Kapitulo 10

Manuuley Lay Panarian na Dios!

1, 2. Panon ya apaneknekan ya agmagenap iray gobierno na too?

ANGANKO et asali yo lay angaliw na sakey a kagawaan, tan nalmoan yon satan so ag-onggagana manaya. Ikuan tayo lan anawag kayo na manag-apiger. Balet, ag-abayag kayari “impanapiger” to, satan so aderal la lamet. Talagan makapasyodot!

² Satan so miulibay ed saray gobierno na too. Lawas panpipilalekan na katooan so sakey a gobierno a mamaseguro ed kareenan tan liket. Ingen, saray anggapoy-tundan gunaet ya apigeren iray deral ed sosyedad so agbalot tinmalona ed kapiganman. Dakel a paknaan parad kareenan so agawa la​—tan insan binuyak. Niarum ni, anton gobierno so akayarin amatunda ed inkaduka, panangiduma-duma, krimen, sakit, tan panagderal ed kaliber-liber? Say uley na too so aglan balot naapiger. Anggan say makabat ya Arin Solomon na Isarel so tinmepet: “Panon sirin so pakatalos na too ed dalan to?”​—Uliran 20:24.

3. (a) Antoy tema na impulong nen Jesus? (b) Panon so impaneskribe na arum a totoo ed Panarian na Dios?

³ Agkayo naeekalay ilalo! Say sakey a maligen a gobierno na mundo so aliwan kugkugip lambengat. Satan so tema na impulong nen Jesus. Tinawag to itan a “say panaria’y Dios,” tan imbangat toray patumbok to ya ipikasi itan. (Lucas 11:2; 21:31) Siempre, say Panarian na Dios so sasalambiten met no maminsan na saray relihyoson grupo. Diad tua, minilyon so mangipipikasi ed satan ya inagew-agew sano ulit-uliten da so Pikakasi na Katawan (tatawagen met ya Ama Mi odino modelon pikakasi). Balet nandurumay ebat na totoo sano natepetan, “Anto so Panarian na Dios?” Arum so mangikuan, “Satan so walad puso yo.” Tatawagen na arum itan bilang tawen. Iiter na Biblia so malinew ya ebat, a singa nanengneng tayo.

SAKEY A PANARIAN A WALAAN NA GAGALA

4, 5. Akin a pinili nen Jehova so pangitarok na balon panangibalikas na inkasoberano to, tan anto so nagawaan to?

⁴ Si Jehova a Dios so lawas ya Ari, odino Soberanon Manuley, ed talba. Say katuaan ya impamalsa to ed amin a bengatla so angipasen ed sikato ed satan a nitandoron posisyon. (1 Awaran 29:11; Salmo 103:19; Gawa 4:24) Balet say Panarian ya impulong nen Jesus so katumbokan, odino onkomadua ed sankatalbaan ya inkasoberano na Dios. Satan a Mesianikon Panarian so walaan na espisipikon gagala, balet anto itan?

⁵ A singa nipaliwawa ed Kapitulo 6, say inmunan paris a too so nanrebelde sumpad autoridad na Dios. Lapud saray apalesan isyu, nilabay na Dios ya usaren so sakey a balon paraan ed panangipatnag na inkasoberano to. Inyanunsio na Dios so gagala to pian mamawala na sakey a “bini” a manmekmek ed Serpienti, si Satanas, tan mangekal ed saray epekto na atawir na katooan a kasalanan. Say manunan “bini” et si Jesu-Kristo, tan “say panarian na Dios” et say ahensya a sigpot a makatalo ed si Satanas. Diad panamegley na sayan Panarian, ipawil nen Jesu-Kristo so pananguley ed interon dalin diad ngaran nen Jehova tan mangiyalangon ed maptek ya inkasoberano na Dios ed amin a panaon.​—Genesis 3:15; Salmo 2:2-9.

6, 7. (a) Iner so kawalaan na Panarian, tan siopay Ari tan saray kaiba ton manuley? (b) Sioparay uuleyan na Panarian?

