Niliktar a Mabilay Diad Panaon na Baleg a Kairapan
“Saraya sikara so nanlapu ed baleg ya irap, tan inorasan da so kawekawes da, tan sikara so pinapoti ra ed dala na Cordero.”—APOCALIPSIS 7:14.
1. Sioparay mangabrasa ed saray napaoli diad mangaraldalin a kioli?
SANO nibangon laray agnabilang a minilyon diad ‘kioli na saray matunong tan saray agmatunong,’ ag-ira itarok ed bilay ed sakey a paoy-paoy a dalin. (Gawa 24:15) Sikaray naliing diad marakerakep a kaliber-liber tan naromog dan nitarya la parad sikara so panayaman, kawesen, tan daakan a tagano. Siopa so manggawa ed sarayan amin a panagparaan? Malinew, a wala laray totoon manaayam ed balon mundo sakbay ya onggapoy mangaraldalin a kioli. Siopara? Tutukoyen na Biblia a sikaramay makaliktar ed onsasabin baleg a kairapan. Diad amin a bangabangat na Biblia, agpanduaruwaan a saya so sakey ed saray makapainteres a tuloy—a walaray pigaran matoor a totoon niliktar a mabilay ed panaon na baleg a kairapan tan aglan balot ompatey. Sayan ilalo so pepekderan a tuloy na Masanton Kasulatan.
Singa ed Saray Agew nen Noe
2, 3. (a) Antoran panparpara so naala ed baetan ed saray agew nen Noe tan ed anggaan na sayan mundo? (b) Anto so ipaparungtal na kililiktar nen Noe tan say pamilya to diad Delap?
2 Diad Mateo 24:37-39, impareng nen Jesu-Kristo so agew nen Noe ed saray kaunoran ya agew, a pakaromogan tayo na inkasikatayo natan. Inkuanto: “Unong ed saray agew nen Noe, ontan naani so isabi na Anak na too. Ta singa dia’d saraman ya agew ed arapen na delap nankakakan ira tan naninum ira, angaasawa ra tan akiasawa ra anga’d agew ya inloob nen Noe ed biong. Tan ag da akabkabatan anga ed sinmabi’ delap, et inyanor to ra ya amin; ontan naani so isabi Anak na too.”
3 Niyanep na sankagloboan a Delap so amin ya ag-angimano ed mensahen pasakbay na Dios. Anggaman ontan, agto niyanep si Noe tan say pamilya to. Sikaray ‘linmoob ed biong,’ a singa inkuan nen Jesus. Lapud maridios a debosyon da, tinarokan ira nen Jehova na sakey a paraan pian niliktar. Tutukoyen na 2 Pedro 2:5, 9 so inkiliktar nen Noe tan say pamilya to sanen kuanton: “Inlaban to [Dios] si Noe, a pati arum nin pitora, sakey a managpulong na katunongan, dia ed inpangitarok to na delap ed mundo na saray momoan. Amta na Katawan [Jehova, NW] so pangiliktar to ed saray masantos ed katokso.” Impareng nen Jesus so agew nen Noe ed kaunoran iran agew pian ipanengneng a say totoo ed inkalapagan et ag-ontutumbok ed manamasakbay a mensahe na Dios. Anggaman kuan, diad panggawa ed saya et pinekderan to met a si Noe tan say pamilya to so tinmulok ed si Jehova a Dios, linmoob ed biong, tan akaliktar ed baleg a Delap. Say inkiliktar nen Noe tan say pamilya to so manutukoy ed kililiktar na matoor ya ariripen na Dios ed pangangga na sayan mundo.
