Kabaten si Jehova Diad Panamegley na Salita To
“Saya sikato so andi angaan a bilay, ya naamtaan da ka a saksakey a tua’n Dios, tan saman so inbakim, salanti Jesu-Cristo.”—JUAN 17:3.
1, 2. (a) Anto so kabaliksan na “kabat” tan “pikakabat” a singa inusar diad saray Kasulatan? (b) Antoran alimbawa so mamalinew ed sayan kabaliksan?
SAY pangabat ed sakey bilang kabat lambengat odino nawalaan na kakabatan ed bengatla diad akinpaway a paraan so arawin tuloy ed kabaliksan na saray salitan “kabat” tan “pikakabat” a singa nausar diad saray Kasulatan. Diad Biblia saya so manasaglawi ed “say kiwas ed pangamta diad panamegley na eksperiensia,” pikakabat a mangipapatnag na “siglaotan na talek ed baetan na totoo.” (The New International Dictionary of New Testament Theology) Lalaktipen na satan so pangamta ed si Jehova diad pangunsidera ed espisipiko iran gawa to, a singa saraman a dakel a kaso ed libro na Ezequiel a say Dios so angidapo na saray panangukom sumpa ed saray managgaway-mauges, a mangiyaabawag: “Et naamtaan da ak naani a siak si Jehova.”—Ezequiel 38:23.
2 Say nanduruman paraan a nayarin pangusaran na “kabat” tan “pikakabat” so napalinew ed pigaran alimbawa. Parad dakel a mangibabagan onkikiwas ed ngaran to, sanen imbaga nen Jesus ya “agta kayo apikabkabatan a balot”; say labay ton ibaga et anggapon balot so pibabali to ed sikara. (Mateo 7:23) Ibabaga na 2 Corinto 5:21 a si Kristo so “ag akaamta na kasalanan.” Agkabaliksan na satan a sikato so andian na pakaamta ed kasalanan noagta, ingen, sikato so andian na personal a pakapilanor ed satan. Mipadpara, sanen inkuan nen Jesus: “Saya sikato so andiangaan a bilay, ya naamtaan da ka a saksakey a tua’n Dios, tan saman so inbakim, salanti Jesu-Cristo,” et nagkalalo so nalalanor nen say basta pangamta ed bengatlan nipaakar ed Dios tan si Kristo.—Ipareng so Mateo 7:21.
3. Anto so mamaneknek a si Jehova so mangipapanengneng na pakabidbiran a marka na tuan Dios?
3 Dakel ed atributos nen Jehova so naamtaan diad panamegley na Salita to, say Biblia. Say sakey ed saratan et say abilidad ton mangipropesiya tekep na inkasusto. Saya so marka na tuan Dios: “Yakar dara komon, tan ipakabat da ed sikami no anto naani nagawa: ipakabat yo so saray inmuna a bengatla, no antora, pian isipen mi ra, tan naamtaan mi so kaunoran a kasumpalan da; odino ipanengneng yo ed sikami so saray bengatla ya onsabi. Ibaga yo so saray bengatla ya onsabi ed arapen, pian naamtaan mi a dirios kayo.” (Isaias 41:22, 23) Diad Salita to, ibabaga nen Jehova so ununa iran bengatla nipaakar ed inkapalsa na dalin tan say bilay ed tapew to. Imbaga to lan inmuna iray bengatlan nagawa ed saginonor tan peteg ya agawa. Tan anggan natan et sikatoy “ipanengneng yo ed sikami so saray bengatla ya onsabi,” nagkalautla ed saray bengatlan nagawa ed “saray kaonoran ya agew.”—2 Timoteo 3:1-5, 13; Genesis 1:1-30; Isaias 53:1-12; Daniel 8:3-12, 20-25; Mateo 24:3-21; Apocalipsis 6:1-8; 11:18.
