Tambayo na Ermen Manlapud “Dios na Ami Ligliwa”
“Bendito so Dios tan Ama na Katawan tayon Jesu-Cristo, say Ama na saray panangasi tan Dios na ami ligliwa; a sikato so manligliwa ed sikatayo ed amin a panermenan tayo.”—2 CORINTO 1:3, 4.
1, 2. Anton klase na ligliwa so kaukolan na totoon maneermen?
SARAY totoon maneermen so mankakaukolan na puron ligliwa—aliwan saray imbalikas a diparan tan pangunsuelo. Nadngel tayo lan amin so diparan a ‘natambal iray sugat diad ilalabas na panaon,’ balet diad agano nin inka-pateyan, siopay toon maneermen a naligliwa ed satan a kanonotan? Kabat na saray Kristiano a say Dios so angisipan na sakey a kioli, balet agto aamperen so aralem a sakit tan emosyonal a gonigon na biglan impakaandi. Tan maseguron no naandi sakey ya anak yo et say arum ya ananak a mabilay ni so agnayarin magmaliw a kasalatan na satan a pinabpabli.
2 Sano naandi’d-bilay so inad-aro, baleg a tulong ed sikatayo so puron ligliwa, ligliwa a putel a base’d saray sipan na Dios. Kaukolan tayo met so empatya. Saya so maseguron tua parad saray taga ed Rwanda, tan lalo la parad nilasus a pamilya na saray Tasi nen Jehova diman a naandi’d-bilay iray inad-aro ra lapud mauge-uges a panpapateyan na poli. Diad siopa so pakaromogay ligliwa na amin a maneermen?
Si Jehova—Say Dios na Ligliwa
3. Panon ya ipapanengneng nen Jehova so alimbawa ed panangiter na ligliwa?
3 Impanengneng nen Jehova ed sikatayon amin so alimbawa ed panangiter na ligliwa. Imbaki to so bogbogtong ya Anak to, si Kristo Jesus, diad dalin pian mangiter ed sikatayo na andi-anggaan a ligliwa tan ilalo. Imbangat nen Jesus: “Ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan.” (Juan 3:16) Imbaga to met ed saray patumbok to: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:13) Diad sakey nin pankanawnawa et inkuanto: “Say Anak na too [so] ag dia linma a panlinkoran, noag say manlinkor, tan iter to’y bilay to a panondon ed amayamay.” (Mateo 20:28) Tan inkuan nen Pablo: “Say Dios ipurek to so dilin aro to ed sikatayo, ta anta, makasalanan itayo ni, si Cristo inatey lapud sikatayo.” (Roma 5:8) Diad panamegley na saraya tan dakel niran teksto, natatalosan tayo so aro na Dios tan nen Kristo Jesus.
4. Akin a si apostol Pablo so nagkalautlan walaan na eebatan ed si Jehova?
4 Nagkalautlan amta nen apostol Pablo so agkanepegan a panangasi nen Jehova. Sikatoy impaliis a manlapud inatey a kipapasen ed espiritual, manlapud impagmaliw a maruksan manamasegsegang na saray patumbok nen Kristo ya anggad impagmaliw ton mismo ya apasegsegang a Kristiano. (Efeso 2:1-5) Onia so panedeskribe to ed asagmak to: “Ta siak so kamelagan ed saray apostoles, tan agak manepeg ya ingaran na apostol, ta inosilosilan ko so iglesia na Dios. Et lapu’d gracia na Dios siak la onong ed siak natan. Tan say gracia to ya inaboloy to ed siak ag aromog ya angapo’y kabaliksan to, no ag ingen lalon daakan a nankimeyak nen say amin da, aliwan siak ni, no ag say gracia na Dios ya wala ed siak nen saman.”—1 Corinto 15:9, 10.
5. Anto so insulat nen Pablo nipaakar ed ligliwan manlalapud Dios?
5 Matukotukoy sirin ya insulat nen Pablo: “Bendito so Dios tan Ama na Katawan tayon Jesu-Cristo, say Ama na saray panangasi tan Dios na ami ligliwa, a sikato so manligliwa ed sikatayo ed amin a panermenan tayo, pian nayarian tayo’n ligliwaen so saray wala ed bengatla’n panermenan, ed samay ligliwa ya diad sikatayon dili, inpanligliwa na Dios. Ta onong ed indaak na saray irap nen Cristo ed sikatayo, ontan met so idaak na pakaligliwa tayo lapu ed Cristo. Et no sikami nairapan, sikatoy makasengeg bengat ed pakaligliwa tan kilalaban yo; odino naligliwa kami, makasengeg ed pakaligliwa yo, a sikato so mangawa na anos a mangitepel ed saraya’n irirap ya itepel mi met. Ta say ilalo mi lapu ed sikayo malet; ya amta mi, a no kaonongan so kalanor yo ed saray irirap, ontan yo met ed pakaligliwa.”—2 Corinto 1:3-7.
