Say “Dalan, tan say Katuaan, tan say Bilay”

1, 2. Akin ya imposible so iyasingger ed si Jehova no diad inkasikatayon dili labat, tan anto so ginawa nen Jesu-Kristo parad sikatayo ed sayan pamaakaran?

ASALIM ta lay abalang? Nayarin walay nanonotan mon aminsan ya impanbiahem pian bisitaen so kaaro odino kanayon mo, balet ta agmo amtay dalan. Leleg mon didiretsoen so agmo kabisadon dalan, nayarin tinmunda ka pian ontepet na direksyon. Anto kasi naliknam no walay mapangasin too ya aglabat la angitoro ed direksyon a laen mo noagta inkuan to nin: “Tumbok mo ak labat. Ta iwanwan taka diman.” Seguradon nainawaan ka!

² Nibaga tayo ya ontan met so ginawa nen Jesu-Kristo parad sikatayo. No dia ed inkasikatayon dili labat, imposible so pakaasingger ed Dios. Lapu ed atawir a kasalanan tan ag-inkayadyari, say katooan so singa met abalang, “a niarawi ra ed bilay na Dios.” (Efeso 4:17, 18) Kaukolan tayoy tulong pian naromog tayo so dalan. Si Jesus, say mapangasin Uliran tayo, so aglabat angiyoprise na simbawa tan panangiwanwan; mas ni so ginawa to. Unong a naamtaan tayo ed Kapitulo 1, si Jesus so mangiimbita ed sikatayo, a kuanton: “Gala magmaliw kan patumbok ko.” (Marcos 10:21, NW) Ingen, inikdan to itayo met na makakombensi iran rason pian awaten itan ya imbitasyon. Aminsan et oniay imbaga nen Jesus: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6) Pantongtongan tayo so pigaran rason no akin a say pakaasingger ed Ama et posible lambengat diad panamegley na Anak. Insan, base ed saratan a rason, singbaten tayo no panon a si Jesus so peteg a say “dalan, tan say katuaan, tan say bilay.”

Makanan Betang ed Gagala nen Jehova

3. Akin a diad panamegley nen Jesus so pakaasingger ed Dios?

³ Unona ed amin, say pakaasingger ed Dios et diad panamegley nen Jesus lapud pinili nen Jehova iyan Anak to a pangiteran ed sayan sankaimportantian a betang.a Sikato so ginawa na Ama a manunan persona a manumpal ed amin a gagala To. (2 Corinto 1:20; Colosas 1:18-20) Pian natalosan so makanan betang na Anak, kaukolan tayon nonoten no anto so agawa ed Hardin na Eden, sanen akinonong so inmunan sanasawa ed si Satanas diad impanrebelde ed si Jehova.​—Genesis 2:16, 17; 3:1-6.

4. Anton isyu so pinalesa na rebelyon ed Eden, tan anto so deneside nen Jehova a gawaen pian resolbien so isyu?

⁴ Lapud impanrebelde ed Eden, oniay linmesan isyu ya angapekta ed interon uniberso: Kasin duga so paraan na panguuley nen Jehova a Dios ed saray pinalsa to? Pian resolbien iyan makanan isyu, denesidi nen Jehova ya ibaki diad dalin so sakey ya ayadyarin espiritun anak. Say misyon a sumpalen na sayan anak et importantin tuloy, salanti, iter to so bilay to pian iyalangon so inkasoberano nen Jehova tan onkanan dondon pian niliktar so sankatooan. Diad panmatoor to anggad patey, nasolbar na satan ya apilin anak so amin a probleman resulta na inpanrebelde nen Satanas. (Hebreos 2:14, 15; 1 Juan 3:8) Balet, minilmilyon so ayadyari ya espiritun ananak nen Jehova. (Daniel 7:9, 10) Siopa ed sikara so pilien ton manumpal ed sayan sankaimportantian ya asainmin? Pinili nen Jehova so “bogbogtong ya Anak” to, a tinawag ed saginonor a Jesu-Kristo.​—Juan 3:16.

5, 6. Panon ya impatnag nen Jehova a walay talek to ed Anak to, tan anto so akabasian na sayan talek?

