Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

◻ Anto so kabaliksan na Griegon salitan pa.rou.si’a a nausar ed Mateo 24:3, 27, 37, 39?

Ibabaga na Expository Dictionary of New Testament nen Vine: “Say PAROUSIA . . . so mangipapanengneng na namparan isabi tan say onsublay a kiwawalan kaiba.” Kanian, aliwa labat itan a basta say mismon isasabi, noagta sakey a mantultuloy a presensia nanlapulad insabi.​—8/15, pahina 11.

◻ Panon ya ‘apatikeyan iraman ya agew’ pian nilaban so “laman” ed inmunan siglo, tan panon a nagawa iya ed malalaknab a pakasumpalan? (Mateo 24:22)

Nen 66 K.P., ag-inilaloan a pinatikey na saray Romano so pangubkob ed Jerusalem, ya angiter na pankanawnawa ed saray Kristianon “laman” a makabatik. Mipadpara, ilaloan tayo a say onsasabin panangataki ed Babilonia a Baleg so anggan panon et napatikeyan. Diad ontan et nilaban so alanaan iran Kristiano tan saray kakaiba ra manlapud posiblin kadederal.​—8/15, pahina 18-20.

◻ Anto so nepeg a reaksion tayo no say sakey a too et onggapon mibiang ed saray emblema na Memoryal odino itunda so panggawa ed satan?

Anggapo so pankaukolan parad arum a Kristiano a manpaga. Inkuan nen Jesus: “Siak so maong a pastol, et kabat ko so saray kayarian ko.” Unong a maseguro, amta nen Jehova iramay pinili to bilang espiritual ya ananak. (Juan 10:14; Roma 8:16, 17)​—8/15, pahina 31.

◻ Anto so manunan gagala na Mosaikon Ganggan?

Manunan imbangat na saya ed Israelitas so pankaukolan da na sakey a Mesias, a manondon ed sikara manlapud makasalanan a kipapasen da. (Galacia 3:24) Imbangat met na Ganggan so maridios a takot tan katutulok, tan tinmulong itan ed Israel a mansiansian biig manlapud alay uges ya agagamil na kabangibang a nasyones. (Levitico 18:24, 25)​—9/1, pahina 9.

◻ Anto so gagala na balon sipanan? (Jeremias 31:31-34)

Pian mamawala na sakey a nasyon na arari tan saserdote a mamendisyon ed amin a katooan. (Exodo 19:6; 1 Pedro 2:9; Apocalipsis 5:10)​—9/1, pahina 14, 15.

◻ Akin ya agamilen tayo so dunong na pipupulangan?

Say pipulangan so mamainawa ed ot-ot a sengegan na ag-inkayadyari, tan natambal to so balingaan na relasyon. Balang pipulangan a gawaen tayo, so sakey a leksion na inkamapaabeba tan nipapasal tayon magmaliw a mas makonsidera ed liknaan na arum.​—9/15, pahina 25.

◻ Kasin sakey a maawaran a katuaan so englobon Delubio ed agew nen Noe?

On. Saray kadaanan a salaysay nipaakar ed englobon delap so naromog ed intiron mundo, manlapud Amerika ya anggad Australia. Say malaknab ya inkiwala na onian tema so manusuporta ed katuaan a say sankamundoan a Delubio so talagan agawa, a singa nireport ed Biblia. (Genesis 7:11-20)​—9/15, pahina 25.

◻ Anto so nalalanor ed pagmaliw a maparawes? (Roma 12:13)

Say “panagparawes” so nipatalos manlapud duaran lamut a salitan mankabaliksan na “aro” tan “estranghero.” Kanian, say inkamaparawes so talagan mankabaliksan na “aro ed saray estranghero.” Balet say panagparawes so mas ni nen say panangaro unong ed prinsipyo, ya ipapanengneng lapud liknaan a wala so susumpalen. Nibasi itan ed masimoon a panlabay, panamabli, tan pikakaaro.​—10/1, pahina 9.

◻ Anto so argumento nen Pablo nipaakar ed panamaley tan walad kasuloan diad inmunan sulat to ed saray taga-Corinto, kapitulo 7?

Say panamaley so matukoy tan, diad silong na pigaran sirkumstansya, makatunongan parad arum. Siansia balet ya agniburin say kasuloan so makagungguna parad sakey a Kristianon laki odino biin malabay a manlingkor ed si Jehova ed sankaraisetan a pakagirogiro.​—10/15, pahina 13.

◻ Panon a ‘taganoen [na sakey a matatken] iray kaamong to a dili’? (1 Timoteo 5:8)

Nepeg na sakey a matatken a ‘taganoen so kaamong to a dili’​—say akulaw to tan ontan met ed ananak to​—diad materyal, espiritual, tan emosyonal.​—10/15, pahina 22.

◻ Panon a mangiter si Jehova na ligliwa ed ariripen to?

Onkikiwas so masanton espiritu na Dios bilang sakey a “managligliwa.” (Juan 14:16, NW, paimano’d-leksab) Sananey nin dalan ya iter na Dios so ligliwa et diad panamegley na Biblia. (Roma 15:4) Amta na Dios iray pankaukolan tayo bilang indibidual tan nayarin usaren itayon manligliwa ed sakey tan sakey, no panon ya aligliwa si Pablo diad panamegley na report nen Tito nipaakar ed saray taga-Corinto. (2 Corinto 7:11-13)​—11/1, pahina 10, 12.

◻ Anto so labay ya ibaga nen Pablo ed impaniskribi to’d si Jehova bilang “say Ama na saray panangasi,” a naromog ed 2 Corinto 1:3?

Say Griegon nombre a nipatalos a “matamoy iran panangasi” so manlalapud salitan nauusar a mangibalikas na ermen diad inpanirap na sananey. Kanian dedeskribien nen Pablo so matamoy a liknaan na Dios parad amin a matoor iran ariripen To a manasagmak na kairapan.​—11/1, pahina 13.

◻ Anto so agawaan na panag-ayunal na saray Israelita ed tinaon ya Agew na Pananakbong? (Levitico 16:29-31; 23:27)

Say panngilin na panag-ayunal so amakiwas ed totoo na Israel pian lalon sinononot ed babaleg a pakaamta ed inkamakasalanan da tan ed pankaukolan na pakadondon. Diad panamegley na satan nibalikas da so kaermenan da ed saray kasalanan da tan manbabawi ed arap na Dios.​—11/15, pahina 5.

◻ Anto so labay ya ibaga na ganggan ed saray kalangweran: “Nonoten mo met so Manamalsam”? (Eclesiastes 12:1)

Ibabaga na sakey ya autoridad a say Hebreon salitan nipatalos a “nonoten” so mabetbet a mangipanengneng na “panlabay na kanonotan tan say kiwas a laktipen toy pakanonot.” Kanian say italineng ed sayan ganggan et kabaliksan toy mas nen say panisip labat nipaakar ed si Jehova. Lalanoren to so kiwas, say panggawa ed panliketan to.​—12/1, pahina 16.