6. Anto so kabaliksan na say Griegon salitan nipatalos a ‘ligliwa’?
6 Talagan makapasagyat iran salita! Say Griegon salita a nipatalos dia a ‘ligliwa’ so misiglaotan ed “sakey ya imbitasyon pian naabayay sakey.” Kanian, “saman so iyalagey ed abay na sakey a too pian pasesegen sano sikatoy manasagmak na mapalalon pananubok.” (A Linguistic Key to the Greek New Testament) Onia so insulat na sakey ya iskolar ed Biblia: “Satan a salita . . . so naynay a mankabaliksan na nagkalalo nen say makaligliwan piaambegya. . . . Say Kristianon ligliwa so ligliwan mangiiter na pakpel, say ligliwan manggawa’d sakey a natalonaan so amin a kairapan ed bilay.” Lalaktipen to met dia so makaligliwan salita a nibased maligen a sipan tan ilalo—samay kioli na saray inatey.
Si Jesus tan si Pablo—Maabagey Iran Managligliwa
7. Panon a nagmaliw a ligliwa si Pablo ed agagi ton Kristianos?
7 Agaylan makapakelaw ya alimbawa si Pablo ed panangiter na ligliwa! Insulat to ed saray agagi ed Tesalonica: “No ag say maoyamo kami ed pegley yo, a singa sakey a sigsiwa a managano na dili’n anak to. Ontan mi met, a maibibeg kami’n mangaro ed sikayo, apaliket kami’n toloy a mangipanabang ed sikayo, na aliwa’n say evangelio na Dios labat, no ag met saray dili’n kakamarerwa mi, ta nagmaliw kayo a sankablian ed sikami. Onong na kabat yo no panon so panangimano mi ed balang sakey ed sikayo, a singa sakey ya ama ed saray dili’n anak to, a kakalaran mi kayo, tan pababayanien mi kayo, tan tatasian.” Singa maaro, maasikason atateng, amin tayo so nayarin mangipanabang na ligsa tan pakatalos ed arum diad panaon na pankaukolan da.—1 Tesalonica 2:7, 8, 11.
8. Akin a say bangat nen Jesus et sakey a ligliwa parad saramay maneermen?
8 Diad panangipanengneng na ontan a panangasikaso tan panangasi, si Pablo so mangaalig lambengat ed baleg ya Uliran to, si Jesus. Tandaan so maabagey ya imbitasyon ya inanatnat nen Jesus ed amin a singa nikurit ed Mateo 11:28-30: “Dago kayo’d siak, amin yo’n nasasagpotan tan nabebelatan, et itdan ta kayo’y pampainawa. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso, et naromog yo’y inawa nipaakar ed saray kamarerwa yo. Ta say pakok mainomay, tan anlemew so awit ko.” On, makaligliwa so bangat nen Jesus, lapud mangiiter iya na ilalo tan sakey a sipan—say insipan a kioli. Saya so ilalo tan sipan ya iyoopresi tayo ed totoo, alimbawa, sano nitilakan tayoray brosyur a Sano Naandi’d-bilay so Pinabli Yo. Sayan ilalo so makatulong ed sikatayon amin, anggan abayag tayo lan maneermen.
No Panon A Ligliwaen Iramay Maneermen
9. Akin ya agtayo nepeg ya agmakankaanos ed totoon maneermen?
9 Say ermen so aglimitado ed sakey a nigetar a panaon a tampol kayari impatey na inad-aro. Arum so mansakbat na belat na ermen da legay bilay da, nagkalautla ed saramay naandian na ananak. Sakey a matoor a Kristianon sanasawa ed Espanya so naandian na 11-años ya anak dan laki nen 1963 bilang biktima na meningitis. Anggad natan, makalua nira sano nasalambit so nipaakar ed si Paquito. Saray anibersaryo, retrato, subenir, so nayarin mangipawil ed makapaermen iran pakanodnonotan. Kanian, agtayon balot magmaliw ya agmakankaanos tan isipen a nepeg da lan atalonaan so paneermen da natan. Onia so binidbir na sakey ya autoridad ed medisina: “Say depresyon tan panguman-uman na liknaan so nayarin ombayag ed pigaran taon.” Kanian, tandaan a no panon a say literal iran piglat ed laman tayo so mansiansia legay-bilay tayo, ontan met so nagawa ed dakel a piglat ed liknaan.
