Ipakabat so Katuaan Nipaakar ed si Jesus
1 Saray alanaan a Kristiano, a tutulongan na arum a karneron kakaiba ra, ‘so walaan na [kimey] a panagtasi ed si Jesus.’ (Apoc. 12:17) Saya so importantin asainmin, lapud say kilalaban so posibli labat diad panamegley to.—Juan 17:3; Gawa 4:12.
2 ‘Say Dalan, say Katuaan, tan say Bilay’: Inkuan nen Jesus: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6) Diad panamegley lambengat nen Jesus, bilang ‘say dalan,’ a makaasingger itayo ed Dios diad pikakasi tan nawalaan na naabobonan a relasyon ed Sikato. (Juan 15:16) Si Jesus so “katuaan” lapud asumpal ed sikato iray propesiya tan anino a lugan na Hebreon Kasulatan. (Juan 1:17; Col. 2:16, 17) On, say manunan gagala na tuan propesiya et pian liwawaan so importantin betang to diad pakasumpal na gagala na Dios. (Apoc. 19:10) Sakey ni, si Jesus et “say bilay.” Pian nagamoran so bendisyon ya andi-anggaan a bilay, amin so nepeg a mangagamil na pananisia ed dondon bagat to.—Juan 3:16, 36; Heb. 2:9.
3 Ulo tan Manuuley lan Ari: Nepeg met a bidbiren na totoo so malaklaknab ya administratibon autoridad ya inmatalek nen Jehova ed Anak to. Si Jesus so nitrono la bilang Ari ed Panarian na Dios—‘dia ed sikato wala so katutulok na saray katooan.’ (Gen. 49:10) Sakey ni, sikatoy tinuro nen Jehova bilang Ulo na kongregasyon. (Efe. 1:22, 23) Kaukolan tayon tulongan iray iyaaralan tayo na Biblia pian natalosan da no panon ya aasikasoen nen Jesus so kongregasyon tan uusaren toy “matoor tan makabat ya aripen” a mangitarya na espiritual a “tagano ed panaon a kinepeg to.”—Mat. 24:45-47.
4 Mapangasin Atagey a Saserdote: Lapud asagmak to iray subok tan kairapan bilang too, “nayarian [nen Jesus] a tulongan iramay nasusubok.” (Heb. 2:17, 18, NW) Agaylan makapaliket parad ag-ayadyarin totoo a naamtaan dan mililikna si Jesus ed saray kaleteyan da tan mapangasin oneey-ey parad sikara! (Roma 8:34) Diad letnegan na bagat nen Jesus tan diad panamegley na saray serbisyo to bilang Atagey a Saserdote, makaasingger itayo ed si Jehova “a walaan na bulos a panagsalita” ta pian nagamoran tayo so “tulong diad dugan panaon.”—Heb. 4:15, 16, NW.
5 Komon ta saray sagpot tayon pakabatan so arum na katuaan nipaakar ed si Jesus so mamakiwas ed sikaran ontulok tan manlingkor a kaiba tayo.—Juan 14:15, 21.