⁶ Unong ed sakey a patalos ed balikas nen Jesus ed marelmeng a Pariseos, inkuanto: “Say panarian na Dios so walad dalem yo.” (Lucas 17:21, King James Version) Kasin labay ya ibaga nen Jesus a say Panarian so walad marelmeng a kapusoan na saraman a totoon mauges? Andi. Onia so nabasa na lalon suston panangipatalos ed orihinal a Griegon lenguahe: “Say panarian na Dios so walad pegley yo.” (New World Translation) Si Jesus, a walad pegley da, so anukoy ed inkasikato bilang say arapen ya Ari. Arawin tuloy ed pagmaliw a walad puso na sakey a too, say Panarian na Dios so sakey a peteg tan onkukurang a gobierno a walaan na manuley tan saray uuleyan. Satan so mangatatawen a gobierno, lapud satan so tatawagen a namparan “panarian na tawen” tan “panarian na Dios.” (Mateo 13:11; Lucas 8:10) Diad pansingawey, anengneng nen propeta Daniel so Manuley bilang “singa sakey ya anak na too” a nitarok ed arap na Makapanyarin-amin a Dios tan naikdan na magnayon a “panuley, tan gayaga, tan sakey a panarian, ya amin so saray baley, saray nacion, tan pansasalita manlinkor ira komon ed sikato.” (Daniel 7:13, 14) Siopa iyan Ari? Bueno, tatawagen na Biblia si Jesu-Kristo a “say Anak na too.” (Mateo 12:40; Lucas 17:26) On, introno nen Jehova so Anak to, si Jesu-Kristo, pian magmaliw ya Ari.

⁷ Aliwan si Jesus lambengat so manuley. Kaiba toy 144,000 ya “asaliw dia ed saray taga dalin” pian magmaliw a kakaiban arari tan saserdote. (Apocalipsis 5:9, 10; 14:1, 3; Lucas 22:28-30) Say magmaliw ya uuleyan na Panarian na Dios so sakey a sankagloboan a pamilya na totoon manpapasakop ed panangidaulo nen Kristo. (Salmo 72:7, 8) Balet, panon tayon makapanseguro a talagan itandoro na satan a Panarian so inkasoberano na Dios tan mangipawil ed malaparaison kipapasen na dalin tayo?

SAY KAPETEGAN NA PANARIAN NA DIOS

8, 9. (a) Panon tayon niyilustra so inkanapanmatalkan na saray sipan na Panarian na Dios? (b) Akin a maseguro itayo ed kapetegan na Panarian?

⁸ Isipen pan sinimot na apuy so abung yo. Natan et insipan na sakey a walay nayarian a kaaron tulongan to kayo ed pamaalagey-lamet na abung tan taganoey pamilya yo. No naynay a mangibabaga ed sikayo na katuaan itan a kaaro, kasin agyo ni panisiaan? No bilang ta diad insempet yo ed kaimbuasan a nanlapud trabaho et naimano yon nigagapo lan linisan na saray trabahador iray kera na pool tan nitarok lay tagano parad pamilya yo. Andi-duaruwan magmaliw a sigpot so talek yo ya onsabi panaon, ya aglabat nipawil iray bengatla noagta magmaliw a lalon magmaong ni nen say dati.

⁹ Diad ontan met a paraan, papaseguroan itayo nen Jehova ed kapetegan na Panarian. A singa nipanengneng ed libro na Biblia a Hebreos, dakel a pamaakaran na Ganggan so angiyanino ed oksuyan na Panarian. (Hebreos 10:1) Saray mapropetikon nengnengnengen no antoy kipapasey Panarian na Dios so anengneng met ed mangaraldalin a panarian na Israel. Satan so aliwan basta ordinaryon gobierno lambengat, ta saray manuley so akayurong ed “trono nen Jehova.” (1 Awaran 29:23) Sakey ni, nipasakbay la: “Say cetro ag ontainan ed Juda naani, nisay tayokor na manangoley agnaekal ed leet na saray salisali to, anga ed isabi nen Siloh, tan dia ed sikato wala naani katotolok na saray katooan.” (Genesis 49:10)a On, manlapud sayan linya na ararin Judeano so kiyanakan na permanentin Ari na gobierno na Dios, si Jesus.​—Lucas 1:32, 33.

10. (a) Kapigan a niletneg so pundasyon na Mesianikon Panarian na Dios? (b) Anton importantin kimey so idaulo na saray prospektibon kakaiba nen Jesus a manuley diad dalin?

