Kapitulo Tres

Mantultuloy ya Ompeket a Malet ed Salita na Dios

1. (a) Panon a naeksperiensya na Israel nensaman so inkamatua na Salita na Dios? (b) Akin a makapainteres itan ed sikatayo?

“AMTA yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo.” (Josue 23:14-16) Saya so imbaga nen Josue ed saray mamasiken na Israel kayari na inkiligen da ed Insipan a Dalin. On, apaneknekan a napanmatalkan iray sipan nen Jehova. Satan a rekord​—tan amin nin wala ed Biblia​—so nipreserban para ed sikatayo ta pian “wala so ilalo tayo.”​—Roma 15:4.

2. (a) Diad anton pantalos a say Biblia so “impuyan na Dios”? (b) Diad pikabat a say Biblia so impuyan na Dios, anton responsabilidad so wala ed sikatayo?

² Anggaman manga 40 a totoon managsulat so nausar a mangikurit ed Biblia, si Jehova a mismo so Autor na satan. Kasin kabaliksan na saya a sikaton mismo so angiwanwan ed inkisulat na amin a bengatlan wadtan? On. Saya so ginawa to diad panamegley na mabiskeg a masanton espiritu to, say aktibon puersa to. Simamatuan imbaga nen apostol Pablo: “Amin a Sulat [so] impuyan na Dios . . . pian say too na Dios anggapo komon so pankulangan to, a nabangatan a maong ed amin a gawa a maabig.” Saray totoo ed amin a pasen a kombinsidon say Biblia so impuyan na Dios so mangimano ed Biblia tan manbilay unong ed saray bangat to.​—2 Timoteo 3:16, 17; 1 Tesalonica 2:13.

Tulongan so Arum a Pablien Itan

3. Anto so sankaabigan a paraan pian natulongan so dakel ya agkombinsido a say Biblia et Salita na Dios?

³ Dakel a pitotongtongan tayo so miduma ed kombiksion tayo a say Biblia so Salita na Dios. Panon tayo’ran natulongan? Mabetbet, say sankaabigan a paraan et say pangilukas ed Biblia tan ipanengneng ed sikara so karga to. “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray-tarem, . . . tan masiglat a mangibiig ed saray nonot tan saray getma na puso.” (Hebreos 4:12) “Say salita na Dios” so aliwan basta maawaran a salaysay ya andian la na kabaliksan ed panaon tayo; satan so mabilay! Saray sipan na Biblia so tuloytuloy a nasusumpal. Say impluensya na mensahe na Biblia ed tuan getma na puso na sakey a too so mas mabiskeg nen say antokaman a nayarin ibaga tayon personal.

4. Antoran paliwawa ed saray katuaan na Biblia so amasimbalo ed awawey na arum a totoo nipaakar ed Biblia, tan akin?

⁴ Say pakanengneng ed ngaran na Dios ditan so anenyeg ed dakel pian lalon mansukimat ed Biblia. Nilabay na arum ya aralen so Biblia sanen nipanengneng ed sikara no anto so ibabaga to nipaakar ed gagala na bilay, no akin ya iyaabuloy na Dios so karelmengan, say kabaliksan na peles a nagagawa, odino say ilalo ed maandon bilay diad paraison dalin. Diad daldalin a nidudunget so totoo ed panaggirogiro na saray mauges ya espiritu lapud relihyoso iran agamil, say paliwawa na Biblia ed no antoray sengegan na saya tan no panoy pakalukpos so anagyat na interes. Akin a makapasagyat irayan punto ed saray masimoon a totoo? Lapud say Biblia so alenleneg a panlapuan na napanmatalkan ya impormasyon ed amin na saratan a makanan bengatla.​—Salmo 119:130.

5. (a) Sano ibaga na totoo ya agda panisiaan so Biblia, antoray nayarin rason? (b) Panon so nayarin panulong ed ontan a totoo?

⁵ Anggaman ontan, anto no ibaga na totoo ed sikatayo ya ag-ira manisia ed Biblia? Kasin satan so mamultot la ed tongtongan? Andi no sikara so mabulos a mangonsidera ed saray katuaan tekep na lukas a kanonotan. Nayarin moriaen da a say Biblia so libro na Kakristianoan. Say kabkabat ya awaran na Kakristianoan ed pansimpisimpitan tan pibabali to ed politika, ontan met ed pirmin panag-usos toy kuarta, so nayarin sengegan na agda panisia ed Biblia. Akin ta no tepeten no ontan so panmoria ra? Say impangondena na Biblia ed saray minumundon kurang na Kakristianoan, dingan na saray punton pandumaan na Kakristianoan tan say tuan Inkakristiano, so nayarin managyat na interes da.​—Miqueas 3:11, 12; Mateo 15:7-9; Santiago 4:4.

