Anto so Nepeg Tayon Gawaen Pian Nisalba?

AMINSAN et intepet na sakey a laki ed si Jesus: “Katawan, daiset ta iramay nisalba?” Panon ya inebatan nen Jesus? Kasin inkuanton: ‘Basta awaten moak bilang Katawan tan Manangisalbam, tan sika so nisalba’? Andi! Inkuan nen Jesus: “Isekar yoy inkasikayo a sikakasil pian makaloob ed mainget a puerta, lapud, ibagak ed sikayo, dakel so manpirawat a makaloob balet agda nayarian.”​—Lucas 13:23, 24.

Kasin agnaebatan nen Jesus so tepet na laki? Andi, ag-intepet na laki no panon kairap so kisalba; intepet to no daiset ta lambengat so bilang. Kanian impatnag labat nen Jesus a dagdaiset so totoo nen say iilaloan na sakey so mangisekar na inkasikara a sikakasil pian nagamoran iyan makapakelkelaw a bendisyon.

‘Aliwan ontan so nibaga ed siak,’ so nayarin isumlang na arum a managbasa. Nayarin aonen na saraya so Juan 3:16, a kuanton: “Ta ontanlay panangaro na Dios ed mundo, ya inter toy bogbogtong ya Anak to, a siopaman a manisia ed sikato so agnatawtaw, noagta nawalaan na andi-anggaan a bilay.” (King James Version) Balet, say ebat mi: ‘Anto, sirin, so nepeg tayon sisiaen? A si Jesus so aktual a nambilay? Siempre. A sikatoy Anak na Dios? Anggapoy panduaruwa! Tan lapud tatawagen na Biblia si Jesus a “Managbangat” tan “Katawan,” agta nepeg tayon sisiaen met so imbangat to, tuloken, tan tumboken tayo?’​—Juan 13:13; Mateo 16:16.

Pananumbok ed si Jesus

Ah, ditan onlelesa so problema! Dakel a totoon angibagaan a sikaray “nisalba” so ompatnag ya anggapoy tanton intensyon a tumboken odino tuloken si Jesus. Diad tua, oniay insulat na sakey a Protestantin klerigo: “Siempre, say pananisia tayo ed Kristo so kaukolan a mantultuloy. Balet say pangaksobi ed ontan so absoluton manepeg, odino kapilitan ya ontan, so andian na suportan balot ed Biblia.”

Diad kasunian, ililista na Biblia so imoral ya agagamil a karaklan la ed limog na totoon iisipen dan sikara lay “nisalba.” Nipaakar ed sakey a mantultuloy ed ontan iran dalan, oniay imbilin to ed saray Kristiano: “Ekal yo so marelmeng a too ed limog yo.” Maseguron aglabay na Dios a dutakan na marelmeng a totoo so Kristianon kongregasyon to!​—1 Corinto 5:11-13.

Anto so kabaliksan, sirin, na itumbok ed si Jesus, tan panon tayon nagawaan itan? Bueno, anto ta so ginawa nen Jesus? Kasin sikato so imoral? sakey a milalawanan? sakey a buanges? sakey a matila? Kasin sikatoy nansaol ed negosyo? Siempre andi! ‘Balet,’ ompan itepet mo, ‘kaukolan ko ta ya ekalen kon amin iratan a bengatla ed bilay ko?’ Parad ebat, konsideraen pay Efeso 4:17 ya anggad 5:5. Agto ibabagan awaten itayo na Dios antokaman so gawaen tayo. Imbes, ibabaga to a sikatayo so magmaliw a duma manlapud minumundon nasyones ya “abalang day amin a pakalikna ed maong ya ugali, . . . balet agyo naaral so Kristo ya ontan . . . Iwaklit yo so daan a personalidad a mipapakna ed datin kurang na kondukta yo . . . Say matakew so agla mantakew . . . Say pilalawanan tan amin a klase na karutakan odino inkaagum so ag-anggan komon nabitla ed limog yo, singa onkakapet ed masanton totoo . . . Ta kabat yo iya, a bidbiren yo itan ed inkasikayo, ya anggapoy milalawanan odino marutak a too odino maagum a too​—a mankabaliksan na pagmaliw a managtalintao​—so walaan na antokaman a tawir diad panarian nen Kristo tan say Dios.”