10. Anto so nepeg tayon gawaen pian natulongan iray maneermen?
10 Antoray pigara ed praktikal a bengatlan nagawaan tayo pian ligliwaen iramay maneermen ed Kristianon kongregasyon? Nayarin sisisimoon tayon ibaga ed agin mankakaukolan na ligliwa, “No walay naitulong ko, ibaga yo labat.” Balet kaunongan kabetbet a say inateyan so aktual ya ontawag ed sikatayo pian ibagan, “Walay anonotan kon nagawaan mo pian natulongan moak”? Mapatnag, kaukolan so matukoy a panboluntaryo tayo no labay tayon ligliwaen iray maneermen ya inateyan. Kanian, panon tayon makatulong? Wadia iray pigaran praktikal a suhestion:
11. Panon a say itatalineng tayo et makaligliwa ed arum?
11 Ontalineng: Sakey ed saray bengatlan makatulong a tuloy a nagawaan yo et minabang ed ot-ot na inateyan diad italineng. Nayarin itepet yo, “Labay mon tongtongen so nipaakar ed satan?” Abuloyan iran mandeside. Inkuan na sakey a Kristiano diad pakanonot ed impatey na ama to: “Talagan akatulong ed siak, sanen tinepet na arum no anto so agawa tan insan peteg a tinmalineng.” Singa ed simbawa nen Santiago, magmaliw a masiglat komon ya ontalineng. (Santiago 1:19) Ontalineng tekep na anos tan pililikna. Irerekomenda na Biblia diad Roma 12:15 a, “minanangis kayo ed saray mannanangis.” Tandaan a si Jesus so akinangis ed si Marta tan Maria.—Juan 11:35.
12. Anton nengneng na panamaseguro so niyopresi tayo ed saramay mandageyem?
12 Mangiter na Panamaseguro: Tandaan a say inateyan diad inmuna et liknaen ton nankasalanan, ya isipen ton wala ni komoy agawaan to. Ipaseguro ed sikara a ginawa ra so amin a posibli (odino antokaman nin bengatlan amta yon tua tan positibo). Seguroen ed sikara a say nalilikna ra so kaslakan. Itongtong ed sikara so arum a kabat yon akatalona ed mipadparan impakaandi. Diad arum a salita, magmaliw a malikas tan mililikna. Say mapangasin tulong tayo so makabaliksan a tuloy! Insulat nen Solomon: “Say salita a makana so kisalita to sikato so singa saray manzana a balitok ed iket a pilak.”—Uliran 16:24; 25:11; 1 Tesalonica 5:11, 14.
13. No gawaen tayoy inkasikatayon akaparaan, panon iyan makatulong?
13 Akaparaan ya ontulong: Magmaliw ya akaparaan ya ontulong, aliwan basta pigaran agew sano dakel a kakaaro tan kakanayon so presenti noagta anggan pigaran bulan ed saginonor no nakakaukolan, sano say arum so akapawil la ed normal a rotina. Say panaon na panermen so nayarin manduruman tuloy, dependi ed indibidual. Baleg so nagawaan na Kristianon interes tan pililikna ed antokaman a panaon na pankaukolan. Ibabaga na Biblia a “wala so kaaro a lalon maapit nen say agi.” Kanian, say balikas a, “Sakey a tuan kaaro so sakey a mansiansia ed panaoy pankaukolan,” so sakey a balikas a nepeg a gawaen.—Uliran 18:24; ipareng so Gawa 28:15.
