Kapitulo Dose

Say Kabaliksan na Bautismom

1. Akin a say bautismo ed danum so paninteresan na balang sakey ed sikatayo?

NEN taon 29 K.P., si Jesus so abautismoan sanen impalgep nen Juan a Managbautismo ed Ilog na Jordan. Si Jehova a mismo so mangiimaton tan imbalikas to so panangabobon to. (Mateo 3:16, 17) Sirin inletneg nen Jesus so pangaligan a tumboken na amin a babangatan to. Talora tan kapalduan taon ed saginonor, binilin nen Jesus iray babangatan to: “Amin a pakauley niiter ed siak ed tawen tan dia ed dalin. Onla kayo sirin, tan manggawa kayo na babangatan ed amin a nasyones, a binyagan yo ra ed ngara’y Ama, tan say Anak, tan say espiritu santo.” (Mateo 28:18, 19) Kasin abautismoan ka la unong ed ingganggan nen Jesus? No andi ni, kasin manpaparaan ka lan manpabautismo?

2. Mitukoyan ed bautismo, antoran tepet so kaukolan a naebatan?

² Balanglan abautismoan ka la odino manpaparaan ka lan manpabautismo, say malinew a pakatalos ed bautismo so importante ed siopaman a malabay a manlingkor ed si Jehova pian manbilay ed matunong a balon mundo to. Saray tepet a mankanepegan na ebaebat so mangilaktip ed saraya: Kasin say Kristianon bautismo natan so walaan na parehon kabaliksan a singa ed bautismo nen Jesus? Antoy kabaliksan na pakabautismoan ed “ngara’y Ama, tan say Anak, tan say espiritu santo”? Antoy nasasaglawi ed pambilay a tukoy ed kabaliksan na Kristianon bautismo ed danum?

Saray Bautismon Ginawa nen Juan

3. Para ed siopa labat so bautismo nen Juan?

³ Ngalngalin anem bulan sakbay na inkabautismoan nen Jesus, nampulong si Juan a Managbautismo ed kalawakan na Judea, a kuanto: “Manpataoli kayo; ta say panarian na tawen asingger la.” (Mateo 3:1, 2) Nadngel na totoo so imbaga nen Juan tan impapuso ra itan. Maparungtal dan impatua iray kasalanan da, nagbabawi ira, insan linma ra ed si Juan pian pabautismoan ed Ilog Jordan. Saman a bautismo so para ed saray Judio labat.​—Lucas 1:13-16; Gawa 13:23, 24.

4. Akin a kakkaukolan a magbabawi iray Judios nen inmunan siglo?

⁴ Kakkaukolan na saraman a Judio so panagbabawi. Diad Palandey Sinai ed samay taon 1513 K.K.P., saray atateng da so linmoob ed sankanasyonan a sipanan​—pormal, masimoon a pipapaknaan—​ed si Jehova a Dios. Balet lapud graben kasalanan da, agda sinumpal iray responsabilidad da ed silong na satan a sipanan, kanian sikara so akondena ed satan. Mapeligro so kipapasen da ed agew nen Jesus. Asingsingger la so “baleg tan makapataktakot ya agew nen Jehova” ya impasakbay nen Malaquias. Nen 70 K.P., saman ya “agew” so sinmabi sanen dineral na Romanon armada so Jerusalem, say templo to, tan masulok a sakey milyon a Judio. Si Juan a Managbautismo, a maseseg ed tuan panagdayew, so nibaki sakbay na satan a kadederal, “pian itadiaan to so Katawan na sakey a baley a maralato.” Kaukolan dan pagbabawian iray kasalanan da a sumpad Mosaikon Ganggan a sipanan tan iparaan a mangawat ed Anak na Dios, si Jesus, ya imbaki nen Jehova ed sikara.​—Malaquias 4:4-6; Lucas 1:17; Gawa 19:4.

