Aalagden Tekep na “Maseseg a Panpilalek”
“Say maseseg a panpilalek na pinalsa aalagden to so kipatnag na saray anak na Dios.”—ROMA 8:19.
1. Anto so panulibayan na kipapasen na Kristianos natan tan ed saray inmunan-siglon Kristiano?
MIULIBAYAN so kipapasen na tuan Kristianos natan ed saramay inmunan-siglon Kristiano. Tinmulong so sakey a propesiya ed ariripen nen Jehova ed saman a panaon pian naamtaay nigeter ya iyapireng na Mesias. (Daniel 9:24-26) Satan met a propesiya so angipasakbay ed kaderal na Jerusalem balet ta andian na bengabengatlan mamasarag ed Kristianos a naamtaan la no kapigay kaderal na saman a syudad. (Daniel 9:26b, 27) Mipadpara, maong ta pinagmaliw na propesiya iray masimoon ya estudyante na Biblia nen koma-19 siglo a mantalaran. Diad impangikonekta’d “saray pitoran panaon” na Daniel 4:25 ed “saray agew na saray Gentiles,” inilaloan da lan awaten nen Kristo so pakayari na Panarian nen 1914. (Lucas 21:24, King James Version; Ezequiel 21:25-27) Bangta dakel a propesiya so lugan na libron Daniel, anggapo ed saraya so mamasarag ed saray estudyante na Biblia natan a mangalkula no kapigay eksakton kaderal na intiron sistema na bengabengatla nen Satanas. (Daniel 2:31-44; 8:23-25; 11:36, 44, 45) Balet, saya so asingger lan nagawa, ta manbibilay itayo la ed “panaon na kasumpalan.”—Daniel 12:4.a
Inkamabantay Legay Kiwawala nen Kristo
2, 3. (a) Antoy manitibukel ed manunan prueba a manbibilay tayo la kaleganay kiwawala nen Kristo ed maarin pakayari? (b) Antoy mangipapanengneng a kaukolan a mansiansian akabantay iray Kristiano legay kiwawala nen Jesu-Kristo?
2 Tua, a say propesiya et pinagmaliw ton matalaran iray Kristiano sakbay ya inawat nen Kristo so pakayari nipaakar ed Panarian nen 1914. Balet say “tanda” ya inter nen Jesus nipaakar ed kiwawala to tan ed konklusyon na sistema na bengabengatla so walaan na saray ebento. Tan maslak ed saraya so nanengneng kayarin ginmapo so kiwawala to. Saratan ya ebento—bakabakal, kakisiray tagano, yegyegyeg, saray salot, onloloor a kaugsan, kapasegsegang na Kristianos, tan say sankamundoan a kipulong na maong a balita na Panarian—so onkakanan manunan prueba a manbibilay tayo la kaleganay kiwawala nen Kristo ed maarin pakayari.—Mateo 24:3-14; Lucas 21:10, 11.
3 Ingen, say intiron tonada na kaunoran a konseho nen Jesus ed saray patumbok to et: “Manlikas kayo, manbantay. . . . Manpuyat kayo.” (Marcos 13:33, 37; Lucas 21:36) Ipapanengneng na maalwar a panbasa ed konteksto na sarayan bilin ed inkamabantay ya agmanunan tutukoyen nen Kristo so pansiansian maapit a panalagar ed tanda na igapoy kiwawala to. Imbes, ingganggan toy tuan babangatan to a mansiansian akabantay legay kiwawala to. Anto kasi so mansiansian pambantayan na tuan Kristianos?
4. Anton gagala so kanaan na say tandan inter nen Jesus?
4 Inter nen Jesus so abalbaleg a propesiya to bilang ebat ed tepet: “Kapigan so kagawa na sarayan bengatla [saray ebenton mangipaarap ed kaderal na Judion sistema na bengabengatla], tan anto kasi so tanda ed isabim tan say anggaan na mundo?” (Mateo 24:3) Say nipasakbay a tanda so onkana a pakabidbiran aliwa lambengat ed kiwawala nen Kristo noagta ontan met ed saray ebenton mansumpal ed anggaan na kaplesan a marelmeng a sistema na bengabengatla.