Tutumboken tayo ta si Jesus no agtayo anggan panggugunaetan so panbilay a mitunosan ed uliran to? Agta kaukolan a kimeyan tayo so pagmaliw a lalon mala-Kristo ed panagbilay tayo? Mataltalag itan ya importantin tepet, no bilang, a konsideraen na totoon mangibabaga, a singa ed walad relihyoson tract: “Onsingger ed Kristo natan​—ya ontan kayo la.”

Amasakbay so sakey ed babangatan nen Jesus a saray agmaridios a totoo et “gagawaen da a say agkanepegan a panangasi na Dios tayo bilang baraan parad malukak a kondukta tan itila ra so alenleneg ya Akankayarian ed sikatayo tan Katawan tayo, si Jesu-Kristo.” (Judas 4) Diad tua, panon tayon nagawan “bilang baraan [so panangasi] na Dios parad malukak a kondukta”? Nagawaan tayo itan diad pangipasen tayon sasakbongan na bagat nen Kristo iray ginagalan kasalanan a ginetma tayon mantultuloy a gawaen imbes a saray kasalanan lapud ag-inkayadyari na too a panggugunaetan tayon benegan. Maseguron agtayo labay so miabobon ed sakey ed sankabantogan ya ebanghelista ed Amerika, a kuanton agmo la kaukolan so “manlinis, ontunda, odino onbeneg.”​—Ipareng so Gawa 17:30; Roma 3:25; Santiago 5:19, 20.

Mamakiwas so Sisiaen

Nibaga ed dakel a totoo a “say panisia ed si Jesus” so sakey a pinsanan a gawa tan say pananisia tayo so agnakaukolan ya ontanlan mabiskeg pian mamatulok. Balet agmiaabobon so Biblia. Ag-imbaga nen Jesus a saray totoon onggagapo ed Kristianon kurso et nisalba. Imbes, inkuanto: “Siopaman a makapansungdo angga ed kasampotan satan met so nisalba.” (Mateo 10:22) Iyaaliling na Biblia so Kristianon kurso tayo ed sakey a lumba, a say kilalaban so pinagkapremyo ed sampot na satan. Tan ipapaseseg to: “Ombatik kayo ed paraan a nadampot yo itan.”​—1 Corinto 9:24.

Kanian, mas ni so nasasaglawi ed “pangawat ed Kristo” nen say basta pangawat ed saray bendisyon ya iyoopresi na sankamatalonggaringan a bagat nen Jesus. Kakaukolanen so katutulok. Oniay kuan nen apostol Pedro a say panangukom so onggapo “ed abung na Dios,” tan intuloy to: “Natan no satan so onggapon unona ed sikatayo, anto kasi so pansumpalan na saramay aliwan matulok ed maong a balita na Dios?” (1 Pedro 4:17) Kanian mas ni so nepeg tayon gawaen nen say basta idengel tan panisia. Kuan na Biblia a nepeg tayoy ‘magmaliw a mananumpal na say salita, aliwan dumerengel lambengat, a papalikdoen so inkasikatayo tekep na palson katunongan.’​—Santiago 1:22.

Saray Mismon Mensahe nen Jesus

Say libro ed Biblia ya Apocalipsis so walaan na saray mensahen nanlapud si Jesus, a nipasabi diad panamegley nen Juan ed pitoran inmunan Kristianon kongregasyon. (Apocalipsis 1:1, 4) Imbaga ta nen Jesus a lapud saray totoo diad sarayan kongregasyon so “angawat” la ed sikato et magenap la itan? Andi. Indayew toray gawa ra, say impansagpot da tan say impansungdo ra tan sinaglawi toy aro, pananisia, tan ministeryo ra. Balet inkuanto a say Diablo so manubok ed sikara tan sikara so natumangan a “balang sakey unong ed saray gawa to.”​—Apocalipsis 2:2, 10, 19, 23.

