Kasin Nanonotan Yo?

Aromog mo ta’n praktikal a makagungguna’d sika so agano niran paway na Say Panag-Bantayan? Sirin, akin ya agmo suboken so memoryam ed onggendan a tepetepet:

◻ Anton duaran tepet so akatulong la ed dakel a Kristianon nipapaarap ed saray dedesisyonan nipaakar ed trabaho ta pian personal a makapandesisyon?

Say unonan tepet et: Kasin say trabaho a mismo so kinondena ed Biblia? Say komaduan tepet et: Kasin say pantrabaho ed onia et pagmaliwen toy sakey a minonong ed sakey a nakokondenan agamil?​—4/15, pahina 28.

◻ Diad anton dalan a say ‘too et impauleyan ed kaapaan’? (Roma 8:20)

Sikatayoy impauleyan ed kaapaan lapud inkiwas na inmunan atateng tayo, si Adan tan Eva. Agawa iya “aliwan lapud panlabay [tayo]” odino bilang resulta na dilin pinili na indibidual. Atawir tayoy kipapasen tayo. Sipapangasi, anggaman say nipatawir na inmunan atateng tayo lambengat et say ag-inkayadyari, kasalanan, tan ipapatey, siansian inabuloyan ira nen Jehova a nawalaan na ananak. Say patey so kinmayat ed amin a too, kanian diad satan a pantalos a say Dios et “impauleyan toy [pinalsa] ed kaapaan.”​—5/1, pahina 5.

◻ Akin a makatunongan a nibagan wala so arapen ya ‘iyalagey na makapadimlan bengatla ed sakey a masanton pasen’? (Mateo 24:15)

Diad kadaanan a padron, ‘say makapadimlan bengatla ya akaalagey ed masanton pasen’ so nisiglaot ed impangataki na Roma ya indauloan nen Heneral Gallus nen 66 K.P. Say modernon-agew a piparaan na satan ya impangataki​—say ibetag na ‘baleg a kairapan’​—so dia ni’d arapen. (Mateo 24:21) Kanian ‘say makapadimlan bengatla a sengegay pankibalatar,’ so onalagey ni labat ed sakey a masanton pasen.​—5/1, pahina 16, 17.

◻ Panon a makapangiter na panaon so mantratrabahon ama tan ina ed ananak da?

Say sakey ya inan abanabanalan kayari sanagew ya impantrabaho so nayarin patulongan ed ananak to a manluto. Say ama a walaay dakel a bengatlan gawaen ed saray sampot simba so makapantrabaho’d pigara ed saratan a kaibay ananak to.​—5/15, pahina 6.

◻ Antoy nepeg a gawaen na saramay ‘manakar ed dalan nen Jehova’? (Jeremias 7:23)

Say panakar ed dalan nen Jehova so mankaukolan na katooran​—determinasyon a manlingkor lambengat ed sikato. Mankaukolan itan na panagmatalek​—nagnap a pananisia a saray sipan nen Jehova et napanmatalkan tan nagawa. Say panakar ed dalan nen Jehova so mankaukolan na katutulok​—a tumboken iray ganggan to ya ag-onkakasipa tan sumpalen iray atagey ya estandarte to. (Salmo 11:7)​—5/15, pahina 14.

◻ Antoray apatiran importantin responsabilidad a nayarin gawaen na ‘saray langkap a totoo’? (Efeso 4:8)

Sitatamoy da itayon ipepetek lamet, simamaaro da itayon ipapaalagey, pansiasiansiaen da so pankakasakey tayo diad kongregasyon, tan sipapakpel da itayon sasalimbengan. (Efeso 4:12-14)​—6/1, pahina 14.

◻ Antoy naaralan tayo manlapud impilimoglimog nen Pablo ed manga sanlasus ya indibidual ya asalambit ed Saray Gawa tan ed arum a sulat to?

Nepeg itayon lawas a mikimeyan ed organisasyon na Dios, ed lokal a kongregasyon tayo, tan ed saray kapananisiaan tayo. Kaukolan tayoy tulong, suporta, tan panamaligliwa ra balanglan diad panaon a marakep odino andi.​—6/1, pahina 31.

◻ Anton taloran panagkatunongan so nayarin usaren ed panulong ed arum a manisip nipaakar ed Manamalsa?

Say inka-eksakton nanengneng ed maawa-awang ya uniberso, say gapoan na bilay ed dalin, tan say agniburin inka-nikadkaduma na utek na too, tekep na saray nanduruman kapasidad to.​—6/15, pahina 18.

◻ Akin ya ontanlan importanti a talosay kabaliksan na personal a ngaran na Manamalsa?

Say ngaran na Dios et kabaliksan toy “Pagmaliwen To” tan idadanet ton sikatoy managgagala tan onkikiwas. Diad pangamta tan pangusar tayo ed ngaran to, nagkalalon natalosan tayon totooren toray sipan to tan aktibon manusumpal ed gagala to.​—6/15, pahina 21.

◻ Panon a napibali iray anak ed panagaral na Biblia bilang pamilya?

No posibli, iparaanan so kada ugaw na ugaw na dili ton Biblia tan aaralen a palapagan. Nayarin paipaliwawa ed ugaw ni iray litrato a pinmatnag ed aaralen a materyal, tan say sakey ya ugaw so nayarin pabtangan lan masakbay a mamasa ed sakey a teksto. Say mas panguloan so nayarin pabtangan a mamitla ed saray pankanawnawan praktikal a kiyaplikaan na aaralen a materyal.​—7/1, pahina 15.

◻ Antoray pigaran kalat a nayarin ilaktip na pamilya ed panagparaan parad saray miting ed kongregasyon?

(1) Manparaan so balang sakey ed pamilya ed pankomento diad saray miting; (2) panpelengan na balang sakey so pankomento ed dili toran salita; (3) ilaktip iray teksto ed saray komento; tan (4) analisaen so materyal a sinononot ed personal a kiyaplikaan.​—7/1, pahina 20.

◻ Anto so tombok na maong a panamaley?

Pian nalukasan tan naeksperiensia iray mablin gayaga na maong a panamaley say sakey a nakaukolan et say maong a komunikasyon. Sasaglawien na saya so pananginabang na saray liknaan tan ideya. Tan say makagunggunan komunikasyon et manginabang na saray bengatlan makapabiskeg, makapaligsa, masimpit, galgalangen, tan makaligliwa. (Efeso 4:29-32; Filipos 4:8)​—7/15, pahina 21.

◻ Anto so ‘dalan nen Jehova’? (Salmo 25:8, 9, 12)

Satan a dalan et say dalan na aro. Nibase itan ed panggawa no antoy duga unong ed saray estadarte na Dios. Tatawagen na Biblia iyan panangiyaplika ed aprinsipyoan ya aro a “sankaabiganan ni a dalan.” (1 Corinto 12:31)​—8/1, pahina 12.