14. Anto so itongtong tayo pian ligliwaen iray inateyan?
14 Pantongtongan so nipaakar ed marakep iran ugali na inatey. Ipanabang iray positibon eksperiensian nanonotan yo nipaakar ed satan a too. Agnatatakot a saglawien so ngaran to. Ag-onkikiwas a singano say inatey et agbalot nambilay odino walad isip lambengat. Makapaligliwan naamtaan so imbaga na sakey a publikasyon manlapud Harvard Medical School: “Nagagamoran so sakey a nengneng na pakatambal sano diad kaunoran et nayarian lan isipen na inateyan so naandi’d-bilay ya agmakakalikna na alabas ya ermen . . . Legan a nakakabatan tan naaawat to lay balon katuaan, say panermen so kalkalnan mansumpal ed pagmaliw a lalaniran iran pakanodnonotan.” “Lalaniran iran pakanodnonotan”—agaylan baleg a ligliwa so pakanonot ed saraman ya importantin bektan kalimog so inad-aron sakey! Onia so kuan na sakey a Tasin inateyan na ama, pigaran lan taon so apalabas: “Say sakey ya espisyal a pakanodnonotan parad siak et say panbasa na Biblian kaibay Tatay ag-abayag kayarin naaralan toy katuaan. Ontan met samay idukol mi ed gilig na ilog legan a pantotongtongan so pigaran problemak. Makapannengnengan kami lambengat a kada komatlo odino komapat a taon, kanian importantin tuloy iraman a bekta.”
15. Panon a say sakey so nayarin manboluntaryon ontulong?
15 Manboluntaryo sano matukoy: Pigaran totoon maneermen so mas mainomay a makatalona nen say arum. Kanian, mandependi ed saray kipapasen so panggawa na praktikal iran kundang pian makatulong. Onia so anonotan na sakey a Kristianon biin naermenan: “Dakel so angibaga, ‘No wala so bengatlan nagawaan ko, ibagam ed siak.’ Balet sakey a Kristianon agin bii so agla tinmepet. Sikato so linman tampol ed kuarto, inekalan toy apis na kama, tan impesak toray apis. Say sananey so angala na timba, danum, tan panaglinis iran suplay tan kinoskos toy alpombran nanotaan na masiken ko. Saraya so tuan kakaaro, tan agkoran balot nalingwanan.” No iner a wala so mapatnag a pankaukolan parad tulong, manboluntaryo—anganko diad panamegley na panparaay tagano, itulong ed panlinis, odino panggawa na pigaran bengatlan parad sikara. Siempre, nepeg tayoy manalwar ya agtayo mibabali sano labay na inateyan a manbokbokor. Kanian, ipapuso tayoray salita nen Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kaoyamoan, kadeenan, kasondoan.” Say kaabigan, anos, tan aro, so agbalot onsaew.—Colosas 3:12; 1 Corinto 13:4-8.
16. Akin a say sakey a sulat odino kard so nayarin mangitarok na ligliwa?
16 Mansulat na sakey a sulat odino mangipawit na makaligliwan kard: Mabetbet a nibabaliwalay kaimportantian na sakey a sulat a piaambegya odino sakey a marakep a kard na pililikna. Say kaabigan na saya? Nabasa irayan paulit-ulit. Say ontan a sulat so agkaukolan ya andukey, balet nepeg ya ipalikna na saya so pililikna yo. Nepeg met a nipatnag dia iray espiritual a bengatla balet aliwan diad paraan a mansesermon. Magenap lay makaligliwan simplin mensahen, “Nailaloan moy tulong mi.”
17. Panon a say pikakasi so mangitarok na ligliwa?
17 Manpikasi a kaiba ira: Agmelmelagen so kablian na saray pikakasi yo a kaiba tan parad saray inateyan a kaparan Kristiano. Onia so kuan na Biblia ed Santiago 5:16: “Say pikakasi’ sakey a matunong a too manalonggaring na dakel ed pankimey to.” Alimbawa, sano narengel na maneermen a sikatayoy manpipikasi ed biang da, ontutulong itan pian naekal iray negatibon liknaan a singa say pantetel ed sarili ra. Diad saray bekta na kaleteyan, inkaapos, panggugunaetan nen Satanas a deralen itayo diad saray “pangalot,” odino “masilib a gawa” to. Saya so panaon a kaukolan tayo so ligliwa tan tulong na pikakasi, singa imbalikas nen Pablo: ‘Diad kada pormay pikakasi tan tagleey et mantultuloy kayo ed pikakasi ed amin a pankanawnawa diad espiritu. Tan diad satan a gagalan mansiansian aliing tekep na inkapekder tan walaay tagleey diad biang na amin a sasanto.’—Efeso 6:11, 18, Kingdom Interlinear; ipareng so Santiago 5:13-15.
No Anto so Nepeg a Paliisan
18, 19. Panon tayon nipanengneng so taktika ed saray tongtongan tayo?
