Kililiktar Diad Kiparungtal nen Jesu-Kristo
“Panliketan yo komon . . . pian dia ed kipatnag na gloria to manliket kayo met ed alablabas a gayaga.”—1 PEDRO 4:13.
1. Panon nen Jehova a payayamanen iray ariripen to?
PAYAYAMANEN nen Jehova iray totoo to na dakerakel a langkap. Bilang Engranden Instruktor tayo, sikatayo so sinindagan to na sigsigpot a pikakabat nipaakar ed linawa tan gagala to. Diad panamegley na masanton espiritu to, binayuboan to ed sikatayo so abilidad a mangisindag na liwawa tekep na inkakpel. Ibabaga ed sikatayo nen apuyanan ya apostol Pablo diad 1 Corinto 1:6, 7: “Onong a say pananasi nen Cristo apabiskeg ed sikayo. Ta pian angapo so kakulangan yo ed bengatla a palangkap; a manaalagar ed ipatnag na Katawan tayo a Jesu-Cristo.”
2. Anton magayagan ilalo so itatarya na “kipatnag na Katawan tayon Jesu-Kristo”?
2 Say “ipatnag na Katawan tayo a Jesu-Cristo”—anto so kabaliksan na satan? Tutukoyen to so panaon sano si Jesus so niparungtal bilang maglorian Ari, ya onkiwas a manumang ed matoor iran patumbok to tan mangidapo na panangibales ed saray agmaridios. Unong ya ipapanengneng na 1 Pedro 4:13, panaon itan na ‘panliket tan pangayaga’ parad manamemben-katooran iran alanaan-ed-espiritun Kristianos tan ed matoor a kakaiba ra a baleg ya ulop, lapud satan so mananda ed anggaan na sistema na bengabengatla nen Satanas.
3. Panon so pakatalindeg tayon malet, a singa saray agagi tayo ed Tesalonica?
3 Unong a manasingger itan a panaon, diad sanok nen Satanas et padaaken to so desdes ed sikatayo. Sasalien to itayon buagen a singa omoang a leon. Nepeg tayo so ontalindeg a malet! (1 Pedro 5:8-10) Sanen balo ni ed katuaan, saray agagi tayo ed Tesalonica so anagmak na saray kairapan a miulibay ed saramay sinagmak na dakel iran Tasi nen Jehova natan. Kanian, saray balikas nen apostol Pablo ed sikara so makabaliksan a tuloy ed sikatayo. Insulat to: “Matunong ed Dios so pamales na kaermenan ed saray mamaermen ed sikayo, tan dia ed sikayo ya apaermen mipainawa kayo ed sikami, sano ompayawar so Katawan tayo a Jesus a manlapu ed tawen ya ibato so saray angeles na pakayari to, a dia ed mandarlang ya apuy. Iter to so panamales ed saray ag mikabat ed Dios, tan dia ed saray ag ontolok ed evangelio na Katawan tayon Jesus.” (2 Tesalonica 1:6-8) On, say inawa so onsabi!
4. Akin a kanepegan na saray klero so panangukom a nidapo diad kiparungtal nen Jesus?
4 Nen panaon nen Pablo dakel ed kairapan so pinalesa na saray Judion relihyoson papangulo. Ontan met natan, say isusumpa ed saray manangaroy-kareenan a Tastasi so mabetbet ya insugsug na saramay mangibabagan mangilalaman ed Dios, salanti say klero na Kakristianoan. Mankuankuanan iran kabat da so Dios, balet ipupulisay da so “sakey a Jehova” ed Biblia, a sinaltan da na mistikon Trinidad. (Marcos 12:29, NW) Agda tutuloken so maong a balita nipaakar ed Katawan tayon Jesus lapu’d say uley-na-too so panmamatalkan da parad inawa tan ipupulisay da so maong a balita na onsasabin Panarian nen Kristo ed inkatunong. Amin na sarayan relihyoson sumusumpa so natawtaw ed panaon “sano ompayawar so Katawan tayo a Jesus a manlapu ed tawen”!