⁵ Kasin pankelawan tayo ni a si Jesus so pinili nen Jehova? Andin balot! Sigpot a panmamatalkan na Ama so bogbogtong ya Anak to. Diad tua, nilasus a taon antis na isabi na Anak to diad dalin, impasakbay la nen Jehova a sayan Anak so mansiansian matoor anggaman makasagmak na dakel tan nanduruman klase na kairapan. (Isaias 53:3-7, 10-12; Gawa 8:32-35) Isipen pa so labay ya ibaga na satan. Say Anak, a singa met ed amin nin arum ya intelihentin pinalsa, so bulos a makapandesisyon, sirin et nayarian ton pilien so dili ton panlabayan. Ingen, ontan lay talek nen Jehova ya impasakbay to lay panmatoor na Anak to. Anto so akabasian na satan a talek? Nibasi itan ed pikakabat. Kabkabat a maong nen Jehova so Anak to tan amta to no kaunongay pankaliktan na Anak a mamaliket ed Sikato. (Juan 8:29; 14:31) Inaro na Anak so Ama to, tan inaro met nen Jehova so Anak to. (Juan 3:35) Satan ya aroan na Sanama so pinaelet na agnapakset a bedber na pankakasakey tan talek.​—Colosas 3:14.

⁶ Lapud satan ya importantin betang na Anak, tan ed talek na Ama ed sikato, ontan met ed aron mamebedber ed sikaran Sanama, agta agla pankelawan a say pakaasingger ed Dios et posible dia lambengat ed panamegley nen Jesus? Balet, wala ni sananey a rason no akin a say Anak labat so makapangiwanwan ed sikatayo ed Ama.

Say Anak Lambengat so Sigpot a Mikabat ed Ama

7, 8. Akin a susto si Jesus sanen imbaga ton anggapo lay arum a sigpot a mikabat ed Ama “nilikud so Anak”?

⁷ Walaray kakaukolanen a nepeg a tooren pian makaasingger itayo ed si Jehova. (Salmo 15:1-5) Tan siopa ta ni so mikabat, noag say Anak, ed no anto so kakaukolanen pian nakapet iray estandarte na Dios tan nagamoran so panangabobon To? Oniay inkuan nen Jesus: “Amin a bengabengatla initer nen Amak ed siak; tan anggapoy mikabat ed Anak, nilikud so Ama; tan anggapo met so mikabat ed Ama, nilikud so Anak, tan say labay na Anak a pangipuyanan ed sikato.” (Mateo 11:27) Amtaen tayo no akin a susto tan makatunongan labat a nibaga nen Jesus ya anggapo so sigpot a mikabat ed Ama “nilikud so Anak.”

⁸ Bilang “panguloan ed amin a pinalsa,” say Anak so walaan na nikadkaduman siglaotan ed si Jehova. (Colosas 1:15) Isipen pa so inkaapit na siglaotan na Sanama ya atibukel legan na agnatantian karukey na panaon sanen siksikara nin dua, salanti, manlapud gapoy panamalsa anggad inkiwala na arum nin espiritun pinalsa. (Juan 1:3; Colosas 1:16, 17) Isipen pa labat so alay abig a pankanawnawa a nakaiba na Anak so Ama to, a natalosan so kanonotan nen Ama to nipaakar ed saray bengabengatla, tan naaral so linawa, saray estandarte, tan paraan To. Peteg a makatunongan labat so pangibaga a si Jesus so mas mikabat ed Ama to nen say siopaman ni. Sayan inkamaapit so maseguron tinmulong ed si Jesus ya ipakabat so Ama to ed paraan ya anggapo lay arum a makagawa.

9, 10. (a) Diad antoran paraan ya impakabat nen Jesus so Ama to? (b) Pian nagamoran so panangabobon nen Jehova, antoy nepeg tayon gawaen?

⁹ Saray bangat nen Jesus so angipatnag na aralem a pikakabat to ed panag-isip tan liknaan nen Jehova tan no anto so kakaukolanen To ed saray managdayew ed Sikato.b Impakabat nen Jesus so Ama to ed sananey nin matalonggaring a paraan. Oniay inkuan nen Jesus: “Say akanengneng ed siak anengneng to so Ama.” (Juan 14:9) Naspot ya inalig nen Jesus so Ama to ed amin ya imbaga tan ginawa to. Kanian no babasaen tayo ed Biblia so nipaakar ed si Jesus, a singa say mapuersa tan makapasagyat iran imbabalikas to sano manbabangat, say inkamaabagey to a sengegay impanpaabig to ed arum, tan say piliklikna to ya akatedteran na saray lua to, nayarin nilitrato tayo’d isip tayo a si Jehova so mismon mansasalita tan manggagawa ed saratan. (Mateo 7:28, 29; Marcos 1:40-42; Juan 11:32-36) Saray paraan tan linawa na Ama so naspot a niparungtal diad saray salita tan kiwas na Anak. (Juan 5:19; 8:28; 12:49, 50) Kanian, pian nagamoray abobon nen Jehova, kaukolan tayon talinengen so bangabangat nen Jesus tan tumboken so ehemplo to.​—Juan 14:23.