4. Panon ya inusar nen Jehova so atributo to a pakapanyari, tan panon ton usaren lamet itan?
4 Sananey nin atributo nen Jehova et say pakapanyari. Satan so napatnagan diad katawenan a ditan et saray bitewen so onkikiwas a singa baleg ya inpanuulop na saray pugon a mangiiter na liwawa tan petang. Sanen saray rebelyoson totoo tan angheles so nanangat ed inkasoberano nen Jehova, uusaren to so pakapanyari to bilang “mibabakal,” a mangidedepensa ed maong a ngaran tan matunong iran pananontonan to. Diad saratan a kipapasen sikato so agmasuyat a mangibulos na pakapanyari ed panagderal, a singa diad Delap ed agew nen Noe, diad inpakaderal na Sodoma tan Gomorra, tan diad inkiliktar na Israel diad panamegley na Ambalangan Dayat. (Exodo 15:3-7; Genesis 7:11, 12, 24; 19:24, 25) Agla mabayag et usaren na Dios so pakayari to pian “imedmer to si Satanas ed lepsag na saray sali yo.”—Roma 16:20.
5. Katekep na pakapanyari to, anton kalidad so wala met ed si Jehova?
5 Ingen, anggaman ed sarayan amin ya agmanganggan pakayari, wala so panagpaabeba. Ibabaga na Salmo 18:35, 36: “Say inkadunong [panagpaabeba, NW] mo pinabaleg toak. Sika pinarawes mo so saray kundang ko ed silong ko.” Lapud inkamapaabeba na Dios sikato so “manpaabeba ya onnengneng . . . ed tawen, tan dia ed dalin. Sikato ipaalagey to so duka ya agwaten ed dabok, tan lakeyen to so naokolan ya agwaten ed dumsis.”—Salmo 113:6, 7.
6. Anton kalidad nen Jehova so manangiliktar-bilay?
6 Say panangasi nen Jehova diad pidedeneng to ed too so manangiliktar-bilay. Agaylan panangasi so nipatnag ed si Manases sanen sikato so pinerdona, anggaman sikato so akagawa na makapasinagem a kaugsan! Kuan nen Jehova: “No kuan ko ed marelmeng, Ompatey ka naani ya andi saew; no magbabawi ed kasalanan to, tan gawaen to so nikatunongan tan maptek. Anggapo naani ed saray kasalanan to a ginawa to so nanonotan a sumpa ed sikato; sikato ginawa to so unong ed tunong tan maptek; sikato manbilay naani ya andi saew.” (Ezequiel 33:14, 16; 2 Awaran 33:1-6, 10-13) Isisindag nen Jesus si Jehova sanen impaseseg to’y panamerdona diad 77 a danay, anggan 7 a danay ed sanagew!—Salmo 103:8-14; Mateo 18:21, 22; Lucas 17:4.
Sakey a Dios a Walaan na Liknaan
7. Panon a si Jehova so miduma ed dirios na saray Griego, tan anton mablin pribilihyo so nilukas ed sikatayo?
7 Saray Griegon pilosopo, a singa saray Epicureo, so anisia ed dirios balet minoria dara a bilang arawin tuloy ed dalin pian nawalaan na interes ed too odino naapektaan na saray liknaan to. Agaylan miduma so siglaotan ed baetan nen Jehova tan matoor a Tastasi to! “Ta si Jehova naroyroyo ed katooan to.” (Salmo 149:4) Saray marelmeng a totoo sakbay na Delap so amaermen ed sikato tan “amasinagel ed puso to.” Say ag-inkamatoor na Israel so angitarok na ot-ot tan pasakit ed si Jehova. Say itutunganga na saray Kristiano so mamaermen ed espiritu nen Jehova; anggaman ontan, diad inkamatoor da, sikato so napaliket da. Agaylan makapakelkelaw a nonoten a say maletey a too diad dalin et nayarian ton pasakitan odino paliketen so Manamalsa ed uniberso! Nisesengeg ed amin a gagawaen to parad sikatayo, agaylan makapakelaw a sikatayo so walaan na mablin pribilihyo a mamaliket ed sikato!—Genesis 6:6; Salmo 78:40, 41; Uliran 27:11; Isaias 63:10; Efeso 4:30.