6. (a) Anto so personal ya angombinse ed sika a say Biblia so Salita na Dios? (b) Anto niray arum a panagkatunongan a nayarin ipresenta diad panulong ed totoo pian natebek dan say Biblia so peteg a nanlapud Dios?

⁶ Para ed arum, say prangkan panalaysay ed saray ebidensya a say Biblia so impuyan na Dios so nayarin makatulong. Anto so mabitar a mamapaneknek ed sika a say Biblia so nanlapud si Jehova a Dios? Kasin diad ibabagan mismo na Biblia no iner so nanlapuan to? Odino diad katuaan a say Biblia so nankarga na dakel iran propesiyan mangipapatnag na detalyadon pikakabat ed arapen, propesiyan talagan nanlapud mabiskeg-nen-toon lapuan? (2 Pedro 1:20, 21) Kasin say ipapanengneng na Biblia a makapakelaw ya akindalem a pantutunosan, anggaman insulat na 40 lalaki ed peryodo na masulok a 1,600 taon? Odino say sientipikon inkasusto to a miduma ed arum a sulsulat manlapud saraman a panaon? Odino say inkaprangka na saray managsulat to? Odino say inkipreserba na satan anggaman ed mauges a getman paneral ed satan? Antokaman so nalmoan mon personal a makapasagyat so nausar met a panulong ed arum a totoo.a

Panagbasa Tayo ed Biblia

7, 8. (a) Anto so nepeg tayon gawaen nipaakar ed Biblia? (b) Anto so nakaukolan tayon niarum ed personal a panagbasa ed Biblia? (c) Panon mon agamoran a personal so pakatalos ed saray gagala nen Jehova?

⁷ Niarum ed panulong ed arum a manisia ed Biblia, sikatayon mismo so nakaukolan a mangipanaon diad pambasa ed satan a maparanay. Kasin satan so gagawaen mo? Ed amin a libron pinawala, saya so sankaimportantian. Siempre, agkabaliksan na saya a no satan so basaen tayo et anggapo la so nakaukolan tayo. Mamapasakbay so Kasulatan sumpad pangisian tayo ed inkasikatayo. Nepeg ya agtayo isipen a sarag tayo lan naromog so ebat ed amin a bengatla diad pansukimat a bukor. Namparan nakaukolan so personal a panagaral tan maparanay ya iyaatendi ed saray miting na totoo na Dios ta pian magmaliw itayon asimbang a Kristianos.​—Uliran 18:1; Hebreos 10:24, 25.

⁸ Nipaakar ed saya, ibabaga na Biblia so nipaakar ed sakey ya Etiopen opisyal a mamabasa ed propesiya nen Isaias. Inwanwan na anghel so Kristianon ebanghelisador a si Felipe a mantepet ed laki: “Natalosan mo so babasaen mo?” Sipapaabeban inmebat so Etiope: “Panon so pakayarik, no anggapo so mangiwanwan ed siak?” Impaipaliwawa to’d si Felipe itan a Kasulatan. Natan, si Felipe so aliwan basta independentin managbasa na Biblia ya angiter na opinyon to ed Kasulatan. Impansiansia toy maapit a pitatalosan ed nanengneng ya organisasyon na Dios. Kanian atulongan to so Etiope a nagunggonaan ed bangat ya itatarya nen Jehova panamegley na satan ya organisasyon. (Gawa 6:5, 6; 8:5, 26-35) Mipadpara natan, anggapo so nawalaan na dugan pakatalos ed saray gagala nen Jehova ed kabukbukoran to. Nakaukolan tayon amin so tulong a simamaaron itatarya nen Jehova panamegley na nanengneng ya organisasyon to.

9. Anton programa na panagbasa ed Biblia so mangunggona ed sikatayon amin?

⁹ Pian natulongan itayon mantalos ed Biblia, itatarya na organisasyon nen Jehova so sankaabigan a Makasulatan a materyal diad nanduruman publikasyon. Niarum ni, say maparanay ya eskedyul ed panagbasa na Biblia so niyuksoy ed sikatayo diad Teokratikon Eskuelaan Parad Ministeryo a gagawaen ed amin a kongregasyon na saray Tastasi nen Jehova ed sankamundoan. Baleg so nagunggona diad personal a panangusisa ed Masanton Kasulatan. (Salmo 1:1-3; 19:7, 8) Panggunaetan a maong so maparanay a panagbasa ed Biblia. Anggaman agmo natalosan a sigpot so amin a bengatla, baleg so nitulong na pakawalaay malaknab a pakatebek mo ed Kasulatan. Alimbawa, no mamasa ka lambengat na apatira odino limaran pahina a kada agew, nasumpal mo so Biblia ed sakey taon.

