Nainawaan Ta Niray Maniirap?

LABAY mo ta lan manampot so panirap, aliwa labat lan parad say sika noagta parad amin a katooan? Konsideraen pa irayan alimbawa:

Sobsobra lay paniirap nen Sonia.a Ginmapo itan sanen asukayan toy masiken ton mikakalugoran ed loob la na samploy taon. Insan apeketan na HIV so sankayugtanan ya anak to a sengegay impatey to la’d AIDS. Duay taon ed saginonor et sakey nin anak to so nansakit, tan agnambayag et inatey met ed AIDS. Onia so nanonotan nen Sonia, “abaybayag so unor a kabiangan na sakit to. Sinagmak toy pirmin depresyon, man-orot lay buek to, tan kurabdab met lay pakanengneng to. Talagan makapaermen iman.”

Si Fabiana, a sakey a kolehiyalan taga-Brazil, so nampagan maong ed ag-inkahustisya na sayan mundo ed sosyedad. Asabin agaway trahidya ed mismon bilay to. Say agi ton laki, a maniirap ed depresyon, so nambitkel. Sanen naandiay trabaho si Fabiana, insuhiri kaaro ed sikato ya ontupleg ed pai-de-santo (managtambal na tanem), a mangibabagan si Fabiana so agnapapalaran lapud wala kunoy ananem ed sikato! Balet ta ag-angitarok na pakainawaan so pai-de-santo. Imbes, liknaen nen Fabiana a nadudusa tan agmakakaugip lapud panpapairap to.

Asakbay a tuloy so impanirap nen Ana. Oniay insalaysay to, “Sanen sakey taon ko, tinaynan ak nen inak, kanian kinomponi ak la nen baik.” Insan, sanen taloy taon lambengat nen Ana, say bai to so inatey. Kanian si Ana so nipudir ed ayaman na saray ulila diad Rio de Janeiro, a nansiansian to ya anggad 13 to. “Amaltrato kamin maong diman, kanian nagmaliw ak a rebelyoso,” so inkuanto. “Legay ibabaleg ko, kakontrak lawarin amin a bengatla.”

Ompatnag ya aapektaen na irap so kada too diad nanduruman dalan. On, nababalitaan tayoray trahidya na too ed agew-agew​—no manbantay itayo, manbasa, odino mandengel ed saray balita. “Angga’d kasabi . . . na mass communication ya imposibli lay agmo pakatatabek ed mauges a balita,” so insulat nen Dr. Mary Sykes Wylie. “Saray bakal, natural iran desyang, say panagderal na industriya, aksidinti’d karsada, krimen, terorismo, seksual a panag-abuso, panagpasoot, karawalan ed ayaman​—amin et pansesengegay sesga a makapasinagem tan inagew-agew a pawil-pawil a balita ed koma-20 siglo.” Realistikoy impanegek nen Kristianon apostol Pablo ed sasagmaken na too: “Amta tayo a lapag a pinalsa maningel ira ya amin tan maniirap.”​—Roma 8:22.

Komusta met ed sika? Sasagmaken mo ta so irap? Anton pakainawaan so aalagden mo? Nagamoran mo ni kasi so tuan kareenan? Aromog di Sonia, Fabiana, tan Ana so puron ligliwa tan peteg a kareenan! Nabasam itan ed onggendan ya artikulo.

[Paimano ed leksab]