Say Makapakelaw a Kalaknab na Kaabigan na Dios

SAY Dios so maong! Panon karakel lan nadngel mo so ontan a balikas odino anggan impangusar mon mismo? Balet kasin minorekdek mo la so sigpot a kalaknab na kaabigan na Dios ed sika? Say ontan a panagdalepdep so mamaaralem na apresasyon tayo ed nengneng na Dios a dadayewen tayo.

Ununa, anggaman kuan, nakaukolan tayon talosan no anto so kaabigan. Say kaabigan, siempre, so kalidad na kipapasen a maong a sumpa ed kipapasen a marelmeng. Balet say kaabigan so nagkalalo nen say satan. Sikato so sakey ya aktibon kalidad. Say sakey a toon maong so manggawa na maong. Tan say Dios, diad kaabigan to, so manggagawa na dakerakel iran maong a bengatla a para ed sikatayo pian saray puso tayo so maligsa ed sikato.

Say malaknab a sukat na kaabigan na Dios so nanengneng ed saray salita to ed si Moises diad kalawakan na Sinai. Diman, insipan to ed matoor ya aripen to: “Siak a mismo so mangipanengneng ed amin a kaabigan ko ed arapan mo.” Sinumpal to iman a sipan tan inusar to so dilin ngaran to, intuloy ni na Dios ya imbaga: “Jehova, Jehova, sakey a Dios a maabagey tan mapangasi, matantan ya onsanok tan daakan ed maaron-panangasi tan katuaan, a mangigana na maaron-panangasi ed saray nilibulibo, a mamerdona ed inkauges tan impakalukso tan kasalanan, balet sikato so agbalot mangilikud a manlapud pananusa.”​—Exodo 33:19; 34:6, 7.

Sirin, say kaabigan na Dios so mangisasakup ed panangabagey to tan ontan met ed panangasi to, maaron-panangasi to, tan say katuaan. Niarum, say kaabigan to so nanengneng unong a sikato so “matantan ya onsanok,” manangitepel. Agkabaliksan na satan, anggaman kuan, a sikato so singa sakey a maluklukak ya ateng, ya abuloyan to so kasalanan a mantultuloy ya agnasita ed ando lan ando. “Sikato so agbalot mangilikud a manlapud pananusa” ed saray agmanagbabawin managkasalanan. Say maong a Dios so agmangiyabuloy ed karelmengan ya onwalan agnasita.

Say Inkadaakan na Kaabigan na Dios

Imanoen, natan, so arum ed saray dalan ya angipanengnengan na Dios ed kaabigan to. Diad pangigapo, sikato so maong ed saray totoo sanen inmunan pinalsa to so dalin. Sikato so aglambengatla angitarya na saray basta nakakaukolan ed atooan a bilay. Imbes, sikato so siyayaman ya angiter ed planeta tayo pian say pambilay ed satan so sakey a tuan liket. Inter to so tagano tan inumen ed baleg a panduruma. Sikato so nanggawa na makapasagyat iran nanduruman ayayep tan kamanokan, tan pinalsa toray karosasan a mangarum na kolor tan kalimgasan ed saray kaliberliber tayo. Niarum ni, sikato so nanggawa na dakerakel a nanduruman nengneng na senerya a makapasagyat a nengnengen. Akin, kada nanengneng tayo so maglorian iseselek-na-agew odino sankarakpan a kapoporma na lurem, nanengneng tayo so ebidensya na kaabigan na Dios!

Sanen pinalsa to so laki tan bii, say kaabigan na Dios so anengneng lamet. Inikdan to si Adan tan Eva na ayadyari, mabunigas a laman tan impasen to ra ed hardin na Eden. Insan sikara so inikdan to na makapasagyat tan makapaangat a kimey: “Panoen so dalin tan patuloken.” Sirin, impasen to ed arap da so ilalo ed panggayaga ed bilay diad ando lan ando ed sakey a paraison dalin ed limog na saray dakerakel a kapolian da. (Genesis 1:26-28; 2:7-9) Agaylan makapakelkelaw a regalo ed kasal a para ed inmunan paris a too!

