Saray Gungguna Diad Pangaro ed Salitay Dios

“Aroen mo [so kakabatan], et sikato bantayan to ka. . . . Sikato yakar to ka ed kagalangan, sano sikato so sayakupen mo.”​—ULIRAN 4:6, 8.

1. Anto so lalanoren na peteg a panangaro ed Salitay Dios?

SAY pambasa ed Biblia so makanakana parad sakey a Kristiano. Anggaman ontan, say pambasa lambengat ed satan so agmismon pakapatnagay panangaro ed Salitay Dios. Panon no walay sakey a manbabasa na Biblia balet ta saray gagawaen to et kokondenaen na Biblia? Mabitar, agto aaroen so Salitay Dios a singa ed say impangaro na nansulat ed Salmo 119. Say panangaro ed Salitay Dios so angitonton ed sikato a manbilay unong ed saray kakaukolanen na satan.​—Salmo 119:97, 101, 105.

2. Antoran gungguna so nagamoran manlapud kakabatan a nibase’d Salitay Dios?

² Say pambilay unong ed Salitay Dios so mankaukolan na tuloytuloy a pananguman ed panag-isip tan dalan na kabibilay na sakey. Say ontan a kurso so pakapatnagay maridios a kakabatan, a kabaliksan toy praktikal a panangiyaplika ed pikakabat tan pakatalos ya agamoran diad panaaral ed Biblia. “Aroen mo [so kakabatan], et sikato bantayan to ka. Sikato so paatageyen mo, et sikato ipatagey to ka; sikato yakar to ka ed kagalangan, sano sikato so sayakupen mo. Sikato mangiter ed ulom na sakey a balanget na palabo; sakey a balanget na kalimgasan so yawat to ed sika.” (Uliran 4:6, 8, 9) Agaylan abig a panamaseseg pian bayuboan tayo so panangaro ed Salitay Dios tan paigiya ed satan! Siopa so agmalabay a nasalimbengan, nitandoro, tan nigloria?

Nasalimbengan Manlapud Permanentin Pankaugsan

3. Nagkalalo ni nen say kapiganman, akin a nakaukolan a pasalimbengan iray Kristiano, tan manlapud siopa?

³ Diad anton dalan a nasalimbengan so sakey lapud kakabatan ya agamoran to ed panaaral tan pangiyaaplika ed Salitay Dios? Say sakey lan bengatla et sikato so nasalimbengan manlapud si Satanas a Diablo. Imbangat nen Jesus iray patumbok to ya ipikasi so kilegyas manlapud mauges a sakey, si Satanas. (Mateo 6:13) Natan et talagan kakkaukolan ya ilaktip iyan kerew diad saray pikakasi tayo. Apagit si Satanas tan saray demonyo to manlapud tawen kayari 1914, kanian si Satanas so walaan na ‘baleg a sanok, ya amta ton daiset la so panaon to.’ (Apocalipsis 12:9, 10, 12) Diad saya lan panaon, sikato so seguradon manngilngilet la’d sanok to lapud agto itatalona diad pibabakal ed saramay “manguunor ed ganggan na Dios, tan wala ed sikara so impantasi nen Jesus.”​—Apocalipsis 12:17.

