Nibalikas a Walaan na Kombiksyon

SANO mansasalita so sakey a too a walaay kombiksyon, nanengneng na arum a mapekder ton panisiaan so ibabaga to. Satan a kombiksyon so mapatnag ed ministeryo nen apostol Pablo. Diad saramay nagmaliw a mananisia ed Tesalonica, insulat to: “Say maong a balitan ipupulong mi so agnansumpal ed sikayo a salita lambengat noagta dia met ed . . . mabiskeg a kombiksyon.” (1 Tes. 1:5, NW) Mapatnag itan a kombiksyon diad paraan na impansalita to tan diad impanbilay to. Nepeg a mapatnag met so mabiskeg a kombiksyon diad paraan na pangipresenta tayo ed saray katuaan na Biblia.

Say pangibalikas na ontan a kombiksyon so miduma ed pagmaliw a mangipasoot ed opinyon, dogmatiko, odino matangsit. Imbes, sano say sakey a toon mangipatnag na kombiksyon so manpapaliwawa nipaakar ed saray bengatla ed Salita na Dios, satan so gawaen to diad paraan a mangipanengneng na mabiskeg a pananisia.​—Heb. 11:1.

Saray Pankanawnawa ed Pangibalikas na Kombiksyon. Importante so pansalita a walaan na kombiksyon sano manpupulong ka. Mabetbet a naimano na totoo so paraan na panagsalitam ontan met ed mensahem. Nalikas da so peteg a liknaan mo ed ibabagam. Say kombiksyon mo so makapangipasabi, a lalon mabiskeg nen saray salita lambengat, a walaan ka na bengatlan mablin tuloy ya inabang.

Wala met so pankaukolan na pangibalikas na kombiksyon sano manpapaliwawa ed saray kapananisiaan. Insulat nen apostol Pedro so inmunan apuyanan a sulat to “pian mangiter na panamaseseg tan masimoon a pantasi a saya so tuan agkanepegan a panangasi na Dios.” Diad saya, pinaseseg toray agagin: “Ontalindeg a malet.” (1 Ped. 5:12, NW) Sanen nansulat ed kongregasyon diad Roma, imbalikas nen apostol Pablo so kombiksyon ya akagunggonaan da. Insulat to: “Sisiaen ko a peteg, ya anggan say patey, anggan say bilay, anggan saray angheles, anggan saray arari, anggan saray wala ed kaplesan, anggan saray wala ed arapen, anggan saray pakayari, anggan say katagey, anggan say kaaralman, anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.” (Roma 8:38, 39) Makatangguyor met a nansulat si Pablo nipaakar ed pankaukolan na pampulong ed arum, tan say dilin seseg to ed satan a kimey so angipatnag a sikato so personal a kombinsido ed kaimportantian na satan. (Gawa 20:18-21; Roma 10:9, 13-15) Nepeg a mapatnag so miparan kombiksyon ed biang na Kristianon mamatatken natan diad pambabangat da manlapud Salita na Dios.

Legan na panaaral tan diad arum a panaon, kaukolan ya ibalikas na atateng so inkasikara a walaan na kombiksyon sano isisingbat daray espiritual a bengatla ed ananak da. Kaukolan na saya a bayuboan na atateng so aro ed Dios tan diad saray dalan to ed dilin kapusoan da. Diad ontan et makapansalita ra na impapuson kombiksyon ed ananak da, ‘lapud diad inkadaakan na puso say sangi so mansalita.’ (Luc. 6:45; Deut. 6:5-7) Say pakawalaan na ontan a kombiksyon so mamakiwas met ed atateng a mangipanengneng na alimbawa na ‘pananisian anggapoy pansimpisimpitan.’​—2 Tim. 1:5, NW.

Nagkalalo lan importante so pansalitam a walaay kombiksyon sano nasusuppiat so pananisiam. Nayarin pankelawan na sakey a kaeskuelaan, sakey a maestro, odino sakey a katrabahoan a sika so agmibibiang ed sakey a selebrasyon. Say mapekder, makatunongan ya ebat so nayarin ontulong ed sikaton manrespeto ed talindeg mon nibase’d-Biblia. Anto no walay manalin managyat ed sika ed mauges a kondukta​—panagsaol, panagdruga, odino diad seksual ya imoralidad? Importantin ipalinew ya agmon balot agamilen itan tan anggapoy pananangguyor a manguman ed nonot mo. Kaukolan na saya a mansalita kan walaan na kombiksyon sano ipulisay mo so opresi. Sanen reresistian to so imoral a kaliktan na asawa nen Potipar, mapekder ya imbaga nen Jose: “Panon sirin so pakayarik a manggawa ed saya ya abalbaleg a kabaglan tan kasalanan ya onsumpa ed Dios?” Sanen mapilit so asawa nen Potipar, sikato so tinmaynan ed abung.​—Gen. 39:9, 12.

