Pananumpal ed Kristianon Dedikasyon Diad Kawayangan

“No iner so kawalaan na espiritu na Katawan, diman so kawalaan na kawayangan.”​—2 CORINTO 3:17.

1. Siopay nandedikaan na Tastasi nen Jehova, tan akin a manguusar iray legal ya ahensya?

SISIAEN na Tastasi nen Jehova a say relihyon da so maando lawas. Tatalaranan da sirin so panserbi ed Dios “ed espiritu tan katuaan” ed andi-geter. (Juan 4:23, 24) Bilang wala lay amtan totoo, agnagiing ya angidedika irayan Kristiano ed si Jehova a Dios tan determinadon sumpalen itan. Diad satan a gagala, onsasaral ira ed Salitay Dios tan ed masanton espiritu to. Legan a sigpot-puson gegemtanen da so kurso ran Kristianon dedikasyon ed inter-Dios a kawayangan, ipapanengneng met na Tastasi so manepeg a respeto ed betang na saray gobierno bilang “saray atagtagey a pakauley” diad dugan panguusar ed saray legal iran paraan tan probisyon to. (Roma 13:1; Santiago 1:25) Singa bilang, uusaren na Tastasi so Watch Tower Society a pinagka-legal ya instrumento​—sakey ed dakel diad nanduruman daldalin​—a mamasarag ed sikaran manumpal ed pananulong da’d kaparan totoo, nagkalalo la diad espiritual a daladalan. Balet ta dedikado iray Tastasi ed Dios, aliwan ed dinanman a legal ya ahensya, tan say dedikasyon da’d si Jehova et maando lawas.

2. Akin a say Watch Tower Society tan mipadpara iran legal ya ahensya so aapresiaen a tuloy na Tastasi nen Jehova?

² Bilang ariripen a dedikado’d Dios, naobliga iray Tastasi nen Jehova a tumboken iray instruksion nen Jesus a ‘manggawa na saray babangatan ed amin a nasyones, a binyagan ira ed ngaray Ama, tan say Anak, tan say espiritu santo, ya ibangat ira.’ (Mateo 28:19, 20) Mantultuloy iyan kimey anggad anggaan na sistema na bengabengatla, ta inkuan met nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi anggaan.” (Mateo 24:3, 14) Kada taon et saray panag-imprintaan na Watch Tower Society tan mipadpara iran legal a korporasyon to so manusuplay na minilyon a Biblia, libro, brosyur, tan magasin ed Tastasi nen Jehova pian usaren da’d sankamundoan a panagpulong da. Sarayan legal a korporasyon so makanakana’d dedikadon ariripen na Dios ed pakasumpal da’d dedikasyon da’d sikato.

3. Diad anton pantalos a saray Tastasi nen Jehova et datin angusar ed terminon “say Sosyedad”?

³ Nayarin walay manuppiat a say paraan a panasaglawi na Tastasi nipaakar ed Watch Tower Society​—odino mas mabetbet et “say Sosyedad” labat​—so mangipapatnag a momoriaen da itan a mas ni nen say sakey a legal ya instrumento. Agta nipapasen da itan a pinal ya autoridad ed saray pamaakaran nipaakar ed panagdayew? Ipapalinew na libron Jehovah’s Witnesses​—Proclaimers of God’s Kingdom iyan punto diad impangisalaysay: “Sanen tinukoy na The Watchtower [Hunyo 1, 1938] so ‘Say Sosyedad,’ kabaliksan na saya, ya aliwan basta legal ya instrumento, noagta sakey ya ulop na alanaan a Kristianos ya amorma ed satan a legal a korporasyon tan usaren itan.a Say balikas sirin so mangilalaman ed “matoor tan makabat ya aripen.” (Mateo 24:45) Diad onian pantalos a saray Tastasi so inkalapagan a manguusar ed terminon “say Sosyedad.” Siempre, say legal a korporasyon tan “say matoor tan makabat ya aripen” so agnapansalatan a termino. Saray direktor na Watch Tower Society so imbotos, bangta saray Tastasin manibukel ed ‘matoor ya aripen’ so nilanaan na masanton espiritu nen Jehova.

4. (a) Panon so pangibabalikas na dakel a Tastasi ed inkasikara ta pian napaliisan so agpantatalosan? (b) Akin a magmaliw tayon balansi no nipaakar ed terminolohya?