10. (a) Kapigan mo gawaen so panagbasam ed Biblia? (b) Siopa ni so nepeg ya isakop sano babasaen so Biblia, tan akin ya importante so inkamaparanay?

¹⁰ Kapigan mo nagawaan so panagbasam ed Biblia? No mangigana ka na anggano 10 odino 15 minuto a kada agew parad satan, sika so nagunggonaan a maong. No andi, nayarin mangiyeskedyul ka na regular a panaon para ed satan diad kada simba, insan mansiansia ed satan ya eskedyul. No walaan ka na asawa, napanggayagaan yon sanasawa so sublayan a pambasan maksil ed Biblia. No walaray ananak a makayari lan manbasa, nayarin mansusublayan iran manbasan maksil. Nepeg a say panagbasa ed Biblia so legay-bilay ya ugali, a singa ed panangan na tagano. Unong a kabat mo la, no makapuy so ugali ed panangan na sakey a too, say pisikal a bunigas to so naapektaan. Ontan met, say espiritual a bunigas tayo, tan sirin say maandon bilay tayo, so mandepende ed maparanay a katagano tayo ed ‘amin a salitan ombesngaw ed sangi nen Jehova.’​—Mateo 4:4.

Say Gagala Tayo

11. Anto so nepeg a gagala tayo diad pambasa ed Biblia?

¹¹ Anto so nepeg a gagala tayo diad pambasa ed Biblia? Say kalat tayo et aliwan say basta pambasa labat na pigaran pahina. Kaukolan a say motibo tayo et say lalon pikabat ed Dios ta pian napaelet tayo so panangaro tayo ed sikato tan makapaliket ed sikato so panagdayew tayo. (Juan 5:39-42) Nepeg a say awawey tayo so mipara ed samay managsulat na Biblia sanen inkuanto: “Iparungtal mo ed siak so saray dalan mo, O Jehova; ibangat mo ed siak so saray basbas mo.”​—Salmo 25:4.

12. (a) Akin a nakaukolan so onggamor na “suston pikakabat,” tan anton sagpot ed panagbasa so nayarin nakaukolan ta pian nagamoran itan a pikakabat? (b) Diad pangusar ed anton apatiran punto-de-bista so nayarin mangunggona ed sikatayo diad pangusisa ed samay babasaen tayo ed Biblia? (Nengnengen so kahon ed pahina 30.) (c) Iyilustra irayan punto diad pangebat ed saray tepet a nitarya ed sayan parapo. Bukayen iray nisitan kasulatan balet ta ag-inaon.

¹² Diad pakakaawat tayo na saray bangat manlapud si Jehova, nepeg a say pilalek tayo et say pakagamor na “suston pikakabat.” No anggapo itan, panon tayon niyaplikan matukoy so Salita na Dios ed mismon bilay tayo odino ipaliwawa itan a susto ed arum? (Colosas 3:10, NW; 2 Timoteo 2:15) Say igamor na suston pikakabat so mankaukolan na maalwar a panagbasa, tan no walay aralem, nayarin nakaukolan tayon basaen a maminpiga ta pian natebek tayo so talos to. Sikatayo met so nagunggonaan no ilugar tayo so pandalepdep ed materyal, a morekdeken itan manlapud nanduruman punto-de-bista. Nipabitar ed pahina 30 so apatiran makanakanan paraan na panagkatunongan a nayarian tayon analisaen. Dakel a parte na Kasulatan so makagunggonan nausisa diad pangusar na sakey odino masulok ni ed sarayan punto-de-bista. Legan ya ebatan moray tepet ed onggendan iran pahina, natalosan mo no panon a tua itan.

(1) Mabetbet a say kabiangan na Kasulatan a babasaen mo so makapangibaga ed sika ed no anton nengneng a persona si Jehova. Alimbawa, diad Salmo 139:13, 14, naaralan tayo so pirmin panangasikaso na Dios ed saray agni inyanak: “Sika sinakbongan moak ed eges nen inak. Pisalamatan taka ta makapataktakot tan makapakelkelaw so inkagawa na inkasiak: pankelkelawan so gawagawam; tan kabat a maong na kamarerwak.” Agaylan makapakelaw iray gawa na palsa nen Jehova! Say inkagawa na totoo so mamaneknek ed baleg ya aro to ed sikatayo.

Nisesengeg ed samay nibaga ed Juan 14:9, 10, sano nabasa tayo no panon so impideneng nen Jesus ed arum, peteg a nanenengneng tayo no panon so ikiwas nen Jehova a mismo. Diad pannonot ed satan, anto so nibaga tayo nipaakar ed si Jehova diad saramay agawa a nikurit ed Lucas 5:12, 13 tan Lucas 7:11-15?

