Kristianon Tastasi Parad Madibinon Inkasoberano

“[Nepeg yon] mangibelyaw na karlangan na saman so angekal ed sikayo ed kabilungtan, ta tinawag to kayo ed makapakelaw a silew to.”​—1 PEDRO 2:9.

1. Anton epektibon pantasi nipaakar ed si Jehova so niiter sakbay na Kristianon panaon?

SAKBAY na Kristianon panaon, walay andukey a listaan na tastasin sipapakpel a nantestigo a si Jehova so alenleneg a tuan Dios. (Hebreos 11:4–12:1) Tekep na mabiskeg a pananisia, andi-takot dan tinulok iray ganggan nen Jehova tan ag-akikompromiso ed saray pamaakaran na panagdayew. Sikaray angiter na mabiskeg a pantasi ed sankatalbaan ya inkasoberano nen Jehova.​—Salmo 18:21-23; 47:1, 2.

2. (a) Siopa so sankabalgan a Tasi nen Jehova? (b) Siopa so sinmublay ed nasyon na Israel bilang tasi nen Jehova? Panon tayon amta?

² Say kaunoran tan sankabalgan a tasi sakbay na Kristianon panaon et si Juan a Bautista. (Mateo 11:11) Sikatoy apribilihyoan a mangibalita ed isabi na Pinilin Sakey, tan imparungtal to si Jesus bilang say insipan a Mesias. (Juan 1:29-34) Si Jesus so sankabalgan a Tasi nen Jehova, “say tasi a matoor tan matua.” (Apocalipsis 3:14) Lapud impulisay na silalaman ya Israel si Jesus, sikaray impulisay nen Jehova tan anuro na sakey a balon nasyon, say espiritual ya Israel na Dios, a magmaliw a tasi to. (Isaias 42:8-12; Juan 1:11, 12; Galacia 6:16) Inaon nen Pedro so sakey a propesiya nipaakar ed Israel tan impanengneng ton onaplika itan ed “Israel na Dios,” say Kristianon kongregasyon, sanen inkuanton: “Sikayo so apili a kapolian, peteg ya inkasacerdote, masantos a nacion, sakey a baley na Dios a dilin kayarian to, [a nepeg yon] mangibelyaw na karlangan na saman so angekal ed sikayo ed kabilungtan, ta tinawag to kayo ed makapakelaw a silew to.”​—1 Pedro 2:9; Exodo 19:5, 6; Isaias 43:21; 60:2.

3. Anto so manunan responsabilidad na Israel na Dios tan say “baleg ya ulop”?

³ Ipapanengneng na saray salita nen Pedro a say manunan responsabilidad na Israel na Dios et say pantasi ed publiko nipaakar ed gloria nen Jehova. Diad agew tayo et sayan espiritual a nasyon so iibaan na “baleg ya ulop” na tastasin mapublikon mangiglogloria met ed Dios. Onkekelyaw ira tekep na maksil a boses pian amin so makarengel: “Otang mi kilalaban ed Dios mi, ya akayurong ed trono, tan dia ed Kordero.” (Apocalipsis 7:9, 10, NW; Isaias 60:8-10) Panon a nasumpal na Israel na Dios tan saray kaulop da so pantasi ra? Diad panamegley na pananisia tan katutulok da.

