Amin so Magmaliw a Bulos

“Ibilang ko a saray irirap ed sayan kaplesan a panaon ag-ira makana ya ipara ed arapen a gloria a nipuyan ed sikatayo naani. Ta say maseseg a panpilalek na pinalsa aalagden to so kipatnag na saray anak na Dios. Ta say pinalsa impauleyan ed kaapaan, aliwan lapud panlabay to, noag say makalanor so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios. Ta amta tayo a lapag a pinalsa maningel ira ya amin tan maniirap ira a mananak [“mankakaiba,” NW] ya anggad natan.”​—ROMA 8:18-22.

DIAD sayan kabiangan na sulat to ed saray Kristiano ed Roma, angiter si apostol Pablo na matalonggaring a balikas no akin a say bilay et andian na tuan kawayangan tan mabetbet a tuloy a pakapatnagay kaapaan tan ot-ot. Impaliwawa to met no panon tayon nagamoran so tuan kawayangan.

“Irirap ed Sayan Kaplesan a Panaon”

Agpalelemewen nen Pablo so “irirap ed sayan kaplesan a panaon” sanen inkuanton saratan et “ag-ira makana ya ipara ed arapen a gloria a nipuyan ed sikatayo naani.” Legay panaon nen Pablo ontan met ed saginonor, pirmin apairap iray Kristiano ed silong na masebeg a diktador ya uley na saray Romanon autoridad, ya agtanto inkabilangan iray kanepegan na too. Sanen apanisiay Roma a saray Kristiano et kakabusol na Estado, inuleyan to ra ed pirmin panaglames. Inkuan nen manag-awaran a si J. M. Roberts: “Dakel a Kristiano ed kabisera [Roma] so seguradon andi-panangasin pinapatey diad arena odino pinopoolan a mabilay.” (Shorter History of the World) Nipaakar ed sarayan biktima na panamasegsegang nen Nero, oniay inkuan na sananey a report: “Arum so impasak, arum so indadait ed saray katat na ayayep tan impausil-usilan ed saray aso, arum so kinakalboan na alkitran tan sinelselan pian onkanan mandarlang iran banoot sano ambilunget la.”​—New Testament History, nen F. F. Bruce.

Seguradon pinirawat na saraman ya asasakbay a Kristiano so kawayangan manlapud ontan a panaglames, balet ta sikaray agmalabay ya onsunggay ed saray bangat nen Kristo pian nagamoran itan. Nansiansia iran sigpot a neutral, alimbawa, diad impanpuligesgesan na manuuley iran autoridad na Roma tan saramay Judion milalaban parad kawayangan a singa saray Zealot. (Juan 17:16; 18:36) Parad saray Zealot, “say panongtong nipaakar ed ed isalet na Dios ed aturon panaon to so agkinaukolan ed saman a peles a panaon na kaatapan.” Inkuanto, say nakaukolan et say “marawal a kiwas sumpad kabusol,” say Roma. (New Testament History) Dumay kanonotan na saray inmunan Kristiano. Parad sikara et say “panalagar ed isalet na Dios ed aturon panaon to” so alenleneg a realistikon pilien. Kombinsido iran say isalet labat na Dios so permanentin mamatunda ed “irirap ed sayan kaplesan a panaon” tan mangitarok na tua, magnayon a kawayangan. (Miqueas 7:7; Habacuc 2:3) Balet, sakbay tayon konsideraen no panon a nagawa itan, usisaen tayo nin unona no akin a “say pinalsa impauleyan ed kaapaan.”

“Impauleyan ed Kaapaan”

Dia, say salitan “pinalsa,” kuan nen Benjamin Wilson diad The Emphatic Diaglott, et agto kabaliksay “ayayep tan andiay bilay a pinalsa” a singa isusuheri na arum noagta, imbes, “amin a katooan.” (Ikompara so Colosas 1:23.) Ontutukoy itan ed intiron pamilya na too​—amin tayo a manpirawat na kawayangan. Sikatayoy “impauleyan ed kaapaan” lapud inkiwas na inmunan atateng tayo. Agawa iya “aliwan lapud panlabay [tayo]” odino bilang resulta na dilin pinili na indibidual. Atawir tayoy kipapasen tayo. Unong ed Makasulatan a punto de bista, nalilingo si Rousseau sanen inkuanto a “nianak so too a bulos.” Balang sakey ed sikatayo so nianak ed inkaaripen ed kasalanan tan ag-inkayadyari, naaripen, a singa panangibaga, ed sakey a sisteman napnoy pakadismayaan tan inkaapa.​—Roma 3:23.

