Mansiansian Sinononot ed Agew nen Jehova

“Say agew nen Jehova so asingger ed lawak na panangigeter.”​—JOEL 3:14.

1. Akin a say onsasabin masanton bakal ya inyabawag nen Jehova so duma manlapud “masanton” bakabakal na katooan?

“IYABAWAG iya, sikayon totoo, ed limog na nasyones, ‘Pasantosen so bakal!’” (Joel 3:9) Kasin kabaliksan na saya so masanton bakal? Diad panrepaso ed saray Krusada, relihyoson bakal, tan say duaran guerra mundial​—a walaay baleg a betang so Kakristianoan​—diad panisip lambengat ed inkuan a “masanton” bakal et sengegan la na panmayegmeg tayo ed takot. Anggaman ontan, say masanton bakal ed propesiya nen Joel so aliwan bakal ed limog na nasyones. Aliwan napno-na-busol a puligesgesan parad teritorya o kaykayarian, diad pangusar ed relihyon a bilang baraan. Atan so matunong a bakal. Bakal itan na Dios a mangekal ed dalin na agum, kolkol, inkabulok, tan kairapan ed dalin. Mangiyalangon itan ed makanepegan ya inkasoberano nen Jehova ed interon pasen na pinalsa to. Atan a bakal so mangitandoro ed dalan parad Panarian nen Kristo ta pian itarok so katooan ed Milenyo na sankatalbaan a kareenan, aligwas, tan liket unong ya impasakbay na saray propeta na Dios.​—Salmo 37:9-11; Isaias 65:17, 18; Apocalipsis 20:6.

2, 3. (a) Anto so “agew nen Jehova” a nipropesiya ed Joel 3:14? (b) Akin a makanepegan iray nasyones no antoy kipaarapan da legan na atan ya agew?

² Sirin, anto, so “agew nen Jehova” a nipasakbay ed Joel 3:14? “Kawaen la so agew,” so mismon inyabawag nen Jehova, “ta asingger la so agew nen Jehova, et onsabin singa kabagbag a manlapu ed Makapanyarin-amin a Sakey!” Panon itan a kabagbag? Insalaysay na propeta ed saginonor: “Dakerakel, dakerakel a totoo so wala ed lawak na panangigeter, ta asingger la so agew nen Jehova ed lawak na panangigeter.” (Joel 1:15; 3:14) Saya so agew ya idapo nen Jehova so manangukom a desisyon to ed andian-na-dios iran ulop na katooan a mangipupulisay ed makanepegan ya inkasoberano to ed tawen tan dalin. Desisyon nen Jehova a bagbagen so satanikon sistema na bengabengatla ya abayag lan anayakup ed katooan diad saray gamegamet to.​—Jeremias 17:5-7; 25:31-33.

³ Nepeg ya awaten na abulok a sistema ed dalin itan a desisyon. Balet kasin ontan kauges so sistema na mundo? Say maminsan ya inengneng ed rekord to so magenap la! Imbalikas nen Jesus so prinsipyo ed Mateo 7:16: “Diad panamegley na bunga ra nibiig yo ra.” Agta saray baleg a syudades na mundo so nagmaliw a paralanan na saray druga, krimen, takot, imoralidad, tan polusyon? Saray kapkapanromog a kawayangan diad dakel a daldalin so aaposan na mapulitikan inkawetwet, kakisiran na tagano, tan inkaduka. Masulok a sakey bilyon a totoo so manbibilay ed inkaeras lapud kakulangan na rasyon. Niarum ni, say laganap ya AIDS, a dagdagen na saray druga tan imoral iran estiloy-kabibilay, so amaudiem ed baleg a kabiangan na dalin. Nagkalautla nanlapulad interak na Guerra Mundial I ed 1914, wala so idedenden ed amin a nengneng na bilay diad sankamundoan ya eskala.​—Ipareng so 2 Timoteo 3:1-5.

