Efeso 3:20—“Sarasarag [na Dios ya] Gawaen so Mas Ni nen say Amin a Bengatlan Kekerewen Odino Iisipen Tayo”

“Natan, say Dios, a sarasarag ton gawaen so mas ni nen say amin a bengatlan kekerewen odino iisipen tayo, unong ed pakayari to a napapatnagan ed sikatayo, et nigloria.”​—Efeso 3:20, 21, Balon Mundo a Patalos.

“Diad Dios a makagaway lalon dakdakel nen say nayarian tin kerewen tan nunoten, diad panamegley na pakayarin mankikimey ed sikatayo: niiter komud sikatoy galang.”​—Efeso 3:20, 21, Maung a Balita.

Say labay ya ibaga na Efeso 3:20

Baleg so tiwala nen apostol Pablo ya eebatan na Dios iray pikakasi tayo, tan gagawaen To itan diad paraan ya singa imposible. Tan say ebat to et nayarin mas ni nen say iilaloan o iisipen na saray lingkor to.

“Unong ed pakayari to a napapatnagan ed sikatayo.” Base ed bersikulo 21, naaralan tayo ya si Jehovaa so mangiiter na pakayari. Sarag to tayon ikdan na pakayari o biskeg pian nagawaan tayo so panlabayan to.—Filipos 4:13.

Diad bersikulo 20, indanet nen apostol Pablo so tungkol ed pakayari nen Jehova ya tulongan iray lingkor To. Diad samay balikas ya “unong ed pakayari to,” oniay imbaga na sakey ya reperensya tungkol ed satan: “Aglabat ibabaga na satan ya bersikulo ya sarag nen Jehova ya gawaen so sakey ya bengatla. Imbes, walan talagay pakayari to ya gawaen itan.” Wala ray kakaaro tayon labalabay da tayon tulongan, pero limitado labat so nagawaan da. Balet aliwan ontan si Jehova ta anggapoy limitasyon na pakapanyari tan autoridad to. (Isaias 40:26) Kanian sarag ton gawaen so anggan anto pian naasikaso tan naebatan so pikakasi na saray lingkor to.

“Sarasarag [na Dios ya] gawaen so mas ni nen say amin a bengatlan kekerewen odino iisipen tayo.” Kaya nen Jehova so mangiter na ‘mas dakel ni’ parad saray lingkor to. Sarasarag to tayon tulongan diad paraan ya napalumbasan to so antokaman ya iisipen tayon sobra.

Wala ni arum ya idadanet na saray salitan “mas ni nen say amin a bengatlan kekerewen odino iisipen tayo.” Nen imbaga nen apostol Pablo so “mas ni nen say amin a bengatlan kekerewen odino iisipen tayo,” labay ton natalosan na amin ya Kristiano ya sarasarag iran tulongan na Dios diad paraan ya mas ni nen say iilaloan da. Oniay impangipatalos na New International Version ed unonan parte na bersikulo 20: “Natan diad sikato ya sarasarag ton makagaway mas dakel nen say nayarian tayon kerewen odino nonoten.” No maminsan, iisipen na saray Kristiano ya balbaleg so problema da tan agda itan nasarag. Ompan agda ni ingen amta no antoy ipikasi ra. Pero amta nen Jehova so amin ya dadalanen da tan sarasarag to ran tulongan. Diad dugan panaon, solusyonan to so amin ya problema tayo diad paraan ya singa imposible odino mas ni nen say iisipen tayo. (Job 42:2; Jeremias 32:17) Pero legan tayon aalagaren itan, natan ni labat et iikdan to tayo lay biskeg pian maliket tayon makapan-anos.​—Santiago 1:2, 3.

Say konteksto na Efeso 3:20

Say Libro na Efeso et insulat nen apostol Pablo parad saray Kristiano ya manaayam ed syudad na Efeso diad Asia Minor, ya natan et walad parte na Turkey. Diad samay sulat nen Pablo, nabasa so pikakasi to parad saray agagi ed Efeso. (Efeso 3:14-21) Impikasi to ya naalig da​—tan na amin ya Kristiano—​so maaron panagnonot tan kagagawa nen Kristo. Diad ontan et naamtaan da so aro na Kristo. Diad sampot na pikakasi nen Pablo ya akarekord ed Efeso 3:20, 21 et indayew to so Dios.

Bantayan iyan antikey ya video pian nawalaan kay ideya ed libro na Efeso.