Palson Tastasi

4. Akin a palson tastasi iray Judio diad agew nen Jesus?

⁴ alanoren na pananisia tan katutulok so panbilay unong ed maridios a prinsipyos. Naimano so kaimportantian na saya diad imbaga nen Jesus nipaakar ed saray Judion relihyoson pangulo ed agew to. Saraya so ‘manyorong ed yorongan nen Moises’ bilang managbangat na Ganggan. Sikara ni ingen so angibaki na saray misionero ta pian kumbertien iray aliwan mananisia. Ingen, inkuan nen Jesus ed sikara: “Liberen yo so dayat tan dalin a pangawa yo’y sakey ya patpatombok; et sano sikato so magmaliw ya ontan sikato so gawaen yo’n mamiddua ni ya anak na infierno [Gehenna, NW] nen say sikayo’n dili.” Sarayan relihyonista so palson tastasi​—mapasang, mansimpisimpitan, tan agmaaro. (Mateo 23:1-12, 15) Aminsan et inkuan nen Jesus ed pigaran Judio: “Sikayo kien kayo na ama yo ya diablo, et saray kalikaliktan nen ama yo sikato so labay yo a gawaen.” Akin ya ibaga nen Jesus so ontan a bengatla ed saray membro na nasyon a pinili na Dios? Lapud agda labay a dengelen iray salita na sankabalgan a Tasi nen Jehova.​—Juan 8:41, 44, 47.

5. Panon tayon amta a say Kakristianoan so akapangiter na palson pantasi nipaakar ed Dios?

⁵ iad mipadparan dalan, legan na saray siglo nanlapulad panaon nen Jesus, nilasus minilyon diad Kakristianoan so mangibabagan sikaray babangatan to. Balet, agda gagawaey linawa na Dios tan sirin ag-ira binidbir nen Jesus. (Mateo 7:21-23; 1 Corinto 13:1-3) Angibaki la so Kakristianoan na saray misionero, dakel ed sikara so maseguron masimoon. Ingen, imbangat day totoo a mandayew ed Trinitaryon dios a mamopool ed saray managkasalanan diad impiernon-apuy, tan maslak ed saray akumberti ra so agnapatnagan a sikaray Kristiano. Alimbawa, say dalin ed Aprika a Rwanda et nagmaliw a mabungan lawak parad saray misioneron Romano Katoliko. Siansia, sigpot-puson akibiang iray Katolikon taga Rwanda ed agano nin panlalaban na saray tribu ed saman a dalin. Ipapabitar na saray bunga ed saman a lawak na saray misionero ya ag-agamoran so tuan Kristianon panagtasi manlapud Kakristianoan.​—Mateo 7:15-20.

Panbibilay Unong ed Maridios a Prinsipyos

6. Diad antoran dalan a say maptek a kondukta so sakey ya importantin kabiangan na panagtasi?

⁶ Say lingon kondukta na saramay mangibabagan sikaray Kristiano so mangiiter na kabalawan ed “say dalan na katuaan.” (2 Pedro 2:2) Say sakey a tuan Kristiano so manbibilay unong ed maridios a prinsipyos. Agto mantatakew, mantitila, manasaol, odino manggagawa na imoralidad. (Roma 2:22) Maseguron sikatoy agmamapatey na kapara ton too. Saray Kristianon asawan lalaki so maaron mangaasikaso ed kapamilyaan da. Sirerespeton susuportaan na asawan bibii itan a panangasikaso. Saray anak so ipapasal na atateng da tan diad ontan et nipaparaan pian magmaliw a responsablin Kristianon susto-la’d-edad. (Efeso 5:21–6:4) Tua, amin tayo so ag-ayadyari tan nalilingo. Balet rerespetoen na sakey a tuan Kristiano iray estandarte na Biblia tan sisimoon a manggugunaet a mangiyaplika’d saratan. Saya so napapatnagan na arum tan mangiiter na maabig a pantasi. No maminsan, saramay datin onsusumpa’d katuaan so akaimano ed maptek a kondukta na sakey a Kristiano tan lapud saya et sikaray atangguyor.​—1 Pedro 2:12, 15; 3:1.

7. Kaunongan kaimportanti a manaaroan iray Kristiano?

⁷ Impanengneng nen Jesus so makanan kabiangan na Kristianon kondukta sanen inkuanto: “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.” (Juan 13:35) Say mundo nen Satanas so nabidbiran ed “ag inkatunong, karelmengan, agum, mabanday a linawa; napno ra na siblet, panagpatey, kolkol, kasaolan, karamsakan, managtalabotob, managpabanday, managgola ra ed Dios, mapangta, atatagey a linawa, malangas, managpalsa na kaugsan, matutulay ed saray ateng da.” (Roma 1:29, 30) Diad ontan a kaliberliber, say sakey a sankamundoan ya organisasyon a pakabidbiran na aro so mabiskeg ya ebidensyan onkikiwas so espirituy Dios​—sakey ya epektibon pantasi. Titibukelen na Tastasi nen Jehova so ontan ya organisasyon.​—1 Pedro 2:17.

