“Anto so Tanda na Kiwawalam?”
“Kapigan so kagawa na sarayan bengatla, tan anto so tanda na kiwawalam tan ed konklusyon na sistema na bengabengatla?”—MATEO 24:3, NW.
1, 2. Anto so mangipapanengneng ya interesado so totoo ed arapen?
MASLAK ed totoo so interesado ed arapen. Kasin ontan ka met? Diad libro ton Future Shock, sinaglawi nen Propesor Alvin Toffler “so biglan indaak na saray organisasyon a nitalaga pian aralen so arapen.” Inyarum to: ‘Anengneng tayo so inkiwala na saray grupo na eksperto a niyapasakey so kanonotan da ed arapen; say inlesa na saray dyurnal nipaakar ed arapen na Inglatera, Pransya, Italya, Alemanya, tan Estados Unidos; say idarakel na saray kurso ed unibersidad nipaakar ed panangipasakbay ed arapen.’ Sinampotan nen Toffler: “Siempre, anggapo so ‘makaamta’ ed arapen ed anggan anton sigpot a pantalos.”
2 Kuan na libron Signs of Things to Come: “Say panagpalar, inengneng ed bolan kristal, astrolohya, panagbasa ed baraha, I Ching so paraan iran masilewet a mangiter ed sikatayo na samet ya ideya no anto so arapen tayo.” Balet imbes ya onarap ed saray metodo na too, magmaong ya onarap tayo ed sakey ya apaneknekan a makatulong—si Jehova.
3. Akin a matukoy so panilalo ed Dios para’d pikakabat ed arapen?
3 Inkuan na tuan Dios: “Petepeteg, singa ninonot ko, ontan so nagawa; et singa pinegdat ko, ontan so mansiansia naani.” (Isaias 14:24, 27; 42:9) On, makapansimbawa si Jehova nipaakar ed no anto so nagawa ed arapen, mabetbet a gagawaen itan diad panamegley na saray sangiyan a totoo. Sakey ed sarayan propeta so nansulat: “Petepeteg angapo naani gawaen nen Katawan a Jehova, ya ag naani nipuyan so inamot to ed saray aripen to a profeta.”—Amos 3:7, 8; 2 Pedro 1:20, 21.
4, 5. (a) Akin a makatulong si Jesus nipaakar ed arapen? (b) Anton nankaduan tepet so impaarap na saray apostol to?
4 Si Jesu-Kristo so manunan propeta na Dios. (Hebreos 1:1, 2) Iyapasakey tayo so imano tayo ed sakey ed saray manunan propesiya nen Jesus nipaakar ed saray bengatlan nagagawa ed liber tayo natan. Sayan propesiya so mangiiter met ed sikatayo na aralem a pakatalos nipaakar ed asingger lan nagawa legan a mangangga iyan kaplesan a marelmeng a sistema tan salatan iya na Dios na sakey a mangaraldalin a paraiso.
5 Pinaneknekan nen Jesus a sikato so sakey a propeta. (Marcos 6:4; Lucas 13:33; 24:19; Juan 4:19; 6:14; 9:17) Kanian, natalosan no akin a saray apostol to, ya akayurong ed abay to ed Palandey Olivo ya akabantag ed Jerusalem, so tinmepet nipaakar ed arapen: “Kapigan so kagawa na sarayan bengatla, tan anto so tanda na kiwawalam tan ed konklusyon na sistema na bengabengatla?”—Mateo 24:3, NW; Marcos 13:4.
6. Anto so pisiglaotan na Mateo 24, Marcos 13, tan Lucas 21; tan anton tepet so nepeg a makapainteres a tuloy ed sikatayo?
6 Naromog mo so tepet da tan say ebat nen Jesus ed Mateo kapitulo 24, Marcos kapitulo 13, tan Lucas kapitulo 21.a Diad dakel a pamaakaran, saray salaysay so manpapaknaan, balet sikaray agmanpapara. Alimbawa, si Lucas lambengat so manasaglawin ‘dia’d nambabangil a pasen, . . . salot’ (Lucas 21:10, 11; Mateo 24:7; Marcos 13:8) Makatunongan a sikatayoy mantepet, Kasin say impangipasakbay nen Jesus ed saray ebenton nagawa so dia lambengat ed panaon a panbibilayan na saray dumerengel to, odino kasin ilalaktip to so panaon tayo tan no anto so nailaloan tayo ed arapen?