5. Panon ya impanengneng nen Jesus ya anggaman presenti ed espiritual a paraan et sikato ni “onsabi”?
5 Impanengneng nen Jesus a legay “kiwawala” (Griego, pa·rou·siʹa) to et sikatoy onsabi ed pakayari tan gloria. Nipaakar ed satan ya “isasabi” (nipatnag diad saray paraan ed Griegon salitan erʹkho·mai), inyabawag to: “Insan ompatnag so tanda na Anak na too ed tawen, et manermen naani ed satan so amin a polipoli na dalin, tan nanengneng da naani so Anak na too ya onsasabi ed tapew na lurelurem na tawen a napnoy pakayari tan baleg a gloria. . . . Natan aralen yo ed kiew ya igos so alimbawa to: Sano onlangwer lay sanga to, tan mamapaway na bulobulong tora, amta yo a say tiagew asingger la. Ontan yo met, sano nanengneng yo so sarayan amin a bengabengatla amtaen yo a sikatoy asingger la, salanti, ed saray pinto. . . . Manpuyat kayo sirin, ta agyo amta no anton agew so isabi Katawan yo. . . . Kanian manparaan kayo met komon, ta dia ed oras ya agyo isisipen onsabi’ Anak na too.”—Mateo 24:30, 32, 33, 42, 44.
Akin ya Onsabi Jesu-Kristo?
6. Panon so kaderal na “Babilonia a Baleg”?
6 Anggaman Ari la nanlapulad 1914, nepeg ya ukomen ni nen Jesu-Kristo iray sistema tan sinansakey sakbay ya ukomen iramay naromogan ton marelmeng. (Ikompara so 2 Corinto 5:10.) Agmabayag et iyan nen Jehova ed kanonotan na saray mapolitikan manuley so paneral ed “Babilonia a Baleg,” say sankamundoan ya imperyo na palson relihyon. (Apocalipsis 17:4, 5, 16, 17) Espisipikon imbaga nen apostol Pablo a deralen nen Jesu-Kristo so “too na kasalanan”—say apostatan klero na Kakristianoan, prominentin kabiangay “Babilonia a Baleg.” Insulat nen Pablo: “Dia ed satan ompatnag so mauges a sikato so pateyen nen Jesus a Katawan ed alingasew na sangi to, tan nabalang lapu ed kipatnag na isabi to.”—2 Tesalonica 2:3, 8.
7. Sano onsabi Anak na too ed gloria to, anton panangukom so ipaakseb to?
7 Diad magano lan arapen, ukomen nen Kristo so totoo na nasyones base’d impideneng da’d agagi ton wala ni ed dalin. Nabasa tayo: “Sano onsabi so Anak na too ed gloria to, tan kaulop toray amin ya angheles saman la onyurong ed trono na gloria to. Tan natipon naani ed arap to so saray amin a nasyon, tan panbibiiganen tora naani sakey tan sakey, a singa saray pastol ibiig to so saray kanding. Tan ipasen toray karnero ed nikawanan a lima to, balet saray kanding ed nikawigi. . . . Et say ari onebat naani tan kuanto ed [saray karnero], ‘Tua kuan ko’d sikayo, Bangta sikatoy ginawa yo ed sakey ed sarayan agik, anggan saraya a kamelagan sikatoy ginawa yo ed siak. Et [saray kanding] onla ra naani ed dusa ya andi-anggaan, bang ira balet so matunong dia ed bilay ya andi-anggaan.”—Mateo 25:31-46.
8. Panon a dedeskribien nen Pablo so isabi nen Kristo a mangipaakseb na panangukom ed saray agmaridios?
8 Singa nipanengneng ed parabolo na saray karnero tan saray kanding, ipaakseb nen Jesus so pinal a panangukom ed amin ya agmaridios. Pinaseguroan nen Pablo iray manasagmak na irap a kapananisiaan a “mipainawa kayo ed sikami, sano ompayawar so Katawan tayo a Jesus a manlapu ed tawen ya iba’to so saray angheles na pakayari to, a dia ed mandarlang ya apuy, iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus. A sikara so mantepel na dusa a salanti andi-anggaan a kabalang da a manlapu ed lupa na Katawan tan dia ed lupa na gloria na pakapanyari to, sano sikato so onla dia pian narayew ed saray sasantos to.” (2 Tesalonica 1:7-10) Tekep na sayan amin a makapasagyat ya ebento ed arapen tayo, agta kaukolan a mangagamil tayo na pananisia tan magunaet a mantultuloy a manbantay ed isabi nen Kristo?
