Tepetepet Manlapud Managbasa
“Say Panag-Bantayan” a Nobyembre 1, 1995, so angiyapasakey ed no anto so inkuan nen Jesus nipaakar ed “sayan kailalakan,” a singa nabasa tayo ed Mateo 24:34. Kabaliksan ta na satan a diskusyon a wala so panduaruwa nipaakar ed no kasin say Panarian na Dios so niletneg la ed tawen nen 1914?
Satan a diskusyon ed Say Panag-Bantayan et agton balot uumanen so manunan bangat tayo nipaakar ed 1914. Indalatdat nen Jesus so tanda a mananda’d kiwawala to diad pakayari na Panarian. Walaan itayoy dakel ya ebidensya a sayan tanda so nasusumpal nanlapulad nen 1914. Saray detalyen nipaakar ed saray bakal, eras, salot, yegyeg, tan arum niran ebidensya so mamapaneknek a nanlapulad 1914 et si Jesus so aktibo la bilang Ari ed Panarian na Dios. Ipapanengneng na saya a nanlapulad saman et wala tayo la’d kasampotan na sistema na bengabengatla.
Anto sirin, so ipapalinew na Say Panag-Bantayan? Bueno, say pakabidbiran et say pantalos ed terminon “kailalakan” ya inusar nen Jesus ed Mateo 24:34, NW. Nabasa ed satan a parapo: “Tua kuanko ed sikayo sayan kailalakan so ag-onlabas ed antokaman a paraan anggad kagawa na amin na sarayan bengatla.” Antoy labay ya ibaga nen Jesus ed “kailalakan,” namparan diad agew to tan ed agew tayo?
Pepekderan na dakel a kasulatan ya ag-inusar nen Jesus so “kailalakan” nipaakar ed pigaran ankelag odino nikabiig a grupo, a singa saray pangulo labat na Judio odino saray matoor labat a babangatan to. Imbes, inusar to so “kailalakan” diad pangokondena ed saray ulop na Judio ya angipulisay ed sikato. Balet, makapaliket ta nagawaay sinansakey so impaseseg nen apostol Pedro ed agew na Pentecostes, magbabawi tan “nilaban ed sayan pikewet a kailalakan.”—Gawa 2:40, NW.
Diad satan a balikas, mabitar ya agtutukoyen nen Pedro so antokaman a nigeter ya edad na totoo odino karukey na panaon, nisay isisiglaot to so “kailalakan” ed sakey a pihon petsa. Agto inkuan a say totoo so nisalba manlapud say kailalakan a nianak ed parihon taon na inkianak nen Jesus odino say kailalakan a nianak nen 29 K.P. Tutukoyen nen Pedro iray agmananisian Judio ed saman a panaon—nayarin pigara so malangwer ni, arum so matatken la—ya angipaamtaan la’d bangat nen Jesus, akanengneng odino akadngel la’d saray milagro to, tan ag-angawat ed sikato bilang Mesias.
Ontan so malinew ya atalosan nen Pedro ed impangusar nen Jesus ed “kailalakan” sanen sikato tan taloran nin apostol so kaiba nen Jesus ed Palandey na Olibo. Unong ed mapropetikon balikas nen Jesus, saray Judio ed satan a panaon—manuna, saray kapanaonan nen Jesus—so makaeksperiensia odino makadngel na saray bakal, yegyeg, eras, tan arum niran ebidensya a say anggaan na Judion sistema so asingger la. Diad tua, satan a kailalakan so ag-apaso sakbay a sinmabi so anggaan nen 70 K.P.—Mateo 24:3-14, 34.
Nepeg ya awaten so agtayo lawas pakatetebek ed saray salita nen Jesus diad ontan a pantalos. Wala so tendensyay ag-ayadyarin totoo a mankaliktan ed espisipikon petsa no kapigan so isabi na anggaan. Nonoten ya anggan saray apostol so manaanap ed saray mas espisipiko ni, ya ontetepet: “Katawan, ipawil mo so panarian ed Israel ed sayan panaon?”—Gawa 1:6.
Tekep na parihon masimoon ya intinsion, saray aripen na Dios ed moderno iran panaon so mankuekuentay espisipikon panat na panaon a kinalkula nanlapulad 1914 base’d inkuan nen Jesus nipaakar ed “kailalakan.” Singa bilang, ikakatunongan a say sakey a kailalakan et nayarin 70 odino 80 a taon ed karukey, a tugyopen na totoon susto-la’d-edad pian natalosan so kaimportantian na inmunan guerra mundial tan arum niran agawgawa; kanian, nakalkula tayo no kaunongan lay kinaasingger na anggaan.
Anggaman maong so getma na ontan a panagkatunongan, mipakna kasi itan ed simbawan iiter nen Jesus? Inkuan nen Jesus: “Balet satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat. . . . Manpuyat kayo sirin; ta agyo amta no anton agew so isabi Katawan yo.”—Mateo 24:36-42.
Kanian ag-inuman na agano nin impormasyon ed Say Panag-Bantayan nipaakar ed “sayan kailalakan” so pakatalos tayo’d no antoy agawa nen 1914. Balet palilinewen na satan so pakatalos tayo’d impangusar nen Jesus ed terminon “kailalakan,” a tutulongan to itayon natalosan a say impangusar to so aliwan basiyan na panagkalkula—panguenta manlapud 1914—no kaunongan lay kinaasingger tayo’d anggaan.