8. Panon nen Abraham ya inusar so bulos diad pansalita to ed si Jehova?
8 Ipapanengneng na Salita na Dios a say aro nen Jehova so mangiyaabuloy ed sikatayon tuloy a “bulos diad pansalita.” (1 Juan 4:17, NW) Imanoen so kipapasen nen Abraham sanen dineral nen Jehova so Sodoma. Inkuan nen Abraham ed si Jehova: “Tunawen mo ta so saray bagel a pati saray matunong? Et panon ey no wala so limamplo a matunong ed loob na ciudad: deralen mo ta ni so saman a pasen ya agmo palabasen a nisengeg ed saray limamplo ya wadman? . . . Arawi komon ed sika . . . Agta gawaen na Okom na amin a dalin so maalas?” Agaylaran salitan ibaga ed Dios! Ingen inmabobon si Jehova ya agto deralen so Sodoma no walad man so 50 a matunong a totoo. Intuloy nen Abraham tan akasabi’d bilang ya amaleksab manlapud 50 ya anggad 20. Sikato so natatakot ompan sikato so masyadon mapilit. Inkuanto: “Ag komon naingongotan so Katawan [Jehova, NW], ta mansalita ak ni maminsan labat la: Alimbawa bilang ta samsamplora so naromog diman.” Inmabuloy lamet si Jehova: “Agko deralen nisengeg ed saray samplora.”—Genesis 18:23-33.
9. Akin ya inabuloyan nen Jehova si Abraham a mansalita a singa onman, tan anto so naaralan tayo manlapud saya?
9 Akin ya inyabuloy nen Jehova ed si Abraham so ontan a bulos diad pansalita, ta pian mangibalikas ed onian paraan? Manuna, amta nen Jehova so kapagaan nen Abraham. Kabat to a say kaanakan nen Abraham a si Lot et manaayam ed Sodoma, tan mapaga si Abraham ed kaligenan to. Ontan met, si Abraham so kaaro na Dios. (Santiago 2:23) Sano saray arum so mapasang a mansalita ed sikatayo, kasin panggugunaetan tayon talosan iray liknaan a walad benegan na saray balikas to tan kokonsideraen iray mamakalmado a kipapasen, nagkalalo no sikato so sakey a kaaro a manasagmak na sakit na linawa? Agta makaligliwa so pakaimano a si Jehova so makatalos diad pangusar tayo na bulos diad pansalita, a singa impitongtong to ed si Abraham?
10. Panon a say bulos diad pansalita so ontulong ed sikatayo diad pikakasi?
10 Nagkalalo sano sikato so anapen tayo bilang “Dumerengel na pikakasi” a pilalek tayo iyan bulos diad pansalita pian ibaga so liknaan tayo ed sikato, sano sikatayo so nagogonigon a tuloy tan naaaburido. (Salmo 51:17; 65:2, 3) Anggan diad saray panaon sano sikatayo so napakapuy na saray salita, “say Espiritu tulongan to met so kakapuyan tayo,” tan si Jehova so ontatalineng. Nakabatan to so saray kanonotan tayo: “Sika natalosan mo so nonot ko ya wala ni ed arawi. Ta angapo so sakey a salita diad ed dalin noag say nia, O Jehova, antam a sigpot.” Anggan ontan, nepeg tayo so mantultuloy ya onkerew, mananap, tan ontoktok.—Roma 8:26; Salmo 139:2, 4; Mateo 7:7, 8.