Kaliktan ya Amtaen na Saray Apostol
7. Nipaakar ed anton partikular a bengatla so intepet na saray apostol, balet kaunongan so kalaknab na ebat nen Jesus?
7 Pigaran agew lambengat sakbay na impamatey ed sikato, inyabawag nen Jesus ya impulisay na Dios so Jerusalem, say kabisera na saray Judio. Say syudad tan say engranden templo to so naderal. Insan pigara ed saray apostol so nantepet nipaakar ed sakey a ‘tanda na kiwawala nen Jesus tan ed konklusyon na sistema na bengabengatla.’ (Mateo 23:37–24:3) Andi-duaruwan say manunaan ed kanonotan da et say Judion sistema tan say Jerusalem, lapud agda atalosan so kalaknab na nagawa ed arapen. Balet diad impangebat ed sikara, si Jesus so onnengneng ed labas na say anggaan na nagawa tan pati say 70 K.P. sanen dineral na saray Romano so Jerusalem.—Lucas 19:11; Gawa 1:6, 7.
8. Anto so pigara ed saray nagagawan impasakbay nen Jesus?
8 Singa nabasa yo ed taloran salaysay ed Ebanghelyo, sinalita nen Jesus so nipaakar ed iyalagey na sakey a nasyon sumpa ed nasyon tan panarian sumpa ed panarian, kakisiran na tagano, yegyegyeg, makapakebbiew iran eksena, tan mangatatawen iran tanda. Diad saray taon ed baetan na impangiter nen Jesus ed satan a tanda (33 K.P.) tan say inkaderal na Jerusalem (66-70 K.P.), onlesa iray palson propeta tan palson Kristo. Pasegsegangen na saray Judio iray Kristiano, a mangipupulong ed mensahe nen Jesus.
9. Panon a niwala ya asumpal ed inmunan siglo K.P. so propesiya nen Jesus?
9 Sarayan kabiangan na tanda so talagan agawa, a singa pinekderan na manag-awaran a si Flavius Josephus. Insulat to a sakbay a linmusob iray Romano, saray palson Mesias so nansogsog ed rebelyon. Walaray makapakebbiew a yegyegyeg ed Judea tan ed inerman a pasen. Tinmerak iray bakal ed dakel a pasen na Romanon Imperyo. Kasin agawa so malaknab ya eras? Peteg, ya agawa. (Ipareng so Gawa 11:27-30.) Komusta met so panangipulong na Panarian a kimey? Sanen sinmabi so 60 odino 61 K.P., sanen insulat so libron Colosas, “[say] ilalo na evangelio” na Panarian na Dios so malaknab a nadngelan ed Aprika, Asia, tan Europa.b—Colosas 1:23.
“INSAN” say Anggaan
10. Akin a nepeg tayon imanoen so salitan Griego a toʹte, tan anto so kabaliksan na satan?
10 Diad arum a kabiangan na propesiya, imparungtal nen Jesus iray ebento diad paraan a kagawa ran mantutumbokan. Inkuanto: “Saya ya evangelio na panarian nipulong naani . . . , tan insan onsabi angaan.” Saray Biblia ed Inglis so mabetbet a manguusar na “insan” a walaan na simplin kabaliksan ya “et” odino “balet.” (Marcos 4:15, 17; 13:23) Anggaman ontan, diad Mateo 24:14, say “insan” so nibased Griegon adverb a toʹte.c Isasalaysay na saray eksperto a say toʹte so sakey a “manangidemostran adverb ed panaon” ya inusar “pian ipakabat so katumbokan na panaon” odino “pian ipakabat so sakey ya onggendan ya ebento.” Diad onia et impasakbay nen Jesus a niwala so panangipulong na Panarian tan insan (‘kayari’ odino ‘ontumbok’) et onsabi so “angaan.” Dinan ya anggaan?
11. Panon ya angipaimano si Jesus ed saray ebenton direktan mitukoyan ed kadederal na Jerusalem?
11 Say sakey a kasumpalan na propesiya nen Jesus so naromog ed saray ebenton mangipapaarap ed anggaan na Judion sistema. Saray bakal, yegyegyeg, kakisiran na tagano, tan arum niran impasakbay nen Jesus so agawa ed loob na talomplon taon. Ingen, onggapo ed Mateo 24:15, Marcos 13:14, tan Lucas 21:20, nabasa tayo iray ebento a direktan nisiglaot ed asingsingger lan kadederal, sano say anggaan so asingger lan tuloy.—Imanoen so saksakey ya intuldek a linya na tsart.