Saray Tasi so Estudyante na Biblia

8, 9. (a) Panon ya apabiskeg so salmista ed panagaral to ed Ganggan na Dios tan ed impandalepdep to’d saya? (b) Diad antoran dalan a napapabiskeg tayo na panagaral na Biblia tan panagdalepdep pian mantultuloy a makapangiter na pantasi?

⁸ Pian ontalona ed panangiter na maabig a pantasi, nepeg ya amtaen tan aroen na sakey a Kristiano iray matunong a prinsipyo nen Jehova tan talagan busoley inkabulok na mundo. (Salmo 97:10) Maningganyo so mundo diad pangiyaalibansa na dilin kaisipan to, tan say espiritu to so mairap a resistian. (Efeso 2:1-3; 1 Juan 2:15, 16) Anto so makatulong ed sikatayo pian napansiansiay suston awawey ed kanonotan? Say regular tan makabaliksan a panagaral ed Biblia. Aminpigan danay ya inulit na managsulat na Salmo 119 so panangaro to ed Ganggan nen Jehova. Naynay ton binasa tan dinalepdep itan, “ed amin ya agew.” (Salmo 119:92, 93, 97-105) Bilang resulta, nayarian ton isulat: “Gulaen ko tan dimlaen ko so panagtila; balet say gangan mo inarok.” Niarum ni, sikatoy pinakiwas na aralem a panangaro to. Oniay kuanto: “Maminpito a dayewen taka ed sanagew, nisengeg ed saray matunong a pananontonan mo.”​—Salmo 119:163, 164.

⁹ Diad mipadparan dalan, say regular a panagaral tayo na Salitay Dios tan pandalepdep ed satan so manenyeg ed kapusoan tayo tan mamakiwas ed sikatayon ‘sikatoy dayewen’​—mantasi nipaakar ed si Jehova—​mabetbet, anggan “maminpiton danay ed sanagew.” (Roma 10:10) Mitunosan ed saya, kuan na managsulat na ununan salmo a say maparanay a mandadalepdep ed saray salita nen Jehova “et sikato [so] mipara ed sakey a kiew a nitanem ed abay na saray ag-agos na danum, a mamapaway na bunga to no panaon to, say bolong to met ag namaga; tan antokaman a gawaen to onbona.” (Salmo 1:3) Impanengneng met nen apostol Pablo so pakayari na Salitay Dios sanen insulat to: “Amin a Sulat ya inpuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan, pian say too na Dios angapo komon so pankulangan to, a nabangatan a maong ed amin a gawa a maabig.”​—2 Timoteo 3:16, 17.

10. Anto so mabitar no nipaakar ed totoo nen Jehova ed sarayan kaunoran ya agew?

¹⁰ Say maples ya idaraak ed bilang na saray tuan managdayew diad sayan koma-20 siglo so mangipapatnag ed panamendisyon nen Jehova. Anggapoy antokaman a duaruwa, bilang sakey a grupo et sarayan modernon-agew a tastasi parad madibinon inkasoberano so mamabayubo ed kapusoan da na aro ed ganggan nen Jehova. Singa say salmista, sikaray napapakiwas ya ontulok ed ganggan To tan sitotoor a mantasi ed “agew tan labi” nipaakar ed gloria nen Jehova.​—Apocalipsis 7:15.

Saray Mabiskeg a Gawa nen Jehova

11, 12. Anto so agawaan na saray milagron ginawa nen Jesus tan saray patumbok to?