Anggan sanen si Adan tan Eva so nanrebelde, sikara so agsigpot a kinaindanan na Dios. Diad saman a punto, no sikara so dinusa to ed tampol a patey, ginawa to lambengat so maptek. Anggaman kuan, sikato so maong ed makasalanan la natan a toon paris. Sikara so inabuloyan ton manbilay a magano tan nawalaan na saray anak.​—Genesis 5:1-5.

Nagkalalo ni, say kaabigan na Dios so nantultuloy ed naplag a katooan nanlapulad saman. A singa imbaga nen Arin David: “Si Jehova so maong ed amin, tan saray panangasi to so wala ed amin na saray kimey to.” (Salmo 145:9) Sikato so mangitarya na daakan ta pian say atooan a bilay so mantultuloy ed kayarian to, say dalin. Imbaga nen Jesus ed saray Judios ed agew to: “Say Ama yo a wala ed katawenan . . . so mamasinag ed agew to ed saray marelmeng a totoo tan maong tan pauranen to ed saray matunong a totoo tan agmatunong.” (Mateo 5:45) Anggan anton eras odino kasibletan ya onlesa so aliwan lapud say Dios so sinmaew a mangitarya ed katooan. Sikato so lapud say inkabulok, inkaruksa, tan agpakayari na totoo.

Inabuloyan met na Dios so katooan a mangusar ed saray kayamanan na dalin tan agto inyamot ed sikara so sakey a sukat na pakatalos ed saray mabitewen a katawenan tan say pisikal ya inkatibukel na saray bengatla. Peteg, si Jehova so maong ed katooan, anggaman dakel so sipapangtan mangikuan ya anggapo so Dios, tan saray arum so mangaabuso ed kaabigan to nisesengeg ed kasibletan, anggan diad kalaknab na pamapairap ed kaparan totoo.​—Salmo 14:1.

Kaabigan na Dios ed Saray Mananisia

No, anggaman kuan, say Dios so maong ed katooan ed inkalapagan, saray pidedeneng to ed saray mananisia so peteg a mamaligsa na puso. Diad pangigapo, sanen si Adan tan Eva so inmunan nanrebelde, impropesiya na Dios a sakey a “bini” so onletaw a diad kaunoran et ekalen toray mauges ya epekto na kasalanan da. (Genesis 3:15) Diad inlabas na panaon, dakel ya ilalak nen Adan so nandayew ed Dios a sitotoor anggaman ed agda inkayadyari, tan sayan asakbay a propesiya so angiter ed sikara na ilalo ed magmaong ya arapen. Sakey ed sarayan matoor a managdayew, si Abraham, so tinawag ni na “kaaro nen Jehova.”​—Santiago 2:23.

Insipan na Dios ed si Abraham a saray kapolian to so ombaleg ed dakerakel a nasyones tan say manunan linya na ilalak to so manawir na dalin na Canaan. Diad kasumpalan na saya, saray Israelitas, kapolian nen Abraham, so diad saginonor et naorganisa ed sakey a nasyon. (Genesis 17:3-8; Exodo 19:6) Lamet, say Dios so maong ed sayan balon nasyon, a sikara so inliktar to a manlapud inkaaripen ed Ehipto, a sinalimbengan to ra ed kalawakan, ya inikdan to ra na sakey a kodego na ganggan tan inkasaserdote, tan diad kaunoran et sikara so inikdan to na mabungan dalin na Canaan a bilang tawir.

Saginonor, say Israel so nagmaliw a sakey a panarian, tan ingganggan nen Jehova so komatlon toon ari to, si Solomon, a mangipaalagey na sakey a templo ed Jerusalem bilang sakey a sentro ed mundo na panagdayew ed Sikato. Sanen say templo so asumpal, wala so sankarakpan a seremonya na dedikasyon tan magayagan piesta. Kayari to, ibabaga na kuritan, saray Israelitas so “ginmapon mamendito ed ari tan anempet ed saray kaabungan da, malikeliket tan maligligsa ed puso ed amin a kaabigan a ginawa nen Jehova.” (1 Arari 8:66) Wala niray arum ya inkagawa met sanen saray kapusoan na saray Israelitas so linmippua nisesengeg ed kaabigan na Dios ed sikara.