12. Panon a nalalanor iray armada na Romano ed kasumpalan na Mateo 24:15?
12 Diad inkiwas ed inyalsa na saray Judio nen 66 K.P., saray Romano ed silong nen Cestius Gallus so linmusob ed Jerusalem, niliktob iyan syudad ya impasen a masanto na saray Judio. (Mateo 5:35) Anggaman ed saray panangibales ya inlusob na saray Judio, pilit a linmoob iray Romano ed syudad. Diad saman et ginapoan dan “manal-alagey ed santo a pasen,” bilang kasumpalan na propesiya nen Jesus ed Mateo 24:15 tan Marcos 13:14. Insan wala so makasurpresan agawa. Anggaman apaliberan da so syudad, biglan sinmener iray Romano. Tampol ya abidbir na saray Kristiano so kasumpalan na propesiya nen Jesus, tan say insener so angiter na pankanawnawa ed sikaran ombatik manlapud Judea ed kapalandeyan na basil a Jordan. Onman so ginawa ra unong ed awaran.
13. Akin a saray Kristiano so akayarin manumbok ed pasakbay nen Jesus ya ombatik?
13 Balet no saray Romano so sinmener ed liber na Jerusalem, akin a kaukolan nin ombatik so siopaman? Impanengneng na saray salita nen Jesus a say agawa et amaneknek ‘a say kabagbag [na Jerusalem et] asinger la.’ (Lucas 21:20) On, say kabagbag. Impasakbay to so ‘kairapan ya agni agawa so ontan nanlapu ed gapo tan [ag la nagawan balot.]’ Kayari na talora tan kapaduan taon, nen 70 K.P., talagan asagmak na Jerusalem so “baleg ya irap” manlapud saray Romanon armada ed silong nen Heneral Tito. (Mateo 24:21; Marcos 13:19, NW) Anggaman kuan, akin ya idedeskribe nen Jesus iya bilang sakey a kairapan ya anggapoy kapara to sakbay odino nanlapulad nensaman
14. Akin a nibaga tayon say agawa ed Jerusalem nen 70 K.P. so ‘baleg ya irap ed satan ya angapo so ontan [ya agawa ed saman a syudad, nasyon, tan sistema] a nanlapu’d gapo na mundo ya anga ed natan, angapo, angapo la naani’?
14 Say Jerusalem so dineral na saray taga Babilonia nen 607 K.K.P., tan atasian na syudad so makapataktakot a panlalaban ed peles a siglo tayo. Siansia, say agawa nen 70 K.P. so nikadkaduman baleg ya irap. Diad sakey a kampanyan inmabot ed ngalngali limaran bulan, tinalo na saray bumabakal nen Tito iray Judio. Sikaray amatey na ag-onkulang ed 1,100,000 tan angerel na ngalngali 100,000 ed inkadakep. Nilikud ed satan, dineral na saray Romano so Jerusalem. Saya so amaneknek a say Judion sistema a datin inabobonan a panagdayew a nisentro ed templo so angangga ed ando lan ando. (Hebreos 1:2) On, saray ebento ed 70 K.P. so makatunongan a nikunsideran ‘baleg ya irap ed satan ya angapo so ontan [ya agawa ed saman a syudad, nasyon, tan sistema] a nanlapu’d gapo na mundo ya anga ed natan, angapo, angapo la naani.’—Mateo 24:21.d
Unong a Nipropesiya, Dakel Ni so Ontumbok
15. (a) Anton nengneng na saray ebento so impropesiya nen Jesus ya onsabi kayari na kairapan ed Jerusalem? (b) Diad liwawa na Mateo 24:23-28, anto so nepeg tayon nikuan nipaakar ed kasumpalan na propesiya nen Jesus?
15 Anggaman ontan, ag-inggetar nen Jesus so prediksyon to ed kairapan nen inmunan siglo. Ipapanengneng na Biblia a dakel ni so ontumbok ed satan a kairapan, unong ya isusuheri na impangusar ed toʹte, odino “insan,” ed Mateo 24:23 tan Marcos 13:21. Anto so nagawa ed panaon kayari na 70 K.P.? Kayari na kairapan ed Judion sistema, lalon dakel nin palson Kristo tan palson propeta so linmesa. (Ipareng so Marcos 13:6 ed Mar 13:21-23.) Pepekderan na awaran a saratan a totoo so nanbilay ed indalan na nilasus taon nanlapulad aderal so Jerusalem nen 70 K.P., anggaman agda apalikdo iray totoon walaan na makdem a pasingawey ed espiritual tan onnenengneng ed “kiwawala” nen Kristo. (Mateo 24:27, 28) Anggaman kuan, sarayan agawa kayari na baleg a kairapan nen 70 K.P. so sakey a bengatlan mangipapanengneng a si Jesus so onnenengneng ed labas na satan a kairapan, a sakey lambengat a gapo na kasumpalan.