4. Anton angat so ipaarap nen Jehova ed nasyones?

⁴ Anggaman ontan, titiponen nen Jehova manlapud amin a nasyones so totoo​—a magayagan mangawat ed instruksion nipaakar ed saray dalan to tan manakar ed saray basbas to. Sayan manliliktob-ed-globon totoo so amitpit la ed saray kampilan ya impagmaliw a lukoy, ya itatalirak so marawal iran dalan na mundo. (Isaias 2:2-4) On, saray kampilan so magmaliw a lukoy! Balet agta saya so kasunian na kelyaw ya impaiyabawag nen Jehova ed Joel 3:9, 10? Diman nabasa tayo: “Iyabawag iya, sikayon totoo, ed limog na nasyones, ‘Pasantosen yo so bakal! Liingen yoray mabayanin lalaki! Onasingger ira komon! Ondago ra komon, amin a mibabakal a lalaki! Pitpiten yoray lukoy a gawaen a tarem na kampilan, tan saray kalawit yo a gayagayang.’” Ah, dia et aangaten nen Jehova iray manuley na mundo ya itarok so nankakasakey a biskeg na armada ra a sumpad sikato ed Armagedon. Balet ag-ira ontalona! Sikaray sigpot a natalo!​—Apocalipsis 16:16.

5. Anto so pansumpalan sano anien la “so ubas na dalin”?

⁵ Diad itutunganga ed Soberanon Katawan a Jehova, saray mabiskeg a manuley so angipaalagey na simpenan na makapataktakot iran ayura​—balet sinmaew! Inter nen Jehova so ganggan ed Joel 3:13: “Tan iyan yo so kompay, ta say aanien aluto la. Dago kayo, ongatingatin kayo, ta say panagpespesan na alak napno. Saray samang manlepwas ira; ta say inkauges da sikato so baleg.” Saratan a salita so mipadpara ed Apocalipsis 14:18-20, a ditan a sakey ya anghel a walaan na makdem a kompay so niganggan a “manipon ed saray munil na ubas na dalin, ta aluto lay ubas to.” Iwasiwas na anghel so kompay to tan ibasileng iramay matungangan nasyones ed “baleg a darapilan na alak na sanok na Dios.” Diad piguratibon dalan, pinmaway so dala a nanlapud darapilan angga ed saray preno na saray kabayo, diad distansyan 1,600 estadio​—ngalngali 180 milyas (300 kilometro)! Agaylan makapataktakot ya ilalo ed nasyones a manleglemew ed si Jehova!

Manangunor-ed-Ganggan Iran Mibabaley

6. Panon so panmoria na Tastasi nen Jehova ed nasyones tan saray manuley da?

⁶ Kasin kabaliksan na saya a saray Tasi nen Jehova so andian na respeto ed saray nasyones tan manuley da? Andi! Paneermenan da lambengat so inkabulok a mabitar a nanaimatonan na amin, tan ipapasakbay da so maples ya onsasabin agew na pangidapo ed desisyon to. Diad parehon panaon, sipapaabeba ran tutuloken so ganggan nen apostol Pablo ed Roma 13:1: “Ontulok komon so balang kamarerwa ed saray atagtagey a pakauley.” Diad sarayan atooan a manuley, iiter da so makanepegan a galang balet aliwan panagdayew. Bilang manangunor-ed-ganggan iran mibabaley, tutumboken daray estandarte na Biblia ed inkanapanmatalkan, inkamatua, tan kalinisan tan mamapaalagey na maabig iran moral ed saray dilin pamilya ra. Tutulongan da so arum a makaaral no panon da met a nagawaan iya. Mikakareenan ira ed amin a totoo, ya agmibabali ed demostrasyon odino politikal iran iyaalsa. Panggugunaetan na Tastasi nen Jehova so magmaliw ya ehemplo ed itutulok ed saray ganggan na atagtagey a pakauley na too, legan a manlingkor ed Supremon Autoridad, say Soberanon Katawan a Jehova, a mangipawil na ayadyarin deen tan matunong a gobierno ed sayan dalin.

Pangidapo ed Desisyon To

7, 8. (a) Diad anton dalan a saray nasyones so nayegyeg tan ompaway so kabilungetan ed sikara? (b) Siopa so ireretrato nen Joel natan, tan miduma ed mundo ed inkalapagan, panon irayan nabebendisyonan?

⁷ Diad malinew a piguratibon lenguahe, inter nen Jehova iyan kaaruman a deskripsyon na pangidapo na desisyon to: “Say banwa tan say bulan a mismo onkuyep ira, tan saray bitwen isiblet da so liwawa ra. Et si Jehova manungol naani a manlapu ed Sion, tan ibesngaw to naani so boses to a manlapu ed Jerusalem. Et saray tawen tan say dalin onyegyeg ira naani; balet si Jehova sikato naani so apireng na baley to, tan salimbeng parad saray anak na Israel.” (Joel 3:15, 16) Say mabitar a sindag, maaligwas a kipapasen na katooan so magmaliw ya ambilunget, mamapasakbay, tan sayan naapag-apag a sistema na mundo so nayegyeg ed kaandi, naderal a kuanmono ed baleg a yegyeg!​—Aggeo 2:20-22.

