LEKSION 28
Pisalamatan si Jehova tan si Jesus Lapud Ginawa Da Parad Sika
Antoy naliknam no walay inter ed sika na kaarom ya balibalin regalo? Segurado ya malikeliket ka tan misalamat ka ed regalo to. Inikdan itayo nen Jehova tan Jesus na sankarakepan ya regalo. Anto itan, tan panon tayo iran pisalamatan lapud satan?
1. Panon tayon nipanengneng so pisasalamat ed Dios tan ed Kristo lapud ginawa da parad sikatayo?
Ibabaga na Biblia ya “kada sakey a mangipapanengneng na pananisia ed [si Jesus]” et makapanbilay ya anggapoy anggaan. (Juan 3:16) Antoy labay ya ibaga na pangipanengneng na pananisia? Aliwa labat itan ya basta panisia ed si Jesus. Diad saray desisyon tan gagawaen tayo, kailangan met ya nanengneng so pananisia tayo. (Santiago 2:17) No ipanengneng tayoy pananisia tayo diad saray gagawaen tan ibabaga tayo, onelet so pikakaaro tayo ed si Jesus tan ed Ama to, si Jehova.—Basaen so Juan 14:21.
2. Anton espisyal ya okasyon so ontulong pian nipanengneng tayoy pisasalamat ed ginawa nen Jehova tan Jesus?
Diad samay labi antis na impatey nen Jesus, imbaga to ed saray papatumbok to so sakey nin paraan pian nipanengneng so pisasalamat ed sakripisyo to. Imbaga to ed sikara ya mantitipon ira parad sakey ya espisyal ya okasyon ya tinawag ed Biblia ya “Pangdem na Katawan,” odino Memoryal na impatey nen Kristo. (1 Corinto 11:20) Labay nen Jesus ya nodnonoten na saray apostol to—tan na amin ya tuan Kristiano kayari da—so impangiter to na bilay to parad sikatayo. Oniay ingganggan to: “Itultuloy yon gawaen iya bilang pannodnonot ed siak.” (Lucas 22:19) No onatendi ka ed Memoryal, ipapanengneng mo ya misalsalamat ka ed baleg ya panangaro nen Jehova tan Jesus ed sikatayo.
DAKEL NI NAARALAN MO
Amtaen no anto ni ray arum ya paraan ya nipanengneng moy pisasalamat ed baleg ya panangaro nen Jehova tan Jesus. Amtaen met no akin ya importante so Memoryal na impatey nen Kristo.
3. Pakiwasen itayo na pisasalamat
Imadyin mon walay angiligtas ed sika nen nalelener ka. Bastam labat kasi lingwanan so ginawa to parad sika? Odino manggawa kay paraan pian pisalamatan mo ed ginawa to?
Utang tayo so bilay tayod si Jehova. Basaen so 1 Juan 4:8-10, insan ebatan iraya:
Akin et espisyal ya regalo imay sakripisyo nen Jesus?
Antoy nibagam ed ginawa nen Jehova tan Jesus parad sika?
Panon tayon nipanengneng so pisasalamat ed ginawa nen Jehova tan Jesus parad sikatayo? Basaen so 2 Corinto 5:15 tan 1 Juan 4:11; 5:3. Kayarin basaen so kada teksto, ebatan iya:
Base ed satan ya teksto, antoy gawaen tayo pian nipanengneng so pisasalamat?
4. Aligen si Jesus
Say sakey nin paraan ya nipanengneng tayo so pisasalamat et no aligen tayoy Jesus. Basaen so 1 Pedro 2:21, insan ebatan iya:
Anto ray paraan ya naalig moy Jesus?
Pinabpabli nen Jesus so Salita na Dios, impulong toy maong a balita, tan tinulongan toy arum
5. Onatendi ed Memoryal na impatey nen Kristo
Pian naamtaan no antoy agawa diad samay inggapo nen Jesus ya Pangdem na Katawan, basaen so Lucas 22:14, 19, 20. Insan ebatan iraya:
Antoy agawa diad samay Pangdem na Katawan?
Antoy isisimbolo na tinapay tan alak?—Nengnengen so bersikulo 19 tan 20.
Labay nen Jesus ya tinaon ya nodnonoten na saray disipulo to so Pangdem na Katawan diad samay mismon anibersaryo na impatey to. Kanian tinaon ya mantitipon iray Tasi nen Jehova pian nodnonoten so impatey nen Kristo diad paraan ya ingganggan to. Pian naamtaan so tungkol ed sayan importantin pantitipon, i-play so VIDEO. Insan ebatan iya.
Antoy gagawaen no Memoryal?
Walay isisimbolo na tinapay tan alak. Isisimbolo na tinapay so perpekton laman nen Jesus ya insakripisyo to parad sikatayo. Isisimbolo na alak so dala to
IBABAGA NA ARUM: “Basta manisia kad Jesus, ligtas ka la.”
Panon mon usaren so Juan 3:16 tan Santiago 2:17 pian ipanengneng ya aliwan ontan labat?
SUMARYO
Misalsalamat tayo ed ginawa nen Jesus parad sikatayo no ipanengneng tayoy pananisia ed sikato tan onatendi ed Memoryal na impatey to.
Rebyu
Antoy labay ya ibaga na pangipanengneng na pananisia ed si Jesus?
Panon mon nipanengneng so pisasalamat ed ginawa nen Jehova tan Jesus parad sika?
Akin et importante so iyatendi ed Memoryal na impatey nen Kristo?
DISKOBRIEN
Antoy ibales tayo lapud insakripisyo na Kristo so bilay to?
Aralen ni so tungkol ed pananisia tan no panon tayon nipanengneng itan.
“Ipanengneng Moy Pananisiam ed Saray Promisa nen Jehova” (Say Panag-bantayan, Oktubre 2016)
Diad istoryay bilay na sakey ya bii, ya say title to et, “Nagmaliw Ak ya Malinis, Maliket, tan Buo,” amtaen so epekto ed sikato nen naamtaan toy impansakripisyo na Kristo.
“Uumanen na Biblia so Bilay” (Say Panag-bantayan-E, Agosto 1, 2011)
Amtaen no akin ya no Memoryal et pigpigara labat so oniinum na alak tan mamangan na tinapay.