Makapaermen, anggaman kuan, sikara so agnaynay ya angapresya ed pribilehyo ran managdayew ed sakey a tuan Dios. Saginonor, saray Israelitas bilang sakey a nasyon so nagmaliw a malamang, tan nen 607 K.K.P., sikara so inabuloyan nen Jehova a nadakep ed Babilonia. A singa imbaga na Dios ed si Moises, lapud kaabigan To, et “sikato so agbalot mangilikud a manlapud pananusa.”​—Exodo 34:7.

Anggaman kuan, kayari na 70 taon et say Dios so sipapangasin angitarok ed matoor a nakdaan na saray Israelitas ya ompawil ed dilin dalin da. Anto so amakiwas ed sikato diad panggawa na ontan? Say kaabigan to. Insulat nen Jeremias a mapropetiko so impawil na saray Israelitas a nanlapud Babilonia: “Sikara a peteg so onsabi tan onkelyaw a magaygayaga diad katagyan na Sion tan magmaliw a masnag ed kaabigan nen Jehova.” Intuloy na propeta: “‘Diad kaabigan ko et say dilin katooan ko so napenek,’ so kuan nen Jehova.”​—Jeremias 31:12, 14.

Saginonor, si Jesus so linma ed dalin tan apaneknekan a “bini” a nipasakbay ed satan a propesiyan nibalikas ed Eden. (Genesis 3:15) Ibabaga na Biblia: “Ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so agkomon naderal noagta nawalaan na andi-anggaan a bilay.” (Juan 3:16) Say impatey nen Jesus so angitarya na dondon a panaliw ed saray totoo a manlapud kasalanan tan sikara so ipawil ed inkayadyari. Sirin, Saray mauges ya epekto na kasalanan nen Adan so diad kaunoran et natalonaan. A singa insulat nen Pablo ed saray taga Roma: “Diad panamegley na katutunganga na sakey a too et dakel so agawan makasalanan, ontan met a diad panamegley na katutulok na sakey a too et dakel so agawan matunong.” (Roma 5:19) Salamat ed kaabigan na Dios, a saray maptek-impampuson totoo natan so awalaan na ilalo ed pakagamor na andi-anggaan a bilay. Sikara ni ingen so nayarin magmaliw a kakaaro na Dios, a singa si Abraham.

Intultuloy na Dios ya impanengneng so kaabigan anggan natan ed saraman so mandadayew ed sikato. Sikato so mangiter na simbawa ed panamegley na Biblia pian sikara so tulongan ton mangarap ed saray problema ra. (Salmo 119:105) Iyoopresi to so libren langkap na espiritu to ya ontulong ed sikara a nisukat ed saray matunong ya estandarte to. Tan iparungtal toray gagala to, ta pian saray tuan Kristianos so makapanilalo ed arapen diad sakey a balon mundo na inkatunong ya onsalat diad kayari kapaso na sayan daan a mundo. (Uliran 4:18; 2 Pedro 3:13) Saray Kristianos so matalek nipaakar ed saratan a bengatla lapud say Dios, diad kaabigan to, et saratan so imparungtal to ed agnalingon Salita to.​—2 Timoteo 3:16.

On, say panalaysay ed kaabigan na Dios so seguradon mamaligsa na kapusoan tayo ed sikato. Balet mamalesa met na sakey a tepet:

Panon Kalaem So Pangunggunam Manlapud Kaabigan na Dios?