Inmunan-Siglon Padron
4. Diad kasumpalan na saray salita nen Jesus, antoran ebento so angipaarap ed kadederal na Jerusalem nen 70 K.P.?
4 Sinaglawi met nen Jesus iray ebento ed pangangga na sayan mundo. Diad Mateo 24:21, 22 et nabasa tayo: “Wala naani baleg ya irap ed satan, ya angapo so ontan a nanlapu’d gapo na mundo ya anga ed natan, angapo, angapo la naani. Et no ag apatikeyan iratan ya agew, angapo komon naani laman ya nilaban; balet nisengeg ed saray pinili napatikeyan so saratan ya agew.” Sarayan salita et walaan na inmunan kasumpalan diad inmunan siglo na Komon a Panaon tayo. Nen 66 K.P., say syudad na Jerusalem so nilusob na saray Romanon armada ed silong nen Cestius Gallus. Saray tropa na Romano so sinmabi’d punton aneral ed pader na templo, tan dakel a Judio so akaparaan ya onsuko. Anggaman ontan, ag-inilaloan tan diad agmalinew a rason et pinaatras nen Cestius Gallus iray tropa to. Diad impakanengneng ed inyatras na saray Romano, kinmiwas iray Kristiano unong ed saray balikas nen Jesus, a sinaglawi to ed pigaran taon la ed asasakbay: “Sano nanengneng yo so Jerusalem a niliktob na saray ejercito, saman la amtaen yo a say kabagbag to so asinger la. Saman la saray wala ed Judea ombatik ira ed saray palandey; et saray wala ed pegley to, ontainan ira; et saray wala ed uma ag ira onloob ed sikato.” (Lucas 21:20, 21) Saray nagmaliw a Kristianon Judio, saray pinili, so tampol a tinmaynan ed naderal a syudad na Jerusalem tan diad ontan et niliktar manlapud makapataktakot a kadederal a dinmateng ed saya ag-abayag kayari to. Nen 70 K.P., saray armadan Romano ed silong nen Heneral Tito so pinmawil. Sikaray nankampamento ed liber na Jerusalem, nilusob so syudad, tan sigpot a dineral itan.
5. Diad anton pantalos a say kairapan ed Jerusalem so apatikeyan nen 70 K.P.?
5 Isasalaysay na manag-awaran a si Josephus a 1,100,000 a Judio so inatey, bangta 97,000 so akaliktar tan inala bilang adakep. Saramay aliwan-Kristianon akaliktar a Judio so maseguron aliwan saray “pinili” ed propesiya nen Jesus. Diad pitotongtong ed rebelyoson Judion nasyon, inkuan nen Jesus: “Nia, say abung yo natainan ed sikayo ya andi lugan. Ta kuan ko ed sikayo, Ag yo ak la naani nanengneng a manlapu’d natan, anga ed pangikuan yo naani, Mapalar so onla dia ed ngaran na Katawan.” (Mateo 23:38, 39) Anggapoy rekord a saraman a Judion asikop ed Jerusalem, so diad kaunoran et angawat ed si Jesus bilang say Mesias, nagmaliw a Kristianos, tan angawat na pabor nen Jehova. Anggaman kuan, apatikeyan so kairapan a sinmabi’d Jerusalem nen 70 K.P. Say unor ya impangataki na Romanon armada so agnambayag. Angiyabuloy iya parad pigaran Judion makaliktar, pian gawaen lambengat bilang adakep ed nanduruman parti na Romanon Imperyo bilang ariripen.
Sakey a Baleg ya Ulop na Saray Makaliktar
6, 7. (a) Anton baleg a relihyoson syudad so naderal ni, bilang kabiangan na anton agnaparaan a kairapan? (b) Anto so impropesiya nen Juan nipaakar ed onsasabin baleg a kairapan ed sayan mundo?
6 Bangta say kadederal na Jerusalem nen 70 K.P. so peteg ya angitarok na “baleg ya irap” parad saman a relihyoson syudad, say manunan kasumpalan na saray salita nen Jesus so nagawa ni’d arapen. Say babaleg a relihyoson syudad, say Babilonia a Baleg, say imperyo na sankamundoan a palson relihyon, so makaeksperiensia na makapatey a baleg a kairapan a tumbokan a tampol na agnaparaan a kairapan parad arum nin kabiangan na sistemay bengabengatla nen Satanas. (Mateo 24:29, 30; Apocalipsis 18:21) Ngalngali 26 a taon kayari inkaderal na Jerusalem, si apostol Juan, diad Apocalipsis 7:9-14, so angisulat nipaakar ed sayan sankamundoan a baleg a kairapan. Impanengneng to a sakey a baleg ya ulop na totoo so makaliktar ed satan.
7 Sarayan akaliktar, a tinawag a “baleg ya olop,” so nabidbiran lapud pigaran mapekder a kiwas a ginawa ra. Unong ed Apocalipsis 7:14, sakey ed 24 a mamatatken ed tawen so angibaga ed si Juan. “Saraya sikara so nanlapu ed baleg ya irap, tan inorasan da so kawekawes da, tan sikara so pinapoti ra ed dala na Cordero.” On, itatandoro na baleg ya ulop si Jehova bilang lapuan na kilalaban da. Aagamilen da so pananisia ed nipaagos a dala nen Jesus tan walaan na matunong a talindeg ed imaton na Manamalsa ra tan ed aturon Ari to, si Jesu-Kristo.