5. (a) Sanen linman pabautismoan si Jesus, akin a sinuppiat itan nen Juan? (b) Anto so insimbolo na bautismo nen Jesus?

⁵ Si Jesus a mismo so sakey ed saramay inmasingger ed si Juan pian pabautismoan. Balet akin? Lapud amta ton si Jesus so andian na saray kasalanan a kaukolan ya ipatua, inkuan nen Juan: “Siak so mankaukolan a pabinyagan ed sika, et onla ka dia ed siak?” Balet say bautismo nen Jesus so mangisimbolo na duman bengatla. Kanian inmebat si Jesus: “Abobonan mo’ya natan: ta ontan so manepeg ed sikata a pananumpal na amin a kaptekan.” (Mateo 3:13-15) Lapud anggapoy kasalanan nen Jesus, say bautismo to so ag-angisimbolo na panagbabawi ed kasalanan; nisay kaukolan ton idedika so inkasikato ed Dios, lapud sikato so membro na nasyon a dedikado la ed si Jehova. Imbes, say bautismo to ed edad a 30 años so nikadkaduma ed sikato, tan insimbolo na satan so panangipresenta to ed inkasikato ed mangatatawen ya Ama to pian gawaen so kaaruman nin linawa To.

6. Panoy inkaseryoso nen Jesus ed panggawa na linaway Dios?

⁶ Saglawien na say linawa na Dios ed si Kristo Jesus so kimey nipaakar ed Panarian. (Lucas 8:1) Sinaglawi met na satan so pangibagat to ed ayadyarin atooan a bilay to bilang sakey a dondon tan bilang letnegan parad balon sipanan. (Mateo 20:28; 26:26-28; Hebreos 10:5-10) Seneryoson maong nen Jesus so insimbolo na bautismo to ed danum. Agto inabuloyan a nisuawi so imano to ed arum a bengatla. Anggad sampot na mangaraldalin a bilay to, matoor ton sinumpal so linawa na Dios, a pinagmaliw ton manunan kimey to so panangipulong ed Panarian na Dios.​—Juan 4:34.

Bautismo ed Danum na Saray Kristianon Babangatan

7. Nanlapula’d Pentecostes 33 K.P., anto so nibaga ed saray Kristiano a gawaen da nipaakar ed bautismo?

⁷ Saray inmunan babangatan nen Jesus so binautismoan nen Juan ed danum insan impaarap to ra ed si Jesus bilang prospektibon membro na Panarian ed tawen. (Juan 3:25-30) Diad panangiwanwan nen Jesus, sarayan babangatan so amautismo met, a walaan na parehon kabaliksan ed panagbautismo nen Juan. (Juan 4:1, 2) Anggaman ontan, nanlapula’d Pentecostes 33 K.P., ginapoan dan sumpalen so kimey a manbautismo “ed ngara’y Ama, tan say Anak, tan say espiritu santo.” (Mateo 28:19) Naromog mon makagunggonan tuloy so panrepaso ed kabaliksan na satan.