18 Sano maneermen so sakey a too, walara met so bengatla ya agtayo nepeg a gawaen odino salitaen. Ipapasakbay na Uliran 12:18: “Wala so mansalita a botaktak a singa saray kisaksak na kampilan; balet say dila na makabat sikato so kasil.” No maminsan, diad agnamamantaan et onsasaew itayon mangipanengneng na inkataktika. Alimbawa ompan nibaga tayon, “Amtak so naliliknam.” Balet ontan ta? Kasin asagmak yo so singa kaparpara na inkaandi to? Ontan met, nandurumay reaksion na totoo. Say reaksion yo so nayarin agkapareho ed reaksion na toon inateyan. Mas maabig so pangibaga yon, “Talagan miaambegya ak ed sikayo lapud naeksperiensiak met so mipadparan inkaandi sanen inatey so [inad-aro] . . . pigaran panaon lay apalabas.”
19 Panangipanengneng met na inka-sensitibo no paliisan so pankomento no kasin napaoli odino andi so inatey. Walaray pigaran agagin asakitan a tuloy lapud mahusgan komento nipaakar ed posibilidad ed arapen na inatey ya agmananisian kapareha. Aliwan sikatayo so manhusga ed no siopa so napaoli odino andi. Sakey a pakainawaan parad sikatayo a si Jehova, a makakatebek ed puso, so magmaliw a lalon mapangasi nen say nagawaan na siopaman ed kaslakan tayo.—Salmo 86:15; Lucas 6:35-37.
Saray Tekston Makaligliwa
20, 21. Antoray pigaran teksto a mantambayo ed ermen na saray inateyan?
20 Say sakey ed sankabalgan a panlalapuay tulong, sano initer ed dugan panaon et say pangunsidera ed sipasipan nen Jehova parad inaatey. Sarayan kanonotan ed Biblia so makagungguna balanglan say inatey et sakey lan Tasi odino sakey a toon naabet tayo diad ministeryo. Antoray pigara ed sarayan teksto? Amta tayo a si Jehova so Dios na amin a ligliwa, lapud inkuanto: “Siak, siak lanlamang so manligliwa ed sikayo.” Inkuanto met: “Singa say sakey a liligliwaen na ina to, ontan naani so panligliwak ed sikayo.”—Isaias 51:12; 66:13.
21 Insulat na salmista: “Sikato so ligliwak ed kaermenan ko; ta say salitam pinabilay toak. Ninodnonot ko so panangisisip mo nen ona, O Jehova, tan tinaliwak so inkasiak. Pikasik ed sika, ta say mapangasi ya abig na linawam so onkana a ligliwak, unong ed salitam ed aripen mo.” Imanoen a say salitan ‘ligliwa’ so inusar ya aminpigan danay ed satan a bersikulo. On, naromog tayo so tuan ligliwa parad inkasikatayo tan parad arum diad pangipaarap tayoy imano tayo ed Salita nen Jehova ed panaon na kairapan tayo. Saya, pati say aro tan piaambegya na agagi so makatulong ed sikatayo pian natalonaay panermen tan napano lamet so bilay tayo na magayagan kimey ed Kristianon ministeryo.—Salmo 119:50, 52, 76.
22. Antoray iilaloan a walad arapen tayo?
22 Natalonaan tayo met so ermen tayo anggan panon diad pagmaliw tayon okupadon ontulong ed arum diad irirap da. Legan ya ipapaarap tayoy imano tayo ed arum a mankakaukolan na ligliwa, nalikna tayo met so tuan liket ed panangiter diad espiritual a pantalos. (Gawa 20:35) Ipanabang tayo ed sikara so pasingawey na agew na kioli sano saray totoo ed amin a nasyon, ed mantumbok iran kailalakan, so mangabet ed saray naandi’d-bilay ya inad-aro ra manlapud saray inatey, a mamaarap ed balon mundo. Agaylan iilaloan! No ontan agaylaran lua na liket legan ya iisipen tayo a si Jehova so talagan say Dios—a “manligliwa ed saray abeban linawa”!—2 Corinto 7:6.
Kasin Natandaan Yo?
◻ Panon a si Jehova so “Dios na ami ligliwa”?
◻ Panon a niligliwa nen Jesus tan si Pablo iray maneermen?
◻ Antoray pigaran bengatlan nagawaan tayo pian naligliwa iramay maneermen?
◻ Anto so kaukolan a paliisan tayo sano midedeneng ed saray inateyan?
◻ Antoray paborito yon teksto diad kaligliwa ed panaon na inkaandi?
[Litrato ed pahina 15]
Diad mataktikan paraan et mabulontaryon ontulong ed saramay walad kaermenan