⁸ Imanoen so maliket a panamaseguro a si Jehova so magmaliw ya apireng tan salimbeng ed totoo to! Akin ya ontan? Lapud sikara so totoon​—internasyonal a totoo​—a kinmiwas ed saray salita nen Jehova: “Dia ed ontan naamtaan yo naani a siak si Jehova a Dios yo.” (Joel 3:17) Lapud say ngaran nen Joel et mankabaliksan a “Si Jehova so Dios,” matukotukoy ton iretrato iray nakdaan a Tasi nen Jehova ed modernon panaon, a nanlingkor a sipapakpel ed panangiyabawag na inkasoberano nen Jehova. (Ipareng so Malaquias 1:11.) Diad ibaling ed manangilukas iran salita na propesiya nen Joel, naromog tayo no panon kalinew so impangipasakbay to ed kimey na totoo na Dios natan.

Sakey ya Ulop na Duron

9, 10. (a) Anton salot so impasakbay nen Joel? (b) Panon ya iyaaniweng na Apocalipsis so propesiya nen Joel ed sakey a salot, tan anto so epekto na sayan salot ed Kakristianoan?

⁹ Talinengen natan so “salita nen Jehova a sinmabi ed Joel”: “Denglen yo so saya, sikayo a mamasiken, tan talinengen yo, sikayo ya amin a manayam ed dalin. Wala ta so saya nensaman ed saray agew yo, odino ed saray agew na saray atateng yo? Ibaga yo ed saray anak yo, tan saray anak yo ibaga ra komon ed saray anak da, tan saray anak da ed sananey a kailalakan so nipaakar ed atan. Say inkera na ansasabot, kinan na duron; say inkera na duron; kinan na lukton; say inkera na lukton kinan na asipet.”​—Joel 1:1-4.

¹⁰ Ekstraordinaryo iyan kampanya, sakey a bengatlan nodnonoten ed amin a panaon. Dagup na kimuyekyek iran bigibigis, nagkalautla ed duron, so manderal ed dalin. Anto so kabaliksan na saya? Salitaen met na Apocalipsis 9:1-12 so salot na duroduron, ya imbaki nen Jehova ed silong na “sakey ya ari, say anghel na kalinsurong,” ya anggapoy arum noag si Kristo Jesus. Say ngaran to so Abaddon (Hebreo) tan Apollyon (Griego) a mankabaliksan na “Kadederal” tan “Managderal.” Sarayan duron so mangiretrato ed alanaan a nakdaan a Kristianos, a manederal ed pastulan na Kakristianoan diad kumpleton pangiwalwal ed palson relihyon tan pangiyabawag ed panamales nen Jehova ed sikato, natan la ed agew na Katawan.

11. Panon a say modernon-agew a duron so apabiskeg, tan siopa nagkalautla so puntirya na saray atake ra?

¹¹ Singa impanengneng na Apocalipsis 9:13-21, say salot na duron so tinumbokan na baleg a salot na de-kabayoan. Agaylan tua iya natan, unong a say pigaran libon nakekeraan ya alanaan a Kristianos so napabiskeg na masulok ya apatiran laksan “arum a karnero” a nankakasakey a manugyop na agnatalon de-kabayoan! (Juan 10:16) Nankakasakey ira ed pangiyaabawag na makapaotot iran panangukom nen Jehova ed saray managtalintao na Kakristianoan tan ed saraman so ‘agnagbabawi ed saray inpanpapatey da ed totoo nisay diad saray espiritistikon ag-agamil da saray impilawan da nisay diad impantakew da.’ Say klero​—namparan Katoliko tan Protestante​—ya aktibon anuporta ed makapatey iran bakal ed sayan siglo, tan ontan met ed saray paparin managpasoot ed ugugaw tan makasalanan iran ebanghelisador ed TV, so tugyop a kipaarapan na sarayan manangukom iran mensahe.

12. Akin a saray papangulo na Kakristianoan so makanepegan a mangawat na manangukom iran mensahe, tan anto so asingger lan nagawa ed sikara, a pati ed amin iran membro na Babilonian Baleg?