Say ‘Isasabi’ nen Jesu-Kristo
5. Panon a say kiparungtal nen Jesus so malinew a nipanengneng diad Mateo 24:29, 30?
5 Satan a kiparungtal so malinlinew ya inretrato nen Jesus diad Mateo 24:29, 30. Diad panedeskribe ed nanduruman kabiangan na tanda na kiwawala to tan say konklusyon na sistema na bengabengatla, kuanto: “Say banwa onbilunget naani, tan say bulan agto naani iter so sinag to, tan saray bibitewen napaptak ira naani a manlapu ed tawen, tan saray pakayari tawen nagalaw ira naani. Insan onpatnag so tanda na Anak na too ed tawen: et manermen naani ed satan so amin a polipoli na dalin, tan nanengneng da naani so Anak na too [Mesianikon Ari nen Jehova] ya onsasabi ed tapew na lurelurem na tawen a napno’y pakayari tan baleg a gloria.” Sayan ‘isasabi,’ er·khoʹme·non diad Griego, so manutukoy ed ipatnag nen Jesus bilang Manangiyalangon nen Jehova.
6, 7. Panon ya “amin a mata sikato so nanengneng da,” tan sioparay apisakup ed saya?
6 Sayan ‘isasabi’ so dedeskribien met nen apostol Juan diad Apocalipsis 1:7, a ditan et kuanto: “Nia, ya onladia ya olopen na saray lurem.” Siempre, saraman a kakabusol so agmakanengneng ed si Jesus ed literal iran mata, lapud “saray lurem” so mankabaliksan a sikatoy onsabin agnanengneng pian mangidapo na panangukom. No say mangatatawen a gloria to so nanengneng na totoo lambengat ed ag-aprotektaan a mata, sikaray nabulag, a singa say inkabulag nen Saulo diad dalan a mamaarap ed Damasco, sanen say niglorian Jesus so pinmayawar ed sikato diad baleg a liwawa.—Gawa 9:3-8; 22:6-11.
7 Ibaga na salaysay na Apocalipsis ya “amin a mata sikato so nanengneng da, tan saray anugat ed sikato; et saray amin a kailalakan ed dalin mandageyem ira naani lapu ed sikato.” Kabaliksan na saya a natebek na saray sumusumpa ed dalin a diad kadederal et onsabi si Jesus a walaay pakayari tan baleg a gloria bilang Manamatey nen Jehova. Akin a sarayan kakabusol so adeskribe bilang “saray anugat ed sikato”? Lapud say ampait ya awawey da ed saray ariripen nen Jehova natan so mipadpara ed saray managpasegsegang nen Jesus. On, sikara “mandagayem ira naani lapu ed sikato.”
8. Anton pasakbay so namparan impakabat nen Jesus tan Pablo nipaakar ed biglan kadederal?
8 Panon naani isabi na satan ya agew na panangibales nen Jehova? Diad propesiya ed Lucas kapitulo 21, dedeskribien nen Jesus so makadesyang iran nagawgawa ya onkakanan tanda na kiwawala to nanlapulad 1914. Insan, diad bersikulo 34 tan 35, ipapasakbay nen Jesus: “Balet manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed saya’n bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabito ed saray amin a manaayam ed tapew na amin a dalin.” On, satan ya agew na panangibales nen Jehova so onsabin bigla, tampol! Pekderan iya nen apostol Pablo diad 1 Tesalonica 5:2, 3, a kuanto: “Say agew na Katawan onsabin singa matakew ed labi. Sano ibabagaray, Kareenan tan andi paga, insan biglan kaderal so onsabi ed sikara.” Anggan natan et pantotongtongan na nasyones so nipaakar ed kareenan tan kaligenan tan ipoproponi ran pabiskegen so Nasyones Unidas pian bantayan iray magulon pasen diad panamegley na pakayari militar.
9. Diad siopa so ‘sinindagan na liwawa,’ tan akin?
9 Diad bersikulo 4 tan 5, ituloy na apostol ya ibaga ed sikatayo: “Balet sikayo, agagi, andi kayo ed kabilungtan, a satan ya agew naabotan to kayo a singa sakey a matakew. Ta sikayon amin anak’kayo na liwawa, tan anak kayo na agew. Sikami ag kami anak na labi, angan kabilungtan.” Pangagayagaan tayo so impagmaliw ya ananak na liwawa—saray manangakbibit na liwawa parad arum a manpirawat na tuan kareenan tan kaligenan diad balon mundo na Dios. Diad Salmo 97:10, 11, nabasa tayo: “O sikayo ya mangaaro ed Jehova, gula yo so mauges. Sikato yapiger to so kamarerwa na saray sasantos to; iliktar to ra ed lima na bagel. Say liwawa nitanem ya onkana ed matunong, tan say liket onkana ed maptek a puso.”