¹¹ Nen inmunan siglo, pinakayari na masanton espiritu iray matoor a Kristianon tasi pian manggawa na saray milagro, ya angiter na mabiskeg a prueba a say pantasi ra et tua. Sanen nipangaw si Juan Bautista, angibaki na saray babangatan pian ontepet ed si Jesus: “Sika’man so onla dia, ono alagdem mi’ sananey?” Ag-inebatan nen Jesus itan na on odino andi. Imbes, inkuanto: “Onla kayo la, tan ibaga yo ed Juan so saray bengatlan narengel tan nanengneng yo: Saray bulag awaten da’y pakanengneng da, tan saray piley manakar ira, saray akating alinisan ira, tan saray telek makadngel ira, tan saray inaatey inmoli ra ed bilay, tan nipulong ed saray duruka so maong a balita. Et mapalar so siopaman ya ag naani makarumog na katiroran ed siak.” (Mateo 11:3-6) Sarayan makapanyarin gawa so kinmana bilang pantasi ed si Juan a si Jesus so say talagan “say Onsabin Sakey.”​—Gawa 2:22, NW.

¹²  Diad mipadparan dalan, arum ed papatumbok nen Jesus so amaabig ed saray mansasakit tan amaoli ni ingen ed inaatey. (Gawa 5:15, 16; 20:9-12) Sarayan milagro so singa met la pantasin nanlapun mismo ed Dios ed biang da. (Hebreos 2:4) Tan saratan a kimey so angidemostra ed makapanyarin-amin a pakayari nen Jehova. Alimbawa, tua a si Satanas a “principe na mundo,” so walaan na pakayarin mamatey. (Juan 14:30; Hebreos 2:14) Balet sanen pinaoli nen Pedro so matoor a biin si Dorcas manlapud inaatey, agawaan to lambengat itan diad pakayari nen Jehova, ta Sikato lambengat so makapangipawil na bilay.​—Salmo 16:10; 36:9; Gawa 2:25-27; 9:36-43.

13. (a) Diad anton dalan a saray milagro ed Biblia so siansian mamapaneknek ed pakayari nen Jehova? (b) Panon a say kasumpalan na propesiya so walaan na baleg a betang ed pamaneknek ed inka-Dios nen Jehova?

¹³ Natan, agla nagagawa iratan a mamilagron kimey. Asumpal lay gagala na saratan. (1 Corinto 13:8) Anggaman kuan, siansian walaan tayoy rekord na saratan diad Biblia, a pinaneknekan na dakel ya akanengneng. Sano nipaarap so imano na Kristianos natan ed sarayan maawaran a salaysay, saratan a kimey so mangiiter ni na epektibon pantasi ed pakayari nen Jehova. (1 Corinto 15:3-6) Niarum ni, diad agew nen Isaias, tinukoy nen Jehova so suston propesiya bilang say mabitar a prueba a Sikato so say tuan Dios. (Isaias 46:8-11) Nasusumpal la natan so dakel a madibinon impuyan a propesiya​—pigara ed saratan et nasusumpal ed Kristianon kongregasyon. (Isaias 60:8-10; Daniel 12:6-12; Malaquias 3:17, 18; Mateo 24:9; Apocalipsis 11:1-13) Nilikud ed impanukoy a sikatayoy manbibilay diad “saray kaonoran ya agew,” iyaalangon na say kasumpalan na sarayan propesiya si Jehova bilang say alenleneg a tuan Dios.​—2 Timoteo 3:1.

14. Diad antoran paraan a say modernon-agew ya awaran na Tastasi nen Jehova so mabiskeg a pantasi a si Jehova so Soberanon Katawan?

