Ipulong so Maong a Balita Tekep na Mabiskeg a Kombiksion
1 Diad gapo na inmunan siglo, ingganggan nen Jesus iray patumbok to ya ipulong so maong a balita na Panarian tan ‘manggawa na saray babangatan ed amin a nasyones.’ (Mat. 24:14; 28:19, 20) Masimoon a tutumboken na Tastasi nen Jehova itan a bilin to, kanian diad impangangga na koma-20 siglo, say Kristianon impanaagi tayo so dinmakel ed masulok lan 5,900,000 a babangatan ed 234 a daldalin. Agaylan kelyaw na panangidayew ed say mangatatawen ya Ama tayo!
2 Wala itayo la natan ed koma-21 siglo. Mapalikdon sasalien na Kabusol tayo ya amperen so kimey tayo a panangipulong na Panarian tan panaggaway babangatan. Uusaren toy pananesdes manlapud sayan sistema na bengabengatla diad gunaet ton ibalang so imano tayo, upotey panaon tayo, tan pakapuyey biskeg tayo lapud amayamay ya agnakakaukolan iran kapagaan tan paninteresan. Imbes a padiktaan itayo ed sayan sistema no antoy importanti ed bilay, paneknekan tayo’d inkasikatayo manlapud Salitay Dios so sankamanunaanan—say panggawa ed linawa nen Jehova. (Roma 12:2) Kabaliksan na satan so itulok ed Makasulatan a bilin ya ‘ipulong so salita diad marakep tan mauges a panaon tan sigpot a sumpalen so ministeryo tayo.’—2 Tim. 4:2, 5, NW.
3 Bayuboan so Malet a Kombiksion: Saray Kristiano so kaukolan a “nagnap ya ontalindeg tan tekep na malet a kombiksion ed amin a linawa na Dios.” (Col. 4:12, NW) Say salitan “kombiksion” so naukeran bilang “mabiskeg a pakatangguyor odino panisia; pagmaliw a kombinsido.” Bilang Kristianos, nepeg a kombinsido itayo a say mapropetikon salita na Dios so segurado tan sikatayo lay manbibilay ed kasampotan lay panaon na anggaan. Nepeg a say panisia tayo et singa kabiskeg ed impanisia nen apostol Pablo, a nankuan a say maong a balita “so, diad tua et pakayari na Dios parad kilalaban na amin a walaan na pananisia.”—Roma 1:16, NW.
4 Uusaren na Diablo iray marelmeng a totoo tan impostor, a sikaran mismo so apalikdo, pian impluensiaan tan ibalang so arum. (2 Tim. 3:13) Lapud apasakbayan itayo la unong ed saya, onkiwas itayon pabiskegen so kombiksion tayo nipaakar ed katuaan. Imbes ya abuloyan iray kapagaan ed bilay a mamakapuy ed seseg tayo, itultuloy tayon iyuna so intereses na Panarian. (Mat. 6:33, 34) Agtayo labay a lingwanan so inkaganatan na panaon, ya ompan liknaen tayo a say anggaan na sayan sistema so mabayag ni. Manasingger lan maong itan. (1 Ped. 4:7) Anggaman liknaen tayon say kikakayat na maong a balita so agtanton maaligwas ed pigaran daldalin lapud niiter lan pantasi, say panamasakbay a kimey so nepeg a mantultuloy.—Ezeq. 33:7-9.
5 Saray manunan tepet natan et: ‘Kasin masimoon kon tutumboken so ganggan nen Jesus a manggawa na saray babangatan? Sano ipulong ko so maong a balita, kasin ipapatnag ko so mabiskeg a kombiksion a tudtua so Panarian? Kasin determinado ak a nawalaan na malaknab a pibiang no nayadyari ed sayan manangisalbay bilay a ministeryo?’ Diad pakamorian asingger tayo la ed panaon na anggaan, nepeg tayon imanoen so inkasikatayon dili tan ed komisyon tayon manpulong tan manbangat. Diad panggawa ed saya et nisalba tayoy inkasikatayo tan saramay ondengel ed sikatayo. (1 Tim. 4:16) Panon tayon amin a napabiskeg so kombiksion tayo bilang miministro?