4. Panon a nasalimbengan iray Kristiano manlapud saray pananesdes tan patipatit nen Satanas?

⁴ Lapud sanok to et itutultuloy nen Satanas so panodogirog ed saray Kristianon ministro tan papawalaen to so maramsak a panamasegsegang odino aamperen to so kimey da. Labay to met a naingganyo iray manangiyabawag na Panarian a mangiyapasakey ed bengabengatlan singa say inkabantog ed mundo, say aro ed panagrelaks, say panagtipon na materyal a kaykayarian, tan say pangegemtan na likeliket, imbes a say kimey ed panangipulong na Panarian. Anto so makasalimbeng ed saray matoor a lingkor na Dios pian ag-ira onsuko ed saray pananesdes nen Satanas odino pian agto ira nakalotan? Siempre, say pikakasi, say maapit a personal a relasyon ed si Jehova, tan pananisia ed inkapeteg na saray sipan to so makanakana. Balet ta nisiglaot irayan amin ed pikakabat tan determinasyon a mangunor ed saray panonot na Salitay Dios. Nagamoran irayan panonot diad panamegley na panagbasa ed Biblia tan saray katulongan ed panagaral ed Biblia, iyaatendi ed saray Kristianon miting, italineng ed Makasulatan a simbawa na sakey a kapanisiaan, odino diad masimoon a pandalepdep ed saray prinsipyo na Biblia ya ipapanonot na espiritu na Dios.​—Isaias 30:21; Juan 14:26; 1 Juan 2:15-17.

5. Diad antoran dalan a makasalimbeng ed sikatayo so kakabatan a nibase ed Salitay Dios?

⁵ Saramay mangaaro ed Salitay Dios so nasasalimbengan ed arum niran dalan. Alimbawa, napaliisan da so pakagonigonan ed emosyon tan pisikal a sakisakit a makasengeg ed bengabengatlan singa say lingon panangusar na druga, panagtabako, tan seksual ya imoralidad. (1 Corinto 5:11; 2 Corinto 7:1) Napapaliisan da met so pagmaliw a sengegay balingaan lapud panagtalabutob odino ansakit iran panagsalita. (Efeso 4:31) Nisay pabibiktima ira diad kakaupapet da ed saray makapalikdon pilosopiya na kakabatan ed mundo. (1 Corinto 3:19) Lapud panangaro ra ed Salitay Dios, nasasalimbengan ira manlapud saray bengatlan nayarin pakabalangan day relasyon da ed Dios tan ed ilalon andi-anggaan a bilay. Okupado iran ontutulong ed kapara ran totoo pian manilalo met ira ed alay abig iran sipan ed Biblia, ya amta ran ‘kilabanan dan dili tan saramay ondengel ed sikara.’​—1 Timoteo 4:16.

6. Panon itayon nasalimbengan na kakabatan a nibase’d Salitay Dios anggaman ed mairap iran sirkumstansia?

⁶ Tua, amin​—pati saramay mangaaro ed Salitay Dios​—so nidudunget ed “panaon tan agnailaloan a nagawa.” (Eclesiastes 9:11, NW) Agnapaliisan na arum ed sikatayo so pakasagmak na natural iran desyang, grabi iran sakit, aksidenti, odino ag-ilaloan ya ipapatey. Siansia nin sikatayo so nasalimbengan. Anggapo so desyang a permanentin pankaugsan na sakey a toon mangaaron talaga ed Salitay Dios. Kanian, agtayo nepeg a mapagpaga nipaakar ed nayarin nagawa ed arapen. Kayari na amin a makatunongan lan panag-alwar tayo, magmaong ya ipalima iray bengabengatla ed si Jehova tan agtayo aabuloyan a naandi so deen a walad sikatayo lapud inkaandian lay seguridad ed bilay natan. (Mateo 6:33, 34; Filipos 4:6, 7) Tandaan so seguradon ilalo ed kikioli tan say magmaong a bilay sano ‘say amin a bengatla et gawaen la na Dios a balo.’​—Apocalipsis 21:5; Juan 11:25.