No Panon a Nipatnag so Kombiksyon. Saray salitan usaren mo so lalon makapangipasabi ed kombiksyon mo. Diad dakel ya inkagawa inggapo nen Jesus iray importantin balikas diad impangikuan: “Tua, tua, kuan ko ed sikayo.” (Juan 3:3, 5, 11; 5:19, 24, 25) Nipanengneng so kombiksyon nen Pablo ed saray balikas a singa say “Siak so kombinsido,” “Amtak tan atangguyor ak ed Katawan a Jesus,” tan “Ibabagak so katuaan, agak mantitila.” (Roma 8:38; 14:14; 1 Tim. 2:7, NW) Nipaakar ed kasumpalan na salita to, no maminsan et puyanan nen Jehova iray propeta ton mangibagan maranet, a singa, “Andi-saew itan ya ontua.” (Hab. 2:3, NW) Sano tukoyen mo irayan propesiya, nayarin usaren mo so miparan salita. No agka manmamatalek ed inkasikan dili noagta diad si Jehova tan no mitongtong ka ed arum diad marespeton paraan, saray balikas a mangipanengneng na miparan kombiksyon so ebidensyan mabiskeg so pananisiam.

Nipanengneng met so kombiksyon diad inkagunaet tan diad biskeg na balikas mo. Saray ipatnag na lupam, saray panag-andawes mo, tan kiwas na laman mo so ontulong ya amin ed saya, anggaman saraya so nayarin manduruma ed kada too. Anggano sika so sipor lan mabaing odino mapalnan mansalita, sano sigpot kan natangguyor a say ibabagam so katuaan tan satan so kaukolan a narengel na arum, napatnagan so kombiksyon mo.

Siempre, nepeg a tudtua so antokaman iran balikas na kombiksyon tayo. No nalikas na totoon mankunkunwari itayo imbes a mansasalitan manlalapud puso, nayarin ibaga ra a say mensahe tayo et aliwan importante. Sirin, manuna ed amin, magmaliw a matua. No sika so manpaliwawa ed dakel a dumerengel, nayarin kaukolan mo so mansalita diad mamaksil a boses nen say gendat tan mas mabiskeg. Ingen say gagalam et nepeg ya ibalikas moy inkasika a masimoon tan natural.

Saray Tulong diad Pangibalikas na Kombiksyon. Lapud lalanoren na kombiksyon mo so liknaan mo nipaakar ed materyal mo, importante so maabig a panagparaan. Aliwan magenap so basta pangopya ed materyal a manlapud sakey a publikasyon insan idalatdat. Kaukolan mon talosan a maong so materyal tan ibalikas itan ed dilin salitam. Nepeg a sigpot kan kombinsido a tua itan tan makanakana ed dumerengel mo so ibabagam. Kabaliksan na saya a sano ipaparaan moy presentasyon mo, konsideraen mo so sirkumstansya ra ontan met ed samay nayarin kabat da la nipaakar ed suheto odino no panon so nayarin liknaan da nipaakar ed satan.

Mainomay a nalikas na arum so kombiksyon tayo sano marmarlas so panagpaliwawa tayo. Kanian, niarum ed pangiparaan na maabig a materyal, kimeyan a maong so panagpaliwawam. Imanoen a maong iray kabiangan na materyal mo a mankaukolan na lalon inkasimoon ta pian saratan so nipaliwawam ya agka masyadon mandepende ed saray notam. Tandaan, met, ya ipikasi so panamendisyon nen Jehova ed saray sagpot mo. Diad onian paraan et ‘napabiskeg mo so inkatepel diad panamegley na Dios tayo’ a mansalita ed paraan a mangipatnag na kombiksyon mo no nipaakar ed inkamatua tan kaimportantian na mensahem.​—1 Tes. 2:2.