Sampot ya Agew nen Jesus Diad Templo

Diad sampot ya inyakar nen Jesus ed templo, intuloy ton ipaamta so pankunkunwari na saray eskriba tan Fariseo, diretsaan to ran tinawag ya mansimpisimpitan. Angusar na ilustrasyon: “Lilinisan yoy paway na kopa tan plato, balet diad dalem et napno na inkaagum tan inkaalablabas. Sikan bulag a Fariseo, linisan mo nin unona so dalem na kopa tan plato pian magmaliw met a malinis so paway na satan.” (Mateo 23:25, 26) Saray Fariseo et istrikto ed kalinisan tan itsura, balet agda naiimanoy inkatoo ra tan agda lilinisay puso ra.

Mapatpatnag met so pankunkunwari da ta labalabay dan igawaan na lubok iray propeta tan paparakepen da iratan. Balet singa imbaga nen Jesus, ‘ananak ira na saramay amatey ed saray propeta.’ (Mateo 23:31) Pinaneknekan da itan diad saray plano dan pamatey ed si Jesus.​—Juan 5:18; 7:1, 25.

Insan imbaga nen Jesus no antoy pansumpalan na sarayan lider na relihyon no ag-ira magbabawi: “Sikayo ran poli na saray maditan uleg, panon yo kasin nibatikan so panangukom na Gehenna?” (Mateo 23:33) Say asingger ya Lawak nen Hinom et panagpoolan ed saman na saray basura, tan inusar itan pian ipanengneng so permanentin kaderal na saray mauges ya eskriba tan Fariseo.

Saray disipulo nen Jesus so mangirepresentad sikato bilang “propeta tan marunong a lalaki tan saray managbangat ed totoo.” Panoy pantratod sikara na totoo? Oniay imbaga nen Jesus ed saray lider na relihyon: “Pateyen yo tan ipasak yod poste so arum ed [saray disipulok], tan say arum et siplatan yo diad saray sinagoga yo tan pasegsegangen yo diad kada syudad, kanian sikayo so akankasalanan ed impamatedter ed amin a matunong a dala diad dalin, manlapud dala nen matunong ya Abel ya anggad dala nen Zacarias . . . a pinatey yo.” Impasakbay to: “Ibagak ed sikayoy tua, a nagawa irayan amin ed sayan henerasyon.” (Mateo 23:34-36) Agawa itan nen 70 C.E. nen dineral na saray sundalo na Roma so Jerusalem tan nilibon Judio so inatey.

Naeermenan si Jesus no nononoten to iyan makapataktakot ya nagawa. Oniay imbaga to: “Jerusalem, Jerusalem, say managpatey na saray propeta tan managtupak na saramay imbaki ed sikato​—aminpigan labay kon tiponen komon iray anak mo, a singa ed panitipon na nganak ed saray siwsiw to diad saray payak to! Balet agyo labay. Napaulyanan la so abung yo.” (Mateo 23:37, 38) Nayarin iisipen na saramay ondedengel no anton “abung” so tutukoyen to. Kasin saman may marakdakep a templo ed Jerusalem, ya singa proprotektaan met na Dios?

Insan intuloy nen Jesus: “Ibagak ed sikayo, ya agyo ak lan balot nanengneng manlapud natan anggad ibaga yon, ‘Abendisyonan imay onsasabi ed ngaran nen Jehova!’” (Mateo 23:39) Inala to itan ed samay propesiyad Salmo 118:26: “Abendisyonan imay onsasabi diad ngaran nen Jehova; bebendisyonan mi kayo manlapud abung nen Jehova.” Malinew ya no naderal itan a templo, anggapo lay onla ditan diad ngaran na Dios.

Linma natan si Jesus ed parte na templo ya wala ray kurti trumpeta ya pananginay donasyon. Sarag na totooy mangipelag na kontribusyon da ed melag ya abot na satan. Naoobserbaan nen Jesus iray Judio ya manggagawad satan, saray mayaman “so mangipepelag na dakel a kuarta” bilang regalo. Insan naobserbaan nen Jesus so sakey ya pobrin balo ya angipelag na “duaran angkelag a sinsilyo ya abebbebay balor to.” (Marcos 12:41, 42) Seguradon amta nen Jesus ya aliketan so Dios ed satan a regalo.

Tinawag nen Jesus iray disipulo to tan inkuan to: “Ibagak ed sikayoy tua, mas dakel ni so impelag na sayan pobrin balo a bii nen say impelag na amin a mangipepelag na kuarta diad saray pananginan na donasyon.” Akin? Impaliwawa to: “Say impelag dan amin et nanlapud saray sulok da, balet sikato, anggaman ed pankakkaukolan to et impelag toy amin a walad sikato, amin lan pambilay to.” (Marcos 12:43, 44) Baleg so pidumaan na sayan balo ed saramay lider na relihyon!

Nisan 11 ni ed saman, tan onalis lay Jesus ed templo. Imbaga na sakey ed saray disipulo to: “Managbangat, nengneng mo! agaylay abig na sarayan bato tan paalagey!” (Marcos 13:1) Talagan angkakabaleg iray arum ya bato ed dingding na templo, kanian iisipen dan matibay itan tan agbalot naderal. Kanian makapakelaw ya imbaga nen Jesus: “Nanenengneng mo iratan a marakdakep a paalagey? Anggapoy anggan sakey a baton natilak dia ya akatapew ed sakey a bato ta nageba iratan ya amin.”​—Marcos 13:2.

Kayari ton imbaga iraya, si Jesus tan saray apostol to et binmaliw ed Lawak na Kidron tan sinmegep irad Palandey na Saray Olibo. Kaiba to ray apatiran apostol to​—si Pedro, Andres, Santiago, tan Juan. Sankanengneng da ditan so balibalin templo.