6 Aligen Iray Taga-Tesalonica: Diad impangipanonot nen apostol Pablo ed makulin impankimey na agagi diad Tesalonica, inkuanto ed sikara: “Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder [“mabiskeg a kombiksion,” NW]; unong na singa pikakabat yo no anto so inkatoo mi ya imparungtal mi a dili ed sikayo a nisengeg ed sikayo. Tan nagmaliw kayon manag-alig ed sikami, tan dia ed Katawan, ya inawat yo so salita ed baleg a kaermenan, sililiket ed espiritu santo.” (1 Tes. 1:5, 6) On, kinomendaan nen Pablo so kongregasyon na saray taga-Tesalonica lapud ta anggaman diad pirmin kairapan et sikaray nampulong tekep na seseg tan mabiskeg a kombiksion. Antoy akatulong ed sikaran gawaen itan? Diad malaklaknab a paraan et maabig so epekto ed sikara lapud anengneng da so seseg tan kombiksion nen apostol Pablo tan saray kakimeyan to. Panon ya ontan?
7 Paneknekan na mismon impanbilay nen Pablo tan saray kaiba ton managbaroy a walad sikara so espiritu na Dios tan sikaray sigpot-puson anisia ed impupulong da. Antis na insabi di Pablo tan Silas ed Tesalonica, sikaray minelmelag ed Filipos. Sikaray pinekpek, impangaw, tan imbartolina ya ag-inusay. Balet, sayan alay irap ya asagmak da so ag-amakapuy ed seseg da parad maong a balita. Nibulos ira lapud impibali na Dios, ya angitonton ed inkakomberti na manangipangaw tan say sankaabungan to, tan angilukas na dalan parad sarayan agagi ya ituloy so ministeryo ra.—Gawa 16:19-34.
8 Diad tulong na espirituy Dios, akasabi si Pablo ed Tesalonica. Sikatoy nantrabaho diman pian nalegpet toray pankaukolan to insan sigpot ton insekar so inkasikato diad impanbangat na katuaan ed saray taga-Tesalonica. Agto inkibot ya impulong so maong a balita ed amin a pankanawnawa. (1 Tes. 2:9) Baleg so epekto na impanpulong nen Pablo ya atekepay mabiskeg a kombiksion ed saray totoon taga diman ya arum ed sikara et intalirak day datin panagdayew da a misiglaotan ed idolatriya tan nagmaliw iran lingkor na tuan Dios a Jehova.—1 Tes. 1:8-10.
9 Ag-akasbel ed saray balon mananisia so panamasegsegang diad pangipupulong day maong a balita. Lapud sikaray apakiwas ed balon nalmoan dan pananisia tan sigpot a kombinsido ira a nagamoran da iray andi-anggaan a bendision, saray taga-Tesalonica so adagdag a mangiyabawag ed katuaan ya entusiastiko ran inabrasa. Lapud aktibon tuloy so kongregasyon kanian nibalita so pananisia tan seseg da ed arum a parti na Macedonia tan akasabi ni anggad Acaya. Kanian, sanen insulat nen Pablo so inmunan sulat to ed saray taga-Tesalonica, kabkabat la iray maabig a gawa ra. (1 Tes. 1:7) Agaylan matalonggaring ya alimbawa!
10 Apakiwas Lapud Panangaro ed Dios tan ed Totoo: Panon tayon napansiansia, a singa saray taga-Tesalonica, so mabiskeg a personal a kombiksion tayo sano ipupulong so maong a balita natan? Oniay insulat nen Pablo nipaakar ed sikara: “Andi tunda min nodnonoten so matoor a gawa yo tan say impasyan sagpot yo lapu ed aro.” (1 Tes. 1:3, NW) Mapatnag a walaan ira na aralem tan impapuson panangaro ed si Jehova a Dios tan ed totoo a pupulongan da. Onia met a panangaro so amakiwas ed si Pablo tan saray kaiba to pian inabang ed saray taga-Tesalonica ya “aliwan say ebanghelyo na Dios labat, noag met saray dilin kamarerwa [ra].”—1 Tes. 2:8.
