Say Pisasangsangan nen Jehova ed Saray Nasyon

“Sakey a tanol so onsabi naani anga met lanlamang ed sampot na dalin; ta si Jehova wala so pisangsanganan to ed saray nacion.”​—JEREMIAS 25:31.

1, 2. (a) Anto so agawa ed Juda kayari na impatey nen Arin Josias? (b) Siopa so unor ya ari na Juda, tan panon a sikato so nanirap lapud agto inkamatoor?

SAY dalin na Juda so nidunget ed maatap a panaon a mairap a pilimogan. Sakey a maabig ya ari, si Josias, so temporaryon amaleen ed sanok nen Jehova. Balet anto so tinmunbok sanen si Josias so pinatey nen 629 K.K.P.? Saray ararin tinmunbok ed sikato so ag-amagalang ed si Jehova.

² Say unor ya ari na Juda, si Zedekias, komapat ya anak nen Josias, so nantultuloy, a singa ibabaga 2 Arari 24:19, “et ginawa to so mauges dia ed pakanengneng nen Jehova, unong na amin a ginawa nen Joacim [say panguloan ya agi to].” Anto so resulta? Si Nabucodonosor so linmusob ed Jerusalem, kinautibo si Zedekias, pinapatey iray anak ed imaton to, sikatoy binulag, tan sikatoy inawit ed Babilonia. Nagkalalo ni, sinamsam na saray taga Babilonia iray baseha ya inusar ed panagdayew ed si Jehova, a pinoolan so templo tan say syudad. Saray akaliktar so dinakep ed Babilonia.

3. Anton peryodo na panaon so ginmapo diad inkaderal na Jerusalem nen 607 K.K.P., tan anto so niganan nagawa ed kasampotan na satan a peryodo?

³ Saman a taon, 607 K.K.P., so ananda aliwa lambengat ed kaunoran a kadederal na Jerusalem noagta gapoan met na “aturon panaon na nasyones,” ya atukoy ed Lucas 21:24, NW. Sayan 2,520-taon a peryodo so anampot ed siglo tayo, nen taon 1914. A diad saman et say panaon so sinmabi ed si Jehova, diad panamegley na nitronon Anak to, si Jesu-Kristo, a babaleg nen say si Nabucodonosor, ed pangiyabawag tan pangidapo panangukom ed abulok a mundo. Sayan panangukom so ongagapo ed modernon-agew a misimbangan ed Juda, kasimbangan na mankuan a mangirepresenta ed Dios tan Kristo ed dalin.

4. Antoran tepet so onlelesa natan ed pisiglaotan na propesiya nen Jeremias?

⁴ Kasin naimano tayo so mitukoyan a gulo ed baetan na agawa legan na unor iran taon na Juda ed silong na arari to​—tekep na saray makadesyang ya ebento a mangaapekta ed kabangibang iran nasyon—​tan ed gulo ed Kakristianoan natan? Peteg ya wala so naimano tayo! Sirin, anto so ipapanengneng na propesiya nen Jeremias nipaakar ed no panon so pangasikaso nen Jehova ed saray pamaakaran natan? Imanoen tayo.

5, 6. (a) Nanlapulad 1914, panon a say kipapasen ed Kakristianoan so mipareho ed Juda sakbay na kadederal to? (b) Anton mensahe so tarok na modernon Jeremias para ed Kakristianoan?

⁵ Say matematisian tan pilosopon taga Britanya a si Bertrand Russell so nankomento ed ngalngali 40 a taon lay apalabas: “Nanlapulad 1914, amin na mapaga ed andar na panaon na mundo so agulon tuloy lapud singa nigetar tan dinetermina lan akauna a mamaarap ed lalon babaleg a kadederal.” Inkuan nen statesman ya Aleman a si Konrad Adenauer: “Say kaligenan tan kareenan so naandipat manlapud bilay na totoo nanlapulad 1914.”

⁶ Natan, a singa ed agew nen Jeremias, say manasingger a kasampotan na sakey a sistema na saray bengatla so naiimano ed dakel a panamaagos na dala na saray inosente, nagkalalo la ed duaran bakal na mundo ed sayan siglo. Diad kaslakan a kabiangan, sarayan bakal so akilabanan na saray nasyon na Kakristianoan, a mangibabagan mandadayew ed Dios na Biblia. Agaylan baleg a pansimpisimpitan! Agpankelawan a si Jehova so angibaki na saray Tasi to ed sikara, a mangibabaga, ed saray salita na Jeremias 25:5, 6: “Ompawil kayo natan balang sakey a manlapu ed inkauges na saray dalan to tan manlapu ed inkauges na saray gawa to . . . Agkayo ontombok ed saray sananey a dirios ya manlinkor ed sikara, tan manpikasi ed sikara, tan agyoak sagyaten a manpasnok ed gawa na saray lima yo; et agak naani mangawa na duksa ed sikayo.”