Diad ontan et deneskribe nen Jesus so mas babaleg a responsabilidad nen say natatalosan na maslak a totoo sano nibaga la ed sikaran say kilalaban so sakey ya “asumpal a gawa” bektaman a sikatoy “awaten” da ed sakey a relihyoson miting. Inkuan nen Jesus: “No siopaman a labay toy ontumbok ed siak, italirak toy inkasikato tan sakbaten toy panamairapan a kiew to tan mantultuloy ya ontumbok ed siak. Ta siopaman a labay toy nilaban so kamarerwa to et nabalang to; balet siopaman a nabalang toy kamarerwa to nisesengeg ed siak et naromog [to] itan.”​—Mateo 16:24, 25.

Italirak so inkasikatayo? Mantultuloy a tumboken si Jesus? Kakaukolanen toy sagpot. Satan so mamasimbalo ed bilay tayo. Ingen, talaga ta ya imbaga nen Jesus ya arum ed sikatayo so nayarin ‘nabalangay kamarerwa’​—ya ompatey parad sikato? On, satan a nengneng na pananisia so onsasabi lambengat katekep na pikakabat ed makapakelkelaw a bengabengatlan naaralan mo manlapud panagaral ed Salitay Dios. Mapatnag itan ed agew na impantupak ed si Esteban na saray relihyoson panatiko ya ‘agda nabenbenan so inkasikara sumpad kakabatan tan espiritu a diad panamegley na saman et mansasalita ed sikara.’ (Gawa 6:8-12; 7:57-60) Tan say ontan a pananisia so nidedemostra la ed panaon tayo na nilasus a Tastasi nen Jehova ya inatey ed saray panangipangawan a kampo na Nazi imbes a sumlangen da so nipasal-ed-Biblian konsiensia ra.a

Kristianon Seseg

Nepeg tayon ompeket a malet ed Kristianon pananisia tayo lapud, aliwan singa ed narerengelan mo ed pigaran simbaan odino ed saray relihyoson programa ed telebisyon, ibabaga na Biblia a sikatayo so nayarin niswawi. Sasaglawien to so nipaakar ed saray Kristiano ya anaynan ed “say maptek a basbas.” (2 Pedro 2:1, 15) Kaukolan tayo sirin a ‘mantultuloy a kimeyan tayo so dilin kilalaban tayo tekep na takot tan giwgiw.’​—Filipos 2:12; 2 Pedro 2:20.

Onia ta so pakatalos na inmunan-siglon Kristianos, totoon aktual ya akadngel ed imbangat nen Jesus tan apostoles to, nipaakar ed sayan bengatla? On. Amta ran walay kaukolan dan gawaen. Inkuan nen Jesus: “Onla kayo sirin tan manggawa na babangatan ed totoo na amin a nasyon, . . . ibangat yo iran mangunor ed amin a bengatlan inganggan ko ed sikayo.”​—Mateo 28:19, 20.

Duay bulan kayari impangibaga nen Jesus ed satan, 3,000 totoo so abautismoan ed sakey labat ya agew. Say bilang na saray mananisia so biglan dinmakel anggad 5,000. Saramay anisia so angibangat ed arum. Sanen nitakatak ira lapud panamasegsegang, satan so kinmana ingen ya angikayat ed mensahe ra. Kuan na Biblia ya aliwa lambengat a pigpigaran pangulo noagta “saramay nitaktakatak so linma ed amin a daldalin a mangiyaabawag ed maong a balita na salita.” Kayari na ngalngali 30 taon, nisulat sirin nen apostol Pablo a say maong a balita so “nipupulong ed amin a pinalsa ed leksab na tawen.”​—Gawa 2:41; 4:4; 8:4; Colosas 1:23.