¹⁰ Lapud kabkabat a maong tan naspot ya aaligen nen Jesus si Jehova, agpankelawan a dinitermina nen Jehova a sayan Anak so paraan pian makaasinger itayo ed Sikato. Natan ta atalosan tayo la no akin a makaasingger itayo ed si Jehova panamegley labat nen Jesus, singbaten tayo so kabaliksan na saray salita nen Jesus a: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.”​—Juan 14:6.

“Siak so Dalan”

11. (a) Akin a diad panamegley labat nen Jesus so pakawalaan tayo na naabobonan a relasyon ed Dios? (b) Panon ya idadanet na saray balikas a nabasa ed Juan 14:6 so nikadkaduman betang nen Jesus? (Nengnengen so paimano’d leksab.)

¹¹ Naaralan tayo la ya agtayo makaasingger ed Dios noag diad panamegley nen Jesus. Espisipiko tayo pan usisaen natan no antoy kabaliksan na saya parad sikatayo. Si Jesus so “dalan” lapud dia labat ed panamegley to so pakawalaan tayo na naabobonan a relasyon ed Dios. Akin ya ontan? Diad impanmatoor to anggad patey, imbagat nen Jesus so bilay to pian onkanan dondon. (Mateo 20:28) No anggapo itan a probisyon, imposible so pakaasingger tayo ed Dios. Say kasalanan et singa samben ed baetan na totoo tan Dios, lapud masanto si Jehova tan agton balot abobonan so kasalanan. (Isaias 6:3; 59:2) Balet inekal na bagat nen Jesus itan a makakasbel; sinakbongan na satan so kasalanan. (Hebreos 10:12; 1 Juan 1:7) No awaten tayo so probisyon na Dios panamegley nen Kristo tan nawalaan na pananisia ed satan, paboran itayo nen Jehova. Satan so alenleneg a polaing pian sikatayoy ‘makapipulangan ed Dios.’c​—Roma 5:6-11.

12. Diad antoran pantalos a si Jesus so “dalan”?

¹² Si Jesus so “dalan” no nipaakar ed pikakasi. Dia lambengat ed panamegley to a makapitongtong itayo ed si Jehova diad pikakasi tan makaseguro a saray impapuson kerew tayo so dengelen. (1 Juan 5:13, 14) Inkuan a mismo nen Jesus: “No onkerew kayo na bengatla ed Ama, sikato so iter to ed sikayo ed ngaran ko. . . . Kerew kayo, et awaten yo, pian say gayaga yo nayadyari.” (Juan 16:23, 24) Matukotukoy sirin, a diad ngaran nen Jesus et makaasingger itayo ed si Jehova diad pikakasi tan sikatoy natawag tayon ‘Ama mi.’ (Mateo 6:9) Si Jesus so “dalan” ed sananey nin pantalos, salanti, diad panamegley na ehemplo to. Unong a nibaga la, naspot ya inalig nen Jesus so Ama to. Impanengneng sirin na ehemplo nen Jesus no panon so pambilay pian napaliket si Jehova. Kanian, pian makaasingger ed si Jehova, kaukolan tayon tumboken iray bakat nen Jesus.​—1 Pedro 2:21.

“Siak so . . . Katuaan”

13, 14. (a) Panon a si Jesus so matua ed panagsalita to? (b) Pian magmaliw si Jesus a “katuaan,” anto so kaukolan ton gawaen, tan akin?

¹³ Lawas a sinalita nen Jesus so katuaan nipaakar ed mapropetikon salita na Ama to. (Juan 8:40, 45, 46) Si Jesus so agbalot angibalikas na panamalikdo. (1 Pedro 2:22) Anggan saray onsusumpa ed sikato so angaksobi ya imbangat to so “katuaan [na] dalan na Dios.” (Marcos 12:13, 14) Balet, sanen inkuan nen Jesus a “siak so . . . katuaan,” agto lambengat tutukoyen so nipaakar ed impangipakabat to ed katuaan panamegley na panagsalita, panagpulong, tan panagbangat. Aliwa labat a say pangitongtong to ed satan so nalalanor.

