Mantultuloy Komon so Inaagin Aro Yo!

“Mansiansia komon ed sikayo so aro na sanaagi.”​—HEBREOS 13:1.

1. Antoy gawaen mo ta pian napansiansia so apuy a mandarlang ed ambetel a labi, tan antoy walan mipadparan responsabilidad tayon amin?

AMBETEBETEL a maong ed paway, tan say temperatura so ompalalo. Say panlalapuan labat na petang ed abung mo et say apuy a mantalsik ed fireplace. Mandedependi bilay yo diad pamasiansiam ed satan ya apuy. Kasin basta onyurong ka labat tan banbantayay kaeerep na apuy tan ikuyep na ngalab a magmaliw ya andiay bilay a kolor-dapol? Siempre andi. Andi-kesaw mon tuloytuloy a sungloran itan ta pian mansiansiay apuy. Diad sakey a pantalos et balang sakey ed sikatayo so walaan na mipadparan trabaho no nipaakar ed mas importantin “apuy”​—samay nepeg ya ondalang ed kapusoan tayo​—aro.

2. (a) Akin a nibaga a say aro so ombebetel ed sarayan kaunoran ya agew? (b) Panon kaimportanti so aro ed tuan Kristianos?

² Unong ya abayag lan impasakbay nen Jesus, sikatayoy manbibilay ed panaon a say aro so ombebetel ed limog na saramay mankuan a Kristiano ed sankamundoan. (Mateo 24:12) Tutukoyen nen Jesus so sankaimportantian a nengneng na aro, say aro ed si Jehova a Dios tan parad Salita to, say Biblia. Say arum niran nengneng na aro, so onkukupas met. Impasakbay na Biblia a diad ‘kaunoran iran agew,’ dakel so andian na “aro ed nianakan.” (2 Timoteo 3:1-5) Agaylan tua itan! Say pamilya so nepeg a pasen na nisipor a lugor, balet anggan ditan, say karawalan tan panangabuso​—no maminsan et makapakigtot ya inkaruksa​—so onkakasmak la. Ingen, diad sayan ambetel a kipapasey mundo, gagangganen iray Kristiano ya aglabat manaaroan noagta nawalaan na dilin-managsakripisyon aro, ya iyuuna iray arum nen say sarili ra. Kaukolan tayon mabitar ya ipanengneng iyan panangaro a napatnagan na amin, a magmamaliw a pakabidbiran a marka na tuan Kristianon kongregasyon.​—Juan 13:34, 35.

3. Anto so inaagin aro, tan antoy kabaliksan na pantultuloyen itan?

³ Apuyanan si apostol Pablo a mangiganggan: “Mansiansia komon ed sikayo so aro na sanaagi.” (Hebreos 13:1) Unong ed sakey a matudion palapagan, say Griegon salitan nipatalos ya ‘inaagin aro’ (phi·la·del·phiʹa) “so manutukoy ed mapablin aro, ya ipapanengneng toy kaabigan, simpatia, mangiyoopresi na tulong.” Anto sirin so labay ya ibaga nen Pablo sanen inkuanton kaukolan tayon pansiansiaen iyan aro? “Agbalot itan pabebetelen,” so inkuan na parihon palapagan. Kanian agmagenap so piliknan atekepay panamabli ed agagi tayo; nepeg tayon ipanengneng itan. Niarum ni, nepeg tayon pagnayonen iyan aro, ya agbalot aabuloyan ya ombetel. Makapaangat? On, balet ta tulongan itayo na espiritu nen Jehova a bayuboan so inaagin panamabli tan mantinien itan. Konsideraen tayo paray taloran dalan a nasungloran iyan aro ed kapusoan tayo.