⁴ Ta pian napaliisay agpantatalosan, panggugunaetan na Tastasi nen Jehova ya alwaran no panon dan ibalikas so inkasikara. Imbes ya ibaga ran, “ibabangat na Sosyedad,” mas labay ya usaren na dakel a Tastasi so oniaran balikas a singa say, “kuan na Biblia” odino, “natalosan kon ibabangat na Biblia.” Diad onian paraan et nidadanet day personal ya impandesisyon na kada Tasi diad impangawat ed saray bangat na Biblia tan agda met nipatnag a saray Tastasi et nisisilong ed panangidikta na sakey a relihyoson sekta. Siempre, saray suhestion nipaakar ed terminolohya so agbalot teman pansangsangan. Tutal, say terminolohya so importanti lambengat diad punton amperen na satan so agpantatalosan. Kakaukolanen so inkabalansi na Kristiano. Isisimbawa na Biblia ed sikatayo ya ‘agmansusuppiatan ed saray salita.’ (2 Timoteo 2:14, 15) Onia met so ibabaga na Kasulatan a prinsipyo: “No dia ed dila agyo bitlaen so saray salitan mainomay a talosan, panon so pakaamta na sasalitaen?”​—1 Corinto 14:9.

Babawasay Espiritu na Dios so Pankaukolan Parad Totontonen

5. Panon so nepeg a pantalos ed 1 Corinto 10:23?

⁵ “Ami bengatla niabuloy, bangbalet aliwan amin et manepeg,” so imbaga nen apostol Pablo. Inyarum to: “Ami bengatla niabuloy; bangbalet ta aliwa ya amin da mamabiskeg.” (1 Corinto 10:23) Mapatnag ya aglabay ya ibaga nen Pablo a say panggawa na bengabengatlan mabitabitar a kokondenaen na Salitay Dios et manepeg. No ipareng ed manga 600 ganggan a niiter ed kadaanan ya Israel, dagdaiset labat iray mabitar a ganggan a mangontrol ed panagbilay na Kristiano. Kanian, dakel a pamaakaran so nisilong la’d konsiensia na kada indibidual. Panggayagaan na toon nandedika la’d si Jehova so kawayangan a resultay pangiwawanwan na espirituy Dios. Walan kinayarian to lay katuaan, manpapasakop so sakey a Kristiano ed nipasal ed Biblian konsiensia to tan onsasaral ed panangiwanwan na Dios diad panamegley na masanton espiritu. Ontutulong iya ed dedikadon Kristiano a determinaen no antoy “mamabiskeg” tan “manepeg” parad sikato tan ed arum. Amta ton saray desisyon to et mangapekta’d personal a relasyon to ed Dios, a nandedikaan to.

6. Diad saray Kristianon miting, panon tayon nidemostra a kinayarian tayo lay katuaan?

⁶ Nidedemostra na sakey a Tasi a kinayarian to la so katuaan diad pankomento to’d saray Kristianon miting. Diad unona, nayarin onebat unong ed inkabalikas na aaralen a palapagan. Balet, onsabi panaon, sikatoy onaligwas anggad punton nibalikas to laray bangat na Biblia ed dilin salita to. Diad ontan et nipapatnag ton sikatoy maaligwas ed abilidad ton mannonot, agbasta manguulit ed imbaga la na arum. Say panibukel na kanonotan to’d saray dilin salita tan panangibalikas na duga iran salitay katuaan ed impapuson paraan so mamaligsa ed sikato tan pakapatnagan a sikatoy kombinsido’d mismon nononoten to.​—Eclesiastes 12:10; ikompara so Roma 14:5b.

7. Antoran desisyon so mabulbulos a ginawa na ariripen nen Jehova?

⁷ Napapakiwas iray Tastasi nen Jehova lapud panangaro ed Dios tan ed kapara ran totoo. (Mateo 22:36-40) Tua, a napapaapit ira diad bedber na singa-Kriston aro bilang sankamundoan ya asosasyon na agagi. (Colosas 3:14; 1 Pedro 5:9) Balet, bilang wala lay amtan totoo, kada sakey so personal a nandeside la ya iyabawag so maong a balita na Panariay Dios, a mansiansian neutral ed politika, ya arawiay dala, a paliisay pigaran nengneng na panagligliwaan, tan manbilay unong ed saray estandarte na Biblia. Ag-iraya impilit ed sikaran desisyon. Desisyon iratan a kabiangay kabibilay a boluntaryon pinili na potensyal a Tastasi sakbay ya inala ray kurang na Kristianon dedikasyon.

Walay Eebatan ed Mananguley ya Ulop?

