Tepetepet Manlapud Managbasa
◼ Saray angheles so espiritu, andian na materyal iran laman, kanian akin ya ipapanengneng yora ed saray ilustrasyon bilang walaan na saray payak? Kasin saya so relihyoson tradisyon lambengat?
Kaslakan ya ireretrato miray angheles a walaan na saray payak lapud simbolikon pangideskribren naromog ed Biblia.
Duga so kuanyo a saray espiritun palsa et andian na saray materyal a laman a tekep na saray literal a payak—nisay saray lupa, lima-lima, sali-sali, o arum iran kabiangan na laman. Ingen, no maminsan, sano manpanengneng iray angheles ed ariripen na Dios, maseguron sikaray nanengneng a bilang normal a totoo, ta sikaray abalwan ya ontan.—Genesis 18:2, 22; 19:1; Uko-ukom 6:11-22.
Anggaman ontan, no maminsan, saray totoo so mangaawat na saray pasingawey na saray angheles tan dineskribe ra. Say propetan Ezequiel so akanengneng na “apatiran mabilay a palsa,” tan ed saginonor a pasingawey, akabatan toraya a bilang angheles ed say ranggo a kabkabat a bilang kerubin. (Ezequiel 1:5; 9:3; 10:3) Balang sakey ed sarayan angheles so walaan na apatiran payak, a mangipanengneng na abilidar dan onkiwas a mapmaples ed antokaman a direksyon ed saray ganggan na Dios. “Ag-ira ombalingling sano onla ra; onla ra a balang sakey a maptek ed arap . . . No iner ya onaarap so espiritu, diman ira onla. Sikaray ag-ombalingling sano onla ra.”—Ezequiel 1:6, 9, 12.
Balet saray angheles ya anengneng ed pasingawey so ag lawas parepareho. Saray angheles a tatawagen a kerubin ya anengneng nen Isaias so walaan na anemiran payak. (Isaias 6:1, 2) Walaray pandumaan ed baetan na saray pasingawey nen Ezequiel. Diad inmuna, saray angheles so walaan na sali-sali, lima-lima ed leksab na balang sakey ed apatiran payak, tan apatiran lupa (singa lupa na sakey a too, sakey a leon, sakey a baka, tan sakey ya agila). Diad tinmunbok a pasingawey to, sakey ed saray lupa so singa ed samay kerubin imbes a sakey a baka, anganko pian mangipatnag na baleg a pakayari na saray kerubin. Diad saginonor a pasingawey na dekorasyon na sakey a simbolikon templo, anengneng nen Ezequiel iray kerubin a walaan na duaran lupa, sakey ed too tan say sananey ed sakey a leon. (Ezequiel 1:5-11; 10:7-17; 41:18, 19) Diad Sankasantosan na tabernakulo, tan ontan met ed templon impaalagey nen Solomon ed Jerusalem, walaray kerubin a walaan na sanderwan payak. Saraya so walad balitok a sakob na kaban a tatawagen a kaban na sipan. Saray duaran balitok a kerubin so nanarapan, tan namparan walaan na duaran payak ya onlalaknab a manakbong ed Kaban. (Exodo 25:10-22; 37:6-9) Diad tagey na Kaban (tan say sakob to) ed templo nen Solomon ya akalagey ed duaran babaleg a balitok-asakbongan na saray kerubin, balang sakey so walaan na duaran akabuskag iran payak.—1 Arari 8:6-8; 1 Awaran 28:18; 2 Awaran 5:7, 8.
Insulat nen Josephus: “Nipaakar ed [saramay] kerubin a mismo, anggapo so makapangibaga o makapanisip no antoy itsura ra.” Sirin, saray arum ya eskolar tan pintor so angibased pangiretrato ra ed saray angheles (nagkalautla ed saray kerubin) ed nikuan a kadaanan a Sampot a Bukig a kapatparan ayayep a walaan na payak a dirios. Balet sakey a lalon napanmatalkan a giya so komento nen Ezequiel a saramay anengneng to “so kapadpara na mangaraldalin a too.” (Ezequiel 1:5) Kanian sano saray mangatatawen ya angheles so niyulustra ed saray palapagan tayo, kaslakan min iretrato ra a bilang kaparpara na too. Sikaray ireretrato mi a bilang walaan na payak lapud dakerakel a Biblikal a deskribe na saray angheles a walaan na saray payak tan lapud saray komento nipaakar ed saray angheles a “mantektekkiab.”—Apocalipsis 14:6; Salmo 18:10.
Kaunoran, diad pahina 288 na Revelation—Its Grand Climax At Hand! et ireretrato so sakey a mangatatawen a palsa a walaan na payak, a walaan na balanget ed ulo to tan sakey a tombok ed lima to. Saya so sakey a malinew a retrato ya ibabaga na Apocalipsis 20:1: “Anengneng ko so sakey ya anghel a manlapud tawen a walaan na tombok na kalinsurong tan sakey a baleg a gonlonggolong ed lima to.” Natalosan tayo a sayan anghel a walaan na tombok a si niglorian Jesu-Kristo. Ipanengneng na ilustrasyon a sikato so walaan na saray payak a mitunusan ed katuaan a saray angheles ya anengneng ed pasingawey et gendat a walaan na saray payak.