7. Anto so walan paneknek ya imbaliwala na Kakristianoan iray pasakbay nen Jehova?

⁷ Anggaman ontan, saray nasyon na Kakristianoan so sinmaew a pinmawil. Saya so nipanengneng diad panggagawa da na nagkalalon panagbagat ed dios na bakal ed Korea tan Vietnam. Tan nantultuloy dan gagastosan iray managlako na patey, saray managgawa na saray armas. Saray dalin na Kakristianoan so nangastos na babaleg a kabiangan a ngalngalin sakey trilyon a dolyar ed saray armas kada taon legan na saray taon na 1980. Manlapud 1951 anggad 1991, say gastos ed saray armas na Estados Unidos labat so linmampas ed dagup a tubo na amin a korporasyon na Amerika no pankakasakeyen. Nanlapulad maksil ya impangiyabawag ed anggaan na Cold War, saray panagbawas so gagawaen ed kadaanan iran armas nuklear, ingen nansiansia tan nantultuloy so pamaaligwas ed saray baleg ya arsenal na arum iran makapatey ya armas. Nayarin usaren iraya balang agew.

Panangukom Sumpad Kunsintidor Iran Uuleyan na Kakristianoan

8. Panon a saray salita ed Jeremias 25:8, 9 so nasumpal ed Kakristianoan?

⁸ Saray arum nin salita nen Jehova, a naromog ed Jeremias 25:8, 9, so onaplikan nagkalalo ed Kakristianoan, a sinmaew a manbilay unong ed saray Kristianon estandarte na inkatunong: “Kanian onia so kuan nen Jehova na saray ejercito: Lapu’d no agyo dinengel so saray salitak, Nia, mangibaki ak naani tan alaen ko so saray amin a familia ed amianen, kuan nen Jehova, et mangibaki ak naani ed kinen Nabucodonosor ya ari na Babilonia, ya aripen ko, et yakar ko ra naani sumpa ed saya a dalin, tan sumpa ed saray manaayam ed sikato, tan sumpa ed saray amin a nacion ed liberliber; et bagbagen ko ra naani a sigpot, tan gawaen ko ra naani a sakey a pankelawan, tan maando a kibalatar.” Sirin, manlapud mangibabagan totoo na Dios, say Kakristianoan, say baleg a kairapan so onggapo la, diad kaunoran et onlaknab ed sankadalinan, ed “amin a nacion ed kaliberliber.”

9. Diad anton pantalos a say espiritual a kipapasen na Kakristianoan so nagmaliw a mauges ed panaon tayo?

⁹ Wala so sakey a panaon ed Kakristianoan sanen say Biblia so nirespeto, sanen say panangasawa tan bilay na pamilya so ngalngalin malaknab ya impasen bilang sakey a lapuan na liket, sanen saray totoo so binmangon ya asakbay tan aliketan ed inagew-agew a kimey da. Dakel so nainawaan ed ikasikara diad panbabasa tan panaaral ed Salita na Dios ed liwawa na lamparaan. Balet natan, say piaakdol ed ag-asawa, say diborsyo, panag-abuso ed druga tan panagbuanges, inkadelingkuente, agum, ugalin inkangiras ed kimey, inkailuam ed TV, tan arum nin bisyo so manederal ed bilay ed mapeligron kipapasen. Saya so manunaan ed panderal a pagani-gani lan idapo nen Jehova a Dios ed kunsintidor ya uuleyan na Kakristianoan.

