kasin mangipapanengneng ak na sanaagin panangaro? Tan panon kaapit a sasalien kon manakar ed saray bakat nen Jesus no nipaakar ed ministeryok?’
17. Anto so pansumpalan no sikatayoy onkiwas ya andi-siblet ed saray paneknek na panangaro nen Jehova a Dios?
17 Peteg, walaray dakel a dalan a pangipanengneng na masimoon a pisasalamat tayo ed amin a paneknek na panangaro na Dios a naeksperiensia tayo. Diad panganamot na naspot a bentaha ed amin a pankanawnawan ipanengneng so ontan ya apresasyon, napagayaga tayo so puso na mangatatawen ya Ama tayo, magmaliw a bendisyon ed arum, tan makawat na gayaga, deen, tan inkakontento ed inkasikatayo. Mantultuloy tayo komon ya onkiwas ya andi-siblet ed saray paneknek ed panangaro na Dios.
Panon so Iyebat Yo?
◻ Anto so nakaukolan ed ikiwas ya andi-siblet ed panangaro na Dios?
◻ Panon tayon manbantay a sumpad saray tukso?
◻ Anto iray dalan a mangipanengneng na sanaagin panangaro?
◻ Panon a saray paneknek na panangaro nen Jehova so mamayubo ed sikatayo ya onkiwas ed saray kakaabay?
[Litrato ed pahina 15]
Nepeg tayon talonaen ya onsumpa ed saray makasalanan a kilingan pian onarawi ed desyang
[Litrato ed pahina 16]
Saray mamatatken so mangipanengneng na sanaagin panangaro diad piulop ed arum ed ministeryo na Panarian
[Litrato ed pahina 17]
Si Charles Taze Russell, say inmunan presidente na Watch Tower Society, so anawag ed imano ed deen, gayaga, tan bendisyon ya itarok lambengat na Dios