Say Inkianak nen Jesus—No Panon a Mangitatarok na Kareenan
ALIWA labat a samay niyabawag a ‘kareenan ed saray totoo’ so propesiyan nisiglaot ed inkianak nen Jesus. Nilikud ed samay inyanunsio na saray anghel ed nikelkelawan iran pomapastol, angiyabawag met iray mangatatawen a mensahero na impuyan na Dios iran deklarasyon nipaakar ed Jesus a kapangiyanak ed sanasawan Maria tan Jose. Say pangonsidera ed sarayan mensahe so mangipagamor ed sikatayo na malalaknab a pikakabat ed inkianak nen Jesus tan pakatalos ed peteg a kabaliksan na samay insipan na anghel a kareenan ed limog na katooan.
Antis na inkianak nen Jesus, sakbay ni ingen na impangilukon ed sikato, si Maria so binisita na sakey ya anghel ya impabidbir na Biblia bilang Gabriel. Oniay pabano na anghel: “Daray ka la, nasnaspot ya apalangkapan, say Katawan [Jehova] wala ed sika.” Unong a nayarin inisip yo, si Maria so anerbiyos a maong ed saya tan ompan medyo ataktakot ni ingen. Anto kasi so kabaliksan na satan a pabano?
Impaliwawa nen Gabriel: “Nia, ilukon mo tan yanak mo so sakey ya anak a laki et tawagen mo so ngaran to a Jesus. Sikato naani baleg, et ningaran ya Anak na sankatageyan; et iter na Dios a Katawan ed sikato so trono nen David ya ama to. Et manari lawas ed abung nen Jacob; et say panarian to andi angga to.” Intepet nen Maria no panon iyan nagawa, anta sikatoy sakey a birhen, sirin et agnin balot akiakdol ed sakey a laki. Say ebat nen Gabriel et say ugaw so inginew panamegley na masanton espiritu na Dios. Aliwa iyan sakey ya ordinaryon ugaw.—Lucas 1:28-35.
Sakey ya Impasakbay ya Ari
Saray imbaga nen Gabriel so maseguron akatulong ed si Maria pian natebek ton say iyanak ton laki et sikato itan imay tutukoyen na saray propesiya nensaman. Say imparungtal na anghel ya iter nen Jehova ed anak a laki nen Maria so “trono nen David ya ama to” so mangipanonot ed si Maria—tan ed anggan siopan Judio a mikabisado ed Kasulatan—ed samay insipan na Dios ed si Arin David na Israel.
Panamegley nen propetan Nathan, inkuan nen Jehova ed si David: “Say abung mo tan say nanarian mo mansiansia lawas ed arap mo: say yurongan mo niletneg lawas.” (2 Samuel 7:4, 16) Oniay inkuan nen Jehova nipaakar ed si David: “Saray bini to gawaen ko met a manando lawas, tan say trono to a singa dukey na saray agew na tawen. Saray bini to maando ra lawas, tan say trono to singa say agew ed arap ko.” (Salmo 89:20, 29, 35, 36) Kanian aliwan nibanbana labat a si Maria a pati si Jose et nanlapud pamilya nen David.
Diad Hebreon Kasulatan, aliwan saraya labat so propesiya a nipaakar ed anak nen David a magmaliw ya ari. Nayarin pamilyar met si Maria ed sayan propesiya nen Isaias: “Dia ed sikatayo nianak so sakey ya ugaw, dia ed sikatayo, sakey ya ugaw a laki so niiter; et say uley wala naani ed tapew na abala to; et say ngaran to natawag naani a Makapakelaw, Mananimbawa, Makapanyari a Dios, Andi-anggaan ya Ama, Prinsipe na Kareenan. Ed ibaleg na pananguley to tan kareenan anggapo naani anggaan, ed trono nen David, tan ed panarian to, a sikato so iletneg to, tan sikato so ipaalagey to a tekep na inkatunong tan kaptekan a manlapud natan angga ed ando lan ando. Say paga nen Jehova na saray ejercito so manumpal ed saya.”—Isaias 9:6, 7.