11. Panon a nipanengneng a si Jehova so peteg a manatalima ed sikatayo?
11 Si Jehova so manatalima. Sikato so mangitatarya parad bilay a pinalsa to. “Saray mata na amin mantalaran ira ed sika; et sika ikdan mo ra na kanen da no kanepegan to a panaon. Sika buskagen mo so limam, tan peneken mo so saray pilalek na ami bengatlan mabilay.” (Salmo 145:15, 16) Sikatayo so naimbitaan a mangimano ed no panon so panatagano to ed saray manok diad saray kalawakan. Imanoen iray lirios ed uma, no panon inkarakep so pangawes to ed sikara. Inyarum nen Jesus a nagkalalo so gawaen na Dios ed sikatayo nen say diad sikara. Kanian akin a sikatayo so mapagpaga? (Deuteronomio 32:10; Mateo 6:26-32; 10:29-31) Say 1 Pedro 5:7 so mangiimbita ed sikayon “imatalek yo ya amin ed sikato so kapagaan yo; ta sikato asikasoen to kayo.”
“Dilin Talintao na Inka Dios To”
12, 13. Niarum ed pakanengneng ed si Jehova diad panamegley na palsa to tan saray gawa to a nikurit diad Biblia, panon ni a sikatayo so makayarin makanengneng tan makarengel ed sikato?
12 Nanengneng tayo si Jehova a Dios diad panamegley na saray palsa to; sikato so nanengneng tayo diad panbasa na saray gawa to dia ed Biblia; sikato so nanengneng tayo met diad saray salita tan gawa a nikurit nipaakar ed si Jesu-Kristo. Ibabaga a mismo nen Jesus itan, diad Juan 12:45: “Et say makanengneng ed siak, nanengneng to so angibaki dia ed siak.” Lamet, diad Juan 14:9: “Say akanengneng ed siak anengneng to so Ama.” Ibabaga na Colosas 1:15: “A sikato [Jesus] so talintaoy Dios ya ag nanengneng.” Iyaabawag na Hebreos 1:3: “Tan dilin [Jesus] talintao na inka Dios to.”
13 Imbaki nen Jehova so Anak to ya aliwa lambengat a mangitarya na dondon noagta mangiletneg met na ehemplon aligen, parehon diad salita tan diad gawa. Sinalita nen Jesus iray salita na Dios. Inkuanto diad Juan 12:50: “Saray bengatla a sinalitak, unong na inkuan na Ama ed siak ontan so salitaen ko.” Agto ginawa so dilin linawa to, balet ginawa toray bengatlan imbaga na Dios a gawaen to. Kuanto diad Juan 5:30: “Angapo so nagawaan ko ed inkasiak.”—Juan 6:38.
14. (a) Anton impakaimano so sengegay inkiwas nen Jesus tekep na panangabagey? (b) Akin a say nengneng na panagsalita nen Jesus so sengegay impantitipon na totoo pian ondengel ed sikato?
14 Anengneng nen Jesus iray totoon akating, agmakayari, telek, bulag, tan aselepan tan saramay mandageyem ed inatey da. Sikatoy apakiwas tekep na panangabagey, tinambal toy sakit tan amaoli’d inatey. Tan anengneng to so dakel a totoo a pakaskasi tan ontatawag nipaakar ed espiritual, tan ginapoan ton imbabangat ed sikara so dakel a bengatla. Sikatoy nambangat ya aliwa lambengat ed susto iran salita noagta ontan met ed makaayat iran salita a nanlapud puso to a direktan tinmanek ed kapusoan na arum, a sikaray sinmingger ed sikato, ya intarok to’ran asasakbay diad templo pian sikatoy dengelen da, a sengegan na impantultuloy dan panutumbok tan itatalineng ed sikato, diad italineng ed sikato tekep na liket. Sikaray nantitipon pian ondengel ed sikato, a mangiyaabawag ya “angapo so too a nansalita na onia.” Sikaray nikelawan ed paraan na panagbangat to. (Juan 7:46; Mateo 7:28, 29; Marcos 11:18; 12:37; Lucas 4:22; 19:48; 21:38) Tan sanen inanap na saray kakabusol to pian sikatoy palikdoen ed saray tepet et impuliktar to ed sikara so tepet, ya amareen ed sikara.—Mateo 22:41-46; Marcos 12:34; Lucas 20:40.
