“Saray Sugat na Kaaro”

NAIMANO nen apostol Pablo so pankaukolan na pangiter na pigaran panangorehi ed saray inmunan-siglon Kristiano diad Galacia. Pian napaliisan so dinanman a pakasakitan, intepet to: “Nagmaliw ak ta sirin a kabusol yo, dia ed impangibagak ed sikayo na tua?”​—Galacia 4:16.

Nen ‘imbaga [nen Pablo] so katuaan,’ sikatoy agnagmaliw a kabusol da. Diad tua, sikatoy kinmiwas a mitunosan ed prinsipyoy Biblia: “Matoor so saray sugat na kaaro.” (Uliran 27:6) Amta to a nayarin nasugatan so kinon na saray nankasalanan. Balet, kabat to met a say agpangiter na disiplina a kaukolan na nankasalanan so mansumpal ed agkinatnat na panangaro nen Jehova a Dios ed nankasalanan. (Hebreos 12:5-7) Kanian, bilang matoor a kaaro a manunan walaan na agnaumas a panangiyansakit ed kongregasyon, agpinugeran nen Pablo so pangiter na panangorehin simbawa.

Susumpalen na saray Tastasi nen Jehova natan so ganggan ed sikara a ‘manggawa na saray babangatan ed amin a nasyones, . . . ya ibangat da ran mangunor na amin a bengabengatla ya ingganggan [nen Jesu-Kristo].’ Diad panggagawa ed satan, ag-ikokompromiso na sarayan masimoon a Kristiano iray katuaan na Biblia a mangiwawalwal tan mangokondena ed lingon doktrina tan agmakristianon walna. (Mateo 15:9; 23:9; 28:19, 20; 1 Corinto 6:9, 10) Imbes a magmamaliw iran kabusol ya ipulisay, ipapatnag day panangiyansakit na peteg a kakaaro.

Tekep na impuyan na Dios ya aralem a pakatalos, onia so insulat na salmista: “Say matunong so mangabil ed siak et sikato naani so sakey ya abig na linawa; tan banoen toak; et sikato naani maomaong a larak ed ulo agmo yabuloy ya aggabayey ulok.”​—Salmo 141:5.