Ipanengneng so Pililikna

4. Anto so pililikna?

⁴ No labay mon lalon naaro iray Kristianon agagim, unona et kaukolan moy milikna ed sikara, miambegya ed sikara ed saray subok tan angat a kidudungetan da ed bilay. Insuheri iya nen apostol Pedro sanen insulat to: “Mankakasakey komon so nonot yo, maabagey [mililikna, NW] kayo komon, manaaroan kayo a singa sanaagi, masibeg tan mapaabeba ed kanonotan.” (1 Pedro 3:8) Say Griegon salitan inusar dia parad pangipanengneng na ‘pililikna’ et kabaliksan toy “piirap.” Inkuan na sakey ya autoridad ed Griegon Biblia nipaakar ed sayan salita: “Dedeskribien toy niwawalan kipapasey kanonotan sano minanabang tayo ed nalilikna na arum a singano saratan met so sasagmaken tayo.” Kanian, nakakaukolan so piaambegya. Aminsan et oniay inkuan na sakey a matoor, maedad lan aripen nen Jehova: “Say piaambegya et pakalikna’d ot-ot mo ed pusok.”

5. Panon tayon amta a walaay pililikna si Jehova?

⁵ Walaan ta si Jehova na ontan a pililikna? Agpanduaruwaan. Singa bilang, nabasa tayoy kipaakaray impanirap na totoo ton Israel: “Dia ed amin ya irap da sikato so apairap.” (Isaias 63:9) Aglabat inimano nen Jehova iray problema ra; sikatoy akilikna’d totoo. Say kinabelat na liknaan to parad sikara so iyiilustra na salitan mismo nen Jehova ed totoo to, a nirekord ed Zacarias 2:8: “Say maniwit ed sikayo diwiten to so bukel na matak.”a Oniay kuan na sakey a komentarista ed sayan bersikulo: “Say mata so sakey ed sankakomplikadoan tan madelikadon kabiangay laman na too; tan say ugaw-ugaw na mata​—say lulukasan a loloobay liwawa na tawen parad pakanengneng​—so sankasinsitiboan, sankaimportantian, a kabiangay mata. Anggapolay eksakton makapangidemostra ed ideyan nikadkaduman matamoy a panatalima nen Jehova ed kipapaarapay aro to.”

6. Panon nen Jesu-Kristo ya impanengneng so pililikna to?

⁶ Lawas impanengneng met nen Jesus so kinapetang na pililikna to. Aminpigan ‘naabagey’ toy kipapasey kapara ton totoo a mansasakit odino nagogonigon. (Marcos 1:41; 6:34) Impanengneng to itan a sano siopaman ya agmantraton sipapangasi ed kapara ton alanaan et liknaen ton singano sikaton mismo so tratratoen ya ontan. (Mateo 25:41-46) Tan natan bilang say mangatatawen ya “atagey a saserdote” tayo, sikato imay ‘makayarin mangasi [misimpatia, NW] ed saray kakapuyan tayo.’​—Hebreos 4:15.

7. Panon itayon natulongan na pililikna sano napasyodot itayo na sakey ya agi?

⁷ “Misimpatia ed saray kakapuyan tayo”​—agta makaligliwa itan? Maseguro, sirin, a labay tayo met a gawaen itan ed sakey tan sakey. Siempre, mas mainomay ya anapey kakapuyan na sananey. (Mateo 7:3-5) Balet diad ontumbok a napasyodot ka na agim, akin ya agsalien iya? Ipasen mo pay inkasika ed sirkumstansia, abenegan, personalidad, personal a kalilingoan a pibabakalan na satan a too. Segurado ka ta ya agka makagawa na parihon lingo​—odino ompan mas grabe ni ingen? Imbes ya alablabas so iilaloan mo’d arum, ipanengneng tayo so pililikna, ya ontulong ed sikatayon magmaliw a makatunongan a singa si Jehova, a ‘nodnonoten ton sikatayo so sapok.’ (Salmo 103:14; Santiago 3:17) Amta toray limitasyon tayo. Agton balot iilaloan ed sikatayo so labas ni nen say makatunongan labat a nagawaan tayo. (Ikompara so 1 Arari 19:5-7.) Inatnat tayo sirin itan a pililikna ed arum.