Sirin, say inyabawag nen Gabriel ed si Maria et aliwa labat a nipaakar ed mamilagron kianak na sakey ya ugaw a laki. Say anak to so magmaliw a tomatawir ed trono nen Arin David—say permanente tan magnayon a tomatawir ed sakey a Panarian ya inletneg na Dios. Saray propesiya nen Gabriel nipaakar ed arapen a betang nen Jesus so makabkabaliksan a tuloy ed sikatayon amin.
Sanen naamtaan nen Jose a malukon so aasawaen to, denesidi ton pultoten so sipanan da. Amta ton aliwan sikatoy ama na samay lukon lapud agni ran balot nan-akdol nen nobya to. Seguro et naisip yo la no panon kairap ed si Jose a talosan so eksplinasyon nen Maria nipaakar ed impanlukon to. Oniay inreport na Ebanghelyo: “Sakey ya anghel na Katawan so pinmayawar ed sikato ed sakey a kugip, a kuanto, Jose, sika anak nen David, agka ontakot a mangawat ed Maria ya asawam; ta say nilukon ed sikato manlapud pakayari na espiritu santo. Et sikato yanak to naani so sakey ya anak a laki; et tawagen mo naani [a] Jesus [so] ngaran to; ta sikato ilaban to naani so baley to ed saray kasalanan da.”—Mateo 1:20, 21.
Ag-ibabaga na Biblia no kaunongay atalosan nen Jose ed no panon ya “ilaban [na ugaw] so baley to ed saray kasalanan da.” Balet magenap la itan pian napaseguroan si Jose ya anggapoy makapuy a ginawa na samay magmaliw ya ina. Ginawa to so ingganggan na anghel tan insempet to si Maria, sakey a kundang a misimbangan ed kasalan.
Maong labat ta walay impormasyon a naromog ed arum a parte na Kasulatan, diad ontan et natalosan tayo so labay ya ibaga na samay anghel. Diad kagapo na awaran na too, inangat na sakey a rebelyoson anghel so soberanya nen Jehova. Ipapabitar na Hebreon Kasulatan a, nilikud ni ed arum et imbaga na sayan rebelde a say paraan kuno na pananguley na Dios et agmakatunongan tan anggapo kunoy toon mansiansian matoor ed si Jehova no nasubok. (Genesis 3:2-5; Job 1:6-12) Sakey si Adan ed saray alinggi. Lapud impankasalanan to, akatawir na kasalanan so amin a too, tan say nansumpalan na satan a kasalanan et ipapatey. (Roma 5:12; 6:23) Balet, si Jesus so inyanak ya andian na kasalanan lapud aliwan sakey ya aman too so sengegan na inkilukon to. Diad mabulbulos ton impangiter ed perpekton bilay to bilang too, a saya so dondon ya eksakton misimbangan ed abalang nen Adan, nisalba nen Jesus iray katooan ed kasalanan da tan naikdan to ra na ilalon manbilay na andi-anggaan.—1 Timoteo 2:3-6; Tito 3:6, 7; 1 Juan 2:25.
Legan na ministeryo nen Jesus diad dalin, impataway to, a singa panangibaga, no antoy kabaliksan na kaekal na kasalanan. Pinaabig to ray totoo ed amin a klase na deperensyay laman tan amaoli ni ingen na inaatey. (Mateo 4:23; Juan 11:1-44) Iyaanino na saratan a milagro no antoy gawaen to ed arapen. Oniay inkuan a mismo nen Jesus: “Agkayo mankelaw ed saya, ta onsabi oras, ya amin so saray wala ed saray lubok narengel da so boses [ko] et ompaway ira.”—Juan 5:28, 29.
Ipapaliwawa na satan a sipan a kioli diad arapen no akin ya importantin tuloy ed sikatayo so inkianak nen Jesus, nagkalalo la ed say impatey to. Imbaki na Dios ed dalin so Anak to “pian say mundo nilaban ed panamegley to,” so inkuan na Juan 3:17. Ipapanonot ed sikatayo na sayan alay abig a balita imay inyabawag ed saray pomapastol a manbabantay ed pulo-pulok da diad samay labi a nianak si Jesus.