Say Uksoy na Saray Nagawgawa
10. Anton abanten pasakbay so nepeg tayon imanoen nipaakar ed agew na pikukuentaan na Dios? (Apocalipsis 16:15)
10 Anto so uksoy na saray nagawgawa sano ombetag so baleg a kairapan? Ibukay tayo ed Apocalipsis kapitulo 16. Imanoen, unong ya adeskribe ed bersikulo 13 anggad 16, a saray marutak, demonikon espiritu so manipon ed nasyones na interon dalin diad Har-magedon, say bakal na baleg ya agew na Makapanyarin-amin a Dios. Lamet, say singa-matakew ya isabi na agew na pikukuentaan so nidadanet, tan sikatayo so papasakbayan a mansiansian aliing—a pansiansiaen iray espiritual ya aysing tayo a mananda ed sikatayo parad kilalaban. Say panaon so sinmabi la diad pangukom ed saray totoo ed dalin, nasyones, tan—samay sakey. Siopa’tan?
11. Panon na bii ed Apocalipsis 17:5 ya impabidbir so inkasikato?
11 Say piguratibon bii a nanggunaet a “mangikinon ed inkasikato.” Sikato so adeskribe diad Apocalipsis 17:5 bilang “misteryo, say Babilonia a Baleg, ina na saray balangkantis tan saray karimdimla dia ed dalin.” Balet sikatoy aliwa lan misteryo ed saray Tasi nen Jehova. Malinlinew lan impabidbir to so inkasikato bilang say sankamundoan ya imperyo na palson relihyon, a titibukelen na saray sekta na Kakristianoan so matalonan kabiangan. Say pibabali to ed saray pamaakaran na pulitika so makapadimla ed imaton nen Jehova lapud impagmaliw ton “abuanges ed dala na saray sasantos” diad impamasegsegang ed saray tuan Kristianos, tan impagmaliw ton responsable ed dala na “amin da a pinatey dia ed dalin,” a pati say masulok a sanlasus laksan atigway ed saray bakal ed sayan koma-20 siglo lambengat.—Apocalipsis 17:2, 6; 18:24.
12. Akin a saray sekta na Kakristianoan so nakondena?
12 Sankaugsan ed amin, saray sekta na Kakristianoan so mangitatarok na kabalawan ed ngaran na Dios a mansimpisimpitan ya ikuan dan ilalaman da. Ibabangat daray Binababilonia tan Gresyan pilosopiyas imbes a say puron Salita na Dios tan angarum ed moral ya inkadelinkuente na interon nasyones diad pangiyaabuloy ed malukak iran estiloy-panagbilay a manmumudmora ed saray prinsipyo na Biblia. Saray maagum a managtagilako ed limog da so akondena ed saray balikas na Santiago 5:1, 5: “Balap natan, sikayo mamayaman, mannangis tan maningal kayo ed saray irirap ya onsasabi ed sikayo. Nanbilay kayo ed saray liket dia ed dalin, tan managlawan kayo; pinataba yo so puspuso yo, a singa dia ed sakey ya agew a panagpatey na asalian.”
Inkagba na Babilonia a Baleg!
13. Panon so isabi na manangigapoy baleg a kairapan, tan anton pankaganatan so nidadanet diad Apocalipsis 18:4, 5?
13 Say gapo na baleg a kairapan so onsabi diad kidapo na panangukom nen Jehova ed Babilonia a Baleg. Malinew so impaneskribi na Apocalipsis 17:15-18 ed “kanonotan” na Dios—diad pangimaneobra ed “samploran saklor,” saray mabibiskeg a puersa ed multinational ya “atap ya ayep” na NU, pian manbingkas ed sikato. “Et saray samplora’n saklor ya anengneng mo, tan say ayep, bosolen da so balangkantis, tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apuy. Ta say Dios inyan to ed saray kapusoan da so pangawa ed kinaliktan to.” Agpankelawan ya impaknol na mangatatawen a boses so maganat a pasakbay diad Apocalipsis 18:4, 5: “Ompaway kayo ed sikato, baley ko, pian ag kayo nalanor ed saray kasalanan to, tan ag kayo manlikna ed saray bakbak to. Ta saray kasalanan to sinmabi ra anga ed tawen, tan say Dios anonotan to so kaugsan to.” Say kelyaw so mantultuloy: Paksoten so amin a siglaotan ed palson relihyon, sakbay ya atrasadon tuloy!