8. Panon so nepeg ya ikiwas tayo sano say sakey ya agi et makakasagmak na irap?

⁸ Insulat nen Pablo a say kongregasyon et singa sakey a laman a walaay nanduruman membro a nepeg a saniiban mankimey diad pankakasakey. Inyarum to: “No nairapan so sakey a kabiangan, amin a kabiangan miiirap ira ed sikato.” (1 Corinto 12:12-26) Kaukolan tayo so miirap, odino miambegya, ed saramay makakasagmak na ir-irap. Saray mamatatken so manunaan ed satan. Insulat met nen Pablo: “Siopa so makapuy, tan agak makapuy? Siopa so nagapol, tan agak ondalang?” (2 Corinto 11:29) Aaligen na mamatatken tan managbiahen manangasikaso si Pablo ed sayan pamaakaran. Diad saray paliwawa ra, diad panagpastol da, tan anggan ingen diad panangasikaso ra’d hudisyal a pamaakaran et pambabanikelan dan ipanengneng so pililikna. Inrekomenda nen Pablo: “Minanangis kayo ed saray mannanangis.” (Roma 12:15) Sano nalikna na saray karnero a talagan miaambegya iray managpastol, natatalosan daray limitasyon da, tan misisimpatia ed saray kairapan ya aarapen da, kaslakan a lalon mainomay dan awatey konseho, panangidirehi, tan disiplina. Sigugunaet dan atendian iray miting, a matalek a naalmo daray ‘pakainawaan na kamarerwa ra.’​—Mateo 11:29.

Panangipanengneng na Apresasyon

9. Panon ya ipapanengneng nen Jehova ya aapresiaen toy walan maong ed sikatayo?

⁹ Say komaduan dalan a nasungloran so inaagin panangaro et diad panamegley na apresasyon. Pian naapresia so arum, nepeg tayon isentro tan pablien so maong a kualidades da tan pansasagpot da. Sano gagawaen tayo itan, aaligen tayo si Jehova a mismo. (Efeso 5:1) Inagew-agew ton peperdonaen so dakel ya angkekelag a kasalanan tayo. Peperdonaen to ni ingen iray graben kasalanan tayo daput no walay masimoon a panagbabawi. Insan bektaman a pinerdona to laray kasalanan tayo, agto iratan eem-eman. (Ezequiel 33:14-16) Intepet na salmista: “No sika, Jehova, et oninengen mo so saray kasulitan, O Katawan, siopa kasi naani makaalagey?” (Salmo 130:3) Say iimanoen nen Jehova et saray maong a bengatlan gagawaen tayo diad panseserbi tayo’d sikato.​—Hebreos 6:10.

10. (a) Akin a mapeligro ed sanasawa so pakaandi na apresasyon da ed balang sakey? (b) Anto so kaukolan a gawaen na sakey a naaandian lay panangapresia’d asawa to?

¹⁰ Nagkalautlan importantin tumboken iyan alimbawa ed loob na pamilya. Sano manaapresiaan so atateng, ileletneg da so marakep a padron ed loob na pamilya. Diad sayan panaon na agmanbayag iran panamaley, alay inomay ya ibaliwala so asawa tan pabitaren iray kakabosan to tan ag-idanet iray maong a walna to. Satan a negatibon kaisipan so mangegeray ed panamaley, a pagmaliwen ton anggapoy gayagan pabelat labat. No say apresasyon mo’d kapariham et onkukupas la, tepetan mo pay inkasika, ‘Kasin say asawak so talagan andiay maong a kualidades?’ Isipen pa iramay rason no akin a sikatoy naarom tan inasawam. Kasin amin iraman a rason na impangarom ed sayan nikadkaduman too et talagan naandipat la? Seguradon andi; kanian kimeyan a maong so pangapresia ed kinaabig ed asawam, tan isalitam iray apresasyon mo.​—Uliran 31:28.

11. No say aro ed panamaley et kaukolan a bulos ed pansimpisimpitan, antoran agamil so kaukolan a paliisan?

¹¹ Say aro ra so mansiansian bulos met ed pansimpisimpitan na sanasawa no walay apresasyon. (Ikompara so 2 Corinto 6:6; 1 Pedro 1:22.) Say ontan ya aro, a sinungloran na impapuson apresasyon, so agmangiter na pankanawnawa ed niamot ya inkaruksa, ed saray salitan makapasakit tan mamapaabeba, ed ginagalan panangibaliwala’d kapariha ya onlalabas iray pigaran agew ya anggapo labat lay mapangasi odino marespiton salitan nibabalikas, tan maseguron anggapoy pankanawnawa ed pisikal a karawalan. (Efeso 5:28, 29) Say asawan laki tan asawan bii a talagan manaapresiaan so manpapagalangan. Agda lambengat gagawaen itan ed arap na publiko noagta kapiganman a sikaray nanenengneng nen Jehova​—diad arum a salita, ed amin a panaon.​—Uliran 5:21.