Diad tua, anggano siopa ka, sika la so nagugunggunaan a manlapud kaabigan na Dios. Sika so manlilinawa, sika so mamangan, sika so oniinum, sika so manggagayaga ed bilay​—amin na saratan so langkap a nanlapud Dios. Balet kasin sika so nagugunggunaan a nagnap? Nonoten, a say kaabigan na Dios ed si Adan tan Eva so alimitaan ed kayari na impankasalanan da. Miulibay, limitaan to so langkap to ed sikatayo likud no sikatayo so onkiwas ed suston dalan diad saray panangasi to. Panon so panggawa tayo ed saya?

Impikasi na salmista: “Ibangat moak na kaabigan, katudioan tan pikakabat, lapud diad saray ganggan mo et siak so angagamil na pananisia.” (Salmo 119:66) Nepeg ya ontan met so pikakasi tayo. Unong a say Dios so maong, nakaukolan tayon aralen so pagmaliw a maong a singa sikato. Impaseseg nen Pablo: “Magmaliw ya umaalig ed Dios, a bilang inararon ananak.”​—Efeso 5:1.

Saya so gawaen tayo, ununa diad panaral ed Biblia pian aralen no anto so kaabigan. Insan, kerewen tayo so tulong na Dios diad pamayubo ed sayan kalidad. Say kaabigan so sakey a bunga na espiritu, a dingan na “aro, gayaga, kareenan, panangitepel, panangasi, . . . pananisia, kaumildian, [tan] dangka.” (Galacia 5:22, 23) Nayarian tayon bayuboan irayan amin a kalidad diad panmatalek ed espiritu na Dios, ya aralen so Biblia ya impuyan na Dios, a manpikasi ed sikato ed ikerew na tulong, tan milimog ed saray kaparehon-kaisipan a Kristianos.​—Salmo 1:1-3; 1 Tesalonica 5:17; Hebreos 10:24, 25.

Ibabaga met na Biblia: “Iyabawag dan mapalalo so panalambit ed inkadaakan na kaabigan mo, tan lapud inkatunong mo et sikara so onkelyaw a magaygayaga.” (Salmo 145:7) On, sikatayo so ilaloan na Dios a mangibaga ed arum na nipaakar ed kaabigan to. Nepeg tayon tongtongen a sibubulos so nipaakar ed mangatatawen ya Ama tayo.

Kaunoran, nepeg ya agtayo leglemewen so kaabigan na Dios. Tua, si Jehova so mamerdona ed saray makasalanan. Si Arin David so matalek ed maapabor ya ebat sanen impikasi to: “Saray kasalanan na inkatobonbalok tan saray insumlang ko O agmo ra nonoten. Unong ed maaron-panangasim a sika a mismo so mannonot ed siak, nisesengeg ed kaabigan mo, O Jehova.” (Salmo 25:7) Kasin labay ya ibaga na satan ya abuloyan tayo so inkasikatayon manggawa na saray kasalanan diad talek ya iilaloan tayo so panamerdona na Dios? Andin balot. Nonoten, say kaabigan na Dios et kabaliksan to a “sikato so agbalot mangilikud a manlapud pananusa” ed saray agmanagbabawin managkasalanan.

Panggayagaan So Kaabigan na Dios

Maminsan a naeksperiensia tayon sigpot so kaabigan na Dios, agaylan saray kapusoan tayo so maligsa ed sikato! Sikatayo so apaseseg a manumbok ed maabig a simbawa nen apostol Pablo: “Mantultuloy a manakar a bilang ananak na liwawa, lapud say bunga na liwawa so manugyop ed amin a nengneng na kaabigan tan inkatunong tan katuaan.”​—Efeso 5:8, 9.

Inagew-agew, sikatayo so sinononot ed maaron panagpaga na Dios ed sikatayo. Anggan diad leksab na sankairapan iran sirkumstansya, kabat tayo ya agto kaindanan iraman so mangaaro ed sikato. On, eksperiensiaen tayo so kareenan na nonot na salmista: “Peteg a say kaabigan tan say maaron-panangasin mismo so manumbok ed sika ed amin ya agew na bilay ko; tan siak so manayam ed abung nen Jehova ed dukey na saray agew.”​—Salmo 23:6.