“Maong a Balita na Baleg a Liket”
Talagan “maong a balita na baleg a liket” parad katooan so impangiyabawag na saray anghel ed inkianak na “sakey a Manangilaban, a sikato so Kristo a Katawan.” (Lucas 2:10, 11) Sayan ugaw imay magmaliw a Mesias, say matalonggaring a Propeta tan Manuley ya abayag lan tatalaranan na saray totoo na Dios. (Deuteronomio 18:18; Miqueas 5:2) Say pambilay tan ipatey to ed dalin so nawalaan na manunan betang diad pangiyalangon ed sankatalbaan a soberanya nen Jehova, kanian nibaga na saray anghel: “Gloria ed Dios ed sankatageyan.”—Lucas 2:14.
Impatnag nen Jesus, a tinawag na Biblia ya “unor ya Adan,” ya anggan diad silong na sankapirmian lan subok et nayarian na sakey a too so manmatoor ed si Jehova. (1 Corinto 15:45) Pinaneknekan to sirin a si Satanas et marelmeng a matila. Sengegan iya na impanliket na saray matoor ya anghel ed tawen.
Balet, pawilen tayo pa imay tepet a, “Kasin realistiko so panilalo a nasumpal imay inyabawag na anghel ed samay labin inyanak si Jesus?” Say ebat et maranet ya on! Importantin tuloy so kareenan pian nasumpal so gagala na Dios parad dalin, a kabiangan ed satan so pangipawil ed malaparaiso iran kipapasen. Sano nasumpal la itan ed interon dalin, amin a totoo so pakiwasen la na aro tan katooran. Kanian, say pakasumpal ed gagala nen Jehova so mankabaliksan met na kaekal na amin ya agmanpasakop ed soberanya to. Aliwa iyan marakep a balita ed saramay manusuporta ed si Satanas diad pangibabaga ran makapuy iray estandarte nen Jehova. Satan so mankabaliksan na kadederal da.—Salmo 37:11; Uliran 2:21, 22.
Ipangasin imanoen ya ag-imbaga na saray anghel ed saramay pastol ya amin a too et nawalaan na deen tan maong ya ugali odino, abig na linawa. Imbes, say inyabawag da et “deen ed saray totoo a sikara so panliketan ton maong” odino diad mas dugan patalos et “deen ed limog na totoon maabig-linawa.” Labay ton ibaga sirin, diad limog na saramay totoon aabobonan na Dios tan walaan na kaabigay linawa to. Saramay mangipapatnag na peteg a pananisia ed si Jehova et magmamaliw a matoor a papatumbok tan umaalig ed si Jesus. Say ontan iran lalaki tan bibii so akaparaan a mangipatnag na inkamabunlok tan pakatalos ed arum, aliwa labat a diad pigaran agew kada taon, noagta diad amin ya agew.
Sakey a Kristianon Espiritu a Napansiasiansia ed Interon Taon?
Say pakayari na maong a balitan impulong nen Jesus so angimpluensya ed bilay na amayamay ya indibidual. Dakel la so angadapta ed saray Makristianon prinsipyo diad amin ya aspekto na bilay da. Walaray totoon dati-rati et makasarili a manetepet la no anto kasi so gawaen nen Jesus no sikatoy niiyan ed situasyon da. Arum a datin akasentro so bilay da ed kaykayamanan tan likeliket so akamoria la ed kaimportantian na maespiritual iran estandarte tan say pananginabang ed saraya ed kapara ran too. Saray totoon manggagawa na saya so manggugunaet a mangipatnag na inkamabunlok tan kamaongan ed amin ya agew na taon. Agta ontan so iilaloan yo ed sakey a tuan Kristiano?
No motekteken labat komon na amin a masimoon a totoo so kaimportantian tan kabaliksan na saman a mensahe na saray anghel nipaakar ed kareenan tan onkiwas ira ed namotektek da, say dalin so seguradon magmaliw a mas maong a pasen.
Saray propesiyan misiglaotan ed inkianak nen Jesus so mamapaseguro ed saramay walaan na kaabigay linawa na Dios a napanggayagaan da so peteg a kareenan ed andi-anggaan. Agta ontan so pirawat yo? Makapanseguro itayo a seguradon nasumpal imay maglorian anunsio nipaakar ed kareenan ya inyabawag na saray anghel nen inyanak si Jesus. Say kareenan et talagan magmaliw a petepeteg tan aliwa labat a sakey a pabes a salita no panaoy Krismas.
[Saray litrato ed pahina 7]
Say Kristianon espiritu so nipatnag tan nepeg labat ya ipatnag ed interon taon