8. Antoy kabaliksan na pakabautismoan “ed ngara’y Ama”?

⁸ Antoy kabaliksan na pakabautismoan “ed ngara’y Ama”? Mankabaliksan itan na pangawat ed ngaran, inkabetang, autoridad, gagala, tan saray ganggan to. Imanoen so lalanoren na saya. (1) Nipaakar ed ngaran to, oniay ibabaga na Salmo 83:18: “Sika, a say ngaran mo a bukbukor et Jehova, sankatageyan ka a manuna nen say amin a dalin.” (2) Nipaakar ed inkabetang to, kuan na 2 Arari 19:15: ‘O Jehova, sika a bukbukor so [tuan] Dios.’ (3) Diad autoridad to, ibabaga ed sikatayo na Apocalipsis 4:11, unong ed New World Translation: “Sika so manepeg, Jehova, a Dios mi, a mangawat na gloria tan say galang tan say pakayari, lapud pinalsam so amin a bengatla, tan lapud linawam sikara so niwala tan apalsa ira.” (4) Nepeg met a bidbiren tayon si Jehova so Manangiter-Bilay, a gagala ton nisalba itayo manlapud kasalanan tan patey: “Say panangilaban betang nen Jehova.” (Salmo 3:8; 36:9) (5) Kaukolan tayon awaten a si Jehova so Supremon Manangiter-Ganggan: “Si Jehova sikato so ukom tayo, si Jehova sikato so mangiiter na tunong ed sikatayo, si Jehova sikato so ari tayo.” (Isaias 33:22) Lapud bebembenan ton amin iratan ya inkabetang, sikatayo so napaseseg: “Nepeg mon aroen si Jehova a Dios mo ed interon pusom tan ed interon kamarerwam tan ed interon nonot mo.”​—Mateo 22:37, NW.

9. Antoy kabaliksan na pakabautismoan “ed ngara’y . . . Anak”?

⁹ Antoy kabaliksan na pakabautismoan “ed ngara’y . . . Anak”? Kabaliksan to so pamidbir ed ngaran, inkabetang, tan autoridad nen Jesu-Kristo. Say ngaran ton Jesus et mankabaliksan na “Si Jehova So Manangilaban.” Naawat toy inkabetang to manlapud katuaan a sikato so bogbogtong ya Anak na Dios, say inmuna ed palsa na Dios. (Mateo 16:16; Colosas 1:15, 16) Oniay ibabaga ed sikatayo na Juan 3:16 nipaakar ed sayan Anak: “Ontan lay impangaro na Dios ed mundo [na dorondonen a katooan], ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” Lapud inatey a matoor si Jesus, sikato so pinaoli na Dios manlapud saray inaatey tan inikdan to na kaaruman ya autoridad. Unong ed si apostol Pablo, say Dios so “angitandoro [ed si Jesus] ed atagtagey a posisyon” ed talba, a komadua labat ed si Jehova. Satan no akin a “diad ngaran a Jesus et nepeg ya ontalimukor so amin a pueg . . . tan amin a dila so nepeg a parungtalan dan bidbiren a si Jesu-Kristo so Katawan diad kigloriaan na Dios ya Ama.” (Filipos 2:9-11, NW) Mankabaliksan iya na itulok ed saray ganggan nen Jesus, a manlalapud si Jehova a mismo.​—Juan 15:10.

10. Antoy kabaliksan na pakabautismoan “ed ngara’y . . . espiritu santo”?

¹⁰ Antoy kabaliksan na pakabautismoan “ed ngara’y . . . espiritu santo”? Mankabaliksan itan na panamidbir ed betang tan kimey na masanton espiritu. Tan anto so masanton espiritu? Satan so aktibon puersa nen Jehova, a diad satan et susumpalen toray gagala to. Imbaga nen Jesus ed saray patumbok to: “Mikasi ak ed Ama, et ikdan to kayo na sananey a managligliwa, pian manayam ed sikayo lawas, say espiritu na katuaan.” (Juan 14:16, 17) Anto so nayarian dan gawaen lapud satan? Inyarum nin imbaga nen Jesus ed sikara: “Mangawat kayo na pakayari, no onsabi ed sikayo so espiritu santo: et sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Diad panamegley na masanton espiritu, impuyan met nen Jehova so impansulat ed Biblia: “Anggapo so propesiya a nanlapu ed linawa na too, noag saray totoo nansalita ra a nanlapu ed Dios, diad impanenyeg ed sikara na espiritu santo.” (2 Pedro 1:21) Bidbiren tayo sirin so betang na masanton espiritu sano aralen tayo so Biblia. Say sananey nin paraan a pamidbir tayo ed masanton espiritu et diad ikerew ed si Jehova a tulongan to itayon mamawala “na bunga na espiritu,” salanti say “aro, liket, deen, kasungdoan, kauyamoan, kaabigan, sisia, tayadno, dangka.”​—Galacia 5:22, 23.