8. Anton maabig a siglaotan so wala ed baetan na “baleg ya olop” tan saray nakekeraan ed alanaan ya agagi nen Jesus?
8 Natan, ngalngali limaran milyon a membro na baleg ya ulop so manbibilay ed silong na aktibon panangipangulo na mangatatawen ya Arin si Jesu-Kristo. Sikaray manpapasakup ed si Kristo tan maapit a mililimog ed alanaan ya agagi ton wala ni ed dalin. Nipaakar ed panangipasen na satan a baleg ya ulop ed sarayan alanaan, kuan nen Jesus: “Tua kuan ko’d sikayo, Bangta sikato’y ginawa yo ed sakey ed saraya’n agik, angan saraya a kamelagan, sikato’y ginawa yo ed siak.” (Mateo 25:40) Lapud andi-siblet ya itutulong da ed alanaan ya agagi nen Kristo, saramay kabiangan na baleg ya ulop so ipapasen ya akapanggawa na maong ed si Jesus a mismo. Ontutulong iya ed sikara a nawalaan na maligen a siglaotan ed si Jesu-Kristo tan si Jehova a Dios. Sikaray apribilihyoan a miulop ed alanaan a nakdaan ed pagmaliw a Tastasi na Dios tan manangakbibit na ngaran to.—Isaias 43:10, 11; Joel 2:31, 32.
Pansiansian Aliing
9, 10. (a) Anto so nepeg tayon gawaen ta pian napansiansia tayo so matunong a talindeg tayo ed arap na Anak na too? (b) Panon so nepeg ya ikiwas tayo ta pian “mansiansian aliing”?
9 Nepeg a pansiansiaen na baleg ya ulop so matunong a talindeg da ed arap na Anak na too ya andi tunda, a mankakaukolan na mantultuloy a panbantay anggad anggaan. Malinew ya imbaga nen Jesus iya sanen inkuanto: “Balet manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed saya’n bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabi to ed saray amin a manaayam ed tapew na amin a dalin. Balet manbantay kayo [mansiansian aliing, NW] ed amin a panaon, a mikasi kayo, pian ontalona kayo a nilaban ed sarayan amin a bengatla’n nagawa, tan makaalagey kayo ed arap na Anak na too.”—Lucas 21:34-36.
10 Pian ontalona diad italindeg ed arap na Anak na too, nepeg a nawalaan tayo na panangabobon to, ya agtayo nakayarian no abuloyan tayoy inkasikatayon naimpluensyaan na panag-isip na sayan mundo. Say minumundon panag-isip so makatangguyor tan makasagyat ed sakey ed alabas a silalaman a panliliket odino diad pagmaliw a nabebelatan a tuloy ed saray problema’d bilay ya agto la niyuuna iray interes na Panarian. (Mateo 6:33) Say ontan a kundang so mamaletey ed espiritualidad na sakey tan manggawa’d sikaton agmananginunang nipaakar ed responsabilidad to ed Dios tan ed arum. Nayarin sikatoy magmaliw ya inaktibo odino maneral ed kipapasen to diad kongregasyon diad pantultuloy a panggaway seryoson kasalanan, anganko et mangipanengneng ni na agmagbabawin awawey. Balang sakey ed baleg ya ulop so nepeg a mangimano ed inkasikaton dili. Nepeg toy mansiansian biig manlapud sayan agmaridios a mundo tan saray agamil to.—Juan 17:16.
11. Say pangiyaplika ed antoran Makasulatan a prinsipyo so ontulong ed sikatayon makaliktar ed Armagedon?
11 Diad satan a gagala, itatarok nen Jehova so nakaukolan tayo diad panamegley na Salita to, masanton espiritu to, tan nanengneng ya organisasyon to. Nepeg tayon sigpot ya anamoten iraya. Niarum ni, nepeg tayon magmaliw a mapikasi tan matulok ed Dios no labay tayon nagamoray panangabobon to. Sakey ni, nepeg tayon bayuboan so mabiskeg a panggula ed no anto so mauges. Inkuan na salmista: “Agak akiyorong ed saray matitila a totoo, nisay akiyorong ak ed saray mansimpisimpitan. Siak ginulak so muyong na saray managgawa na mauges; tan agkon balot miyorong ed saray bagel. Agmo pitiponen so kamarerwak ed saray managkasalanan, nisay bilay ko ed saray totoo na dala.” (Salmo 26:4, 5, 9) Diad loob na Kristianon kongregasyon, ugaw man odino maedad la so kaukolan a manlimita ed pililimog da ed saramay aliwan dedikado ed si Jehova. Pian naawat so panangabobon na Dios, panbanikelan tayo so pagmaliw ya andi-pakabalawan tan andi-mantsa manlapud mundo. (Salmo 26:1-5; Santiago 1:27; 4:4) Kanian, napaseguroan tayo a diad Armagedon, agtayo ipibali nen Jehova ya ompatey a kaiba iray agmaridios.