16. Say Lucas 21:24 so mangiyaarum na anton kabiangan ed propesiya nen Jesus, tan anto so kabaliksan na saya?
16 No ipareng tayo so Mateo 24:15-28 tan Marcos 13:14-23 ed Lucas 21:20-24, naromog tayo so komaduan paneknek ya agtinmunda so kasumpalan na impangipasakbay nen Jesus ed kaderal na say Jerusalem. Tandaan a si Lucas lambengat so anaglawi ed saray salot. Mipadpara, sikato lambengat so anampot ed sayan seksion ed saray salita nen Jesus: “Say Jerusalem igatin naani na saray Gentiles, angga ed kasumpal na saray agew na saray Gentiles [“saray panaon na saray Gentil,” King James Version].”e (Lucas 21:24) Pinagit na saray taga Babilonia so kaunoran ya ari na saray Judio nen 607 K.K.P., tan kayari na satan, say Jerusalem, a mangilalaman ed Panarian na Dios, so nigatingatin. (2 Arari 25:1-26; 1 Awaran 29:23; Ezequiel 21:25-27) Impanengneng nen Jesus ed Lucas 21:24, a say kipapasen so mantultuloy ed arapen angga ed isabi na panaon ya iletneg lamet na Dios so sakey a Panarian.
17. Sikatayoy walaan na anton komatlon paneknek a nagawa so kasumpalan na propesiya nen Jesus kayari na andukey a panaon?
17 Wadia so komatlon paneknek a si Jesus so manutukoy met ed sakey a kasumpalan kayari na andukey a panaon: Unong ed Kasulatan, say Mesias so kaukolan ya ompatey tan insan napaoli, insan sikato so onyurong ed nikawanan na Dios anggad sikato so ibaki na Ama a mibakal. (Salmo 110:1, 2) Impaimano nen Jesus so nipaakar ed iyurong to ed nikawanan na Ama to. (Marcos 14:62) Pepekderan nen apostol Pablo a say apaolin Jesus so walad nikawanan a lima nen Jehova tan manaalagar na panaon ed pagmaliw to bilang Ari tan Manangidapo na Dios.—Roma 8:34; Colosas 3:1; Hebreos 10:12, 13.
18, 19. Anto so pisiglaotan na Apocalipsis 6:2-8 ed misimbangan a propesiya ed Saray Ebanghelyo?
18 Para ed komapat tan kaunoran a paneknek a say propesiya nen Jesus nipaakar ed konklusyon na sistema na bengabengatla so onaaplika ed labas na inmunan siglo, nayari tayon ombaliksat ed Apocalipsis kapitulo 6. Diad insulat to dakel a dekada kayari na 70 K.P., dineskribe nen Juan so sakey a makatawag imanon eksena na saray aktibon dekabayoan. (Apocalipsis 6:2-8) Sayan mapropetikon pasingawey ed “agew na Katawan”—say agew na kiwawala to—so mangipapabidbir ed koma-20 siglo bilang sakey a panaon na sankaimanon panbabakal (Apo 6 bersikulo 4), kasmak a kakisiray tagano (Apo 6 bersikulo 5 tan 6), tan “makapatey a salot” (Apo 6 bersikulo 8). Malinew, saya so misimbangan ed inkuan nen Jesus ed Saray Ebanghelyo tan mamapaneknek a say propesiya to so walaan na babaleg a kasumpalan ed sayan ‘agew na Katawan.’—Apocalipsis 1:10.
19 Bidbiren na totoon walaan na pikakabat a say atugyop a tandan nipasakbay ed Mateo 24:7-14 tan Apocalipsis 6:2-8 so napapatnagan nanlapulad guerra mundial nen 1914. Iyaabawag na saray Tasi nen Jehova ed sankamundoan a say propesiya nen Jesus so nawawalaan la natan na komadua tan babaleg a kasumpalan to, a singa papaneknekan na maruksa iran bakal, makaderal iran yegyeg, graben eras, tan kasmak iran sakit. Diad sayan unor a punto, say U.S.News & World Report (Hulyo 27, 1992) so nankuan: “Say epidemya na AIDS . . . so mangipapaarap ed minilyon a biktima ed ipapatey da tan nayarin diad asingger ya arapen et magmaliw a sankagastosan tan makadesyang a salot ed awaran. Say Black Death so anigway na 25 milyon a maniirap a totoo nen koma-14 siglo. Balet diad isabi na taon 2000, 30 milyon angga ed 110 milyon a totoo so nawalaan na HIV, say virus a sengegan na AIDS, a wala natan ed 12 milyon. Lapud anggapo ni so tambal, amin so nipapaarap ed mapekder ya ipapatey.”