10. Deskribien so kipapasen na Kakristianoan kayari pangidapo na panangukom nen Jehova.

¹⁰ Si Jehova so mangiyaabawag, unong a nabasa tayo ed Jeremias kapitulo 25, ed bersikulo 10 tan 11: “Sakey ni ekalen ko naani ed sikara so voces na gayaga tan voces na liket, say voces na novio, tan say voces na novia, say tanol na saray gilingan, tan say silew na tinkaw. Et saya ya amin a dalin sikato naani sakey a kibalatar, tan sakey a pankelawan; et saraya a nacion manlinkor ira naani ed ari na Babilonia ed pitomlo a taon.” Peteg a satan so makapakelaw sano say mabiskeg iran templo tan magastos iran palasyo na Kakristianoan so nageba ed kadederal da. Panon kalaknab iyan kadederal? Diad panaon nen Jeremias, say inkaderal na Juda tan saray kabangibang a nasyon so nanbayag na 70 taon, a diad Salmo 90:10 so manideskribe bilang sakey a tipikon dukey na bilay. Say pangidapo na panangukom nen Jehova natan so magmaliw a kompleto, agmangangga.

Panangukom Sumpad Babilonia a Baleg

11. Siopa so magmaliw ya instrumento ed panderal na Kakristianoan? Akin?

¹¹ Singa impasakbay ed Apocalipsis 17:12-17, onsabi so panaon sano igapo nen Jehova so makapakelaw a gawa to diad pangipasen ed satan ed kapusoan na ‘samploran saklor’​—saray militaryan membro na Nasyones Unidas—​‘pian sumpalen so kinaliktan to’ ed panderal ed imperyo na palson relihyon na mundo. Panon iyan nagawa? Wala so dakel iran paraan a say “samploran saklor” ed Apocalipsis kapitulo 17, ed saray salita na Apo 17 bersikulo 16, et “bosolen da so balangkantis . . . tan sikato so lablabasen dan poolan ed apuy.” Tua, saray nuklear ya armas so dinmakel tan siansia nin ondarakel ed dakel iran mapeligron lugar ed dalin. Balet nepeg tayon alagaren tan imanoen no panon nen Jehova ya ipasen ed kapusoan na mapulitikan manuley pian idapo so panangukom to.

12. (a) Anto so agawa ed Babilonia kayari na inpaneral to ed Jerusalem? (b) Anto so nagawa ed saray nasyon kayari na kaderal na Kakristianoan?

¹² Diad inmunan panaon et asabin asagmak na Babilonia so ampetang a sanok nen Jehova. Mitukoyan, manlapu ed Jeremias Jer kapitulo 25, bersikulo 12, say propesiya so minoria ed saginonor, a nauman a punto-de-vista. Agla betang na Manangidapo nen Jehova, si Nabucodonosor tan say Babilonia so kaiba la natan ed limog na amin a minumundon nasyon. Saya so mipadpara ed kipapasen natan. “Say samploran saklor” ed Apocalipsis kapitulo 17 so maneral ed palson relihyon, balet diad saginonor sikaran mismo so managmak na kadederal a kaiba so amin ya arum ya “arari ed dalin,” a singa adeskribe ed Apocalipsis kapitulo 19. Say Jeremias 25:13, 14 so manideskrebi no panon a say Babilonia, a pati ‘amin a nacion’ ya angabuso ed totoo na Dios, so naukom. Inusar nen Jehova si Nabucodonosor bilang manangidapo na pananusa ed Juda. Ingen namparan sikato tan saray arari ed Babilonia diad saginonor so sikikinon a nantasi sumpa ed si Jehova a mismo, a singa nipanengneng, alimbawa, diad impanleglemew ed saray baseha na templo nen Jehova. (Daniel 5:22, 23) Tan sanen dineral na saray taga Babilonia so Jerusalem, saray kabangibang a nasyon na Juda​—say Moab, Ammon, Tiro, Edom, tan arum ni—​so nanliket tan nanludlurey ed totoo na Dios. Sikara met so kaukolan a mangawat na makanepegan a dusa manlapud si Jehova.

Panangukom Sumpad “Amin a Nasyones”

13. Anto so kabaliksan na “sayan kopa na alak na sanok,” tan anto so agawa ed saraman so uniinom ed kopa?

¹³ Kanian, si Jeremias so mangiyaabawag, a singa nikurit ed Jer kapitulo 25, bersikulo 15 tan 16: “Ta onia so kuan nen Jehova a Dios na Israel, ed siak: Alaen mo so saya ya copa na alak na sanok ed limak, et painumen mo so saray amin a nacion a pangibakian ko ed sika. Et sikara oninum ira naani, et mantogingging ira, tan mankolangkolangan ira lapu ed kampilan ya ipawit ko naani ed nanleleetan da.” Akin a sakey a ‘kopa na alak na sanok nen Jehova’? Diad Mateo 26:39, 42 tan Juan 18:11, sinalita nen Jesus so sakey a “kopa” a mangisisimbolo ed linawa na Dios para’d sikato. Mipadpara, say sakey a kopa so inusar pian isimbolo so linawa nen Jehova para’d nasyones pian inumen so madibinon panangibales to. Diad Jeremias 25:17-26 et nililista irayan grupo na nasyon a mangiyaanino ed saray nasyon natan.