Paneknekan Moy Inkasika Bilang “Mabuna a Dalin”

7. Anton ilustrasyon so insalaysay nen Jesus ed saray ulop na totoo a dinmagon ondengel ed sikato?

⁷ Say kaimportantian na pakawalaay dugan panmoria ed Salitay Dios so nipabitar diad sakey ed saray parabolo nen Jesus. Diad pangiwawakawak nen Jesus na maong a balita diad intiron Palestina, dinmagsa iray ulop na totoo pian ondengel ed sikato. (Lucas 8:1, 4) Balet ta aliwan amin da so talagan mangaaro ed Salitay Dios. Andi-duaruwan dakel so dinmago pian ondengel ed sikato lapud labay da lambengat a nanengneng iray milagro odino lapud panggagayagaan day alay abig a paraan na panagbangat to. Kanian, insalaysay nen Jesus ed saray ulop na totoo so nipaakar ed sakey ya ilustrasyon: “Say managtanem pinmaway a linman mangitanem na ilik [“bukel,” NW] to: et nen nantanem, arum naplag ed saray gilig na dalan; et agatingatinan, tan saray manok ed tagey sikato so kinan da. Et say arum naplag ed bato; et katubo to, amagaan, lapu ed anggapo so basa to. Et arum naplag ed kasabitan; et saray sabit tinmubo pati sikato, tan sikato so pinalereg da. Et arum naplag ed mabuna a dalin, et tinmubo, tan angiter na bunga a tunggal lasus.”​—Lucas 8:5-8.

8. Diad ilustrasyon nen Jesus, anto so bukel?

⁸ Pinmatnag ed parabolo nen Jesus so nanduruman kiwas na totoo ed kipupulong na maong a balita, ya akadependi ed kipapasen na puso na dumerengel. Say bukel ya itatanem et say “salita na Dios.” (Lucas 8:11) Odino, unong ed ibabaga na sakey nin salaysay na parabolo, say bukel et say “salita na panarian.” (Mateo 13:19) Anggan dinan ed satan a balikas so nayarin uusaren nen Jesus, lapud ta say tema na Salitay Dios et say mangatatawen a Panarian ed silong nen Jesu-Kristo bilang Ari, a diad panamegley na satan et alangonen nen Jehova so inkasoberano to tan pasantosen toy ngaran to. (Mateo 6:9, 10) Bilang resulta, say bukel sirin et say mensahe na maong a balita ed Salitay Dios, say Biblia. Ipapabitar na Tastasi nen Jehova iyan mensahe na Panarian legan dan itatanem so bukel bilang pangalig ed orihinal a Managtanem, si Jesu-Kristo. Anton kiwas so naroromog da?

9. Anto so ililitatro na bukel a naplag ed (a) gilig na dalan? (b) dia ed bato? (c) diad masabit a dalin?

⁹ Inkuan nen Jesus a napelag so arum a bukel diad gilig na dalan tan nagatin-gatinan. Tutukoyen na saya so totoo ya okupadon maong kanian ag-onlamot so bukel na Panarian ed kapusoan da. Sakbay dan nabayuboan so panangaro ed Salitay Dios, “onsabi’ Diablo, et ekalen to so salita ed kapusoan da, pian ag-ira manisia tan ag-ira nilaban.” (Lucas 8:12) Arum a bukel so napelag ed bato. Tutukoyen na saya so totoon asagyat ed mensahe na Biblia balet ta agda itan pinatanek ed kapusoan da. Sano onsabi so isusumpa odino sano nairapan iran mangiyaplika ed simbawa na Biblia, “onsian ira” lapud ag-ira linmamot. (Lucas 8:13) Insan wala met iramay ondengel ed salita balet ta natalonaan ira na “kapagaan tan kayamanan tan likeliket ed saya a bilay.” Diad kaunoran, singa ira tanaman a kinulapotan na saray kasabitan, “ag-ira manbunga.”​—Lucas 8:14.

10, 11. (a) Sioparay ililitrato na say mabunan dalin? (b) Anto so nepeg tayon gawaen pian ‘napansiansia’ so Salitay Dios ed kapusoan tayo?