20. Anto so kobrian na ununan kasumpalan na Mateo 24:4-22, balet anto so malinew a kaaruman nin kasumpalan na saya?
20 No ontan, anto so napanampot tayo nipaakar ed no panon ya inebatan nen Jesus iray apostol? Say propesiya to so suston tuloy a mangipapasakbay ed saray bengatlan mangipaarap tan mangilalaktip ed kadederal na Jerusalem, tan sinaglawi na saman iray pigaran bengatlan ontumbok kayari na 70 K.P. Balet maslak ed saya so nawalaan na komadua tan babaleg a kasumpalan ed arapen, a mangipaarap ed baleg a kairapan a mangangga ed kaplesan a marelmeng a sistema na bengabengatla. Kabaliksan na saya a say prediksyon nen Jesus ed Mateo 24:4-22, tan saray kasimbangan ed Marcos tan Lucas, so asumpal nanlapulad 33 K.P. angga ed kairapan nen 70 K.P. Ingen, saratan a parehon bersikulo so walaan na komaduan kasumpalan, a mangilaktip ed babaleg a kairapan ed arapen. Sayan babaleg a kasumpalan so natatasian tayo la; nanenengneng tayo ed inagew-agew.f
Mangipaarap ed Anto?
21, 22. Iner so pakaromogan tayo na mapropetikon paneknek a walaray onsabi nin kaaruman a nagawgawa?
21 Agsinampotan nen Jesus so propesiya to ed impanaglawi ed saray palson propeta ya angipanengneng na saray makapalikdon tanda ed loob na andukey a peryodo ‘anga ed kasumpal na saray agew na saray Gentiles.’ (Lucas 21:24; Mateo 24:23-26; Marcos 13:21-23) Intuloy ton imbaga so arum a makapataktakot a bengatlan nagawa, bengabengatlan naiimatonan ed sankadalinan. Saraya so walaay pisiglaotan ed isasabi na Anak na too ed pakayari tan gloria. Say Marcos 13:24-27 so mangilalaman ed manpatuloy a propesiya to:
22 “Ingen dia ed saratan ya agew kayari na satan a kairapan, say banwa onbilunget, tan say bulan ag mangiter naani liwawa to, tan saray bibitewen napelag ira naani manlapud tawen, tan saray pakayari ya wala ed tawen natenyeg ira naani. Et saman la nanengneng da so anak na too ya onsabi ya manluglugan ed saray lurem pati baleg a pakayari tan gloria. Tan saman la ibaki to so saray angeles, et tiponen da naani a pandaragupen so saray pinili to manlapu ed saray apatira’n dagem, manlapu ed kasampotan na dalin anga ed kasampotan na tawen.”
23. Akin a makapanilalo tayo a nasumpal so Mateo 24:29-31 kayari na andukey a panaon ed inmunan siglo K.P.?
23 Say Anak na too, say apaolin Jesu-Kristo, so agsinmabi ed onman a dramatikon paraan kayari na makaderal ya anggaan na Judion sistema nen 70 K.P. Talagan sikato so ag-abidbir na amin a tribu ed dalin, a singa ed impanaglawi na Mateo 24:30, nisay pinandaragup na angheles ed saman so amin ya alanaan a Kristianos ed interon dalin. Kanian kapigan sirin nasumpal so kaaruman a kabiangan na sayan baleg a propesiya nen Jesus? Kasin saya so nawalaan na kaaruman a kasumpalan ed saray nagagawa natan ed kaliberliber tayo, odino, imbes, kasin satan so mangiiter na madibinon aralem a pakatalos ed bengabengatlan nailaloan tayo ed asingger ya arapen? Maseguron kaliktan tayon amtaen, lapud insulat nen Lucas so simbawa nen Jesus: “Balet sano ongapu a nagawa so saraya a bengatla, tangay kayo, et itangua yo so saray olo yo; ta say karondon yo asinger la.”—Lucas 21:28.
[Saray paimano ed leksab]
a Saray kabiangan na sarayan kapitulo so naromog ed tsart ed pahina 14 tan 15, say intuldek iran linya so mangibiig ed mankaampar iran seksion.
b Para’d maawaran a salaysay nipaakar ed sarayan ebento, nengnengen so The Watchtower na Enero 15, 1970, pahina 43-5.
c Ompatnag so toʹte a masulok a 80 a danay ed Mateo (9 a danay ed Mat kapitulo 24) tan 15 a danay ed libro nen Lucas. Inusar nen Marcos so toʹte ya anemiran danay labat, bangta apatira ed saraman so angilanor ed “tanda.”
d Say Britanon autor a si Matthew Henry so nankomento: “Say inkaderal na Jerusalem na saray Caldeo so talagan makapataktakot, balet saya so alabas ni nen say satan. Saya so manigensigen ed sakey a sankatalbaan a panamatey ed amin . . . iran Judio.”
