1 Pedro 5:6, 7—“Manpaabeba Kayo Sirin Diad Silong na Mabiskeg a Lima na Dios, . . . Ipaawit Yod Sikato so Amin a Kapagaan Yo”

“Manpaabeba kayo sirin diad silong na mabiskeg a lima na Dios, pian iyatagey to kayo ed manepeg a panaon, tan ipaawit yod sikato so amin a kapagaan yo, lapud iyaansakit to kayo.”—1 Pedro 5:6, 7, Balon Mundo a Patalos.

“Mangabeba kayo sirin ed silong na makapanyarin limay Dios, pian itandoro to kayo ed kanepegan a panaon; Imatalek yo ya amin ed sikato so kapagaan yo; ta sikato asikasoen to kayo.”—1 Pedro 5:6, 7, Say Biblia.

Say labay ya ibaga na 1 Pedro 5:6, 7

Diad sarayan salita, impaseguro nen apostol Pedro ya sarasarag na saray Kristiano ya ipikasi ed Dios so amin ya problema tan kapagaan da. Papablien na Dios iray mapaabeba tan talagan bendisyonan to ra.

“Manpaabeba kayo . . . diad silong na mabiskeg a lima na Dios.” Diad Biblia, say lima na Dios et maslak ya ontutukoy ed pakayari ton mangiliktar tan manprotekta. (Exodo 3:19; Deuteronomio 26:8; Esdras 8:22) No mantitiwala iray Kristiano ed mabiskeg a lima na Dios, ipapanengneng da ya manpapaabeba ira. Amta ran walay limitasyon da tan bibidbiren dan agda nasarag iray problema da no diad sarili da labat. (Proverbio 3:5, 6; Filipos 4:13) Matalek ira ya sarasarag iran tulongan na Dios diad dugan panaon tan diad sankaabigan ya paraan.—Isaias 41:10.

“Pian iyatagey to kayo ed manepeg a panaon.” Seguradon bendisyonan na Dios iramay maan-anos dan susungdoan iray problema ra. Agto abuloyan ya legay bilay ya nasubok iray mandadayew ed sikato tan nipaarap irad problema ya agda nayarian. (1 Corinto 10:13) Imbes, no tuloytuloy dan gawaen so duga, seguradon bendisyonan ira na Dios “diad manepeg a panaon.”—Galacia 6:9.

“Tan ipaawit yod sikato so amin a kapagaan yo, lapud iyaansakit to kayo.” Sarag na saray Kristiano ya ipaawit ed Dios so amin ya kapagaan da diad mapaabeba dan pampikasi ed sikato. Oniay imbaga na sakey ya reperensya: “Say verb ya ipaawit et ontutukoy ed pansagpot ya pangibantak na sakey a bengatla ed arawi. Tan ginagala itan ya gawaen.” No impaawit la na sakey ya Kristiano so kapagaan to ed Dios, nabawasan lay panaaburido to tan nalikna to may ibabaga na Biblia ya “kareenan na Dios.” (Filipos 4:6, 7) Makaseguro ya tulongan na Dios ta amta ton sikatoy iyaansakit na Dios, tan sarag na Dios ya usaren so pakapanyari To parad lingkor to.—Salmo 37:5; 55:22.

Konteksto na 1 Pedro 5:6, 7

Anampot ed kapitulo 5 so unaan ya sulat nen apostol Pedro ed saray Kristiano. (1 Pedro 1:1) Saray papatumbok na Kristo nensaman, ya singa met natan, et akaeksperiensya na saray problema ya anubok ed pananisia ra tan lapud satan et mapagpaga ra. (1 Pedro 1:6, 7) Amta nen Pedro ya mairap so dadalanen da kanian nanggawa na makapaligliwa tan makapaseseg ya sulat nen manga 62-64 C.E.—1 Pedro 5:12.

Sinampotan nen Pedro so sulat to panamegley na makapaseseg ya panonot parad saramay makakaeksperiensya na subok lapud pananisia ra. No mansiansia ran mapaabeba tan mantiwala ed Dios, makaseguro ran tulongan ira na Dios pian makapansiansian iran mapekder. (1 Pedro 5:5-10) Makapaseseg met irayan imbaga nen Pedro ed saray Kristiano ya napapasegsegang natan.

Bantayan iyan antikey ya video pian nawalaan kay ideya ed libro na 1 Pedro.