8. Anton tepet so nakakaukolan a nipalinew?

⁸ Malinlinew ya ipapanengneng na Biblia a saray tuan Kristiano so agmanlilingkor ed Dios lapud apasootan. Kuanto: “Say Katawan sikato so Espiritu, tan no iner so kawalaan na espiritu na Katawan, diman so kawalaan na kawayangan.” (2 Corinto 3:17) Balet panon a nitunos iyan katuaan ed ideyan “matoor tan makabat ya aripen” a walaay Mananguley ya Ulop to?​—Mateo 24:45-47.

9, 10. (a) Panon a say prinsipyo na inkaulo et niyaplika ed Kristianon kongregasyon? (b) Anto so iyiimpuersa na prinsipyo na inkaulo ed inmunan-siglon Kristianon kongregasyon?

⁹ Pian naebatan iyan tepet, nepeg tayon ipaslep so Makasulatan a prinsipyo nipaakar ed inkaulo. (1 Corinto 11:3) Diad Efeso 5:21-24, si Kristo so nipakabat bilang “ulo na iglesia,” samay ‘panpauleyan.’ Natatalosan na Tastasi nen Jehova a say matoor tan makabat ya aripen et titibukelen na espiritual ya agagi nen Jesus. (Hebreos 2:10-13) Sayan matoor ya aripen a klase so tinuron mangitarya ed totoo na Dios na espiritual a “tagano ed panaon a kinepegto.” Diad sayan panaoy anggaan, tinuro la nen Kristo iyan aripen parad “amin a wala ed sikato.” Say posisyon to sirin so makanepegan na respeto na siopaman a mangibabagan sikatoy sakey a Kristiano.

¹⁰ Say gagala na inkaulo et pian napansiansiay pankakasakey tan paneguro a “nagawa komon so sarayan amin ed kasimpitan tan mauksoy.” (1 Corinto 14:40) Pian nadampot iya ed inmunan siglo, pigaran alanaan a Kristianos a kabiangay matoor tan makabat ya aripen a klase so apilin mangilaman ed intiron grupo. Singa pinaneknekay tinmumbok ya agawgawa, say panangasikason inagamil na sayan inmunan-siglon mananguley ya ulop so inabobonan tan benendisionan nen Jehova. Sigagayagan inawat na inmunan-siglon Kristianos iyan areglo. On, sikaran mismo so angabrasa tan akisalamatan daray maabig a resultan papawalaen to.​—Gawa 15:1-32.

11. Panon so nepeg a panmoria ed peles a Mananguley ya Ulop?

¹¹ Say kablian na ontan ya areglo so siansia nin wala. Diad peles, say Mananguley ya Ulop na Tastasi nen Jehova et tugyopen na samploran alanaan a Kristianos, amin et sinamploy taon lay eksperiensia ra bilang Kristiano. Mangitatarya ira na espiritual a direksion ed Tastasi nen Jehova ed intiron mundo, a singa ed inmunan-siglo a mananguley ya ulop. (Gawa 16:4) Singa saray inmunan Kristiano, maliket iray Tastasi nen Jehova a manilalo’d matatken lan kabiangay Mananguley ya Ulop parad nibase’d Biblian panangidirehi tan giya nipaakar ed panagdayew. Anggaman saray membroy Mananguley ya Ulop et ariripen nen Jehova tan Kristo, a singa met ed kapara ran Kristianos, oniay ibibilin na Biblia ed sikatayo: “Ontulo’kayo ed saray wala a manuley ed sikayo, tan pauleyan kayo ed sikara, ta manbabantay ira lapu ed saray kamarerwa yo, a singa sikara so mangiter naani pipalinewan; pian sikato ya so gawaen da a sigagayaga, tan aliwa a sieermen, ta saya agmakapaabig ed sikayo.”​—Hebreos 13:17.

12. Siopa so nepeg a pikuentaanan na kada indibidual a Kristiano?

¹² Kasin say posisyon a panangasikason ipapabtang na Kasulatan ed Mananguley ya Ulop et kabaliksan ton balang sakey ed Tastasi nen Jehova so nepeg a mikuentaan ed satan nisengeg ed saray kimey to? Aliwan unong ed saray salita nen Pablo ed Kristianos ed Roma: “Akin et pabpabandayen mo so agim? Ta amin tayo ompatnag itayo ed arap na panangukoman na Dios . . . sakey tan sakey ed sikatayo mangiusausa naani nipaakar ed inkasikaton dili ed arap na Dios.”​—Roma 14:10-12.