11 Mipadpara, say aralem a panangaro tayo ed si Jehova tan ed kapara tayon too so mamakiwas ed sikatayon sigpot a mibiang ed panagpulong a kimey ya inter na Dios ed sikatayon gawaen. Lapud satan ya aro, natalosan tayo a satan so personal tan inter-Dios a responsabilidad tayo ya ikayat so maong a balita. Diad positibo tan maapresian pandalepdep ed amin a ginawa la nen Jehova parad sikatayo diad kiwanwan tayo ‘ed peteg a bilay,’ sikatayoy napakiwas ya ibaga ed arum so miparan agaylan abig iran katuaan ya intiron-puso tayon sisisiaen.—1 Tim. 6:19.
12 Leleg a mansiasiansia itayon okupado ed panagpulong a kimey, say panangaro tayo ed si Jehova tan ed totoo so nepeg a mantultuloy ya ombulaslas. No ontan, napakiwas itayon palaknaben so pibibiang tayo ed kada puertan ministeryo tan gegemtanen so arum niran nengneng na panagpulong a nilukas ed sikatayo. Anamoten tayo iray pankanawnawan manpulong ya impormal ed kakanayon, kakaabay, tan kabkabat tayo. Anggaman aglabay na dakel a totoo so maong a balita ya ipapaamta tayo tan arum so magunaet a manebel ed kiproklama na Panarian, naeksperiensia tayo so akindalem a gayaga. Akin? Lapud amta tayon ginawa tayoy anggaay nayarian tayo pian ipulong so Panarian tan tulongan so totoo a nagamoran so kilalaban. Tan bendisionan nen Jehova iray sagpot tayo pian naromog iray maptek-impanpuso. Anggaman apaliberan itayo na saray desdes ed bilay tan panggugunaetan nen Satanas a pakapuyen so gayaga tayo, nayarian tayon mantinien so mabiskeg a kombiksion tayo tan say seseg tayon manpulong ed arum. Sano gawaen tayon amin so betang tayo, manresulta iya ed mabiskeg tan maseseg iran kongregasyon a singa samay walad Tesalonica.
13 Ag-itayo Onsusuko no Nasusubok: Nakaukolan met so kombiksion sano makaabet tayoy nanduruman subok. (1 Ped. 1:6, 7) Impaliwawa nen Jesus ed saray babangatan to a no sikatoy tumboken da et sikaray magmaliw a “puntirya na panggula na amin a nasyones.” (Mat. 24:9, NW) Ontan so asagmak nen Pablo tan Silas sanen walara’d Filipos. Nibaga’d salaysay diad Gawa kapitulo 16 a niiyan ed karaldalman a prisoan tan nibartolina ira di Pablo tan Silas. Diad inkalapagan, say baleg a prisoan et sakey a klase na asukop a paalagey odino dalanan a walaray karsel a walaan na kabkaabigan a liwawa tan dagem. Balet say karaldalman a prisoan et andian na liwawa tan daiset so onloloob a dagem. Asagmak di Pablo tan Silas so bilunget, petang, tan banget na say aliwliwan pasen na prisoan. Kasin naisip yo so ot-ot ya alikna ra legan na inkibartolina ra ed pigaran oras a binmibiret tan mandaldala so beneg da lapud impanlelewet?
14 Anggaman ed sarayan subok, nansiansian matoor si Pablo tan Silas. Impatnag day masimoon a kombiksion, ya amabiskeg ed sikaran manlingkor ed si Jehova anggaman ed subok. Say kombiksion da so nipabitar ed bersikulo 25 na kapitulo 16 unong ed New World Transalation, a nikuan ditan a si Pablo tan Silas so “manpipikasi tan mangidadayew ed Dios tekep na kanta.” Diad tua, anggaman wala ra’d karaldalman a prisoan, maseguro iran walay panangabobon na Dios ed sikara ta nankakansion ira a maksil a sankarengel na arum a priso! Nepeg a walaan itayo met na ontan a kombiksion natan sano nipaarap ed saray subok na pananisia tayo.