¹² Diad saratan a mauges a tuloy iran “lalakin” klero, ontaningting iray ganggan nen Jehova: “Liing kayo, sikayon managbuanges, tan mannangis kayo; et managogol kayo, sikayo ya amin ya omiinum na alak, lapu ed masamit ya alak, ta sikato so nisian ed sangi yo.” (Joel 1:5) Diad sayan koma-20 siglo, say malinis iran prinsipyo na Salita na Dios ed moral so sinaltan na relihyon na Kakristianoan na minumundon inkalukak. Ompatnag a masamit ed palson relihyon tan saray patumbok to ya akoen iray dalan na mundo, balet agaylan panagani na espiritual tan pisikal a sakit so naani ra! Agmanbayag, unong ya adeskribe ed Apocalipsis 17:16, 17, a “kanonotan” na Dios” parad pulitikal iran pakayari a biglan ompuliktar ed interon imperyo na palson relihyon, say Babilonia a Baleg, tan sikato so deralen. Diad atan lambengat, legan a nanengneng ton nagagawa so desisyon nen Jehova sumpad sikato, a sikato so “onliing” manlapud inkabuanges to.

“Sakey a Baley a Baleg tan Mabiskeg”

13. Diad anton dalan a say muyekyek na duron et ompatnag a “baleg tan mabiskeg” ed Kakristianoan?

¹³ Intuloy a deneskribe na propeta nen Jehova so muyekyek na duron a bilang “baley a baleg tan mabiskeg,” a singa ompatnag ed Babilonia a Baleg. (Joel 2:2) Singa bilbilang, say klero to, so mannanggis ed katuaan a saray relihyon na Kakristianoan so sinmaew a mangumberte ed Budistan Hapon. Ingen, natan, masulok a 160,000 Hapon a Tastasi nen Jehova so ondudupag ed atan a bansa tan mangikokondukta na personal iran panagaral na Biblia ed masulok a 200,000 iran ayaman na totoo. Diad Italya 180,000 Tastasi nen Jehova so binidbir natan a bilang onkomadua ed bilang a tumbokan na saray Katoliko. Say nangis na sakey a Romano Katolikon monsinyor ed Italya so andi kakanaan lapud saray Tasi nen Jehova et mangaala manlapud iglesia na ‘ag-onkulang a 10,000 matoor a Katoliko’ ed kada taon.a Saray Tasi so magayagan mangabrasa ed saratan.​—Isaias 60:8, 22.

14, 15. Panon so impaneskribe nen Joel ed muyekyek na duron, tan diad anton dalan ya asumpal iya natan?

¹⁴ Diad paneskribe ed muyekyek na duron na alanaan a Tastasi, salitaen na Joel 2:7-9: “Ombatik ira a singa mabayanin lalaki. Kalaben da so bakor a singa totoon mibabakal. Et manakar so balang sakey ed dilin daladalan to, et agda deralen iray dasig da. Ag-ira met mantutulakan. Singa sakey a makayarin laki ed basbas to, manakar ira; et no wala so pigaran napelag ed saray kampilan, agnabuyak so inkadasig na saray arum. Onlukso ra ed tapew na syudad. Ombatik ira ed tapew na bakor. Onsegep ira ed saray kaabungan. Onloob ira ed saray bintana a singa matakew.”

¹⁵ On, sakey a malinew a panangiretrato, ed ehersitos na alanaan “iran duron,” a natan et uulopen na masulok ya apatiran laksan kakaiba ra, say arum a karnero! Anggapo so “bakor” na relihyoson gulaan so makayarin makaamper ed saraya. Sipapakpel, sikara so “manaakar a mauksoy ed sayan parehon panagtontonan” ed mapublikon panagtasi tan arum iran Kristianon kimey. (Ipareng so Filipos 3:16.) Imbes a mikompromiso, sikara so mabulos ya onarap ed ipapatey, a singa ginawa na nilibon Tastasi a ‘naplag ed saray kampilan’ lapud agda nilabay so mansaludo ed Katolikon Hitler na Nazi Aleman. Say ulop na duron so angiter na sigpot a pantasi ed “syudad” na Kakristianoan, a kuanmono, tatakdangen ya amin iray babeng, tatalosen, a singa matakew ed saray ayaman unong ya imbunog daray binilbilyon iran palapagan na Biblia diad panamegley na kabkaabungan a kimey da. Linawa nen Jehova a nagawa iyan pantasi, tan anggapo so pakayari ed tawen o ed dalin a makayarin mamatunda ed saya.​—Isaias 55:11.

“Napno na Masanton Espiritu”

16, 17. (a) Kapigan a saray salita ed Joel 2:28, 29 et walaan na matalonan kasumpalan? (b) Anton mapropetiko iran salita nen Joel so agkumpleton asumpal ed inmunan siglo?