12. Akin a kaukolan ya ibalikas na atateng so apresasyon da ed walan maong ed ananak da?

¹² Kaukolan met na ananak a naliknan sikaray naaapresia. Aliwan diad panguran na atateng ed ananak da na andi-kakanaan a panagbulatis, noagta komendaan daray anak ed saray makapadinayew a kualidad tan say talagan maong a nagagawaan na ananak da. Nonoten so alimbawa nen Jehova ed impangibalikas toy panangabobon ed si Jesus. (Marcos 1:11) Nonoten, met, so alimbawa nen Jesus bilang say “katawan” diad sakey a parabolo. Namparan kinomendaan to so duaran “maong tan napanmatalkan ya aripen,” anggaman agparihoy apawala na balang sakey ed sikara. (Mateo 25:20-23; ikompara so Mateo 13:23.) Anapen met na makabat ya atateng iray dalan a pakapangibalikas day apresasyon parad nikadkaduman kualidades, abilidad, tan nagagawaan na balang anak. Ontan met, panggunaetan dan agda tanton pabibitaren iray nagagawaan a liknaen na ananak a kaukolan dan palumbasay arum. Agda labay ya ombaleg iray anak da a naingongotan odino agmaligsa.​—Efeso 6:4; Colosas 3:21.

13. Siopa so mangiyuuna ed panangapresia ed kada membro na kongregasyon?

¹³ Diad loob na Kristianon kongregasyon, manunaan iray mamatatken tan managbiahen manangasikaso ed panangipanengneng na apresasyon ed kada membro na pulok na Dios. Mairap pa so posisyon da, ta sasakbaten da met so ambelat a responsabilidad a panisiplina diad inkatunong, a pangipetek tekep na kaumildian ed saramay mankakasalanan, tan ambelat a mangonseho’d saramay mankakaukolan na ontan. Panon dan sisimbangen irayan nanduruman responsabilidad?​—Galacia 6:1; 2 Timoteo 3:16.

14, 15. (a) Panon ya impanengneng nen Pablo so inkasimbang ed panangiter na ambelat a konseho? (b) Panon a nasimbang na saray Kristianon manangasikaso so kaukolan a panangorehi ed saray pakakalingoan ed nakakaukolan a komendasyon? Iyilustra.

¹⁴ Baleg a tulong so alimbawa nen Pablo. Sikatoy matalonggaring a managbangat, matatken, tan pastol. Kaukolan ton asikasoen iray kongregasyon a walaan na grabe iran problema, tan andi-takot ton ag-inkibot so pakapangiter na ambelat a konseho sano nakakaukolan itan. (2 Corinto 7:8-11) Say inengneng ed impanministro nen Pablo et ipatnag toy mataltalag ya impamaat to​—nagawa labat itan sano kapilitan odino matukoy. Diad onia et impanengneng toy maridios a kakabatan.

¹⁵ No say panagministro na sakey a matatken ed arap na kongregasyon et niyaliling ed pieza na musika, sirin say panamaat tan panagdisiplina so singa mansusulon nota ya ontukoy ed intiron pieza. Satan a nota so marakep ed kawalaan to. (Lucas 17:3; 2 Timoteo 4:2) Isipen pa so sakey a kansion a mankarga lambengat na saksakey a nota, ya ulit-uliten itan. Makapasawan dengelen itan. Ontan met, sasalien na Kristianon mamatatken a kompletoen so panagbangat tan parakepen itan tekep na panduruma. Agda igegetar itan diad pangorehi ed saray problema. Imbes, say intiramintin tonada na satan et positibo. Singa si Jesu-Kristo, say nenengnengen ya unona na maaron mamatatken et say maong a nakomendaan da, aliwan say lingon nabalaw da. Aapresiaen day pamapasya na kapara ran Kristianos. Matalek ira a diad kaslakan et gagawaen na balang sakey so anggaay nayarian to a lingkoran si Jehova. Tan sibubulos iray mamatatken ya ibesngaw iratan a liknaan.​—Ikompara so 2 Tesalonica 3:4.