14. Unong ed propesiya nen Jeremias, siopa so uninom manlapud kopa na alak na sanok nen Jehova, tan anto so isisimbolo na saya ed agew tayo?

¹⁴ Kayari na Kakristianoan, singa say Juda, nagawan “sakey a kibalatar, sakey a pankelawan, sakey a pantamsikan tan sakey ya ayew,” manaalagar na kadederal ed nakekeraan ya imperyo na palson relihyon na mundo. Sinmublay, say sankamundoan, ya isisimbolo na Ehipto, so kaukolan ya oninum ed kopa na alak na sanok nen Jehova! On, “amin so saray ar-ari na amianen, arawi tan asinger, ed sakey tan ed sananey; tan amin so saray nanarian ed mundo, ya wala ed tapew na dalin” so kaukolan ya uninom. Kaunoran, “say ari na Sesac oninum naani ed kayari to.” Tan siopa iyan “ari na Sesac”? Say Sesac so sakey a simbolikon ngaran, sakey a cryptogram, odino kodigo, para’d Babilonia. No panon a si Satanas say agnanengneng ya ari ed Babilonia, sikato met so “principe na mundo” anggad sayan agew, a singa inbaga nen Jesus. (Juan 14:30) Sirin, say Jeremias 25:17-26 so mipetekan ed Apocalipsis kapitulo 18 anggad 20 diad pangipalinew ed saray nantutumbokan ya ebento legan a say kopa na sanok nen Jehova so ipapasa. Ununa, say imperyo na palson relihyon na mundo so nepeg a naderal, insan say mapulitikan pakayari, tan insan si Satanas a mismo so ibantak ed kaaralman.​—Apocalipsis 18:8; 19:19-21; 20:1-3.

15. Anto so nagawa sano say kelyaw ed “kareenan tan kaligenan” so narengel la?

¹⁵ Wala so dakel a pantotongtong nipaakar ed kareenan tan kaligenan nanlapulad ipapasen ya impangangga na Cold War, a saksakey lan superpower so natitilak. Unong ya ibabaga ed Apocalipsis 17:10, satan a superpower, a komapiton ulo na maatap ya ayep, so nepeg a “manbayag ed antikey a panaon.” Balet satan ya “antikey a panaon” so manasingger la ed anggaan to. Agla manbayag, amin a kelyaw na pulitikal a “kareenan tan kaligenan” so mansumpal ed “biglan kaderal so onsabin ed sikara.” Ontan so impangibaga nen apostol Pablo.​—1 Tesalonica 5:2, 3.

16, 17. (a) No salien na siopaman so ompaliis ed panangukom nen Jehova, anto so magmaliw a resulta? (b) Diad anton makaderal a paraan a magano lan itarok so linawa nen Jehova ed dalin?

¹⁶ Say interon sistema na mundo nen Satanas, manlapud Kakristianoan so nepeg ya oninum manlapulad kopa na panangibales nen Jehova. Say kaaruman nin ganggan to ed si Jeremias, a nikurit ed Jer kapitulo 25, bersikulo 27 anggad 29, so mamepekder ed saya: “Et kuan mo naani ed sikara, Onia so kuan nen Jehova na saray ejercito, a Dios na Israel; Oninum kayo, et nabuek kayo, tan manota kayo, tan natibakiar kayo, et agkayo la onbangon, lapu ed kampilan ya ipawit ko naani ed sikayo. Et sikato naani, no agda labay ya alaen so copa ed limam pian oninum ira, dia ed ontan ikuan mo naani ed sikara, Onia so kuan nen Jehova na saray ejercito; petepeteg naani ya oninum kayo. Ta nia, igapok so mangawa na mauges ed ciudad a manngaran lapu ed ngaran ko; et sikayo, agkayo ta komon nadusa a mogmo? Aliwa’n say agkayo naani nadusa; ta manawag ak naani na sakey a kampilan ed saray amin a manaayam ed dalin, kuan nen Jehova na saray ejercito.”