Arum so “Ag Balot Ompatey”
12, 13. (a) Sakbay na pamaoli ed si Lazaro, antoray salitan imbalikas nen Jesus ya agsigpot ya atalosan nen Marta? (b) Anto so aglabay ya ibaga nen Jesus nipaakar ed pigaran ‘aglan balot ompatey’?
12 Makapasagyat ya umamengen so kililiktar ed pangangga na sayan sistema na bengabengatla tan say posibilidad ya agbalot ompatey. Saya so ilalon iiter ed sikatayo nen Jesus. Sakbay a tuloy na pamaoli to’d pinablin kaaro ton si Lazaro, imbaga nen Jesus ed agi nen Lazaro a si Marta: “Siak so kiolian, tan say bilay. Say manisia ed siak, angan inatey la nabilay ni. Tan siopa man a manbilay tan manisia ed siak ag balot ompatey. Sisiaen mo ya?” Manisia si Marta ed kikioli, balet agto atalosan ya amin so imbaga nen Jesus.—Juan 11:25, 26.
13 Aglabay ya ibaga nen Jesus a saray matoor ya apostol to so mantultuloy a manbilay a silalaman tan aglan balot ompatey. Diad kasuniyan to, diad saginonor et impanengneng to a saray babangatan to so ompatey. (Juan 21:16-23) On, say inkalanaan da na masanton espiritu nen Pentecostes 33 K.P. et kabaliksan ton sikaray kaukolan ya ompatey ta pian awaten so mangatatawen a tawir da bilang arari tan sacerdote. (Apocalipsis 20:4, 6) Kanian, diad inlabas na panaon, amin ya inmunan-siglon Kristiano so inatey. Anggaman ontan, imbaga nen Jesus iman parad sakey a gagala. Saray salita to nipaakar ed panbilay ya aglan balot ompatey so nasumpal.
14, 15. (a) Panon a nasumpal iray salita nen Jesus nipaakar ed pigaran ‘aglan balot ompatey’? (b) Anto so kipapasen na sayan mundo, balet anto so ilalon wala’d saray matunong?
14 Manuna ed amin, agbalot naeksperiensia na matoor ya alanaan a Kristianos so andi-anggaan ya ipapatey. (Apocalipsis 20:6) Ontan met, tutukoyen na saray salita nen Jesus so sakey ya ispisipikon panaon sano say Dios so onsalet ed saray kurang na too tan punasen so karelmengan ed dalin, a singa ginawa to ed agew nen Noe. Saray matoor a naromogan a manggagawa ed linawa na Dios ed satan a panaon so ag-ompatey diad saray panangukom a kiwas na Dios. Imbes, singa si Noe tan say pamilya to, sikaray nawalaan na pankanawnawan makaliktar ed kaderal na mundo. Say ontan ya ilalo so putel, ta nibased bangabangat na Biblia tan niyilustra diad panamegley na saray alimbawa. (Ipareng so Hebreos 6:19; 2 Pedro 2:4-9.) Ipapanengneng na say kasumplan na propesiya na Biblia a diad magano lan tuloy et say kaplesan a mundo a tutugyopen na agmatunong a sosyedad na too so mangangga ed kadederal. Say kaplesan a situasyon so agla nauman, lapud say karelmengan na mundo so agla nipetek. Say imbaga na Dios nipaakar ed mundo ed agew nen Noe so tua met ed mundo natan. Pupuseken na karelmengan so kapusoan na baleg a karaklan na katooan, tan say kanonotan da so lawas mauges.—Genesis 6:5.