¹⁰ Diad kaunoran, wala so bukel a napelag ed mabunan dalin. Tutukoyen na saya so totoon angawat ed mensahe a walaan na “masimpit tan maong a puso.” Natural lambengat a kaliktan na balang sakey ed sikatayo so napibilang ed sayan klase. Balet, kayari inkakonsidera na amin a bengatla, say panmoria na Dios so sankaimportantian. (Uliran 17:3; 1 Corinto 4:4, 5) Unong ed Salita To, say pakawalaan tayo na “masimpit tan maong a puso” et napaneknekan tayo diad panamegley na saray kiwas tayo manlapud natan ya anggad ipatey tayo odino anggad panganggaen la na Dios iyan marelmeng a sistema na bengabengatla. No positibo so pilimeron inkiwas tayo ed mensahe na Panarian, maabig itan. Balet, saramay walaan na masimpit tan maong a puso so mangawat ed Salitay Dios tan “sikato so binembenan da, tan manbunga ra a maanos.”​—Lucas 8:15.

¹¹ Say alenleneg a seguradon paraan pian mansiansia so Salitay Dios ed kapusoan tayo et say pambasa tan panaral ed satan diad pribadon paraan tan no kalimog iray kapananisiaan. Laktipen na saya so sigpot a panganamot ed espiritual a taganon nitatarya diad panamegley na paralanan ya aturon mangasikaso ed espiritual a pankaabiganan na tuan papatumbok nen Jesus. (Mateo 24:45-47) Diad panamegley na satan, saramay mamapasiansia ed Salitay Dios ed kapusoan da so napakiwas ed aro pian “manbunga ra a maanos.”

12. Anto so bungan nepeg tayon pawalaen ya atekepan na panagsungdo?

¹² Anton bunga so napawala ed mabunan dalin? Diad natural a kipapasen, ontubo iray bukel a magmaliw a tanaman a manbungan walaan na parehon klase na bukel, a nayarin isibwag pian manbunga lamet. Mipadpara, ontutubo so bukel na salita ed saramay walaan na masimpit tan maong a puso, a pagmamaliwen toran maaligwas ed espiritual anggad sikara met la so makapantanem na bukel ed kapusoan na arum. (Mateo 28:19, 20) Tan say kimey dan panagtanem so atekepan na panagsungdo. Impabitar nen Jesus so kaimportantian na panagsungdo diad panagtanem sanen ikuanton: “Say misungdo ya angga ed kasampotan, sikato lamlamang so nilaban naani. Tan saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.”​—Mateo 24:13, 14.

“Mamabunga Diad Ganaganan Maabig a Gawa”

13. Anton pikakasi so imbesngaw nen Pablo a nisiglaot so bunga diad pikakabat ed Salitay Dios?

¹³ Sinaglawi met nen apostol Pablo so pankaukolan ed pamawalay maong a bunga, tan insiglaot to so pamawalay bunga diad panamegley na Salitay Dios. Impikasi to a saray kapananisiaan to et ‘napano komon na kakabatan na linawa [na Dios] ed amin a karunongan a maespiritu tan pakatalos, a mankurang a makana ed Katawan ya onarap ed amin a makapaliket, mamabunga ed ganaganan maabig a gawa.’​—Colosas 1:9, 10; Filipos 1:9-11.

14-16. Mitunosan ed pikakasi nen Pablo, anton bungabunga so papawalaen na saramay mangaaro ed Salitay Dios?