Magunaet a Talaranay Kiparungtal nen Kristo
9, 10. Akin a saray alanaan a wala ni’d dalin so magunaet a manatalaran ed kiparungtal nen Jesu-Kristo?
9 “Sano ompayawar so Katawan tayo a Jesus a manlapu ed tawen” et aliwa lambengat a mangitarok na kadederal ed saray marelmeng noagta manumang met ed saray matunong. Saray natitilak ya alanaan ya agagi nen Kristo a wala ni’d dalin so managmak ni na irap sakbay na kiparungtal nen Kristo, balet ta panggayagaan day maglorian mangatatawen ya ilalo ra. Parad saray alanaan a Kristiano, insulat nen apostol Pedro: “Panliketan yo komon so pidama’yo ed saray irirap nen Kristo, pian dia ed kipatnag na gloria to manliket kayo met ed alablabas a gayaga.”—1 Pedro 4:13.
10 Determinado iray alanaan a mansiansian matoor anggad si Kristo et ‘tiponen tora ed sikato’ ta pian “pakapamintuan” ed pananisia ra so “naalmo ed dayew, gayaga tan galang . . . no ompanengneng si Jesu-Kristo.” (2 Tesalonica 2:1; 1 Pedro 1:7) Diad saratan a matoor a nailalak ed espiritun Kristianos, so pakaibagaay: “Unong a say pananasi nen Kristo apabiskeg ed sikayo. Ta pian anggapo so kakulangan yo ed bengatla a palangkap; a manaalagar ed ipatnag na Katawan tayo a Jesu-Kristo.”—1 Corinto 1:6, 7.
11. Legan ya aalagden so ipatnag nen Jesu-Kristo, antoy gagawaen na saray alanaan a Kristiano?
11 Miparay liknaan na saray alanaan a nakdaan ed si Pablo, a nansulat: “Ibilang ko a saray irirap ed sayan kaplesan a panaon ag-ira makana ya ipara ed arapen a gloria a nipuyan ed sikatayo naani.” (Roma 8:18) Agnakaukolan so panagkalkula ed saray panaon ta pian napabiskeg so pananisia ra. Okupado ira ed serbisyo ed si Jehova, a marakep a panalimbawaan na saray kaiba ra, say “arum a karnero.” (Juan 10:16) Amta na sarayan alanaan ya asingger lay anggaan na sayan marelmeng a sistema, tan tatalinengen day simbawa nen Pedro: “Balkesan yo so saray banel na kanonotan yo, mandangka kayo tan manilalo kayo a nagnap ed pamalangkap a nitarok ed sikayo no ompatnag si Jesu-Kristo.”—1 Pedro 1:13.
“Say Maseseg a Panpilalek na Pinalsa”
12, 13. Panon a say atooan a pinalsa et “impauleyan ed kaapaan,” tan antoy panpirawatan na arum a karnero?
12 Kasin say arum a karnero so walaan met na bengatlan pambilayan diad magunaet a pantalaran? Naseguron tuloy ya ontan. Kayari impanaglawi ed maglorian ilalo na saramay tinagibi nen Jehova bilang nailalak ed espiritun “ananak” tan “mitatawir ed Kristo” diad mangatatawen a Panarian, inkuan nen Pablo: “Say maseseg a panpilalek na pinalsa aalagden to so kipatnag na saray anak na Dios. Ta say pinalsa impauleyan ed kaapaan, aliwan lapud panlabay to, noag say makalanor so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.”—Roma 8:14-21; 2 Timoteo 2:10-12.