e Dakel so akaimano ed salaysay nen Lucas na pansalat ed panangidanet kayari na Lucas 21:24. Si Dr. Leon Morris so mankuan: “Si Jesus so nantultuloy a nansalita nipaakar ed saray panaon na saray Gentil. . . . Diad opinyon na maslak iran iskolar say imano natan so nipapaarap ed isasabi na Anak na too.” Si Propesor R. Ginns so nansulat: “Say Isasabi na Anak na Too—(Mat 24:29-31; Mar 13:24-27). Say impanaglawi ed ‘saray panaon na saray Gentil’ so onkanan sakey ya introduksion ed sayan tema; say laknab na panmoria [nen Lucas] so nipapasabi natan ed labas ni na saray deral ed Jerusalem a mamaarap ed arapen.”
f Si Propesor Walter L. Liefeld so nansulat: “Maseguron posiblin ipasen a saray prediksyon nen Jesus so nilaktip ed duaran peryodo: (1) saray ebento nen A.D. 70 a nisisiglaot ed templo tan (2) ed saramay diad arawi nin arapen, ya adeskribe ed lalon makabaliksan iran salita.” Say komentaryo ya inuksoy nen J. R. Dummelow so nankuan: “Dakel ed saray sankaseryosoan a problema ed sayan baleg a diskurso so naandipat sano amoria a tutukoyen dia na Katawan tayo et aliwan saksakey ya ebento balet ta duara, tan say unaan et tipo na komadua. . . . nagkalautla say [Lucas] 21:24, a manutukoy ed ‘saray panaon na saray Gentil,’ . . . so mangipapasen na sakey ya anggapoy getar a dukey na panaon ed baetan na inkagba na Jerusalem tan say anggaan na mundo.”
Kasin Natandaan Mo?
◻ Say ebat nen Jesus ed tepet ed Mateo 24:3 so walaan na anton kasumpalan ya angitonton ed 70 K.P.?
◻ Panon a say pangusar ed salitan toʹte so ontulong ed sikatayo pian natalosan so propesiya nen Jesus?
◻ Diad anton pantalos a niwala so “baleg ya irap” nen inmunan siglo ya agnin balot agawa ed apalabas?
◻ Si Lucas so manutukoy ed anton duaran nikadkaduman aspekto ed propesiya nen Jesus a mangilalanor ed sikatayo natan?
◻ Antoran paneknek so manutukoy ed komadua tan babaleg a kasumpalan na propesiya ed Mateo 24:4-22?
[Tsart ed pahina 14, 15]
4 Et si Jesus inmebat tan inkuan to’d sikara, Manlikas kayo pian angapoy too a mangibalang ed sikayo. 5 Ta dakel naani onla dia ed ngaran ko, ya kuan da, Siak si Cristo; et dakel naani ontombok ya nabalang. 6 Tan makadngel kayo naani na saray bakal tan dalamurom na bakal; nengneng yo ta ag kayo komon nagolo: ta sarayan bengatla kaokolan ya napalabas; balet aliwa nin sikato’y angaan.
7 Ta ontalindeg naani nacion sumpa ed nacion, tan panarian sumpa ed panarian: tan wala ra naani eraeras tan yegyeg ed nambabangil a pasen. 8 Ingen saraya ya amin a bengabengatla sikara so gapo na kairapan.
9 Saman la yawat da kayo ed pakapasegsegang, tan pateyen da kayo naani: tan gulaen da kayo naani na saray amin a nacion nisengeg ed ngaran ko. 10 Tan saman la dakel so nagapol, tan manaawatan nani sakey tan sakey. 11 Tan amayamay iray tilatila’n profetas ya onalagey naani, tan ibalang da naani so saray amayamay. 12 Tan lapu’d ondakel naani so kaugsan, say aro ray amayamay onbetel. 13 Balet say misongdo ya anga ed kasampotan, sikato lamlamang so nilaban naani. 14 Tan saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.
------------------------------------------------------------------
15 Sano nanengneng yo sirin so kadimlaan na kapalis, ya asalita nen profeta Daniel, a manalalagey ed santo a pasen (say manbasa, talosan to komon,) 16 Saman la saray wala ed Judea onbatik ira komon ed saray palandey. 17 Say wala ed toktok na abung ag onlasor komon ya mangala’d saray bengabengatlan wala ed abung to. 18 Tan say wala ed uma ag komon ompawil a mangala na kawes to. 19 Kasi la balet so saray mamalokon, tan saray manpapasoso ed saratan ya agew! 20 Et mikasi kayo a say kababatik yo aliwa’n dia’d ambetel komon, tan aliwan dia’d sabaton. 21 Tan wala naani baleg ya irap ed satan, ya angapo so ontan a nanlapu’d gapo na mundo ya anga ed natan, angapo, angapo la naani. 22 Et no ag apatikeyan iratan ya agewm angapo komon naani laman ya nilaban: balet nisengeg ed saray pinili napatikeyan so saratan ya agew.
