Juan 14:6—“Siak so Dalan tan say Katuaan tan say Bilay”

“Inkuan nen Jesus ed sikato: ‘Siak so dalan tan say katuaan tan say bilay. Anggapoy makasabi ed Ama no aliwan diad panamegley ko.’”—Juan 14:6, Balon Mundo a Patalos.

“Si Jesus kuanto ed sikato, Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.”—Juan 14:6, Say Biblia.

Say labay ya ibaga na Juan 14:6

No labay na sakey ya dayewen so Ama, si Jehovaa a Dios, kaukolan ton bidbiren so importantin betang nen Jesus.

“Siak so dalan.” Intarya nen Jesus so “dalan” pian makaasingger tayod Dios tan awaten to itayo. Singa bilang, no manpikasi tayod Dios, kaukolan tayon kerewen itan diad ngaran nen Jesus. (Juan 16:23, 24) Lapud impatey nen Jesus, posible lan makapikareenan iray totoo ed Dios, odino nawalaan iray maong ya relasyon ed sikato. (Roma 5:8-11) Angitilak met si Jesus na maong ya alimbawa ya nepeg ya aligen na saramay labay dan paliketen so Dios.—Juan 13:15.

“Siak so . . . katuaan.” Lanang ya katuaan so ibabaga nen Jesus tan impanengneng to met itan ed kabibilay to. (1 Pedro 2:22) Naaralan na sakey so katuaan nipaakar ed Dios, no ondengel ed si Jesus. (Juan 8:31, 32) Si Jesus met so “katuaan” lapud sinumpal toy propesiya ya walad Biblia. Agawa iray impromisa na Dios lapud sikato.—Juan 1:17; 2 Corinto 1:19, 20; Colosas 2:16, 17.

“Siak so . . . bilay.” Inter nen Jesus so bilay to pian saramay mangipanengneng na pananisia ed sikato et nawalaan na bilay ya andi-anggaan. (Juan 3:16, 36) Sikato met so “bilay” parad saramay inatey la, ta bilayen to ra manlapud patey.—Juan 5:28, 29; 11:25.

“Anggapoy makasabi ed Ama no aliwan diad panamegley ko.” Saramay malabay ya nawalaan na maapit a relasyon ed Dios et kaukolan dan awaten so nikaduman betang nen Jesus. Nagawaan da itan no manpikasi rad Dios diad ngaran nen Jesus, pian nipanengneng dan bibidbiren day autoridad nen Jesu-Kristo. (Juan 15:16) Bibidbiren da met ya posible labat so kililiktar lapud si Jesus.—Gawa 4:12; Filipos 2:8-11.

Konteksto na Juan 14:6

Nabasa ed Juan kapitulo 13 anggad 17 iray sampot lan bilin nen Jesus ed saray 11 ya matoor ya apostol to diad samay labi antis ya ompatey. Diad kapitulo 14 pinaseseg nen Jesus iray disipulo to ya ipatnag day pananisia ed sikato tan ed Ama to, tan aroen tan unoren da ra. (Juan 14:1, 12, 15-17, 21, 23, 24) Impaamta tod sikara so maapit ya relasyon tod Ama to. (Juan 14:10, 20, 28, 31) Anggaman asingger lan ompawil si Jesus ed tawen, impaseguro tod saray disipulo to ya agto ran balot paulyanan. (Juan 14:18) Impromisa to met ed sikara so “mananulong” tan tinawag to itan ya “say masanton espiritu, ya ibaki na Ama diad ngaran ko.” (Juan 14:25-27) Diad tulong na saratan tan arum ni, imparaan nen Jesus iray papatumbok to pian nasarag da iray onsabin subok.