¹⁴ Tandaan a nilasus nin taon antis na satan, pinuyanan nen Jehova iray managsulat na Biblia ya irekord so dakel a propesiya nipaakar ed Mesias, odino Kristo. Sarayan propesiya so angipasakbay ed saray detalye nipaakar ed bilay, ministeryo, tan ipapatey to. Niarum ni, walaray akatekep ed Mosaikon Ganggan a mangiyaanino ed say Mesias. (Hebreos 10:1) Kasin manmatoor si Jesus anggad patey, diad ontan et nasumpal to so amin ya impropesiya nipaakar ed sikato? Diad satan labat a niyalangon si Jehova bilang Dios na tuan propesiya. Satan ya ambelat a responsabilidad so nipasakbat ed si Jesus. Diad paraan na impanbilay to, salanti, diad amin a salita ya imbesngaw to tan ed amin a ginawa to, pinaneknekan nen Jesus a katuaan ya amin iramay panangiyanino nipaakar ed sikato. (2 Corinto 1:20) Kanian, si Jesus so “katuaan.” Nibaga a say impropesiya nen Jehova so tinmua diad inkatoo nen Jesus.​—Juan 1:17; Colosas 2:16, 17.

“Siak so . . . Bilay”

15. Anto so kabaliksan na panisia ed Anak, tan anto so resulta na panggawa na ontan?

¹⁵ Si Jesus so “bilay,” lapud dia ed panamegley to labat so pakagamoran tayo na bilay, salanti, say “bilay a peteg.” (1 Timoteo 6:19) Oniay inkuan na Biblia: “Say manisia ed Anak walay bilay ton andi-anggaan; balet say agmangunor ed Anak agto nanengneng so bilay, say sanok ingen na Dios manayam ed sikato.” (Juan 3:36) Anto so kabaliksan na panisia ed Anak na Dios? Kabaliksan ton kombinsido itayo ya ag-itayo makagamor na bilay no anggapo si Jesus. Niarum ni, kabaliksan na satan ya ipapatnag tayoy pananisia tayo panamegley na saray gawa, a mantultuloy a paibangat ed si Jesus, tan gawaen so anggaay nayarian tayo a tumboken so bangabangat tan ehemplo to. (Santiago 2:26) Sirin, say panisia ed Anak na Dios so mangitonton ed bilay ya andi-anggaan, salanti, imortal ya espiritun bilay diad tawen parad say “melag a pulok” na alanaan na espiritu iran Kristiano, tan perpekton bilay bilang too diad paraison dalin parad say “baleg ya ulop” na ‘arum a karnero.’​—Lucas 12:32; 23:43; Apocalipsis 7:9-17; Juan 10:16.

16, 17. (a) Panon a si Jesus et nibabagan “bilay” ed anggan saramay inaatey la? (b) Antoy pakapanmatalekan tayo?

¹⁶ Panon, balet, iramay inaatey la? ‘Bilayen’ met ira nen Jesus. Sanen magano lan paolien nen Jesus si kaaro ton Lazaro, oniay inkuan to ed si Marta, ya agin bii nen Lazaro: “Siak so kiolian, tan say bilay. Say manisia ed siak, anggan inatey la, nabilay ni.” (Juan 11:25) Inmatalek nen Jehova ed Anak to iray “tombok na patey tan say Hades,” ya inikdan to na pakapanyari a mamaoli. (Apocalipsis 1:17, 18) Diad panamegley na saratan a tombok, lukasan na niglorian Jesus iray puerta na Hades, diad ontan et nibulos so amin a walad kaslakan a lubok na katooan.​—Juan 5:28, 29.

¹⁷ Diad sayan simplin balikas a “siak so dalan, tan say katuaan, tan say bilay,” sinegek nen Jesus so gagala na bilay to tan ministeryo to ed dalin. Makabkabaliksan iratan a salita parad sikatayo natan. Tandaan a say katuloyan na satan ya imbaga nen Jesus et: “Anggapo so ondateng ed Ama, noag diad panamegley ko.” (Juan 14:6) Saratan a salita nen Jesus so makanakana natan a singa met nen imbalikas to iratan. Sigpot a makapanmatalek itayo sirin ya ag-itayon balot nabalang no tumboken tayo si Jesus. Sikato labat so mogmon makapangiwanwan ed sikatayo ed dalan ya ompugta “ed Ama.”