16. Antoy epekto na maapresia tan maambegyan awawey nen Pablo ed saray kapara ton Kristiano?

¹⁶ Agnasuppiat, ya alikas na maslak ed Kristianos a nanministroan nen Pablo so panangapresia tan pililikna to’d sikara. Panon tayon amta iya? Imanoen pay liknaan da nipaakar ed si Pablo. Ag-ira natatakot ed sikato, anggaman baleg so autoridad to. Andi, noagta sikatoy inad-aro tan mainomay dan naasinggeran. On, ta sanen inmalis ed sakey a lugar et sikato so ‘nilakap ed beklew [tan matamoy ya inangoban, NW]’ na saray mamatatken! (Gawa 20:17, 37) Agaylay pisalsalamat na mamatatken​—ontan tayo met ya amin​—a walaan tayoy alimbawa a singa si Pablo a nepeg ya aligen! On, komon ta manaapresiaan itayo.

Gawagawa na Maaron-Kaabigan

17. Antoray pigaran maong ya epekto na saray gawa na kaabigan ed loob na kongregasyon?

¹⁷ Sakey ed sankabiskegan ya isusunglor ed inaagin aro et say simplin gawa na kaabigan. Singa inkuan la nen Jesus, “lalo a mapalar so mangiter nen say mangawat.” (Gawa 20:35) Balanglan mangiter tayo diad paraan ya espiritual, materyal, odino ed panaon tan biskeg tayo, agtayo labat napaliket so arum noagta napaliket tayo met so inkasikatayo. Diad loob na kongregasyon et makaalis so kaabigan. Say sakey a gawan maabig so mamawala na mipadpara iran gawa met. Agla mabayag et say inaagin panamabli so ombulaslas!​—Lucas 6:38.

18. Anto so kabaliksan na “kaabigan” a nasasaglawi ed Miqueas 6:8?

¹⁸ Pinaseseg nen Jehova so baley ton Israel a mangipanengneng na kaabigan. Diad Miqueas 6:8, oniay nabasa tayo: “Impatnag to ed sika, O too, so maong. Et anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?” Antoy labay ya ibaga na ‘mangaro na kaabigay linawa’? Say Hebreon salitan inusar dia parad “kaabigan” (cheʹsedh) so nipapatalos met ed Ingles bilang mercy (panangasi). Unong ed The Soncino Books of the Bible, sayan salita et “mankabaliksan na bengatlan lalon aktibo nen say napanuliranan ya Ingles a salitan panangasi. Say labay ton ibaga et ‘panangasin nipatalos ed saray gawa,’ say personal iran gawa na maaron-kaabigan, aliwa lambengat ed saray duruka tan mankakaukolan, noagta ed amin a kaparan too.” Kanian say kuan na sakey ya iskolar nipaakar ed cheʹsedh et kabaliksan toy “aron nipatalos ed kiwas.”

19. (a) Diad antoran dalan a mabulos tayo lan iyuna so pangipanengneng na kaabigan ed arum diad loob na kongregasyon? (b) Mangiter na alimbawa no panon a nipapanengneng ed sika so inaagin aro.