Akin ya onia so kipapasen? Lapud say inmunan atateng tayo, di Adan tan Eva, so nankaliktan a magmaliw a “singa Dios,” pian nawalaan na sigpot a dilin-panetermina, a makapandesidi iran bukor ed no anto so maong tan mauges. (Genesis 3:5) Imbaliwala ra so sakey a makanan sengegan na kawayangan. Say Manamalsa labat so walaan na sigpot a kawayangan. Sikatoy Sankatalbaan a Soberano. (Isaias 33:22; Apocalipsis 4:11) Say kawayangan na too et limitado. Satan no akin a pinaseseg nen babangatan a Santiago iray Kristiano ed panaon to a pauleyan ed “ayadyarin katunongan [“ya unong ed kawayangan,” NW].”​—Santiago 1:25.

Makanepegan a pinataynan nen Jehova si Adan tan Eva manlapud sankatalbaan a pamilya to, tan inatey ira bilang resulta. (Genesis 3:19) Balet komusta iray kapolian da? Sipapangasi, anggaman say nipatawir da lambengat et say ag-inkayadyari, kasalanan, tan ipapatey, siansian inabuloyan ira nen Jehova a nawalaan na ananak. Kanian “say patey ed satan linma ed amin a too.” (Roma 5:12) Diad satan a pantalos et say Dios “impauleyan [toy pinalsa] ed kaapaan.”

“Say Kipatnag na Saray Anak na Dios”

Impauleyan nen Jehova so pinalsa ed kaapaan ‘diad basiyan na ilalo’ a nasabin say kawayangan so nipawil ed pamilya na too diad panamegley na saray aktibidad na “saray anak na Dios.” Siopa irayan “anak na Dios”? Sikaray babangatan nen Jesu-Kristo a, singa arum ed ‘pinalsan [too],’ so nianak a naaripen ed kasalanan tan ag-inkayadyari. Manlapula’d inkianak et andian ira na kanepegan a pasen ed malinis, naspot a sankatalbaan a pamilya na Dios. Balet ta walay bengatlan makatantandan ginawa nen Jehova parad sikara. Diad panamegley na dondon bagat nen Jesu-Kristo, sikaray imbulos To manlapud inkaaripen ya atawir a kasalanan tan nideklara iran “matunong,” odino malinis ed espiritual a paraan. (1 Corinto 6:11) Insan tinagibi to ra bilang “anak na Dios,” ya impawil to ra ed sankatalbaan a pamilya to.​—Roma 8:14-17.

Bilang tinagibin ananak nen Jehova, sikaray nawalaan na maglorian pribilihyo. Sikaray magmaliw a ‘saserdote nipaakar ed Dios; et manuley ira ed tapew na dalin [bilang arari]’ kaibay Jesu-Kristo bilang kabiangan na mangatatawen a Panarian odino gobierno na Dios. (Apocalipsis 5:9, 10; 14:1-4) Saya so gobiernon niletneg a malet unong ed saray prinsipyo na kawayangan tan inkahustisya​—aliwan unong ed inkalames tan inkaruksa. (Isaias 9:6, 7; 61:1-4) Inkuan nen apostol Pablo a sarayan ananak na Dios so kakaiba nen Jesus, say abayag lan insipan a ‘bini nen Abraham.’ (Galacia 3:16, 26, 29) Bilang ontan, sikaray manggagawa na importantin betang bilang panusumpal ed insipan na Dios ed kaaro ton Abraham. Kabiangan na satan a sipan et diad panamegley na bini nen Abraham (odino, ilalak) so “pakapikapalaranan na saray amin a nasyon dia.”​—Genesis 22:18.

Antoy bendision ya itarok da ed katooan? Saray anak na Dios so mibiang ed pangibulos ed intiron pamilya na too manlapud alay uges iran nansumpalan na Adamikon kasalanan tan ed pangipawil ed katooan diad inkayadyari. Saray totoo a “nanlapu ed balang nasyon tan amin na saray kailalakan, tan binaleybaley” so nabendisionan diad pangagamil da na pananisia ed dondon bagat nen Jesu-Kristo tan diad panpasakop ed mapalabon uley na Panarian to. (Apocalipsis 7:9, 14-17; 21:1-4; 22:1, 2; Mateo 20:28; Juan 3:16) Diad ontan a paraan et napanggayagaan lamet na “amin a pinalsa” so “kawayangan na gloria na saray anak na Dios.” Aliwa iyan klase na limitado tan temporaryon mapolitikan kawayangan noagta, imbes, kawayangan ed amin a bengatlan sengegan na ot-ot tan gonigon na pamilya na too nanlapulad impangipulisay di Adan tan Eva ed inkasoberano na Dios. Agpankelawan a nayarian nen apostol Pablo ya ibagan “saray irirap ed sayan kaplesan a panaon ag-ira makana ya ipara ed [antokaman a bengatla]” diad pangipareng ed maglorian serbisyo a gawaen na saratan a matoor!