Ag-angomberti si Pablo, a singa ed gagawaen na pigaran ebanghelista ed TV, diad pangibabagan: ‘Awat mo la natan si Jesus, tan sika so nisalban ando lan ando.’ Nisay kompiyansa to et singa ed samay Amerikanon klerigon nansulat a: “Tinedyer ak ni labat, . . . nisalba ak la.” Masulok a 20 taon kayarin personal a pinili nen Jesus si Pablo a mangipasabi ed Kristianon mensahe ed totoo na nasyones, sayan makulin apostol so nansulat: “Bubogbogen ko so laman ko tan gagawaen ko iyan aripen, pian, kapanpulong ko ed arum, siak a mismo so anggan panon et agmagmaliw ya agnaabobonan.”​—1 Corinto 9:27; Gawa 9:5, 6, 15.

Say kilalaban so libren langkap manlapud Dios. Satan so agnadampot. Ingen kakaukolanen to so pansagpot tayo. No walay mangiyopresi ed sika na mabalor a regalo tan agka angipanengneng na magenap ya apresasyon pian alaen tan awiten itan, say kakulangan na otang a linawam so nayarin managdag ed angiter ya iter itan ed sananey. Bueno, kaunongay balor na mangiiter-bilay a dala nen Jesu-Kristo? Satan so libren langkap, balet nepeg tayon idemostra so aralem ya apresasyon tayo parad satan.

Saray tuan Kristiano so walad nisalban kipapasen diad bengatlan sikaray walaay naabobonan a talindeg ed arap na Dios. Bilang sakey a grupo, say kilalaban da so segurado. Bilang sinansakey, nepeg a nakapet daray kakaukolanen na Dios. Anggaman ontan, nayarin onsaew itayo, ta inkuan nen Jesus: “No say siopaman et agmansiansian mikasakey ed siak, sikato so nibantak a singa sakey a sanga tan namagaan.”​—Juan 15:6.

‘Say Salitay Dios So Mabilay’

Say tongtongan ya asalambit diad gapo na inmunan artikulo so agawa ngalngali 60 taon lay apalabas. Siansian sisiaen nen Johnny a say kilalaban so manlalapu lambengat diad panamegley nen Jesu-Kristo, balet natatalosan ton kaukolan tayon dampoten itan. Siansian sikatoy kombensido ya ibabangat na Biblia so mogmon peteg a lapuan na ilalo parad katooan tan nepeg ya aralen tayo itan a makapakelkelaw a libro, napakiwas na satan, tan abuloyan itan a mamayubo ed sikatayo ed saray gawa na aro, pananisia, kaabigan, katutulok, tan sungdo. Pinabaleg toray ilalak to a manisia met ed saratan a bengatla, tan natan et naliliketan ed pakaimanon pababalegen da met iray anak da ed ontan met a paraan. Pirawat ton balang sakey so nawalaan na ontan a nengneng na pananisia, tan gagawaen to so antokaman a nayarian to pian nipasepsep itan ed puso tan isip na arum.

Si apostol Pablo so pinuyanan a mangisulat a “say salita na Dios so mabilay tan walaan na pakayari.” (Hebreos 4:12) Satan so mamasimbalo ed bilay. Satan so mamakiwas ed sika ed saray impapuson gawa na aro, pananisia, tan katutulok. Balet mas ni gawaen mo nen say basta “pangawat” lambengat ed kanonotan so ibabaga na Biblia. Aralen itan tan abuloyan itan a mamakiwas ed pusom. Paulyan mon igiya ka na kakabatan to. Ngalngali 5,000,000 mabulos a Tastasi nen Jehova diad masulok a 230 daldalin so mangiyoopresi na saray panangiyaral na Biblia ed ayaman. Pian nanengneng no antoy naaralan mo manlapud ontan a panagaral, sulaten iray managpalapag na sayan magasin. Say pananisia tan espiritual a biskeg a nagamoran mo so mamaliket ed sika!

[Paimano ed leksab]

[Kahon ed pahina 7]

AKin a Nepeg a “Manbanikel a Milaban Parad say Pananisia”?