------------------------------------------------------------------
23 Kanian no siopaman a too ikuan to naani ed sikayo, Nia, wadia si Cristo, ono, Dia; agyo sigsiaen. 24 Ta onalagey naani so saray tilatila’n Cristo, tan tilatila’n profetas, tan mangipanengneng ira naani na angkabaleg a tanda tan makapakelaw, pian mangibalang ira, no nayari, pati saray pinili. 25 Nia, inbagak ed sikayo’n inpasakbay. 26 Kanian no ibaga ra naani ed sikayo, Nia, sikato’y wala ed kalawakan; ag kayo oonla: Nia, sikato so wala ed kalooblooban ya silir; ag yo sigsiaen. 27 Ta onong a say kirmat ya ompaway ed bukig, et nanengneng ya anga’d sagud; ontan naani so isabi na Anak na too. 28 Angan ined so kawalaan na bangkay, diman so pantitiponan na saray aguila.
------------------------------------------------------------------
------------------------------------------------------------------
29 Et kapagdaka ed kayari kairapan ed saratan ya agew, say banwa onbilunget naani, tan say bulan agto naani iter so sinag to, tan saray bibitewen napaptak ira naani a manlapu ed tawen, tan saray pakayari tawen nagalaw ira naani. 30 Insan onpatnag so tanda na Anak na too ed tawen: et manermen naani ed satan so amin a polipoli na dalin, tan nanengneng da naani so Anak na too ya onsasabi ed tapew na lurelurem na tawen a napno’y pakayari tan baleg a gloria. 31 Et ibaki to ra naani angeles to a pati baleg a tanol na trumpeta, et tiponen da ra naani pinili to a manlapu’d saray apatira’n dagem, manlapu’d sakey a sampot na tawen anga ed sananey.
5 Et si Jesus ginapoan to’n inkuan ed sikara, Manlikas kayo ya angapoy toon mangibalang ed sikayo. 6 Amayamay naani onla dia ed ngaran ko, a mankuan, Siak iman; tan ibalang to naani so amayamay. 7 Tan sano narengelan yo so bakabakal, agkayo nagulo; sarayan bengatla nakaukolan a nagawa; ingen aliwa ni’n sikato’y kasampotan.
8 Tan saya a nacion onalagey naani’n sumpa ed nacion, tan panarian sumpa ed panarian: wala naani eraeras: saraya’n bengatla sikara’ gapo na ermen.
9 Ingen manlikas kayo ed inkasikayo: ta yawat da kayo ed saray concilio; tan dia ed saray sinagogas nabakbak kayo; tan ed arap na saray gobernadores tan arari onalagey kayo nisengeg ed siak ya onkanan pamituaan ed sikara. 10 Tan say evangelio kaokolan ya nipulong ya unona ed saray amin a naciones. 11 Et sano yakar da kayo ed okoman, tan yawat da kayo, ag yo kapagaan ya ynona no anto so salitaen yo naani: noag say antokaman a niiter ed sikayo ed satan ya horas, satan so salitaen yo: ta aliwa’ n sikayo so mansalita, noag say Espiritu Santo. 12 Tan say agi a laki yawat to naani so agi’n laki ed ipapatey, tan say ama, so anak to: tan saray anak ontalindeg ira naani sumpa ed saray ateng, tan gawaen da ra a niyan ed ipapatey. 13 Tan gulaen da kayo naani na amin a totoo nisengeg ed ngaran ko: ingen say mansongdo ya anga ed kasampotan, sikato lanlamang so nilaban naani.
------------------------------------------------------------------
14 Balet sano nanengneng yo so pangula ed kadederal a manalalagey ed ag to kanepegan (say manbabasa talosan to,) saman la saray wala ed Judea onbatik ira’n anga ed saray palandey: 15 Tan say wala ed toktok na abung ag onlasor, ono onloob, a mangala na angan anto ed abung to. 16 Tan say wala ed uma ag komon ompawil a mangala na kolibenben to. 17 Balet kasi la so saray mamalokon tan saray manpapasoso ed saratan ya agew! 18 Et mikasi kayo ya ag nagawa komon dia ed panaon na betel. 19 Ta dia ed saratan ya agew wala naani kairapan, ya agni agawa so ontan nanlapu ed gapo na inkapalsa na pinalsa’y Dios anga ed natan, tan angapo lawas. 20 Et no say Katawan ag to komon pinatekeyan so saray agew, angapo komon so laman a nilaban: balet nisengeg ed saray apili, a sikaray pinili to, pinatikey to so saray agew.