Kapigan so igapo na “kipatnag na saray anak na Dios”? Maganggano la, sano ipatnag itan nen Jehova ed amin no siopa iray anak na Dios. Saya et sano sarayan “anak,” so napaoli ed espiritun ayaman, a mibiang ira ed si Jesu-Kristo ed panlinis ed sayan dalin manlapud mauges tan panaglames diad bakal na Dios ya Armagedon. (Daniel 2:44; 7:13, 14, 27; Apocalipsis 2:26, 27; 16:16; 17:14; 19:11-21) Nanenengneng tayo ed kaliberliber tayo so dakel ya ebidensia a wala tayo la’d kasampotan na “saray kaunoran ya agew,” sano mangangga lay andukey a pangitetepel na Dios ed panagrebeldi tan saray nansumpalan ton karelmengan.​—2 Timoteo 3:1-5; Mateo 24:3-31.

On, tua, a singa ibabaga nen apostol Pablo, a say “lapag a pinalsa maningel ira ya amin tan maniirap ira a mankakaiba ya anggad natan.”​—balet ta agla manbayag. Minilyon natan a manbibilay so makanengneng ed “kipawil na amin a ganagana a sinalita na Dios ed sangi na saray masantos a propeta a nambilay nanlapu’d gapo,” pati say kipawil na kareenan, kawayangan, tan inkahustisya ed intiron pamilya na too.​—Gawa 3:21.

Tuan Kawayangan a Siansia

Antoy nepeg mon gawaen pian napanggayagaan iyan “kawayangan na gloria na saray anak na Dios”? Inkuan nen Jesu-Kristo: “No mansiansia kayo ed salitak, sirin petepeteg a sikayo so babangatan ko; et nakabatan yo so katuaan, et say katuaan sikayo so gawaen to a bulos.” (Juan 8:31, 32) Satan so tombok ed kawayangan​—panaral insan itulok ed saray ganggan tan bangat nen Kristo. Saya so mangitatarok na sukat na kawayangan anggan natan. Diad magano lan arapen, mangitarok itan na sigpot a kawayangan diad silong na uley nen Kristo Jesus. Say makabat a kurang et say pangamta ed “salita” nen Jesus panamegley na panaral na Biblia. (Juan 17:3) Singa saray inmunan Kristiano, aktibon milimog ed kongregasyon na saray tuan babangatan nen Kristo. Diad panggawa ed satan, nagunggunaan ka manlapud manangibulos iran katuaan ya itatarya nen Jehova panamegley na organisasyon to natan.​—Hebreos 10:24, 25.

Legan ya ‘aalagden so kipatnag na saray anak na Dios,’ nabayuboan moy singa panmatalek nen apostol Pablo ed mananalimbeng a panangasikaso tan suporta nen Kristo, anggan ompatnag a ngalngalin agla naanosan iray kairapan tan ag-inkahustisya. Kayari impaningbat ed kipatnag na saray anak na Dios, intepet nen Pablo: “Siopa so mangisian ed sikatayo ed aro nen Kristo? Say kairapan, o say kaermenan, o say panangusil, o say eras, o say inkalakseb-labos, o say kaatapan, o say kampilan?” (Roma 8:35) Siempre, diad pangiyaplika ed saray salita nen Rousseau, saray Kristiano ed panaon nen Pablo so siansian “abalor” na malames iran puersa ed nanduruman nengneng. Sikaray ‘niiiyan ed ipapatey ya inagew-agew,’ singa “karnero ed panpateyan.” (Roma 8:36) Kasin inabuloyan da itan a manaeg ed sikara?

“[“Diad kasunian,” NW] insulat nen Pablo, “diad amin na sarayan bengatla et mansusumpal itayon sigpot a mananalo panamegley to ya angaro ed sikatayo.” (Roma 8:37) Kasin mananalo anggaman ed amin na saratan a kinaukolan a sungdoan na inmuunan Kristiano? Panon ya ontan? “Sisiaen ko a peteg, ya anggan say patey, anggan say bilay, anggan saray angheles, anggan saray arari, anggan saray wala ed kaplesan, anggan saray wala ed arapen, anggan saray pakayari, anggan say katagey, anggan say kaaralman, anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.” (Roma 8:38, 39) Sika met so ‘ompaway a mananalo’ manlapud antokaman a “kairapan, o say kaermenan, o say panangusil” a kaukolan mon sungdoan ni natan. Say aro na Dios so mangarantiya ed satan a magano la​—maganggano la​—sikatayo so “niliktar ed [amin ya] inkaaripen . . . ya onloob ed kawayangan na gloria na saray anak na Dios.”

[Saray litrato ed pahina 6]

“Amin a pinalsa maningel ira ya amin tan maniirap ira a mankakaiba ya anggad natan”

[Litrato ed pahina 7]

‘Say pinalsa a dili niliktar ed inkaaripen na kabulokan ya onloob ed maglorian kawayangan na saray anak na Dios’