¹⁴ Diad kaunoran, siansian manggagaway baleg a bengabengatla si Jehova, makapakelkelaw iran bengatla, parad totoo to. Say onliliwawan katuaan ed Biblia so iwawanwan na espiritu nen Jehova. (Salmo 86:10; Apocalipsis 4:5, 6) Saray nirereport a matalonggaring ya idaraak ed sankamundoan so ebidensya a si Jehova so “mamapapeles ed satan diad panaon to.” (Isaias 60:22, NW) Sanen tinmerak so mapeget a panamasegsegang ed mantutumbokan a bansa ed loob na kaunoran iran agew, say makpel a panagsungdo na totoo nen Jehova so posibli lapud manamabiskeg a pananuporta na masanton espiritu. (Salmo 18:1, 2, 17, 18; 2 Corinto 1:8-10) On, say modernon-agew ya awaran na Tastasi nen Jehova so mabiskeg a pantasin mismo a si Jehova so Soberanon Katawan.​—Zacarias 4:6.

Nipulong so Maong a Balita

15. Anton pinalaknab a pantasi so kaukolan a niiter na Kristianon kongregasyon?

¹⁵ Tinuro nen Jehova so Israel bilang say tasi to ed nasyones. (Isaias 43:10) Anggaman ontan, pigpigara lambengat ya Israelita so ingganggan na Dios ya onla tan manpulong ed saray aliwan-Israelita, tan saya so mabetbet ta pian iyabawag iray panangukom nen Jehova. (Jeremias 1:5; Jonas 1:1, 2) Anggaman kuan, ipapanengneng na saray propesiya ed Hebreon Kasulatan ya onsabi agew et ipaarap nen Jehova so imano to ed nasyones diad malaknab a paraan, tan ginawa to iya diad panamegley na espiritual ya Israel na Dios. (Isaias 2:2-4; 62:2) Sakbay ya onsegep ed tawen, ingganggan nen Jesus iray patumbok to: “Onla kayo sirin, tan mangawa kayo na saray babangatan ed amin a naciones.” (Mateo 28:19) Manwarin inyapasakey nen Jesus so imano to’d “saray abalang a carnero na abung na Israel,” saray papatumbok to so imbaki “ed amin a naciones,” “anga ed kasampotan [ni ingen] na dalin.” (Mateo 15:24; Gawa 1:8) Kaukolan a narengelan na amin a katooan so Kristianon pantasi.

16. Anton kimey so sinumpal na inmunan-siglon Kristianon kongregasyon, tan diad anton laknab?

¹⁶ Impanengneng nen Pablo ya atalosan to iyan maong. Kasabi taon 61 K.P., nibaga ton say maong a balita so “[diad] amin ya mundo [et] mangiiter na bunga tan ontotobo.” Aglimitado so maong a balita ed saksakey a nasyon odino sekta, a singa saray mibibiang ed “panamagalang na saray angeles.” Imbes, satan so silulukas a “nipulong ed amin a pinalsa ed leksab na tawen.” (Colosas 1:6, 23; 2:13, 14, 16-18) Kanian, sinumpal na Israel na Dios ed inmunan siglo so kimey ton “mangibelyaw na karlangan na saman so angekal ed [sikara] ed kabilungtan, ta tinawag to [ira] ed makapakelaw a silew to.”

17. Panon a say Mateo 24:14 so mantutultuloy a nasusumpal diad malaknab a dalan?

¹⁷ Siansia, say inmunan siglon panagpulong so pagpauna lambengat no antoy nagawa legan na kaunoran iran agew. Diad panilalo ed arapen nagkalautla’d panaon tayo, oniay kuan nen Jesus: “Saya [a maong a balita] na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.” (Mateo 24:14; Marcos 13:10) Kasin nasusumpal iyan propesiya? On, nasusumpal iya. Manlapud melag a gapo nen 1919, say panangipulong ed maong a balita so onaabot la natan ed masulok a 230 a bansa. Say panagtasi so narerengelan ed manyeyelon Amianen tan ed masalimuot tan ampetang a tropiko. Nakokobrian iray ankabaleg a kontinenti, tan nasusukisok so ararawin isla ta pian napulongan iray manaayam ditan. Anggaman ed baleg a gulo, a singa say bakal diad Bosnia tan Herzegovina, mantultuloy a nipupulong so maong a balita. Singa ed inmunan siglo, say panagtasi so manbubunga “[diad] amin ya mundo.” Parungtalan a niyaabawag so maong a balita “ed amin a pinalsa ed leksab na tawen.” Say resulta? Ununa, saray nakdaan na Israel na Dios so atugyop “ed balang kailalakan, tan salita tan baley, tan nacion.” Komadua, saray minilyon a “baleg ya ulop” so natitipon manlapud “amin iran nasyon tan tribu tan totoo tan pansasalita.” (Apocalipsis 5:9; 7:9, NW) Mantultuloy a nasusumpal so Mateo 24:14 ed sakey a malaknab a dalan.