11. (a) Anto so tuan kabaliksan na bautismo natan? (b) Panon a say bautismo so singa ipatey tan ibilay?

¹¹ Saray inmunan abautismoan a mitukoyan ed saray bilin nen Jesus et saray Judio tan saray Judion proselita, a ginmapo nen 33 K.P. Kayarin tuloy na saya, say pribilehyo ed pagmaliw a Kristianon babangatan so ninatnat ed saray Samaritano. Insan, nen 36 K.P., say tawag so linmaknab ya angisakup ed saray ag-agalsiman a Gentil. Sakbay a nabautismoan, saray Samaritano tan Gentiles so kaukolan a manggawa na personal a dedikasyon ed si Jehova pian manlingkor ed sikato bilang babangatan na Anak to. Saya so nantultuloy a kabaliksan na Kristianon bautismo ed danum ya anggad natan. Say sigpot a kipalgep ed danum so matukoy a simbolo na sayan personal a dedikasyon, lapud say bautismo so simbolo na kiponpon. Say kipalseb mo ed danum a pampabautismoan et mangirerepresenta na ipatey mo ed datin kurang na bilay mo. Say iyimwas mo ed danum so mangisisimbolo ed impagmaliw mon mabilay a manggawa ed linawa na Dios. Sayan “sakey a binyag [“bautismo,” NW]” so onaplika ed amin a magmaliw a tuan Kristiano. Diad bautismo et magmaliw iran Kristianon Tastasi nen Jehova, ordinadon ministros na Dios.​—Efeso 4:5, NW; 2 Corinto 6:3, 4.

12. Anto so kapetekan na Kristianon bautismo ed danum, tan panon?

¹² Say ontan a bautismo so walaan na baleg a manangisalban kablian ed imaton na Dios. Singa bilang, kayari na impanalambit to ed impanggawa nen Noe ed biong, ya inkilabanan to tan say pamilya to ed Delap, insulat nen apostol Pedro: “Samay kapetekan na saya so mangilaban met natan ed sikayo, salanti, bautismo, (aliwan diad pangekal ed dutak na laman, noagta pankerew ed Dios na maong a konsiensia,) diad panamegley na inkioli nen Jesu-Kristo.” (1 Pedro 3:21, NW) Say biong so mapatnag ya ebidensyan si Noe so sitotoor ya anumpal ed kimey ya impabtang na Dios. Kayari na impanggawa ed biong, “say mundo nen saman, dia ed inkayanep to [et] atawtaw na danum.” (2 Pedro 3:6) Balet si Noe tan say pamilya to, so “nilaban ed danum, salanti, walora a katao.”​—1 Pedro 3:20.

13. Manlapud anto so kilabanan na sakey a Kristiano diad bautismo ed danum?

¹³ Natan, saramay mangidedika na inkasikara ed si Jehova diad letnegan na pananisia ed apaolin Kristo so nabautismoan bilang simbolo na satan a dedikasyon. Gapoan dan gawaen so linawa na Dios ed panaon tayo tan nilaban ira manlapud peles a mundon marelmeng. (Galacia 1:3, 4) Agla ra mamaarap ed kadederal a kaiba na peles a marelmeng a sistema na bengabengatla. Sikara so nilaban ed sayan kadederal tan inikdan ira na Dios na maong a konsiensia. Papaseguroan nen apostol Juan iray lingkor na Dios: “Say mundo mangangga, tan saray penel to: sabalet so mangunor ed linawa na Dios onsiansia lawas.​—1 Juan 2:17.