¹⁰ Say pundasyon na Mesianikon Panarian na Dios so niletneg diad panamegley na impamili ed apostoles nen Jesus. (Efeso 2:19, 20; Apocalipsis 21:14) Saraya so ununa na 144,000 a manuley ed tawen bilang kaiban arari a kaulop nen Jesu-Kristo. Legan a wadiad dalin, sarayan prospektibon kakaiban manuley so mangidaulo ed sakey a panagtasin kampanya, bilang panumbok ed ganggan nen Jesus: “Onla kayo . . . tan mangawa kayo na saray babangatan ed amin a naciones, ya binyagan yo ra ed ngara’y Ama, tan say Anak, tan say [masanton espiritu, NW].”​—Mateo 28:19.

11. Panon a say panangipulong ed Panarian so nagagawa natan, tan anto so nagagawaan to?

¹¹ Say ganggan a manggawa na babangatan so tutuloken natan ed agnaparaan a laknab. Iyaabawag na saray Tasi nen Jehova so maong a balita na Panarian ed sankagloboan, a mitunosan ed mapropetikon balikas nen Jesus: “Saya ya evangelio na panarian nipulong naani ed sankamundoan ya onkanan pamintuaan ed saray amin a naciones, et saman la onsabi angaan.” (Mateo 24:14) Bilang sakey a kabiangan na panangipulong ed Panarian, gagawaen la so sakey a malaknab a programa na edukasyon. Saramay manpapasakop ed saray ganggan tan prinsipyo na Panarian na Dios so makakaeksperiensia la natan na kareenan tan pankakasakey ya agnadampot na saray gobiernoy too. Amin na saya so mangiiter na malinew ya ebidensya a say Panarian na Dios so sakey a kapetegan!

12. (a) Akin a matukoy so panawag ed saray manangiyabawag na Panarian bilang Tastasi nen Jehova? (b) Panon a miduma so Panarian na Dios manlapud saray gobierno na too?

¹² Inkuan nen Jehova ed saray Israelita: “Sikayo so saray tasik, . . . say aripen ko a pinilik.” (Isaias 43:10-12) Si Jesus, “say Matoor a Tasi,” so siseseseg ya angiyabawag ed maong a balita na Panarian. (Apocalipsis 1:5, NW; Mateo 4:17) Kanian matukoy lambengat ya akbibiten na saray kaplesan a manangiyabawag na Panarian so inter-Dios a ngaran a Tastasi nen Jehova. Balet akin a saray Tasi so manguusar na dakel a panaon tan sagpot ya itotongtong ed arum so nipaakar ed Panarian na Dios? Gagawaen da iya lapud say Panarian so mogmon ilalo na katooan. Saray gobierno na too so diad kaunoran ed manampot, balet say Panarian na Dios so agbalot manampot. Tatawagen na Isaias 9:6, 7 so Manuley to, si Jesus, a ‘Prinsipe na Kareenan’ tan iyaarum to: “Ed ibaleg na panaguley to tan kareenan angapo naani angaan.” Say Panarian na Dios so aliwan singa saray gobierno na too​—a wadia natan tan nabuas et andi la. Dia tua et oniay kuan na Daniel 2:44: “Say Dios na tawen mamaalagey naani na sakey a panarian ya angan kapigan ag naani naderal tan say panaguley to ag naani niiter ed sananey a baley, balet buybuyaken to naani tan opoten to naani so saraya ya amin a panarian, et sikato so mansiansia lawas.”

13. (a) Antoray pigaran problema ya arapen na Panarian na Dios a sitatalona? (b) Akin a makaseguro tayo a saray sipan na Dios so nasumpal?

¹³ Siopan arin too so makapangekal na bakal, krimen, sakit, eras, tan kaandiay-ayaman? Nagkalalo ni, siopan mangaraldalin a manuley so makapanpaoli ed saramay inaatey? Sarayan pamaakaran so arapen na Panarian na Dios tan say Ari to. Anggapoy antokaman a depekto na say Panarian, aliwan singa say ag-onggaganan kagawaan a lawas mankaukolan na panangumpuni. Imbes, say Panarian na Dios so ontalona, lapud isisipan nen Jehova: “[Say] salitak ya ompaway ed sangik . . . ag ompawil ed siak a paoypaoy, no ag ingen sumpalen to naani so kaliktan ko, tan onaliguas naani ed bengatla a pangyakaran ko ed sikato.” (Isaias 55:11) Ag-onsaew so gagala na Dios, balet kapigan so nigetar ya igapo na uley na Panarian?