(2) Imanoen no panon so pisiglaotan na salaysay diad tema na Biblia: say kiyalangon na inkasoberano nen Jehova tan say kapasantos na ngaran to diad panamegley na Panarian ya uleyan nen Jesu-Kristo, say insipan a Bini.

Panon so impangidanet nen Ezequiel tan Daniel ed tema na Biblia? (Ezequiel 38:21-23; Daniel 2:44; 4:17; 7:9-14)

Panon so malinew ya impangipabidbir na Biblia ed si Jesus bilang say insipan a Bini? (Galacia 3:16)

Panon so panedeskribe na Apocalipsis ed engranden kapantokan na tema na Panarian? (Apocalipsis 11:15; 12:7-10; 17:16-18; 19:11-16; 20:1-3; 21:1-5)

(3) Tepetan moy inkasika no panon mon niyaplikan mismo so babasaen mo. Alimbawa, nabasa tayo ed Exodo ya anggad Deuteronomio so nipaakar ed imoralidad tan inkarebelyoso na Israel. Naaralan tayo a saratan ya awawey tan kiwakiwas so walaan na saray mauges a nansumpalan. Sirin, nepeg a sikatayo so mamaliket ed si Jehova diad agpangalig ed mauges ya alimbawa na Israel. “Sarayan bengatla agawa ed sikara a singa uliran, tan nisulat ira a bilin ed sikatayo, ya asabian da so kasumpalan na sayan panaon.”​—1 Corinto 10:11.

Say rekord nipaakar ed impamatey nen Cain ed si Abel so walaan na anton leksion ed sikatayo? (Genesis 4:3-12; Hebreos 11:4; 1 Juan 3:10-15; 4:20, 21)

Kasin say simbawa na Biblia ed saray Kristianon walaan na mangatatawen ya ilalo so onaaplika met ed saray walaan na ilalo ed maandon bilay diad dalin? (Numeros 15:16; Juan 10:16)

Anggaman maabig so talindeg tayo ed Kristianon kongregasyon, akin a kaukolan tayon imanoen no panon so lalon pangiyaplika ed simbawa na Biblia ya amta tayo la? (2 Corinto 13:5; 1 Tesalonica 4:1)

(4) Morekdeken no panon mon nausar so nababasam diad panulong ed arum. Amin a totoo so mapaga nipaakar ed saray problema ed bunigas, nayarian tayo sirin ya ibasa ed sikara imay ginawa nen Jesus pian nipanengneng so malaklaknab a gawaen to sano manuley la bilang makapanyarin Ari ed Panarian na Dios: “Sinmabi ed sikato so dakerakel a katooan, a sankaawit da so saray piley, bulag, emel, sikwel, tan arum niran dakerakel, . . . et pinaabig to ra.”​—Mateo 15:30.

Siopa so nayarin natulongan na samay salaysay ed inkioli na anak a bii nen Jairo? (Lucas 8:41, 42, 49-56)

13. Antoran resulta so nailaloan tayo diad mantultuloy a programa na panagbasa ed Biblia tan panagaral a kaiba so organisasyon nen Jehova?

¹³ Agaylan makagunggonan tuloy so pambasa ed Biblia sano imanoen tayo so apatiran punton asalambit ed tagey! Tua, say panagbasa ed Biblia et sakey ya angat. Ingen ta sikatayo so legay-bilay a nagunggonaan ed satan, lapud sano basaen tayo so Kasulatan, sikatayo so lalon ombiskeg ed espiritual. Say maparanay a panagbasa ed Biblia so mangiyapit ed sikatayo ed maaron Ama tayo, si Jehova, tan diad saray Kristianon agagi tayo. Satan so ontulong ed sikatayo pian mangimatlek ed simbawan mantultuloy ya ‘ompeket a malet ed salita na bilay.’​—Filipos 2:16, NW.

[Paimano ed leksab]

Repason Pantongtongan

• Akin a nisulat tan nipreserba so Biblia ya anggad panaon tayo?

• Panon tayon natulongan so arum a mangapresya ed Biblia?

• Akin a makagunggona so maparanay tan personal a panagbasa ed Biblia? Diad pangusar ed anton apatiran punto-ed-bista so nayarin pakagunggonaan tayo leleg ya aanalisaen tayo so babasaen tayo?

[Kahon/Litrato ed pahina 30]

SANO BASAEN SO SAKEY A KABIANGAN NA BIBLIA, IMANOEN

No anto so ibabaga to ed sika nipaakar ed si Jehova bilang sakey a persona

No panon so pisiglaotan to ed interamentin tema na Biblia

No panon so nepeg a pangapekta to ed mismon bilay mo

No panon mon usaren itan diad panulong ed arum