Nipaarap so libro na Biblia a Judas ed “saray atawag . . . , ya inalwaran parad si Jesu-Kristo.” Ibabaga ta na satan a segurado so kilalaban da, sanen ‘inaawat [da] si Jesus’? Andi, imbaga nen Judas ed saratan a Kristiano a “manbanikel a milaban parad say pananisia.” Inikdan tora na taloran rason ed panggawa na ontan. Unona, say Dios so “angisalba na totoo manlapud dalin na Ehipto,” balet dakel ed sikara so sinmwawi ed saginonor. Komadua, anggan saray anghel so nanrebeldi tan nagmaliw a dedemonyo. Komatlo, dineral na Dios so Sodoma tan Gomora lapud sobran seksual ya imoralidad ya inagamil ed saraman a syudad. Ipaparungtal nen Judas irayan salaysay ed Biblia “bilang sakey a manamasakbay ya alimbawa.” On, anggan saray mananisia ya “inalwaran parad si Jesu-Kristo” so kaukolan a manalwar pian agniswawi manlapud tuan pananisia.​—Judas 1-7.

[Kahon ed pahina 8]

Dinan so Duga?

Kuan na Biblia: “Say sakey a too so nideklaran matunong diad panamegley na pananisia a nibiig manlapud saray gawa na ganggan.” Kuanto met: “Say sakey a too so ideklaran matunong ed panamegley na saray gawa, tan aliwan diad pananisia lambengat.” Dinan so duga? Sikatayo ta so niyaabawag a matunong diad pananisia odino diad saray gawa?​—Roma 3:28; Santiago 2:24.

Say mitunosan ya ebat manlapud Biblia et namparan susto.

Diad loob na saray siglo say Ganggan ya inter na Dios ed panamegley nen Moises so nankaukolan ed saray managdayew a Judio a manggawa na saray espisipikon bagat tan apay, pian ngilinan iray agew na piesta, tan pian mikompormi ed panagdieta tan arum niran kakaukolanen. Say ontan “iran gawa na ganggan,” odino basta “saray gawa,” so agla kapilitan kayari impangitarya nen Jesus ed nagnap a bagat.​—Roma 10:4.

Balet say bengatlan sinalatan na superlatibon bagat nen Jesus irayan gawa a ginawa ed silong na Mosaikon Ganggan so agmankabaliksan ya ibaliwala tayoray instruksion ed Biblia. Ibabaga to: “Panon nin karakel so dala nen Kristo . . . linisan to iray konsiensia tayo manlapud [say dagdaan ya] inatey iran gawa ta pian mangisaklang na sagradon serbisyo ed mabilay a Dios?”​—Hebreos 9:14.

Panon tayon “mangisaklang na sagradon serbisyo ed mabilay a Dios”? Sakey ni, ibabaga na Biblia ed sikatayo a labanan iray gawa na laman, resistian so imoralidad na mundo, tan arawian iray patit to. Ibabaga to: “Milaban ka ed maabig a pilalaban na say pananisia,” pian ekalen so “kasalanan a maininomay a mamabanteng ed sikatayo,” tan “batiken tekep na panagsungdo so lumban walad arapan tayo, legan ya onnenengneng tayon maong ed Manunan Ahente tan Manamayadyari na pananisia tayo, si Jesus.” Tan papasesegen itayo na Biblia ya ag ‘nakesawan tan isuko so kamarerwa tayo.’​—1 Timoteo 6:12; Hebreos 12:1-3; Galacia 5:19-21.

Agtayo nadadampot so kilalaban diad panggawa ed sarayan bengatla, ta anggapo so toon makapanggawa ed kapiganman na magenap pian magmaliw a makanepegan na ontan a makapakelkelaw a bendisyon. Balet, agtayo makanepegan ed sayan makapakelkelaw a langkap no agtayo idemostra so aro tan katutulok diad panggawa tayo na saray bengatlan ibabaga na Biblian labay na Dios tan Kristo a gawaen tayo. No anggaporay gawa pian nidemostra so pananisia tayo, say ibabaga tayo a tumboken si Jesus so onsaew a tuloy, ta malinlinew ya ibabaga na Biblia: “Say pananisia, no satan so anggapo iray gawa, so inatey ed sikaton dili.”​—Santiago 2:17.

[Litrato ed pahina 7]

Aralen so Biblia, tan abuloyan itan a mamakiwas ed sika