14. Sioparay mandageyem diad kaderal na Babilonia a Baleg, tan akin?
14 Panon so pangipasen na mundo ed kaderal na Babilonia a Baleg? Manlapud arawi, saray marutak a pulitiko—“arari ed dalin”—sikato so paneermenan da lapud akapanliket ira diad loob na saray siglo ed espiritual ya impanlawanan da. Sikato met so pannangisan tan pandageyeman na saray maagum ed komersyo, “saray [managbiahen] manag-tagilako . . . , yinmaman ira lapud sikato.” Saraya met so inmarawi ed sikato, a kuanda: “Kasila, kasila so baleg a ciudad, a nankawes na fino ya lienzo tan purpura tan escarlata, tan aparakpan na balitok tan nismakan na batobato ya ankabli, tan perperlas! Ta dia ed sakey ya horas inmandi so ontan la a kayamanan.” Amin a mablin kawes na saray klero tan say karakpan na ankabaleg iran simbaan to ed mundo so naandi ed ando lan ando! (Apocalipsis 18:9-17) Balet kasin balang sakey so manermen ed Babilonia a Baleg?
15, 16. Anton sengegan na pangayaga so niwala ed totoo na Dios?
15 Onebat so Apocalipsis 18:20, 21: “Manliket ka ed sikato, sika tawen, tan sikayo sasantos, apostoles, tan profetas; ta say Dios insingilantoy inkaokom yo ed sikato.” Singa sakey a baleg a bato na gilingan ya imbantak ed dayat, “onia a siglat so kabagbag na Babilonia, say baleg a ciudad, et kapiganman ag la naromog a balot.”
16 Agaylan sengegan na pangayaga! Say Apocalipsis 19:1, 8, NW so mangibaga na onia. Amipat a danay a say kelyaw ya, “Idayew si Jah, sikayon totoo!” so nipaknol manlapud tawen. Say ununan talora ed sarayan Aleluya so mangidadayew ed si Jehova lapud indapo to so matunong a panangukom ed mabanday a balangkantis, say Babilonia a Baleg. Say sankamundoan ya imperyo na palson relihyon so anggapo la! Sakey a boses a pinmaway ed trono na Dios, so angikuan: “Iter yoy galang ed Dios tayo. amin yo ya ariripen to, tan sikayo ya antakot ed sikato, ankekelag man o ankakabaleg.” Agaylan apribilihyoan tayon mibiang ed satan a kanta!
Say Bansal na Kordero
17. Diad pangipareng ed Apocalipsis 11:17 tan 19:6, diad anton duaran konteksto a si Jehova so onggapon manuley bilang Ari?
17 Say komapat ya Aleluya so mangipaparungtal na sananey a tema: “Idayew si Jah, sikayon totoo, lapud si Jehova a Dios tayo, say Makapanyarin-amin, so ginmapon manuley bilang ari.” Balet agta say namparan kanta so inaon diad Apocalipsis 11:17? Ditan et nabasa tayo: “Yawat mid sikay pisasalamat, O Katawan a Dios, a Makapanyarin-amin, . . . ta inalam so baleg a pakapanyarim, tan nanari ka.” On. Anggaman kuan, say konteksto na Apocalipsis 11:17 so manutukoy ed impangitarok nen Jehova na Mesianikon Panarian nen 1914 “a mamastol ed amin a nasyones tekep na tayukor a balatyang.” (Apocalipsis 12:5, NW) Say Apocalipsis 19:6 so natalosan a mitukoyan ed kaderal na Babilonia a Baleg. Diad kapagit na singa-balangkantis a relihyon, say Inkadios nen Jehova so mantultuloy a naalangon. Say panagdayew ed sikato bilang Supremon Soberano tan Ari so ontalona natan tan diad andi-anggaan!