13 Diad panamegley na kasalanan nen Adan, amin a kapolian to so “impauleyan ed kaapaan,” a nianak ed inkaaripen ed kasalanan tan ipapatey. Agda ayarian ya ibulos so inkasikara manlapud satan ya inkaaripen. (Salmo 49:7; Roma 5:12, 21) Agaylan pirawat a tuloy na arum a karnero so “niliktar ed inkaaripen na kabulokan”! Balet sakbay a nagawa itan, walaray bengatlan nepeg a nagawa unong ed saray panaon tan tiempo nen Jehova.
14. Antoy nasaglawi ed ‘kipatnag na ananak na Dios,’ tan panon a mansumpal iya ed “kiliktar [na katooan] ed inkaaripen na kabulokan”?
14 Saray nakdaan ya alanaan ya ‘ananak na Dios’ so nepeg ya ‘ompatnag’ ni. Antoy lalanoren na saya? Diad nigeter a panaon na Dios, nipatnag ed arum a karnero a saray nakdaan et “atatakan” la’d satan tan nigloria a miuley ed Kristo. (Apocalipsis 7:2-4) Saray apaolin ‘ananak na Dios’ so ‘ompatnag’ met sano mibiang ira ed Kristo ed paneral ed marelmeng a sistema na bengabengatla nen Satanas. (Apocalipsis 2:26, 27; 19:14, 15) Insan, kaleganay Sanlibon Taon ya Uley nen Kristo, sikaray ‘ompatnag’ lamet bilang saray makasaserdoten paralanan ed kikurang na saray gungguna na dondon bagat nen Kristo ed atooan a “pinalsa.” Saya so mansumpal ed “kiliktar [na katooan] ed inkaaripen na kabulokan” tan diad kaunoran et onloob la’d “kawayangan na gloria na saray anak na Dios.” (Roma 8:21; Apocalipsis 20:5; 22:1, 2) Tekep na saratan ya engranden iilaloan, pankelawan ta a say arum a karnero et “aalagden to so kipatnag na saray anak na Dios” tekep na “maseseg a panpilalek”?—Roma 8:19.
Say Anos nen Jehova et Kabaliksan Toy Kilalaban
15. Antoy agtayon balot lilingwanan no nipaakar ed eskedyul nen Jehova ed saray ebento?
15 Si Jehova so Baleg a Manangimaton na panaon. Say eskedyul to nipaakar ed saray ebento so napaneknekan a naspot. Ompatnag a say kagagawa na saray bengatla et aliwan unong ed mismon iilaloan tayo. Balet niwala’d sikatayo so absoluton pananisia ed amin a sipan na Dios a nasumpal. (Josue 23:14) Nayarin iyaabuloy ton manbayag niray bengatla nen say abaloan na dakel. Balet ta panggunaetan tayo komon a talosan iray dalan to tan pandinayeway kakabatan to. Insulat nen Pablo: “O say kaaralman na kayamanan na kakabatan tan pakaamta na Dios! Agaylan agnausisa a kanonotan to, tan agnatebek ira a dalan to! Ta ‘siopa ta so akatalos na kanonotan na Katawan ono siopa so mananimbawa to?’”—Roma 11:33, 34.
16. Siopa so walad posisyon a nagunggunaan ed anos nen Jehova?
16 Insulat nen Pedro: “Inararok ira, bangta kaliktan yo so saraya a bengatla [kaderal na say daan a “katawenan” tan “dalin” tan say panalat ed saratan na insipan na Dios a “balon katawenan” tan “balon dalin”], panpelengan yo ta pian [“diad kaunoran,” NW] et naromog kayo’d kareenan, ya andi matik tan karumsisan ed imaton to. Tan ibilang yo a sikatoy kilalaban so sungdo na Katawan.” Lapud anos nen Jehova, minilyon so naiikdan na pankanawnawa a nilaban diad “agew nen Jehova,” ya onsabin ag-ililaloan a “singa sakey a matakew.” (2 Pedro 3:9-15) Say anos to so mangiyaabuloy ed balang sakey ed sikatayo ya ‘isumpal so dili a kilalaban tayo ed takot tan giwgiw.’ (Filipos 2:12) Inkuan nen Jesus a nepeg itayon ‘manlikas ed inkasikatayo’ tan “manbantay” no labay tayon naabobonan tan ontalona diad ‘iyalagey ed arap na Anak na too’ diad panaon a pangukom to la.—Lucas 21:34-36; Mateo 25:31-33.