¹⁷ Saratan so mabigkeg a salita​—on, makapataktakot irayan salita, lapud imbaga na Soberanon Katawan na sankatalbaan, si Jehova a Dios. Legan na nilibo iran taon, sikato so maanos a nansungdo ed panangayew, panamalaw, tan panaggula ya intarok ed masanto a ngaran to. Anggaman kuan, say panaon so asabin siansia, pian ebatan so pikakasi ya imbangat na pinablin Anak to, si Jesu-Kristo, ed saray babangatan to sanen wadia ed dalin: “Kanian onia sirin no mikasi kayo; Ama mi’n wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, onong ed tawen, ontan met ed dalin.” (Mateo 6:9, 10) Linawa nen Jehova a si Jesus so onkiwas bilang say kampilan To diad pangidapo na panangibales.

18, 19. (a) Siopa so akalugan ed kabayo pian ontalona tekep na ngaran nen Jehova, tan ed anton gagala a sikatoy manalagar sakbay na pangumpleto to’d panalo to? (b) Sano bulosan na saray anghel so dagem na sanok nen Jehova, anton makapataktakot iran ebento so nagawa ed dalin?

¹⁸ Diad Apocalipsis kapitulo 6, ununan nabasa tayo so nipaakar ed inlugan nen Jesus ed amputin kabayo ‘pian manaltalo tan pian sigpot a manalo.’ (Apo 6bersikulo 2) Saya so ginmapo nen sikato’y nitrono bilang mangatatawen ya Ari nen 1914. Sananey niran kabayo tan akalogan so tinmumbok ed sikato, a mangireretrato ed sigpot a bakal, eras, tan salot a manasalot ed dalin tayo nanlapulad saman. Balet kapigan manampot irayan amin a gulo? Say Apocalipsis kapitulo 7 so mangipapakabat ed sikatayo ya apatiran anghel so mamupuger ed “apatira’n dagem na dalin” anggad say espiritual ya Israel tan say baleg ya ulop a nanlapud amin a nasyones so natipon para’d kililiktar. (bersikulo 1) Insan anto so nagawa?

¹⁹ Intuloy na Jeremias kapitulo 25, ed Jer 25 bersikulo 30 tan 31: “Si Jehova manongol naani a manlapu ed tagey, tan ibesngaw to naani so voces to a manlapu ed masanto ya ayaman to; manongol naani a makapanyari sumpa ed sinpokokan to; sikato oningal naani, a singa saray mangigatingatin ed saray uvas, a sumpa ed saray amin a manaayam ed dalin. Sakey a tanol so onsabi naani anga met lanlamang ed sampot na dalin; ta si Jehova wala so pisangsanganan to ed saray nacion; sikato onloob naani ed panangokom ed amin a laman: no nipaakar ed saray marelmeng, yawat to ra naani ed kampilan, kuan nen Jehova.” Anggapo so nasyon a makataynan manlapud iyinum na kopa na sanok nen Jehova. Sirin, satan so maganat a panaon ya amin a maptek-inpanpuson totoo ya isian da so inkasikara manlapud karelmengan na saray nasyon sakbay a bulosan na apatiran anghel so maksil a dagem na sanok nen Jehova. Peteg a maksil a dagem, lapud ituloy na propesiya nen Jeremias ed Jer 25 bersikulo 32 tan 33:

20. Anton eksena so mangidadanet ed kabiskeg na panangukom nen Jehova, balet akin a say kiwas so nakakaukolan?

²⁰ “Onia so kuan nen Jehova na saray ejercito, Nia, say mauges ompaway naani a manlapu ed nacion anga ed nacion et sakey a baleg a bagyo so onalagey naani a manlapu ed kasampotan a kabiangan na dalin. Et saray pinatey nen Jehova sikara naani ed satan ya agew manlapu ed sakey a sampot na dalin anga met lanlamang ed sananey a sampot na dalin. Ag ira naani napaney-eyan, tan ag ira met natipon, no nitabon; sikara naani dutak ed tapew na dalin.” Peteg a sakey a maudyem ya eksena, balet sayan kiwas so nakakaukolan ta pian linisan so dalin manlapud amin ya inkauges sakbay ya itarok so Paraiso ya insipan na Dios.

Saray Pastol so Onnangis tan Onkelyaw

21, 22. (a) Diad Jeremias 25:34-36, sioparay “pomapastol” na Israel, tan akin a sikaray apaskar ya onnangis? (b) Dinan ed modernon pastol so mankanepegan na sanok nen Jehova, tan akin sigpot a manepenepeg itan ed sikara?