Panumpal ed Saray Responsabilidad Tayo

14. Akin a say bautismo labat so agmangigarantiya na kilalaban?

¹⁴ Lingo so pangibagan say bautismo so mangigarantiya la na kilalaban. Walaan labat itan na kablian no say sakey a too et peteg ya indedika to lay inkasikato ed si Jehova diad panamegley nen Jesu-Kristo tan kayari na satan et itultuloy ton gawaen so linawa na Dios, a manmatoor ya anggad kasampotan. “Say misungdo ya anggad kasampotan, sikato lanlamang so nilaban.”​—Mateo 24:13.

15. (a) Anto so linawa na Dios natan ed saray bautismadon Kristiano? (b) Panon kaimportante ed bilay tayo so pagmaliw a Kristianon babangatan?

¹⁵ Say linawa na Dios ed si Jesus so angilaktip ed no panon ton inusar so bilay to bilang too. Nisaklang so bilay to diad patey bilang bagat. Diad kipapasen tayo, saray laman tayo so nepeg ya ipresenta ed Dios, tan itultuloy tayo so bilay a walaan na dilin-panangisakripisyo diad panggawa ed linawa na Dios. (Roma 12:1, 2) Peteg ya agtayo gagawaen so linawa na Dios no sagpaminsan et gagalaen tayo so onkiwas a singa say mundo odino isentro tayoray bilay tayo ed sinisiblet a gegemtan, a paspasaray labat so serbisyo tayo ed Dios. (1 Pedro 4:1-3; 1 Juan 2:15, 16) Sanen intepet na sakey a Judio no anto so nepeg ton gawaen ta pian nagamoran to so bilay ya andi-anggaan, binidbir nen Jesus so kaimportantian na pambilay a malinis ed moral. Balet impabitar to so bengatlan lalon importante: say pankaukolan ed pagmaliw a Kristianon babangatan, sakey a patumbok nen Jesus. Nepeg a satan so manunaan a bengatla ed bilay. Kaukolan a satan et ag-onsesegundaryo ed saray materyal a gegemtan.​—Mateo 19:16-21.

16. (a) Antoy responsabilidad na amin a Kristiano nipaakar ed Panarian? (b) Unong a niyilustra ed pahina 116 tan 117, anto so pigaran epektibon paraan a nagawaan so kimey na Panarian? (c) Say interon-puson pibibiang tayo ed kimey na panagpulong so mangiter na anton ebidensya?

¹⁶ Nepeg ya idanet lamet a say linawa na Dios parad si Jesus so angilaktip ed importantin kimey a nipaakar ed Panarian na Dios. Si Jesus a mismo so alanaan a magmaliw ya Ari. Balet legan a wadia ed dalin, sikato so maseseg ya angipulong ed Panarian. Walaan itayo na miparan kimey na panagpulong, tan walaan itayo na rason diad pibiang ya interon-puso ed satan. Diad panggawa na ontan, ipapanengneng tayo so apresasyon ed inkasoberano nen Jehova ontan met ed aro tayo ed kaparan totoo. (Mateo 22:36-40) Ipapanengneng tayo met a sikatayo so nikasakey ed saray kaparan managdayew ed sankamundoan, ya amin da so manangiyabawag ed Panarian. Diad sankagloboan a pankakasakey, sikatayo so ontutundas ed kalat ya andi-anggaan a bilay diad mangaraldalin ya uuleyan na satan a Panarian.

Repason Pantongtongan

• Antoray pamparaan tan antoray pandumaan na bautismo nen Jesus tan say bautismo ed danum natan?

• Antoy kabaliksan na pakabautismoan “ed ngara’y Ama, tan say Anak, tan say espiritu santo”?

• Antoy nasasaglawi diad panumpal ed saray responsabilidad nipaakar ed Kristianon bautismo ed danum?

[Saray litrato ed pahina 116, 117]

PIGARAN PARAAN DIAD PANANGIYABAWAG ED PANARIAN

Diad kabkaabungan

Diad kakanayon

Diad saray katrabahoan

Diad saray kaeskuela

Diad saray karsada

Diad panamegley na ipawil ed saray interesado

Diad saray panangiyaral na Biblia ed abung