Mansiansian Mantalaran Tekep na Panagsungdo
17. Antoran salita nen apostol Pablo so kaukolan a talinengen tayo?
17 Pinaseseg nen Pablo iray kaagian to’d espiritual ya isentroy kamataan da, “[aliwan] ed saray bengatlan nanengneng, noag ingen dia ed saray agnanengneng.” (2 Corinto 4:16-18) Agto labay a walay makaburagas ed pakanengneng da ed mangatatawen a tumang a walad arapan da. Balanglan sikatayoy alanaan a Kristianos odino kabiangan itayoy arum a karnero, mansiansia itayon sinononot ed makapakelaw ya ilalon niletneg ed arapan tayo tan ag-ontutunda. Komon ta ‘sungdoan tayo ya alagaren,’ a papaneknekan ya “aliwa [tayo] ya iba na saray onsener pian pakabalangan; noag ingen iba na saray walaan na pananisia ed kilalaban na kamarerwa.”—Roma 8:25; Hebreos 10:39.
18. Akin a makapanmatalek tayon ipalima ed si Jehova iray panaon tan tiempo?
18 Makapanmatalek tayon ipalima ed si Jehova iray panaon tan tiempo. Say kasumpalan na saray sipan to so “agmanbayag” unong ed niyeskedyul a panaon to. (Habacuc 2:3) Kaleganan ni, walay kabaliksan ed sikatayo na simbawa nen Pablo ed si Timoteo. Inkuanto: “Ibilin ko ed sika ed malet ed arap na Dios, tan si Kristo Jesus, a sikato so mangukom naani ed saray mabilay tan inatey, tan dia ed panaon na kipatnag to tan say panarian to. Ipulong mo so salita; manseet ka no panaon to; tan agto panaon; . . . Gawam so gawa na ebanghelista, sumpal mo so ministeryom.”—2 Timoteo 4:1-5.
19. Antoy wala ni’d panaon a gawaen na totoo nen Jehova, tan akin?
19 Walad kapeligroan iray bilay—bilay tayo tan saramay kapara tayon totoo. Insulat nen Pablo: “Imatonan mo so kaabigan na laman mo tan say ibabangat mo. Mansiansia ka ed sarayan bengatla; tano gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) Antiktikey lay panaon parad sayan marelmeng a sistema na bengabengatla. Bangta aalagden tayo tekep na maseseg a pantalaran iray makapasagyat ya ebento ed arapen tayo, magmaliw tayo komon a lawas mikabisado a wala ni’d panaon tan tiempo nen Jehova so pangipulong na totoo to ed maong a balita na Panarian. Satan a kimey so nepeg a nasumpal ed kapenek to. “Saman la,” singa inkuan nen Jesus, “onsabi anggaan.”—Mateo 24:14.
[Saray paimano ed leksab]
a Nengnengen iray kapitulo 10 tan 11 na libron Pikakabat a Mangitonton ed Andi-Anggaan a Bilay, impalapag na Watchtower Bible and Tract Society of New York, Inc.
Bilang Panrepaso
◻ Nipaakar ed panagkalkulay panaon, panon a mipadpara so situasyon tayo ed saray inmunan-siglon Kristiano?
◻ Akin a saray Kristiano et nepeg a “manbantay,” anggan kaleganay kiwawala nen Kristo?
◻ Akin a say atooan a palsa so magunaet a mantalaran ed ‘ipatnag na ananak na Dios’?
◻ Akin a makapanmatalek tayon ipalima ed si Jehova iray panaon tan tiempo?
[Litrato ed pahina 17]
Nepeg a mansiansian aliing iray Kristiano diad pantalaran ed isabi nen Kristo
[Litrato ed pahina 18]
Mansiasiansian okupado iray alanaan ed serbisyo ed si Jehova, ya agda ibabase pananisia ra ed panagkalkulay panaon