15. Anto so manunan tema na panagpulong nen Jesus, tan diad anton kalaknab ya inlanor toray arum diad pangilaknab ed satan?
15 Inyabawag to ya “asinger la so panaria’y tawen” tan pinaseseg toray dumerengel ya itultuloy dan “anapen ya ununa so panarian.” Imbaki toray arum a mangipulong a “say panarian na tawen asinger la,” a “manggawa na saray babangatan ed amin a naciones,” a magmaliw a tastasi nen Kristo “anga ed kasampotan na dalin.” Natan et ngalngali apatira tan kapalduan laksan Tastasi nen Jehova so manaakar ed saray kundang to, a manggagawa ed saraman a bengatla.—Mateo 4:17; 6:33; 10:7; 28:19; Gawa 1:8.
16. Panon a say atributo nen Jehova ya aro so niiyan ed graben subok, balet anto so agawaan to ed katooan?
16 Ibabaga ed sikatayo na 1 Juan 4:8 a “say Dios sikato so aro.” Sayan matalonggaring ya atributo to so niiyan ed sankasakitan a subok sanen imbaki to diad dalin so bogbogtong ya Anak to pian ompatey. Say irap ya alikna na sayan inadaron Anak tan saray kerew ya imbalikas to ed mangatatawen ya Ama to so angitarok na ot-ot tan ermen ed si Jehova, anggaman pinaneknekan nen Jesus a palso so angat nen Satanas, a si Jehova so agnawalaan na totoo diad dalin a manmatoor ed Sikato diad silong na graben subok. Nepeg tayo met ya apresyaen so kaimportantian na bagat nen Jesus, lapud sikatoy imbaki na Dios dia pian ompatey para’d sikatayo. (Juan 3:16) Saya so aliwan basta, impatey. Usisaen tayo so rekord na Biblia ed saray inkagawa pian naapresya so kablian na satan ed Dios tan si Jesus tan diad inpakamoria ed kaimportantian na say bagat da parad sikatayo.
17-19. Panon nen Jesus a deneskribe so mairap a subok a walad unaan to?
17 Ontanlan amipat a danay a dineskribe nen Jesus ed apostoles to no anto so nagawa. Pigaran agew lambengat sakbay a satan so agawa, inkuanto: “Nia, ontatdang itayo ed Jerusalem; et say Anak na too niyawat ed saray manonaan a sacerdote tan saray escribas; tan sikato’y dusaen da naani na ipapatey, tan sikato’y yawat da naani ed saray Gentiles: Tan sikato’y ludlureyen da naani, tan sikato’y lupdaan da, tan sikato’y bakbaken da naani, tan sikato’y pateyen da.”—Marcos 10:33, 34.
18 Alikna nen Jesus so desdes ya arapen to, a kabat to so makapataktakot a panagdusa na Romano. Saray katat a latiko ya inusar parad panaglewet a walaan na ankelag iran metal tan pukepukel na karnero ya aseksek; kanian legan a say panlelewet so tuloytuloy, say beneg tan saray ulpo so mandala. Pigaran bulan sakbay to, impaimano nen Jesus so pakagonigon a papawalaen na say mairap a subok ed sikato, ya ibabaga to, unong a nabasa tayo diad Lucas 12:50: “Balet wala so binyag a pakabinyagan ko; et agay la’y irap ko anga ed ag nasumpal.”