¹⁴ Kanian impanengneng nen Pablo ya aliwan sankaultimoan lan kalat so pakagamor na pikakabat ed Biblia. Imbes, say panangaro ed Salitay Dios so mamakiwas ed sikatayon ‘mankurang a makana ed Katawan’ diad pantultuloy a ‘pambunga ed ganaganan maabig a gawa.’ Anto so maabig a gawa? Say panpulong na maong a balita na Panarian so matalonggaring a nipabtang parad saray Kristiano diad sarayan kaunoran ya agew. (Marcos 13:10) Niarum ni, gagawaen na saramay mangaaro ed Salitay Dios so anggaay nayarian da pian regular a makatulong ed sayan kimey diad pinansyal a paraan. Panliketan da iyan pribilihyo, ta amta ran “say Dios [et] aroen to so sililiket a mangiter.” (2 Corinto 9:7) Lapu ed saray kontribusyon da, nasasalipotpotan so nanggastosan ed kipapakurang na masulok a sanlasus a pasilidad na Bethel a ditan so kididirehian na panagpulong nipaakar ed Panarian tan uusaren so arum ed saratan diad pangiimprinta na saray Biblia tan literatura na Biblia. Makakatulong met iray kontribusyon da pian nasalipotpotan iray nanggastosan ed angkabaleg iran Kristianon kombension tan diad pangibabaki ed saray managbiahen manangasikaso, misyonaryo, tan arum nin sigpot-panaon ya ebanghelisador.

¹⁵ Lalanoren met na arum nin maabig iran gawa so pangipaalagey tan panangasikaso ed saray pasen a parad tuan panagdayew. Lapud panangaro ed Salitay Dios, napapakiwas iray managdayew ed sikato pian naseguron agnapaulyanan iray Assembly Hall tan Kingdom Hall. (Ikompara so Nehemias 10:39.) Lapud sankanengneng so ngaran na Dios ed arap na saratan a bilding, importanti a pansiansiaen iratan a malinis tan mauksoy diad loob tan paway tan kaukolan ya anggapoy kabandayan ed kondukta na saramay mandadayew ed loob na saratan a hall. (2 Corinto 6:3) Dakel ni so nagagawaan na pigaran Kristiano. Lapud panangaro ra ed Salitay Dios, napapakiwas iran manbiahe ed ararawi pian onayuda ed panagpaalagey ed saray balon pasen a pandayewan diad dakel a parti na mundon walay pankaukolan makasengeg ed inkaduka odino kakulangay dunong.​—2 Corinto 8:14.

¹⁶ Say ‘pambunga na ganaganan maabig a gawa’ so mangilaktip met ed pangasikaso ed saray obligasyon ed pamilya tan panangiyansakit ed saray kaparan Kristiano. Lapud panangaro ed Salitay Dios et napakiwas itayon magmaliw a malikas ed pankaukolan na saramay ‘kaamong tayo ed pananisia’ tan “mangagamil na maridios a debosyon ed dilin sankaabungan [tayo].” (Galacia 6:10; 1 Timoteo 5:4, 8, NW) Nipaakar ed saya, maabig a gawa so pambisita ed saray mansasakit tan ligliwaen iray maneermen. Tan agaylan maabig a gawa so susumpalen na mamatatken ed kongregasyon tan saray Hospital Liaison Committee diad panutulong da ed saray indibidual a nidudunget ed makapaangat iran kipapasen ed medikal! (Gawa 15:29) Tan walay ondarakel a bilang na saray desyang, ya arum ed saratan et natural tan say arum et resulta na kaatiwan na totoo. Diad tulong na espiritu na Dios, akagawa na maong a reputasyon iray Tastasi nen Jehova dia ed dakel a parti na dalin lapud maples ya itutulong ed saray kapananisiaan da tan arum nin biktima na saray kalamidad tan aksidenti. Amin na saraya et maabig iran gawa ya ipapatnag na saramay mangaaro ed Salitay Dios.

Saray Gungguna ed Maglorian Arapen

17, 18. (a) Anto so nagagawaan la na panagtanem na bukel na Panarian? (b) Antoran importantin ebento so magano lan napamintuan na saray manangaro ed Salitay Dios?

¹⁷ Say panagtanem na bukel na Panarian so tuloytuloy a mangitatarok na baleg iran gungguna ed katooan. Diad agano niran taon et inabuloyan na masulok a 300,000 a totoo ed kada taon ya onlamot so mensahe na Biblia ed kapusoan da angga ed impangidedika ra ed bilay da ed si Jehova tan insimbolo ra iya diad panamegley na bautismo ed danum. Agaylan maglorian arapen so manatalaran ed sikara!