------------------------------------------------------------------ 21 Et saman la no siopaman a too ikuan to ed sikayo, Nia, wadia si Cristo: ono, Nia, wadman; sikatoy ag yo sisigsiaen: 22 Ta onalagey naani so tilatilan Cristo tan tilatila’ profetas tan mangipanengneng ira, naani na saray tantanda tan pankelawan, pian mangibalang ira, a no nayari, saray apili. 23 Balet manlikas kayo: nia, inbagak so amin a bengabengatla ed sikayo ya inpasakbay.
------------------------------------------------------------------
------------------------------------------------------------------
24 Ingen dia ed saratan ya agew kayari na satan [a] kairapan, say banwa onbilunget, tan say bulan ag mangiter naani liwawa to, 25 Tan saray bibitewen napelag ira naani manlapu ed tawen, tan saray pakayari tan gloria. 26 Et saman la nanengneng da so anak na too ya onsabi ya manluglugan ed saray lurem pati baleg a pakayari tan gloria. 27 Tan saman la ibaki to so saray angeles, et tiponen da naani a pandaragupen so saray pinili to a manlapu ed saray apatira’n dagem, manlapu ed kasampotan na dalin anga ed kasampotan na tawen
8 Et inkuan to, nengneng yo ta ag kayo komon nibalang: ta dakel naani ray onsabi ed ngaran ko, a kuan da, siak iman; tan, asinger la so pananon: ag kayo ontombok ed sikara. 9 Et sano narengel yo so saray bakal tan gewgew ag kayo natatakot: ta kaokolan a sarayan bengatla nagawa ra ya onona; ingen ag naani onsublay a tampol so pangangaan.
10 Saman la inkuan to ed sikara, onalagey naani nacion sumpa ed nacion, tan panariansumpa ed panarian. 11 Et wala naani ankakabaleg a yegyeg, tan dia ed nambabangil a pasen, eras tan salot; et wala ra naani makapataktakot tan angkakabaleg a tanda a manlapu ed tawen.
12 Inene arapen na sarayan amin a bengtala 13 Et saya nagawa naani ed sikayo a pamatua. 14 Paligenen yo sirin ed kapusoan yo, ya ag kayo manmotektek ya unona no panon naani yebat yo. 15 Ta siak itdan ta kayo naani sangi tan kakabatan, ya ag nayaarian a liktaran tan sumpaen na saray kabusol yo. 16 Balet sikayo so yawat na angan saray atateng yo, tan agagi tan kakanayon tan kakaaro; et arum ed sikayo pateyen da. 17 Et kagula kayo naani na saray amin a totoo nisengeg ed ngaran ko. 18 Et angan sakey a buek na olo yo ag nabalang. 19 Dia ed pantepel yo natalima yo naani kamarerwa yo.
------------------------------------------------------------------
20 Ingen sano nanengneng yo so Jerusalem a niliktob na saray ejercito, saman la amtaen yo a say kabagbag to asinger la. 21 Saman la saray wala ed Judea ombatik ira ed saray palandey; et saray wala ed pegley to, ontainan ira; et saray wala ed uma ag ira onloob ed sikato. 22 Ta saraya sikara’y agew na pangibales, pian nasumpal ya amin so nisulat. 23 Abagey la so saray mamalokon tan saray manpapasoso ed saratan ya agew! ta wala naani baleg ya irap ed tapew na dalin, tan sanok ed sayan baley. 24 Et napelag ira naani ed tarem na kampilan, et niakar iran nadakep ed saray amin a nacion:
------------------------------------------------------------------
et say Jerusalem igatin naani na saray Gentiles, anga ed kasumpalan na saray agew na saray Gentiles.
------------------------------------------------------------------
------------------------------------------------------------------
25 Et wala naani tanda diad agew tan bulan tan saray bibitewen; et diad ed tapew na dalin irap na saray nacion, dia ed jatanagel ed ongol na dayat tan saray daluyon. 26 Saray totoo napunaw ira nisengeg ed takot, tan egagel da ed saray bengatlan onsabi ed mundo; ta saray pakayari na saray tawen natenyeg naani. 27 Et saman la nanengneng da so Anak na too ya onsabi dia ed sakey a lurem pati pakapanyari tan baleg a gloria. 28 Balet sano ongapu a nagawa so saraya a bengatla, tangay kayo, et itangua yo so saray olo yo; ta say karondon yo asinger la.”
[Litrato ed pahina 10]
Say kairapan nen 70 K.P. so sankabalegan ya asagmak ed kapiganman na Jerusalem tan Judion sistema