ULEY NA PANARIAN​—KAPIGAN?

14. Anton lingon impakatalos na saray babangatan nen Jesus nipaakar ed Panarian, balet anto so kabat nen Jesus nipaakar ed pananguley to?

¹⁴ “Katawan, [kasin] ipawil mo so panarian ed Israel ed sayan panaon?” Diad panaon na impangitepet ed saya na saray babangatan nen Jesus et agda ni amta so gagala na Panarian na Dios tan say aturon panaon parad igapo na uley to. Diad pamapasakbay ed sikara ya agpalbengan iyan bengatla, inkuan nen Jesus: “Ag nipabtang ed sikayo so pikabat na saray panaon ono kinepeg, ya ingeter na Ama ed pakaoley to’n dili.” Kabat nen Jesus a say pananguley to ed tapew na dalin so nireserba ed arapen, abayag la kayari inkioli tan insegep to ed tawen. (Gawa 1:6-11; Lucas 19:11, 12, 15) Impasakbay iya ed Kasulatan. Panon?

15. Panon ya iikdan itayo na Salmo 110:1 na aralem a pakatalos nipaakar ed panaon na pananguley nen Jesus?

¹⁵ Diad mapropetikon panukoy ed si Jesus bilang “Katawan,” inkuan nen Arin David: “Si Jehova inkuan to ed Katawan ko, Yorong ka ed nikawanan ko, a sanlegan na pangawak ed saray kakabusol mo a totoonan na salim.” (Salmo 110:1; ipareng so Gawa 2:34-36.) Sayan propesiya so mangipapatnag a say pananguley nen Jesus so agtampol onggapo kayari isegep to ed tawen. Imbes, sikatoy manalagar diad nikawanan a lima na Dios. (Hebreos 10:12, 13) Kaunongan kabayag iyan panalagar? Kapigan so igapo na pananguley to? Tutulongan itayo na Biblia ed pakaromog na saray ebat.

16. Anto so agawa nen 607 K.K.P., tan panon iyan mitukoyan ed Panarian na Dios?

¹⁶ Say mogmon syudad ed interon dalin ya angipasenan nen Jehova na ngaran to et say Jerusalem. (1 Arari 11:36) Satan met so kabisera na inabobonan-na-Dios a mangaraldalin a panarian a litrato na mangatatawen a Panarian na Dios. Sirin, talagan makabaliksan so impaneral ed Jerusalem na saray taga Babilonia nen 607 K.K.P. Sayan ebento so ananda ed gapoan na andukey balet temporaryon intunda na direktan uley na Dios ed totoo to diad dalin. Ngalngalin anemiran siglo ed saginonor, impabidbir nen Jesus a sayan peryodo na tinmundan uley so nipapakurang ni, lapud inkuanto: “Say Jerusalem igatin naani na saray Gentiles, anga ed kasumpal na [say aturon panaon na saray nasyon, NW].”​—Lucas 21:24.

17. (a) Anto so “say aturon panaon na saray nasyon,” tan kaunongan so panbayag na saratan? (b) Kapigan a ginmapo tan anampot so “say aturon panaon na saray nasyon”?

¹⁷ Legan na “say aturon panaon na saray nasyon,” naabuloyan a mamatunda iray minumundon gobierno ed pananguley ya inabobonan na Dios. Satan a peryodo so ginmapo diad impakaderal na Jerusalem nen 607 K.K.P., tan impatnag nen Daniel a mantultuloy itan ed loob na “pitoran panaon.” (Daniel 4:23-25, NW) Kaunongan kabayag itan? Ipapanengneng na Biblia a say talora tan kapalduan “panaon” et kasimbangan toy 1,260 ya agew. (Apocalipsis 12:6, 14, NW) Say mamiduan danay na satan a peryodo, odino pitoran panaon, et magmaliw a 2,520 ya agew. Balet anggapo so antokaman a makatantandan agawa ed sampot na satan ya antikey a peryodo na panaon. Anggaman ontan, diad pangiyaplika ed “balang sakey ya agew singa sakey taon” ed propesiya nen Daniel tan ed panbilang na 2,520 a taon manlapud 607 K.K.P., makasabi tayo ed taon 1914 K.P.​—Numeros 14:34; Ezequiel 4:6.