¹⁸ Agmabayag, amta na saray manangaro ed Salitay Dios ya onkiwas la si Jehova a Dios pian itandoro to so ngaran to. Naderal la so “Babilonia a Baleg,” say sankamundoan ya empiryo na palson relihyon. (Apocalipsis 18:2, 8) Insan, galpongen la na Arin si Jesu-Kristo, iramay agmanbibilay unong ed Salitay Dios. (Salmo 2:9-11; Daniel 2:44) Kayari na satan et itarok na Panarian na Dios so permanentin pakainawaan manlapud krimen, bakal, tan arum nin desyang. Agla nakaukolan naani a ligliwaen so totoo lapud ot-ot, sakit, tan ipapatey.​—Apocalipsis 21:3, 4.

19, 20. Anton maglorian arapen so manalataran ed saramay talagan mangaaro ed Salitay Dios?

¹⁹ Agaylan magloria iray maabig a gawan sumpalen naani na saramay mangaaro ed Salitay Dios! Saray makaliktar ed Armagedon so mangigapo ed magayagan kimey na panamasimbalo ed sayan dalin a pagmaliwen dan paraiso. Walaan iray makapaliket a pribilihyon mangisagana ed saray pankaukolan na saray inaatey a totoon manpapainawa la ed lubok tan wala la ed kanonotan na Dios tekep na ilalon napaoli. (Juan 5:28, 29) Legan na satan a panaon, tuloytuloy a nitarya ed saray manaayam ed dalin so ayadyarin direksion manlapud Soberanon Katawan, a Jehova, diad panamegley na nitandoron Anak to, si Jesu-Kristo. ‘Nabuskag iray lukot,’ a mangiparungtal ed saray instruksion nen Jehova parad saray manbilay ed balon mundo.​—Apocalipsis 20:12, NW.

²⁰ Diad aturon panaon nen Jehova, say kompleton ulop na matoor ya alanaan a Kristianos so nitandoro ed mangatatawen a tumang da bilang saray “mitatawir ed Kristo.” (Roma 8:17) Legan na Sanlibon Taon ya Uley nen Kristo, amin a totoo ed dalin a mangaaro ed Salitay Dios so naagwat ed inkayadyari diad kanonotan tan laman. Kayari ran napaneknekan so katooran da diad kaunoran a subok, natumangan ira na andi-anggaan a bilay tan panggayagaan da so “kawayangan na gloria na saray anak na Dios.” (Roma 8:21; Apocalipsis 20:1-3, 7-10) Agaylan abig la itan a panaon! Petepeteg, balanglan say impagamor nen Jehova ed sikatayo et mangatatawen odino mangaraldalin ya ilalo, say agnaumas a panangaro ed Salita to tan say determinasyon a manbilay unong ed maridios a kakabatan so manalimbeng ed sikatayo. Tan diad arapen et ‘mangigloria itan ed sikatayo diad kagalangan lapud sinayakup tayo itan.’​—Uliran 4:6, 8.

Kasin Nipaliwawa Yo?

◻ Panon itayon nasalimbengan no aroen tayo so Salitay Dios?

◻ Anto so bukel ed ilustrasyon nen Jesus, tan panon itan a nitanem?

◻ Panon tayon napaneknekan a ‘mabuna itayon dalin’?

◻ Antoran gungguna so tatalaranan na saray manangaro ed Salitay Dios?

[Litrato ed pahina 16]

Say bukel ed ilustrasyon nen Jesus so mangililitrato ed mensahe na maong a balita a lugan na Salitay Dios

[Credit Line]

Garo Nalbandian

[Litrato ed pahina 17]

Aaligen na Tastasi nen Jehova so Baleg a Managtanem

[Saray litrato ed pahina 18]

Panggayagaan na saray makaliktar ed Armagedon so bungabunga na dalin