15 Amayamay a subok so idedetdet na Diablo ed sikatayo. Parad arum et nayarin papasegsegangen na pamilya ra. Dakel ed saray agagi tayo so nipaarap ed legal iran kaso. Nayarin naabet so isusumpa manlapud saray apostata. Walaray kairapan ed pinansyal tan say kapagaan no panon a naasikaso so pambilay. Nipapaarap iray kalangweran ed desdes na kalimog ed eskuelaan. Panon tayon matalonan arapen irayan subok? Antoy nakaukolan pian nipatnag so kombiksion?
16 Manuna ed amin, nakaukolan tayon mantinien so maapit a personal a relasyon tayo ed si Jehova. Sanen walad karaldalman a prisoan si Pablo tan Silas, agda inusar itan a panaon pian manreklamo nipaakar ed kipapasen da odino pian abageyen day inkasikara. Sikaran tampol so nampikasi ed Dios tan sikatoy indayew da panamegley na kanta. Akin? Lapud walaan ira na maapit a personal a relasyon ed mangatatawen ya Ama ra. Amoria ran sikaray maniirap nisengeg ed inkatunong tan akauley lay Jehova ed kilalaban da.—Sal. 3:8.
17 Sano nipaarap itayo ed saray subok natan, nepeg itayo met a manilalo ed tagey. Pinaseseg itayo nen Pablo bilang Kristiano ya ‘ipakabat komon ed Dios iray kerew tayo; tan say deen na Dios, a talonaan ton amin a pakatalos, bantayan to so kapusoan tayo tan saray nonot tayo.’ (Fil. 4:6, 7) Agaylan makapaligliwa so pakaamta ya ag-itayo paulyan nen Jehova a managmak ed saray subok a bukbukor tayo! (Isa. 41:10) Sikatoy lawas a kaiba tayo basta sikatoy panlingkoran tayo tekep na tuan kombiksion.—Sal. 46:7.
18 Say sakey a makanan tulong diad pangipatnag na pananisia et say pansiansian okupado ed panaglingkor ed si Jehova. (1 Cor. 15:58) Nipriso ira di Pablo tan Silas lapud sikaray okupado ed panangipulong na maong a balita. Kasin tinmunda iran nampulong lapud pakakasubokan da? Andi, intultuloy day nampulong anggan wala ra’d prisoan, tan kayari inkibulos da, sikaray nambaroy ya amaarap ed Tesalonica tan linma ira ed sinagoga na saray Judio ya ‘akikatunongan ed sikara manlapud Kasulatan.’ (Gawa 17:1-3) Sano walaan itayoy mabiskeg a kombiksion odino panisia ed si Jehova tan kombinsido itayon walad sikatayoy katuaan, anggapoy ‘makapangisian ed sikatayo ed aro na Dios, a wala ed Kristo Jesus a Katawan tayo.’—Roma 8:35-39.
19 Saray Modernon Alimbawa na Mabiskeg a Kombiksion: Dakel iray matalonggaring ya alimbawa ed panaon tayo, a singa di Pablo tan Silas, ya angipanengneng na mabiskeg a kombiksion. Insalaysay na sakey ya agin bii ya akaliktar ed panamairapan a kampo ya Auschwitz so nipaakar ed agnagiing a pananisia tan kombiksion ya impatnag na saray agagi diman. Inkuanto: “Aminsan legan na interogasyon, inmasingger ed siak so sakey ya opisyal ya akaelet na poniti. ‘Anto kasi gawaen mi ed sikayoran totoo?’ so inkelyaw to. ‘No erelen mi kayo, anggapoy paga yo. No ipriso mi kayo, anggapon siansiay paga yo. No ibaki mi kayo ed panamairapan a kampo, anggapoy aburido yo. Sano sentensiaan mi kayo na ipapatey, ontalindeg kayo labat ya anggapoy takot. Anto kasi gawaen mi ed sikayo?’” Agaylan makapabiskeg pananisia so pakanengneng ed pananisia na agagi tayo ed silong na alay irap iran sirkumstansia! Lawas iran maniilalo ed tulong nen Jehova pian mansungdo.