15 Aabuloyan nen Jehova so totoo ya uleyan so dalin ed loob na dakel a siglo ya anggapoy pibabali na Dios, balet say panaon da so ngalngali lan manampot. Agla mabayag et deralen nen Jehova so amin a marelmeng ed dalin, a singa ed ibabaga na Biblia. (Salmo 145:20; Uliran 2:21, 22) Alimbawa, agto ipideral iray matunong a kaibay marelmeng. Say Dios so agbalot manggagawa na ontan! (Ipareng so Genesis 18:22, 23, 26.) Akin a deralen toramay manbabanikel a manlingkor ed sikaton sitotoor, tekep na maridios a takot? Makatunongan labat a saray matoor a managdayew ed si Jehova a mabilay sano onggapoy baleg a kairapan so makaromog na panangabobon ed imaton to tan agnaderal, a singa ed si Noe tan say pamilya to et ag-aderal sanen sinmabi’d makadesyang ya anggaan so marelmeng a mundo ed agew to. (Genesis 7:23) Nawalaan ira na madibinon proteksyon tan makaliktar ed anggaan na sayan mundo.
16. Antoran makapakelaw a bengatla so nagawa ed balon mundo, a mankabaliksan na anto parad saray makaliktar?
16 Anto so nagawa ed satan? Diad balon mundo, saray makatambal a bendisyon so onagus ed katooan legan a say gungguna na dondon bagat nen Jesus so sigpot a niyaplika. Sasaglawien na Biblia so simbolikon “ilog na danum na bilay a manesiab a singa cristal, ya ompapaway ed trono na Dios tan say Cordero, dia ed pegley na lansangan to. Tan dia ed biek na saya ya ilog tan dia ed saman wala so kiew na bilay, ya wala so bunga to a labindua, a binulan so pangiter to na bunga to. Tan saray bulong to nipaakar onkana’ra a pakatambal ed saray naciones.” (Apocalipsis 22:1, 2) Makapakelaw ya ibaga, satan a “pakatambal” et lalaktipen to so katalo na mismon Adamikon patey! “Inakmon to so patey ed ando lan ando; et say [Soberanon] Katawan a Jehova punasen to naani so saray lua ya onagus ed saray amin a lupa.” (Isaias 25:8) Kanian, saray makaliktar ed baleg a kairapan a mamaarap ed balon mundo so agbalot nidunget ed patey!
Seguradon Ilalo
17. Panon inkaseguro so ilalo a say pigara et makaliktar ed Armagedon tan “ag balot ompatey”?
17 Kasin nawalaan tayo na sigpot a talek ed sayan makapakelkelaw ya ilalo? Maseguron tuloy! Impanengneng nen Jesus ed si Marta a walay panaon sano aglan balot ompatey so totoo. (Juan 11:26) Niarum ni, diad kapitulo 7 na Apocalipsis ya inter nen Jesus ed si Juan, niparungtal a walay baleg ya ulop ya ompaway ed baleg a kairapan, a naliktaran itan. Kasin sisiaen tayon si Jesu-Kristo tan say maawaran a salaysay ed Delap ed agew nen Noe? Agnasuppiat! Niarum ni, say Biblia so walaan na arum niran inkagawa sanen impreserba na Dios so ariripen ton mabilay ed saray panaon na panangukom tan inkagba na nasyones. Agta makatunongan lambengat ya ilaloan met a gawaen to itan ed sayan panaon na anggaan? Wala tay imposibli ed Manamalsa?—Ipareng so Mateo 19:26.
18. Panon a sikatayoy napaseguroan na bilay diad matunong a balon mundo nen Jehova?
18 Diad sitotoor a panlingkor ed si Jehova natan, makapanseguro itayo ed andi-anggaan a bilay ed balon mundo to. Parad agnabilang a minilyon, say bilay ed satan a balon mundo so onsabi diad panamegley na kioli. Ingen, diad agew tayo, minilyon a totoo nen Jehova—on, sakey a baleg ya ulop ya anggapoy toon makayarin mamilang odino mangetar—so nawalaan na nikadkaduman pribilihyo a makaliktar a mabilay diad baleg a kairapan. Tan sikaray aglan balot ompatey.
Ipangasin Isalaysay
◻ Panon a niyanino ed agew nen Noe so kililiktar ed Armagedon?
◻ Anto so nepeg tayon gawaen ta pian mansiansian akatalindeg sano onsabi Jesus a mangidapo na saray panangukom nen Jehova?
◻ Akin a nibaga tayon saray makaliktar ed Armagedon so “ag balot ompatey”?
[Litrato ed pahina 15]
Aliktaran na Kristianos so kairapan ed Jerusalem