18. Say kaekal na Babilonia a Baleg so mangilukas na dalan parad anton magayagan pakabat?
18 Kanian, say magayagan pakabat so nayarin gawaen: “Mangayaga itayo tan manliket itayo na mapalalo tan iter tayo ed sikato [Jah] so panangigalang: ta sinmabi la so bansal na Cordero, et say asawa to nantadia la. Tan niiter ed sikato a mankawes na fino ya lienzo, masnag tan malinis: ta say fino ya lienzo sikato so matunong a gawa na saray sasantos.” (Apocalipsis 19:7, 8) Agnibaga no kapigan awaten na natitilak nin alanaan diad dalin so mangatatawen a kikioli ra. Balet napaseguroan itayo dia ed konteksto a say pibiang da ed bansal na Kordero, si Kristo Jesus, so maliket a panaon, lapud natasian dan mismo so kipaabeba na makapabaing a balangkantis, say Babilonia a Baleg.
Naderal so Mundo nen Satanas
19. Anton arum nin nagawa so nadedeskribe diad Apocalipsis 19:11-21?
19 Say amputin kabayo ya inmunan asalambit ed Apocalipsis 6:2 so ompaparungtal lamet. Nabasa tayo ed Apocalipsis 19:11: “Say akasakay ed sikato [say amputin kabayo], sikato so natatawag na Matoor tan Matua, a diad inkatunong sikatoy mangokom tan mibakal.” Kanian say “Ari na arari tan Katawan na kakatawan” so nankabayon mangabil ed saray nasyones pian igatin-gatin to so “darapilan na alak na petang na sanok na Dios a Makapanyarin-amin.” Andi kakanaan so impantitipon na “saray arari na dalin tan saray armada ra” diad pibakal ed Harmagedon. Ilaos na Akalugan ed amputin kabayo so pangonkesta. Anggapon balot so natilak ed mangaraldalin ya organisasyon nen Satanas.—Apocalipsis 19:12-21.
20. Anto so nagawa ed Diablo a mismo?
20 Balet komusta so Diablo a mismo? Diad Apocalipsis 20:1-6, si Jesu-Kristo so adeskribe bilang “sakey ya angel ya inmepas a nanlapu ed tawen, ya wala ed sikato so tombok na kaaralman, tan sakey a golonggolong dia ed lima to.” Inerel to so dragon, say daan ya Uleg, a sikatoy Diablo tan Satanas, binalor to, imbantak to ed kaaralman, tan impukok to tan tinatakan to ed tapew to. Diad kapagit nen Satanas tan agpakayarin pamalikdo lamet ed nasyones, say maglorian Milenyon Uley na Kordero tan say nobya to so niparaan. Anggapo la so lua lapu’d ermen! Anggapo la so Adamikon patey! Anggapo la so mannangis, mandageyem, man-ot-ot! “Saray inmunan bengatla so linmabas la.”—Apocalipsis 21:4.
21. Unong a pitamitam tayon aalagden so kiparungtal nen Jesu-Kristo, anto so nepeg a determinasyon tayo?
21 Legan a pitamitam tayon aalagden so kiparungtal na Katawan tayon Jesu-Kristo, ipanengneng tayo so seseg diad pangibaga ed arum na maaron sipasipan na Panarian na Dios. Asingger la so kililiktar! Ontundas itayo, lawas onabante, bilang aliwawaan ya ananak na Soberanon Katawan a Jehova!
Diad Panrepaso
◻ Anto so mangipanengneng ya asingger la so kiparungtal nen Jesu-Kristo?
◻ Panon so isabi na agew na panangibales nen Jehova?
◻ Panon so nepeg a panmoria na “saray manangaro ed si Jehova” ed peles a kipapasen na mundo?
◻ Anto so oksuy na saray nagawgawa sano onterak so baleg a kairapan?
[Litrato ed pahina 23]
Si Jesus so ‘onlandia ya olopen na saray lurem,’ agnanengneng, a mangidapo na panangukom
[Litrato ed pahina 25]
Agmabayag say palson relihyon, marelmeng a sistema nen Satanas, tan si Satanas a mismo so nimedmer iran amin