LEKSION 54
Say Papel na “Matoor tan Makabat ya Aripen”
Si Jesus so Ulo na Kristianon kongregasyon. (Efeso 5:23) Diad panaon tayo, manlapud tawen et igigiya nen Jesus iray patumbok to diad dalin panamegley na “matoor tan makabat ya aripen.” (Basaen so Mateo 24:45.) Tinuron mismo nen Jesus itan ya “aripen” kanian walay autoridad to, pero siansian sikatoy aripen nen Kristo tan panlilingkoran to ray agagi nen Kristo. Siopa itan ya aripen? Panon to tayon aasikasoen?
1. Siopa so “matoor tan makabat ya aripen”?
Lanang ya manguusar si Jehova na sakey ya too odino melag ya grupo na lalaki pian igiya so totoo to. (Malaquias 2:7; Hebreo 1:1) Kayari impatey nen Jesus, saray apostol tan mamatatken ed Jerusalem la so angidaulo. (Gawa 15:2) Natan, pian natumbok itan, walay melag ya grupo na saray mamatatken—say Mananguley ya Ulop na Saray Tasi nen Jehova—ya mangiiter na espiritual a naakan tan mangigigiya ed panagpulong. Sayan grupo so “matoor tan makabat ya aripen a tinuro [nen Jesus].” (Mateo 24:45a) Amin ya membro na Mananguley ya Ulop et alanaan ya Kristiano. Tan nakaiba day Kristo ed tawen ya manuley ed Panarian, kayari ipatey da diad dalin.
2. Anton espiritual ya naakan so itatarya na matoor ya aripen?
Imbaga nen Jesus ya say matoor ya aripen et “mangitarya . . . na naakan [parad saray kapara ton Kristiano] diad dugan panaon.” (Mateo 24:45b) Singa say naakan ya mangiter na kasil na laman, say espiritual ya naakan—saray instruksion ya manlalapud Salita na Dios—so manpabiskeg ed sikatayo pian mansiansia tayon matoor ed si Jehova tan nagawaan tayo so kimey ya pagagawa nen Jesus. (1 Timoteo 4:6) Naaawat tayo so espiritual a naakan diad saray aral, asemblea, kombension, tan diad saray base ed Biblia ya literatura tan video. Ontulong iratan pian mas natalosan tayo so panlabayan na Dios tan onelet so pikakaaro tayo ed sikato.
DAKEL NI NAARALAN MO
Amtaen no akin ya kailangan tayo so “matoor tan makabat ya aripen”—say Mananguley ya Ulop.
Itatarya na Mananguley ya Ulop so espiritual ya naakan, panangigiya, tan praktikal ya tulong ed Saray Tasi nen Jehova diad interon mundo
3. Kailangan ya organisado iray totoo nen Jehova
Igigiya nen Jesus so Mananguley ya Ulop pian organisado so kimey na Saray Tasi nen Jehova. Ontan met so ginawa to ed saray Kristiano nensaman. I-play so VIDEO.
Basaen so 1 Corinto 14:33, 40, insan ebatan iya:
Panon ya ipapanengneng na sayan teksto ya labay nen Jehova ya organisado iray Tasi to?
4. Oorganisaen na matoor ya aripen so panagpulong ya kimey
Say panagpulong so sankaimportantian ya kimey na saray Kristiano nensaman. Basaen so Gawa 8:14, 25, insan ebatan iraya:
Diad saray Kristiano nensaman, siopay angiter na instruksion ed panagpulong ya kimey?
Antoy ginawa di Pedro tan Juan ed instruksion na saray kapara dan apostol?
Say panagpulong so sankaimportantian ya kimey ya oorganisaen na Mananguley ya Ulop. I-play so VIDEO.
Impaamta nen Jesus ya importantin maong so panagpulong. Basaen so Marcos 13:10, insan ebatan iraya:
Akin et importantin maong parad Mananguley ya Ulop so panagpulong?
Akin et kailangan tayo so “matoor tan makabat ya aripen” pian naorganisa iyan kimey ed interon mundo?
5. Mangiiter na panangigiya so matoor ya aripen
Igigiya na Mananguley ya Ulop iray Kristiano ed interon mundo. Panon dan amta no antoy iter dan instruksion? Nengnengen tayo so ginawa na mananguley ya ulop nensaman. Basaen so Gawa 15:1, 2, insan ebatan iraya:
Anton isyu so ag-apantatalosan na arum ya Kristiano nensaman?
Siopay nila di Pablo, Bernabe, tan arum ni pian nasolusyonan so isyu?
Basaen so Gawa 15:12-18, 23-29, insan ebatan iya:
Antis ya nandesisyon so mananguley ya ulop nensaman, anto ni ginawa da pian naamtaan so panlabayan na Dios?—Nengnengen so bersikulo 12, 15, tan 28.
Basaen so Gawa 15:30, 31 tan 16:4, 5, insan ebatan iraya:
Antoy reaksion na saray Kristiano nensaman ed instruksion na mananguley ya ulop?
Panon iran benendisyonan nen Jehova lapud inmunor ira?
Basaen so 2 Timoteo 3:16 tan Santiago 1:5, insan ebatan iya:
No mandedesisyon so Mananguley ya Ulop natan, iner ira manpapaigiya?
IBABAGA NA ARUM: “Manigsisia kad Mananguley ya Ulop, ta totoo ra labat.”
Antoy akakombinse ed sika ya igigiya nen Jesus so Mananguley ya Ulop?
SUMARYO
Say Mananguley ya Ulop so “matoor tan makabat ya aripen” ya tinuro nen Kristo. Satan ya aripen et mangiiter na panangigiya tan espiritual ya naakan ed saray Kristiano diad interon mundo.
Rebyu
Siopa so nampili ed “matoor tan makabat ya aripen”?
Panon itayon aasikasoen na Mananguley ya Ulop?
Manisia ka ya say Mananguley ya Ulop so “matoor tan makabat ya aripen”?
DISKOBRIEN
Amtaen no panon ya oorganisaen na Mananguley ya Ulop so kimey to.
“Anto so Mananguley ya Ulop na Saray Tasi nen Jehova?” (Artikulo ed website)
Amtaen no panon ya seseguradoen na Mananguley ya Ulop ya napantiwalaan tan susto iray naaawat tayon espiritual ya naakan.
Antoy pangipapasen na saray membro na Mananguley ya Ulop ed kimey ya inter nen Jesus ed sikara?
Akin et prueba iray aral tan kombension ya igigiya nen Jehova so Mananguley ya Ulop?