¹⁹ Say inaagin aro tayo et aliwan diad teorya, odino napanuliranan labat. Satan so sankanengneng ya inkapeteg. Kanian, anapen iray dalan a pakapanggaway maabig ed agagi yo. Magmaliw a singa si Jesus, ya aglawas impaasinggeran ed totoo pian patulongan noagta mabetbet a sikatoy unoona lan onasingger ed sikara. (Lucas 7:12-16) Isipen pan nagkalalo la iramay talagan mankakaukolan. Kasin wala so maedad la odino mansasakit a nakaukolan a nabisita odino anganko et pigaran tulong manlapud saray ibabaki? Kasin say ‘ulilan ugaw’ et mankakaukolan na panaon tan atension? Kasin say walaay depresyon a kamarerwa et mankakaukolan na italineng odino pigaran makatambayon salita? No sarag tayo, mangipanaon tayo parad saratan a gawan kaabigan. (Job 29:12; 1 Tesalonica 5:14; Santiago 1:27) Agbalot lilingwanan a say kongregasyon et tugyop na ag-ayadyarin totoo, sakey ed sanka-importantian a gawa na kaabigan et say panamerdona​—mabulos a paandien so sakit na linawa, anggano wala so katunongan a manreklamo. (Colosas 3:13) Say mabulos a pamerdona so sakey a tulong ed pamasiansia’d kongregasyon a bulos manlapud kaapag-apag, imbelan, tan balingaan, ya aliling na saratan et ambasan ules, a manebseb ed apuy na inaagin aro.

20. Panon tayon amin a mantultuloy ya usisaen so inkasikatayo?

²⁰ Komon ta amin tayo so determinadon mamasiansia ed sayan makanan apuy na aro a mandarlang ed kapusoan tayo. Itultuloy tayon usisaey inkasikatayo. Kasin ipapanengneng tayo so pililikna ed arum? Kasin aapresiaen tayoray arum? Kasin manggagawa tayoy kaabigan ed arum? Anggad gagawaen tayo itan, say apuy na aro so mamapetang ed impanaagi tayo anggan panon lay kabetel tan agpakalikna na sayan mundo. Diad amin a paraan, sirin, “mantultuloy ed inaagin aro”​—natan tan diad andi-anggan!​—Hebreos 13:1.

[Paimano ed leksab]

Anto so Padesir Yo?

◻ Anto so inaagin aro, tan akin a pantultuloyen tayo itan?

◻ Panon a say pakawalaan na pililikna et ontulong ed pakamantini tayo na inaagin aro?

◻ Anto so betang na apresasyon ed inaagin aro?

◻ Panon a saray gawa na kaabigan et panlapuan na ibulaslas na inaagin aro ed loob na Kristianon kongregasyon?

[Kahon ed pahina 16]

Aron Onkikiwas

Pigaran taon lay apalabas, sakey a lakin abayag lan iyaaralan na Biblia a kaibay Tastasi nen Jehova so siansia nin manduaruwa ed inaagin aro. Amta ton inkuan nen Jesus: “Lapu ed saya amin a too nabidbiran da’ya sikayoray babangatan ko, no wala so aro yo ed sakey tan sakey.” (Juan 13:35) Balet ta mairap ton napanisiaan itan. Sakey ya agew et anengneng toy onkikiwas a Kristianon aro.

Anggaman aka-wheelchair, sikatoy nambaroy ya arawi’d panaayaman to. Diad Betlehem, Israel et inatendian toy miting na kongregasyon. Diman et sakey a Tasin Arabo so amilit ed sakey nin turistan Tasi ya onugip ed abung to pati sayan iyaaralan na Biblia. Sakbay ya ondukol, ipapatanir na iyaaralan ed akan-abung ya onla’d balkon diad kaimbuasan pian bantayay ibutay na agew. Mapekder so akan-abung ya angibagan agto gagawaen itan. Kaimbuasan insalaysay na sayan agin Arabo no akin. Diad panamegley na manangipatalos, inkuanto a no naamtaan na kakaabay to a walaray bisita ton Judio​—a singa kipapasen met na sayan estudyante na Biblia​—poolan day abung to pati sikato tan say pamilya to ed loob. Nawewetwet, sikatoy tinepetan na iyaaralan ed Biblia, “Akin, balet ya inalam itan a kapeligroan?” Anggapoy tulong na managpatalos, say agin Arabo so diretson ninengneng to’d mata tan basta inkuanton, “Juan 13:35.”

Asagyat a tuloy so estudyante na Biblia ed inkapeteg na inaagin aro. Ag-abayag kayarin tuloy na satan et sikatoy nampabautsimo.

[Litrato ed pahina 18]

Say makaaro tan maapresian inkatoo nen Pablo so nanggawa ed sikaton mainomay ya asinggeran