Ginawa Ra Iman Lapud Aro
SAKEY a matoor, maparawes a biyuda ed Canada so mamapabaleg na apatiran kalangweran ya anak a bibii bilang tuan Kristianos. Naimano na mamatatken ed kongregasyon a dakel so nepeg ya apigeren ed ayaman to. Sikatoy andian na kuarta nisay dunong a mangapiger. Kanian mitunosan ed prinsipyon walad 1 Timoteo 5:9, 10, maasikason inyarunsa na mamatatken a gawaen so trabaho parad sikato. Panon?
Implano ran say biyuda tan apatiran anak to so onalis ed loob na limaran agew. Masulok a 80 ed kongregasyon so sigpot-puson anuporta, diad impangidonasyon na materyales, pondo, tan panaon. Kaalis na pamilya, saray magunaet a trabahador so singa ra bayaong ya inmanbungal ed abung. Say interon paway na abung so inapiger. Sinakaban tan pinintoraan daray dingding. Inubol daray datal tan pinakinis. Angiyan na balo iran baldosa tan alpombra. Amin a kaukolan ya ayosen nipaakar ed koryente tan saray silew so ginawa. Anggan saray datdaan a muebles so sinalatan. Sigpot a naapiger so abung ed loob lambengat na limaran agew!
Say atmospera na gayaga tan aktibidad so angalay imano ed saman a lugar. Sakey a 80 taon a kaabay so asagyat a tuloy ed gunaet na Tastasi a sikatoy angawit na brotsa to tan impilit to so ontulong. Say amo na sakey ed saray boluntaryo so angiter na ventilation hood parad kalan ed kusina. Sakey nin amo so angidona na balon cupboards. Sakey a laki so nandinayew a tuloy a labay ton amtaen so nagkalalo ni nipaakar ed Tastasi nen Jehova. Sigugunaet ton inawat so palapagan a Makapambilay Kayo na Ando lan Ando ed Paraiso diad Dalin.
Sankaimano so inkasurpresa na biyuda tan saray anak to sanen sinmempet ira. Onman lay inyagos na saray lua, sayaksak, tan panlalakapan—sakey ya agnalingwanan a bekta na Kristianon aro tan liknaan. Peteg, say masimoon ya aro tan panangiyansakit ed saray mankakaukolan a membro na kongregasyon so sakey a tanda na tuan Inkakristiano, lapud insulat nen Pablo: “Peteg, sirin, legan a sikatayo so walaan na panaon a paborable ni parad saya, manggawa tayo na maong ed amin, balet lalo la ed saramay nisiglaot ed sikatayo ed pananisia.”—Galacia 6:10.