20 Seguradon nodnonoten tayoy kombiksion na dakel ya agagi tayon nidunget ed etnikon gulaan ya agawa ed agano niran taon. Anggaman sikaray walad mapeligro iran situasyon, sineguro na saray responsablin agagi so katagano ed espiritual na saray agagi. Amin so nantultuloy a matoor tekep na mabiskeg a kombiksion ya ‘antokaman ya agawan ayura sumpad sikara so ag-ontalona.’—Isa. 54:17, NW.
21 Dakel ed saray agagi tayo a walaan na agmananisian kaasawaan so mangipapatnag met na mabiskeg a pananisia tan panagsungdo. Nidunget so sakey ya agin laki ed Guadeloupe ed mabiskeg ya isusumpa na asawa to. Diad panismaya ed sikato tan panebel ed iyaatendi to’d saray Kristianon miting, ag-ilutoan na bii so asawa to odino ipesakan, ipalansaan, tan apigeren iray kawes to. Diad abayag a panaon, sikatoy agkinatongtong na akulaw to. Balet diad impangipatnag na masimoon a kombiksion diad panaglingkor ed si Jehova tan inkerew na tulong diad pikakasi, asungdoan itan ya amin na sayan agin laki. Kaunongan kabayag ey? Ngalngali 20 taon—kayari na satan et nankalkalnan anguman so awawey na asawan bii. Agnambayag, talagan panliketan na laki ta inawat na bii so ilalo nipaakar ed Panarian na Dios.
22 Kaunoran, agtayon balot lilingwanan so mabiskeg a kombiksion na kalangweran iran agagi tayo a maneeskuela ed kada agew tan onaarap ed desdes na kalimog tan arum ya angat. Nipaakar ed desdes a mikompormi ed eskuelaan, inkuan na sakey a kalangweran a Tasin bii: “No wala ka’d eskuelaan, lawas kan sasagyaten na balang sakey a manrebeldi. Lalo kan respetoen na ugugaw no medyo rebelyoso ka.” Agaylan desdes so kipapaarapan na saray kalangweran tayo! Nepeg a mapekder ira ed kanonotan tan puso ra a labanan so tukso.
23 Maabig a tuloy so nagagawaan na dakel ed saray kalangweran tayo diad panamantini ra ed integridad da anggaman ed saray subok. Say sakey ya alimbawa so agawa ed sakey ya agin marikit a taga-Pransya. Sakey ya agew kayari ogto, sikatoy sinalin pasooten na pigaran lalaki ya angoban tora, balet sikatoy nampikasi tan niresistian ton tuloy ira, kanian sikatoy pinaulyan la na lalaki. Saginonor, sakey ed sikara so pinmawil tan inkuanton sikatoy pandinayewan to lapud inkakpel to. Pinulongan to so laki nipaakar ed Panarian, ya impaliwawa to ed sikato iray atagey ya estandarte ya inletneg nen Jehova parad amin a malabay a minabang ed saray bendision a tarok na satan. Legan na saman ya school year, nipaliwawa to met iray sisiaen to ed intiron klase.
24 Agaylan mablin pribilihyo tayo so pakapibilang ed saramay panliketan nen Jehova ya usaren a mansalita tekep na malet a kombiksion nipaakar ed linawa to! (Col. 4:12) Niarum ni, walaan itayo na agaylan abig a pankanawnawan paneknekan so integridad tayo sano aatakien itayo na singa leon a Kabusol, si Satanas a Diablo. (1 Ped. 5:8, 9) Agbalot lilingwanan ya uusaren nen Jehova so mensahe na Panarian pian itarok so kilalaban ed sikatayon mangipupulong ed satan pati ed saramay ondengel met ed sikatayo. Komon ta saray desisyon a gawaen tayo tan ed inagew-agew a kabibilay tayo so mamaneknek ya iyuuna tayo so Panarian. Itultuloy tayon ipulong so maong a balita tekep na mabiskeg a kombiksion!