13. Akin ya irereport na Tastasi nen Jehova so panagpulong a kimey da?

¹³ Balet, agta tua a kada indibidual a Tastasi et nailaloan a mangireport na panagpulong a kimey da? On, balet say gagala na saya et malinlinew a nisalaysay ed manwal nipaakar ed Tasi, a mangibabagan: “Saray akaunan patumbok nen Jesu-Kristo so nan-interes ed saray report na iyaaligwas ed panagpulong da. (Marcos 6:30) Diad ibubulaslas na kimey, natutugyop iray report na istadistika pati iray salaysay na matalonggaring ya eksperiensia na saramay akibiang ed panangipulong na maong a balita. . . . (Gawa 2:5-11, 41, 47; 6:7; 1:15; 4:4) . . . Agaylan makapaseseg itan parad saramay matoor a Kristianon komikimey a makadngel na report no antoy nagagawaan! . . . Diad mipadparan paraan, pambabanikelan na modernon-agew ya organisasyon nen Jehova so pangisimpen na piho iran rekord ed kimey a nagagawa bilang kasumpalan na Mateo 24:14.”

14, 15. (a) Panon ya onaplika so 2 Corinto 1:24 ed Mananguley ya Ulop? (b) Anto so nepeg a pangibasiyan na indibidual a Kristianos ed personal iran desisyon da, diad panamidbir na anto?

¹⁴ Say Mananguley ya Ulop so maaron probisyon tan sakey ya alimbawa na pananisian manepeg ya aligen. (Filipos 3:17; Hebreos 13:7) Diad itatalineng tan panutumbok da ed Kristo a pinagka-uliran, naiyaniweng daray salita nen Pablo: “Aliwan say uleyan mi pananisia yo, noag ingen mananulong kami ed liket yo, ta lapu ed pananisia sialagey kayo.” (2 Corinto 1:24) Diad pakakaimaton ed saray tendensia, ipapaimano na Mananguley ya Ulop iray gungguna ed italineng ed konseho na Biblia, mangiyoopresi na saray suhestion ed panangiyaplika’d saray ganggan tan prinsipyo na Biblia, mangipapasakbay ed saray niamot a kaatapan, tan mangiiter ed “saray kakimeyan” na nakakaukolan a panamaseseg. Diad ontan et nasusumpal toy Kristianon inkamayordomo to, a tutulongan toran namantini ray gayaga ra, tan napapabiskeg ira ed pananisia ta pian makatalindeg iran malet.​—1 Corinto 4:1, 2; Tito 1:7-9.

¹⁵ No say sakey a Tasi et mandesisyon a nibase’d konseho na Biblia ya iyoopresi na Mananguley ya Ulop, gagawaen to itan ed dilin bunek to lapud sikatoy nakokombinse na mismon panaaral to na Biblia a saya so maptek a kurang. Iimpluensiaan na mismon Salitay Dios so balang Tasi a mangiyaplikay suston Makasulatan a konsehon iyoopresi na Mananguley ya Ulop, diad sigpot a pamidbir a saray desisyon a gagawaen to et mangapekta ed personal a relasyon to ed Dios, ya angidedikaan to.​—1 Tesalonica 2:13.

Estudyantes tan Sundalos

16. Anggaman saray desisyon nipaakar ed kondukta so personal a pamaakaran, akin a saray arum so nadidispelosip?

¹⁶ Balet no saray desisyon nipaakar ed kondukta et personal a pamaakaran, akin a walaray Tastasi nen Jehova a nadidispelosip. Anggapo so mapeget a makadetermina a say pangagamil na sakey a kasalanan et kakaukolanen toy panispelosip. Imbes, sayan kiwas so Makasulatan a kakaukolanen lambengat sano walay membro ed kongregasyon ya agmagbabawin managgawa na saray graben kasalanan, a singa saramay nidatak ed koma-5 a kapitulo na Unonan Corinto. Kanian, bangta say sakey a Kristiano so nadispelosip lapud pangaagamil na pilalawanan, nagawa lambengat iya no say indibidual et agto awatey espiritual a pananulong na saray maaron pastol. Agbukbukor na Tastasi nen Jehova so ontutumbok ed sayan Kristianon agamil. Oniay kuan na The Encyclopedia of Religion: “Aakoen na dinanman a komunidad so kanepegan ton protektaay inkasikato sumpad agmikokompormi iran membron manigensigen ed inkalapagan a pankaabigan. Diad sakey a relihyoson alasir sayan kanepegan so mabetbet a pabibiskegen diad panisian say panumpa [na ekskomunikasyon] et mangapekta’d talindeg na sakey ed imaton na Dios.”