¹⁶ Ikuan nen Jehova ed Tastasi to: “Et naamtaan yo naani a walaak dia ed pegley na [espiritual ya] Israel, tan siak si Jehova a Dios yo tan anggapo la so arum.” (Joel 2:27) Sinmabi iray totoo ed sayan mablin pakatebek sanen ginapoan nen Jehova a sumpalen iray salita to ed Joel 2:28, 29: “Et nagawa naani ya ikalbok so espirituk ed amin a laman et saray anak yo a lalaki tan bibii so seguradon manpropesiya.” Agawa iya nen Pentecostes 33 K.P., sanen saray atiptipon a babangatan nen Jesus so nilanaan “tan sikaran amin so napno na masanton espiritu.” Diad pakayari na masanton espiritu, sikara so nanpulong, tan diad loob na sakey agew, “ngalngalin talon libon kakamarerwa so niarum.”​—Gawa 2:4, 16, 17, 41.

¹⁷ Diad saman a maliket ya okasyon, inaon met nen Pedro so Joel 2:30-32: “Et mangiter ak naani na saray pakapatnagan ed katawenan tan ed dalin, dala tan apuy tan sekseklang ya asewek. Say banwa magmaliw naani ya ambilunget, tan say bulan so magmaliw a dala, sakbay na isabi na baleg tan makapataktakot ya agew nen Jehova. Et nagawa naani a siopaman ya ontawag ed ngaran nen Jehova so nilaban.” Saratan a salita so walaan na melag a kasumpalan sanen aderal so Jerusalem nen 70 K.P.

18. Kapigan ginmapon agawa so babaleg a kasumpalan na Joel 2:28, 29?

¹⁸ Anggaman ontan, wala so kaaruman a kausaran na Joel 2:28-32. Peteg, a sayan propesiya so walaan na makatantandan kasumpalan nanlapulad Setyembre 1919. Diad saman a panaon wala so agnalingwanan a kumbension na saray totoo nen Jehova ya agawa ed Cedar Point, Ohio. E.U.A. Malinlinew a nipatnag so espiritu na Dios, tan saray alanaan ya ariripen to so asagyat ya onloob ed englobon panagtasin kampanya a sinmabi anggad kaplesan ya agew. Agaylan baleg ya inlaknab so nansumpalan to! Say masulok a 7,000 inmatendi ed saman a kumbension ed Cedar Point so binmulaslas ed dagup na 10,650,158 inmatedi ed Memoryal na impatey nen Jesus nen Marso 30, 1991. Diad saraya, 8,850 lambengat so manaakbibit ya alanaan iran Kristianos. Agaylan baleg so gayaga na amin na saraya ed pakanengneng ed englobon bunga ya intarok na dinamikon espiritu nen Jehova!​—Isaias 40:29, 31.

19. Lapud kinaasingger na agew nen Jehova, anto so nepeg ya awawey na balang sakey ed sikatayo?

¹⁹ Asingsingger la so “isabi na baleg tan makapataktakot ya agew nen Jehova” a maneral ed sistema na bengabengatla nen Satanas. (Joel 2:31) Makapaliket, ta “siopaman ya ontawag ed ngaran nen Jehova so nilaban.” (Gawa 2:21) Panon? Ibabaga nen apostol Pedro ed sikatayo a “say agew nen Jehova so onsabi a singa matakew” tan intuloy to: “Lapud amin na sarayan bengatla so natunaw, anton nengneng na inkatoo so nepeg yon pagmaliwan ed amin a masantos a panagbilay tan saray gawa na maridios a debosyon, dia ed panalagar tan pansiansian sinononot ed isabi agew nen Jehova.” Diad pansiansian sinononot ya asingger la so agew nen Jehova, napangayagaan tayo met so inengneng ed kasumpalan na sipan nen Jehova nipaakar ed matunong a “balon katawenan tan sakey a balon dalin.”​—2 Pedro 3:10-13.

[Paimano ed leksab]

Kasin Nisalaysay Mo?

◻ Anto so “agew nen Jehova”?

◻ Panon ya anien so ‘ubas na dalin,’ tan akin?

◻ Diad anton dalan a say salot na duron et amasakit ed Kakristianoan nanlapulad 1919?

◻ Panon a nikalbo so espiritu nen Jehova ed totoo to nen 33 K.P., tan lamet nen 1919?