19 Say desdes so pinmalalo legan a manasingger iman a panaon. Sinalita to itan ed mangatatawen ya Ama to: “Natan say kamarerwak agonigon; et anto so inkuan ko? Ama, ilaban moak ed sayan horas. Balet nisengeg ed saya sinmabi ak ed sayan horas.” (Juan 12:27) Agaylan si Jehova so naapektaan na sayan kerew manlapud bogbogtong ya Anak to! Diad Getsemane, pigaran oras lambengat sakbay na ipatey to, si Jesus so naaburidon tuloy tan inkuanto ed si Pedro, Santiago, tan Juan: “Say kamarerwak maermen a toloy anga ed ipapatey.” Pigaran minuto kayari to sikato so angibalikas na unor a pikakasi to ed si Jehova: “Ama, no labay mo, yarawim so saya a copa ed siak: angaman ontan aliwa a say linawak no ag say linawam so nasumpal. Et sanen manpapanabos akikasi na lalo a marmarlang; et say linge’to singa angkakabaleg a tedter na dala a sinmaklayat anga ed dalin.” (Mateo 26:38; Lucas 22:42, 44) Nayarin saya so akabkabat ed medisina a bilang hematidrosis. Mataltalag balet ta nagawa diad kipapasen na nagogonigon a maong.
20. Anto so tinmulong ed si Jesus a makasungdo ed mairap a subok to?
20 Nipaakar ed sayan panaon diad Getsemane, kuan na Hebreos 5:7: “A dia ed saraman ya agew a sikato so silalaman ya ompatey, angibagat na pikakasi tan pikekerew, a tekep na mabiskeg a tagleey tan saray lua, ed saman so makayari’n mangilaban ed sikato ed ipapatey, tan sikato so nadngel lapud masanton panaglikas to.” Lapud sikato so agniliktar manlapud ipapatey na “Saman so makapanyari’n mangilaban ed sikato ed ipapatey,” diad anton pantalos a say pikakasi to so paborablen nadngel? Onebat so Lucas 22:43: “Et pinmatnag ed sikato so sakey’a angel a nanlapu ed tawen, ya amabiskeg ed sikato.” Say pikakasi so naebatan diad paraan a say anghel ya imbaki na Dios so amabiskeg ed si Jesus pian nasungdoan so mairap a subok.
21. (a) Anto so mangipanengneng a si Jesus so analo diad mairap a subok? (b) Sano saray subok tayo so ompalalo, panon a sikatayo so mankaliktan a makayarin mansalita?
21 Saya so mapatnag diad nansumpalan. Sanen say akindalem ya impipuligesgesan to so linmabas la, si Jesus so inmalagey tan pinawil tora di Pedro, Santiago, tan Juan, tan inkuanto: “Alagey kayo, onla itayo la.” (Marcos 14:42) Diad ontan et ibabaga ton, ‘Paulyan yo ak a niyawat ed sakey ya angob, ya erelen na ulop, ya ilegal a nasubok, a sililingon nakondena. Abuloyan ak a naludlurey, nalotdaan, nadusa, tan nipasak ed panamairapan a kiew.’ Diad loob na anemiran oras et sikato so nipasak diman, diad sankasakitan ya ot-ot, a nansungdo anggad anggaan. Legan a manpapanabos, sikato so kinmelyaw diad impanalo: “Asumpal’la.” (Juan 19:30) Sikato so nansiansian malet tan apaneknekan to so katooran to diad impangitandoro ed inkasoberano nen Jehova. Amin a bengatlan angibakian nen Jehova ed sikato diad dalin et agawaan to. Sano sikatayo so ompatey odino sano onbetag so Armagedon, kasin sikatayo so makapangibaga nipaakar ed kimey tayo manlapud si Jehova: “Asumpal’la.”?
22. Anto so mangipapanengneng ed kalaknab na kakabatan nen Jehova?
22 Diad anggan anton kipapasen, sikatayo so makapanseguro a diad maples-onsasabin nigeter a panaon, amin a “dalin napano naani ed pikakabat ed Jehova, singa saray danum sakbongan da so dayat.”—Isaias 11:9.
Kasin Nanonotan Yo?
◻ Anto so kabaliksan na pangabat tan nawalaan na pikakabat?
◻ Panon a say panangasi tan panamerdona nen Jehova so nipanengneng ed sikatayo diad Salita to?
◻ Panon so impangusar nen Abraham na bulos diad pansalita ed si Jehova?
◻ Akin a sikatayo so onnengneng ed si Jesus tan diad sikato et nanengneng tayo so saray kalidad nen Jehova?