17, 18. Panon a niyilustra so inkamatukoy na panagdispelosip?

¹⁷ Saray Tastasi nen Jehova et estudyantes na Biblia. (Josue 1:8; Salmo 1:2; Gawa 17:11) Say programa na edukasyon ed Biblia ya itatarya na Mananguley ya Ulop so nikompara ed sakey a kurikulum na eskuelaan ya indatak na sakey a board of education. Anggaman aliwan say board a mismo so panlalapuan na materyal a nibabangat, ileletneg toy kurikulum, dedeterminaen toy metodo na panagbangat, tan ipapaakseb toray kapilitan a direktiba. No wala so siopaman a butarbutar ya agmakasumpal ed saray kakaukolanen na eskuelaan, mamroblema ed saray ka-eskuela, odino pansengegay kabalawan na eskuelaan, sikatoy napatakyas. Walaay kanepegan iray autoridad ed eskuelaan ya onkiwas parad pankaabiganan na saray estudyante bilang intiraminti.

¹⁸ Nilikud ed pagmamaliw ya estudyantes, sundalos nen Jesu-Kristo iray Tastasi nen Jehova, ya abilin a ‘mibakal ed maabig a pibabakal na pananisia.’ (1 Timoteo 6:12; 2 Timoteo 2:3) Natural, say tuloytuloy a konduktan agmakanepegan ed sakey a Kristianon sundalo so nayarin pansengegay agpanangabobon na Dios. No panon a say sakey et naikdan na kawayangan a manpili, say sakey a Kristianon sundalo so makapandeside na labay to, balet ta nepeg ton sakbaten iray epekto na desisyon to. Oniay ikakatunongan nen Pablo: “Anggapo so manlingkor a sundalo a manpaligutgut ed saray pananapan na sayan bilay, pian nayarian to a paliketen so angilista ed sikato a sundalo. Ontan met sakey a too mibakal dia ed panpapalaboan, agnabalangetan, noag akibakal ed matunong [pananontonan, NW].” (2 Timoteo 2:4, 5) Saray matatken lan Kristiano, pati saramay kabiangay Mananguley ya Ulop, so sigpot a pasakop ed Lider da, si Jesu-Kristo, diad panumbok ed ‘saray pananontonan’ ta pian napanaloan day premyon andi-anggaan a bilay.​—Juan 17:3; Apocalipsis 2:10.

19. Walan nausisa iray katuaan nipaakar ed Kristianon dedikasyon, antoy naseguro tayo?

¹⁹ Agta ipapalinew na saray katuaan a saray Tastasi nen Jehova et ariripen na Dios, aliwan ariripen na totoo? Bilang dedikadon Kristianos a panggagayagaay kawayangan ya angibulosan ed sikara nen Kristo, aabuloyan day espiritu na Dios tan say Salita to a manguley ed bilay da legan na panlilingkor dan nankakasakey a kaibay agagi ra ed kongregasyon na Dios. (Salmo 133:1) Saray ebidensia na saya so kaukolan a mamural met ed antokaman a panduaruwa nipaakar ed lapuan na biskeg da. Kaibay salmista, naikanta ra: “Si Jehova sikato so biskeg ko tan kinlong ko; say pusok nanmatalek ed sikato, et atulongan ak; kanian say pusok manggayaga a tuloy; tan say kantak pangidayew ko la ed sikato.”​—Salmo 28:7.

[Paimanod ed Leksab]

Panon Yon Ebatan?

◻ Panon a natutulongan na Watch Tower Society tan saray mipadparan legal ya ahensya iray Tastasi nen Jehova?

◻ Panon a nagugunggunaan iray Kristiano manlapud betang na Mananguley ya Ulop na Tastasi nen Jehova?

◻ Akin ya irereport na totoo nen Jehova so panagpulong a kimey da?

◻ Diad silong na antoran sirkumstansia a say panagdispelosip ed sakey a dedikadon Kristiano et matukoy?

[Litrato ed pahina 19]

Say inmunan-siglon mananguley ya ulop so angipreserba’d pankakasakey na doktrina

[Litrato ed pahina 23]

Diad sankamundoan et panggagayagaan na Tastasi nen Jehova so kawayangan ya angibulosan ed sikara nen Kristo