Tepetepet na Saray Manbabasa
Diad anton pantalos ya si Pablo et “biglan niyakar ed komatlon tawen” tan “ed paraiso”?—2 Cor. 12:2-4.
Diad 2 Corinto 12:2, 3, tinukoy nen Pablo so sakey a too ya “biglan niyakar ed komatlon tawen.” Siopa iman ya too? Sanen sinulatan nen Pablo so kongregasyon ed Corinto, impaimano ton sikatoy uusaren na Dios bilang apostol. (2 Cor. 11:5, 23) Insan to binitla iray “pasingawey tan saray panangiparungtal na Katawan.” Diad konteksto, anggapo lay sananey a toon binitla nen Pablo. Kanian makatunongan ya isipen a say tutukoyen to et say sarili to, samay toon akaawat na saray pasingawey tan panangiparungtal.—2 Cor. 12:1, 5.
Kanian si Pablo imay “biglan niyakar ed komatlon tawen” tan “biglan niyakar ed paraiso.” (2 Cor. 12:2-4) Inusar to so salitan “panangiparungtal” pian ipanengneng ya walay imparungtal ed sikato ya nagawa ed arapen.
Anto imay “komatlon tawen” ya anengneng nen Pablo?
Diad Biblia, say “tawen” et nayarin ontukoy ed literal ya tawen. (Gen. 11:4; 27:28; Luc. 17:24) Balet wala ni arum ya tutukoyen na salitan “tawen.” No maminsan et ontutukoy itan ed uley na too. (Dan. 4:20-22) Nayarin ontukoy met itan ed uley na Dios panamegley na Panarian to.—Apo. 21:1.
Antoy punto nen Pablo nen imbaga ton anengneng to so “komatlon tawen”? No maminsan, wala ray salitan mamitlon uuliten diad Biblia parad panangidanet odino pian mangarum na puersa. (Isa. 6:3; Eze. 21:27; Apo. 4:8) Mapatnag ya nen tinukoy nen Pablo so “komatlon tawen,” idadanet to so superyor, niyatagey a klase na pananguley—say Mesianikon Panarian nen Jesu-Kristo tan saray 144,000 ya kaiba ton manuley. (Nengnengen so Insight on the Scriptures, Vol. 1, p. 1059, 1062.) Singa insulat nen apostol Pablo, aalagaren tayo so isabi na “balon tawen” unong ed sipan na Dios.—2 Ped. 3:13.
Balet antoy labay ya ibaga nen Pablo nen binitla to so “paraiso”?
Say salitan “paraiso” et nayarin ontukoy ed nanduruman bengatla: (1) No say pangibasiyan tayo et say orihinal ya ayaman na too, makatunongan ya isipen ya say “paraiso” et ontutukoy ed literal ya Paraiso ed dalin diad arapen. (2) Nayarin ontukoy met itan ed espiritual a kipapasen ya naeksperiensya na totoo na Dios diad balon mundo. (3) Nayarin ontukoy met itan ed balibalin kipapasen diad tawen, say “paraiso na Dios” ya abitla ed Apocalipsis 2:7.—Nengnengen so Say Panag-bantayan, Hulyo 15, 2015, pahina 8, parapo 8.
Posible ya amin iratan ya talo so tutukoyen nen Pablo diad 2 Corinto 12:4 sanen deneskribe to so eksperiensya to.
Bilang sumaryo:
Say “komatlon tawen” ya abitla ed 2 Corinto 12:2 et mapatnag ya ontutukoy ed Mesianikon Panarian diad uley nen Jesu-Kristo tan saray 144,000, salanti, say “balon tawen.”—2 Ped. 3:13.
Tinukoy itan ya “komatlon tawen” lapud say Panarian et superyor, niyatagey a klase na pananguley.
Say “paraiso” ya ditan “biglan niyakar” si Pablo panamegley na pasingawey et mapatnag ya ontutukoy ed (1) literal ya Paraiso ed dalin diad arapen, (2) espiritual ya paraiso ya naeksperiensya tayo diman, ya mas malaknab nen say espiritual ya paraiso a naeeksperiensya tayo natan, tan (3) say “paraiso na Dios” diad tawen a niwala met ed balon mundo.
Kanian, say balon mundo et ontutukoy ed balon tawen tan balon dalin. Magmaliw itan ya balon uksoyan, kaibay Panarian ya gobierno ed tawen tan saray totoo ya manlilingkor ed si Jehova diad paraiso ed dalin.