²¹ Saray Jer 25 bersikulo 34 ya anggad 36 so nagkalalon mangibabaga ed panangukom nen Jehova, a kuanto: “Managogol kayo, sikayo a pomapastol, tan mannangis kayo; et ontolin kayo ed dapol, sikayo manonaan ed polok; ta saray agew na kapatey yo tan kibuyakbuyak yo sinmabi la, et napelag kayo naani a singa marakep ya agamil. Et saray pastol angapo naani dalan da ya ontainan; odino say manonaan na polok ya ompaliis. Sakey a voces na akis na saray pastol, tan agogol na manonaan na polok! ta si Jehova bagbagen to so pankabkaban da.”

²² Sioparayan pastol? Sikara so aliwan relihyoson papangulo, ya inminom la ed sanok nen Jehova. Sikara so pastol na militar, ya adeskribe met ed Jeremias 6:3, ya anipon ed saray armada ra ya onlaban ed si Jehova. Sikara so mapulitikan manuley, a nampayaman ed pakapasakit na saray uuleyan. Dakel ed saraya so masilib a managtagilako, onsiano ed inkabulok. Sikaray nagmaliw a matantan ya ontulong ed saray naeerasan a mangegetel ed bilay na sankatooan ed mairap a daldalin. Payayamanen da so “manonaan na polok,” a singa saray makapanyarin negosyante na saray armas tan maagum a manederal ed kaliber-liber, bangta mangipupulisay a mangitarok na medikal a tulong tan tagano a diad melag labat a kantidad et makapangiliktar ed minilyon ya ompapatey ya ugugaw.

23. Deskribien so kipapasen na nasasakupan nen Satanas kayari na makaderal iran gawa nen Jehova.

²³ Agpankelawan a sasampotan na Jeremias kapitulo 25, diad Jer 25 bersikulo 37 tan 38, diad pangibabaga ed sarayan sinisiblet a manaanap na kareenan para’d ikasikara labat: “Et saray mareen a sinpokokan napareen ira naani lapu ed masebeg a sanok nen Jehova. Tinainan to so amotan to, a singa say leon; ta say dalin nagmaliw a sakey a pankelawan nisengeg ed sanok na manangapos a kampilan, tan nisengeg ed masebeg a sanok to.” Peteg a makapakelkelaw! Ingen, say ampetang a sanok nen Jehova so siguradon ikalbo na Sakey ya adeskribe ed Apocalipsis 19:15, 16 bilang say ‘Ari na saray arari, tan katawan na saray kakatawan,’ a mangipapastol ed saray nasyon a walaan na tayokor a balatyang. Tan anto so ontumbok?

24. Antoran bendisyon so nitarok ed matunong a katooan ed pakaderal na palson relihyon tan say natitilak ed mundo nen Satanas?

²⁴ Kasin naeksperiensiam la so sakey a bagyo? Satan so makapataktakot ya eksperiensia. Balet diad kaimbuasan, anggaman nayarin makanengneng ka na saray aderal ed kaliberliber, gendat a say dagem so makarepresko tan kalmado a makapisalamat ka ed si Jehova para’d nikadkaduman maabig ya agew. Ontan met, legan ya onkekepa so dagem na baleg a kairapan, sika so makaimano ed dalin tekep na pisasalamat a sika so mabilay tan akaparaan a mibiang ed pangilaknab na kimey nen Jehova ed panlinis ed dalin a pagmaliwen a paraiso. Say pisasangsangan nen Jehova ed saray nasyon so nitarok ed engranden panampotan to, ya itandoro so ngaran to tan iparaan so dalan pian say linawa to so nagawa ed dalin ed silong sa Milenyon Uley na Mesianikon Panarian. Komon ta satan a Panarian so onsabi lan tampol!

Panagrepaso ed parapo 5-24 na sayan artikulo

◻ Anton mansimpisimpitan iran kurang na Kakristianoan natan so nauukom la?

◻ Anton pinalaknab a panmoria ed panangukom so ileletrato ed Jeremias 25:12-38?

◻ Anton kopa na panangibales so ipapasa na amin a nasyon?

◻ Siopara so pastol a mannangis tan mankelyaw, tan akin a sikaray nagogonigon?

[Litrato ed pahina 18]

Pinili nen Jehova so instrumento ed panderal ed Kakristianoan

[Litrato ed pahina 23]

Kayari na bagyo na baleg a kairapan, ompatnag so sakey ya alinisan a dalin