18. Anto so pigaran bengatlan nagagawaan na sankamundoan a panangipulong ed maong a balita?

¹⁸ Say sankamundoan a panangipulong ed maong a balita so mamapaneknek a ginmapo lay maharlikan kiwawala nen Jesus. (Mateo 24:3) Sakey ni, satan so manunan paraan a “say aanien na dalin” so gagapasen la, legan ya ipapaarap toy totoo ed mogmon tuan ilalo parad katooan, say Panarian nen Jehova. (Apocalipsis 14:15, 16) Lapud saray tuan Kristiano lambengat so mibibiang ed panangipulong ed maong a balita, ontutulong iyan importantin kimey a mangibiig ed tua manlapud palson Kristianos. (Malaquias 3:18) Diad onian dalan et mansusumpal ed kilalaban na saramay manpupulong ontan met ed saramay onkikiwas. (1 Timoteo 4:16) Sankaimportantian, itatarok na panangipulong ed maong a balita so dayew tan galang ed si Jehova a Dios, say sakey ya angiganggan a gawaen iya, a manusuporta’d saramay manggagawa ed satan, tan mamapabunga ed satan.​—2 Corinto 4:7.

19. Anton determinasyon so ipapaseseg a niwala ed amin a Kristiano legan a sikaray onloloob ed balon serbisyon taon?

¹⁹ Agpankelawan a si apostol Pablo so apakiwas a mangibagan: “Abagey ak la no ag ko ipulong so evangelio!” (1 Corinto 9:16) Ontan met so liknaan na Kristianos natan. Sakey ya engranden pribilihyo tan baleg a responsabilidad so pagmaliw a “kakimeyan na Dios,” a mangisisindag ed liwaway katuaan ed sayan ambilunget a mundo. (1 Corinto 3:9; Isaias 60:2, 3) Say kimey a walaay melag a gapoan nen 1919 so inmabot la natan ed matalonggaring a laknab. Ngalngali limaran milyon a Kristianos so mantatasi parad madibinon inkasoberano unong ta uusaren da so masulok a sakey bilyon ya oras ed loob na sakey taon pian ipasabi mensahe na kilalaban ed arum. Agaylan gayaga so pakapibiang ed sayan kimey na panamasantos ed ngaran nen Jehova! Legan na iloloob tayo’d 1996 a serbisyon taon, determinado tayo komon ya ag-ontantan. Imbes, sikatayoy nagkalalon manumbok ed saray salita nen Pablo ed si Timoteo: “Ipulong mo so salita; manseet ka.” (2 Timoteo 4:2) Legan a gagawaen tayo itan, manpipikasi tayo tekep na inkasimoon ya ituloy a bendisyonan nen Jehova iray sagpot tayo.

Kasin Natandaan Yo?

◻ Siopa so sinmublay ed Israel bilang “tasi” nen Jehova ed saray nasyon?

◻ Panon a makatulong so Kristianon kondukta ed panagtasi?

◻ Akin a say panagaral na Biblia tan panagdalepdep ed saya so importanti parad Kristianon Tastasi?

◻ Diad anton dalan a say modernon-agew ya awaran na Tastasi nen Jehova so onkakanan pantasi a si Jehova so say tuan Dios?

◻ Anto so nagagawaan na panangipulong ed maong a balita?

[Saray litrato ed pahina 15]

Imbes a diad pigpigara lambengat, say maong a balita so nipupulong la natan “ed amin a pinalsa a walad silong na tawen”