18. Anto so ginawa nen Jesus kayarin tuloy na impangawat to ed Panarian tekep na pakayari, tan panon iyan angapekta ed dalin?

¹⁸ Kasin ginmapo lan manguley si Jesus ed tawen diad satan a panaon? Saray Makasulatan a rason a mangibabagan agawa itan so singbaten ed ontumbok a kapitulo. Siempre, say gapo na uley nen Jesus so agnatandaan na tampol a kareenan ed dalin. Ipapanengneng na Apocalipsis 12:7-12, NW, a kayarin tuloy na pangawat ed Panarian, pagiten nen Jesus si Satanas tan saray demonyon anghel manlapud tawen. Saya so mankabaliksan na irap ed dalin, balet makapaliket so pakabasa a say Diablo so walaan lambengat na “antikey a peryodo na panaon” a natitilak. Agmabayag, saya so mamagayaga ya aliwan lapu lambengat ed panuuley la na Panarian na Dios noagta lapud satan met so mangitarok na saray bendisyon ed dalin tan ed matulok a katooan. (Salmo 72:7, 8) Panoy pikabat tayo a saya so magano lan nagawa?

[Saray paimano ed leksab]

SUBOKEN SO PIKAKABAT YO

Anto so Panarian na Dios, tan manlapud iner so pananguley to?

Sioparay manuley ed Panarian, tan sioparay uuleyan to?

Panon ya ipapaseguro ed sikatayo nen Jehova a say Panarian to so peteg?

Kapigan a ginmapo tan anampot so “say aturon panaon na saray nasyon”?

[Kahon ed pahina 94]

PIGARAN IMPORTANTI IRAN EBENTON MITUKOYAN ED PANARIAN NA DIOS

• Iyaanunsio nen Jehova so gagala to ed pamawala na sakey a “bini” a manmekmek ed ulo na Serpienti, si Satanas a Diablo.​—Genesis 3:15.

• Nen 1943 K.K.P., impatnag nen Jehova a sayan “bini” so magmaliw ya atooan a kapolian nen Abraham.​—Genesis 12:1-3, 7; 22:18.

• Say Ganggan a sipanan ya initer ed Israel nen 1513 K.K.P. so mangitatarok na “sakey ya anino na saray penel na bengatla ya onsabi.”​—Exodo 24:6-8; Hebreos 10:1.

• Say mangaraldalin a panarian na Israel so ginmapo nen 1117 K.K.P., tan satan so nantultuloy ed saginonor ed linya nen David.​—1 Samuel 11:15; 2 Samuel 7:8, 16.

• Aderal so Jerusalem nen 607 K.K.P., tan ginmapo so “say aturon panaon na saray nasyon.”​—2 Arari 25:8-10, 25, 26; Lucas 21:24, NW.

• Nen 29 K.P., alanaan si Jesus bilang Nidesignan-Ari tan nantultuloy ed mangaraldalin a ministeryo to.​—Mateo 3:16, 17; 4:17; 21:9-11.

• Nen 33 K.P., sinmegep si Jesus ed tawen, nanalagar diman ed nikawanan a lima na Dios anggad kigapoy uley to.​—Gawa 5:30, 31; Hebreos 10:12, 13.

• Nitrono si Jesus ed mangatatawen a Panarian nen 1914 K.P. legan ya anampot so “say aturon panaon na saray nasyon.”​—Apocalipsis 11:15.

• Si Satanas tan saray demonyo to so nibantak ed kabangibang na dalin tan angitarok na apadaak a kairapan ed katooan.​—Apocalipsis 12:9-12.

• Aasikasoen nen Jesus so sankamundoan a panangipulong ed maong a balita na Panarian na Dios.​—Mateo 24:14; 28:19, 20.